Tsap na shara ganang ta

2010 ning hta Myen Mungdan ting madang hku ra lata poi kaba galaw na matu 2008 ning hta galaw lai mat wa sai ra lata poi kaw na daw dan la lu sai hte Myen Asuya ni mung dai ra lata poi a matu shajin ai lam ni law law galaw nga ai gaw nang ngai a myi n pu kaw sha bin nga sai hku re. Ndai lam hpe kaja ai, n kaja ai nga tsun jahta hkat nga ai hpe mung na lu, chye lu na masai.

2009 ning a 48 ning hpring rawt malan poi kaba galaw nga ai ten kaw nna Maija Yang mare kaw mang hkang bin ai hte Myen, Miwa hte Jinghpaw Wunpawng Mungdan Shanglawt Asuya KIO/A ni ganoi noi galaw, lata shalai hkat lai wa sai re. Ndai lam ni rai n hpang shi ai ten kaw na, Miwa Asuya gaw Laiza Muk Lum lamu ga jarit hta Mini Great Wall gap nga ai hpe mung mu lu sai. Myen Asuya ni KIO/A a dap ba (4) gin ra rai nga ai lahta Sam Mung kaw na shanglawt hpyen dap ni hpe dawm la kau na matu tsun shadut wa ai ni hpe mung na lu ga sai. Shanglawt KIO/A hte Jinghpaw Myusha ni lapran myit shuk na matu Simsa lam la gasadi ni hpe mung masu shabra ai lam ni hpe Myen Asuya ni galaw ai lam mung na lu sai. Jinghpaw Wunpawng Mungdaw kata e nga ai Myen Hpyen dap ni n gun shaja nga ai hte Shanglawt KIO/A kaw na mung hpyen n gun shaja nga ai hpe na lu sai.

2010 ning ra lata poi hta shang lawm na matu masing kaji mi mung n nga ai nga nna 48 ning hpring rawt malan poi kaba kaw na tsun lai wa sai hte, hpyen masa lam hta galoi mung jin jin rai nga na matu mung tsun laiw a sai re. Ndai lam ni hpe na lu, chye lu ai hte maram yu yang Shanglawt KIO/A hte Myen Asuya lapran hta manghkang ni, lani hte lani grau grau kaba wa ai hpe mu maram lu ai hku re. Nang shaja ai majaw ngai shaja ai, nang sha nya ai majaw ngai sha nya ai, nang sat ai majaw ngai sat ai nga nna galaw hkat nga ai hpe mung na lu chye lu ai majaw yawng sadi maja nga ai hpe mung mu lu ai. Myen Asuya wa kade n gun shaja da ai hte KIO/A wa kade n gun shaja da ai hpe chyawm gaw kadai mung n chye maram na re ngu kam ai. Rai tim 48 ning hpring rawt malan poi kaba hta tsun lai wa ai ga ni hta Myen wa a 2010 ning ra lata poi hpe n hkap la ai lam ni mung lawm nga ai majaw Myen Asuya hku nna lama ma galaw nga na re ngu mung kam ai hku re.

2009 ning hta ndai zawn mung masa lam ni bai kahtet wa ai ten hta, moi mung bin lai wa sai hte maren htawm hpang de mung bai bin na re ngu kam ta ai majan kaw an-hte Jinghpaw Wunpawng buga de du shang wa sana kun? Ndai zawn majan kaba bai bin wa ai rai yang nang ngai gara shara kaw tsap ra na rai kun? Ndai ga san ni hpe ya ten an-hte ni ti nang hkum ti nang san ra ai ten du wa sai ngu ngai myit shadu ai hku re. "Moi nye wa ga shanglawt hpyen la la nna myu hte mungdan a matu a sak hpe pyi ap kau sai", "Moi nye nu gaw shanglawt hpyen la ni hpe n gun gun jaw lai wa sai", "Moi ngai gaw Myen hprawng grai hprawng kau sai", "Moi an-hte hting gaw ni majan a majaw Maigan mungdan de htawt ra ai kaw du hkra jam jau kau sai", Moi... Moi... Moi... Moi... nga ai ga ni hpe ngai na lai wa ai gaw 15 ning pyi hpring lai wa sai hku re. Ndai zawn re ai mabin ni hpe na yang an-hte myu sha ni ti nang amyu a matu n ap nawng ai masha grai taw a hka ngu mu mada ai hku re. Hkung ga mung grai hkung ga ai hku re.

1994 ning hta simsa lam la ngut ai kaw na dai ni du hkra rai yang 15 ning hpring sai hku re. An-hte ni majan bai bin yang gara maga tsap na hpe grai myit yak ai shara kaw tsap nga sai hku re. Simsa lam la ngut ai hpang an-hte ni ndai simsa lam hta pyaw mat ai masha ni grai law nga masai majaw mung re. Majan hpe grai pu ba yu sai ni hkrai rai nga ai. Ya na ramma ni n chye tim kanu kawa ni a prat hta gara hku bin wa sai lam ni hpe tsun dan ai majaw mung na yu na masai. Nang gara kaw tsap na kun? Myen wa a mayam mahtang tai na kun, hprawng na kun, shing n rai Shanglawt hpyen la nang lu tai na kun, ? Grai myit yak nga na re ngu mung kam ai hku re. Majan kasat ai a majaw moi nga ai shanglawt hpung kaba langai sha re ai kaw na NDAK hte KDA nga nna lahkawng ga garan mat ai hpe yawng chye na re. Ndai gaw shan hte ni Myu tsaw myi n rawng ai a majaw re ngu gaw n mai tsun nga ga ai. Simsa lam la dai ai a majaw ga garan mat ai hpung ni hpe mung chye lu na ga ai. Kadai galaw ai gaw jaw nga ai kun?

Myen wa a mayam tai ai gaw simsa lam mi la yang la mayam gaw mayam sha tai nga na ga ai. Hpa majaw nga yang Asuya a ga hpe kam shut nna Myen wa a n pu e nga lai wa ai gaw nang ngai rai n shangai shi ai kaw na rai nga sai. Mayam tai nga ai ten hta masha wa dip sha ai, shagari shanyem da hkrum ai lam ni gaw shing ra tara langai mi rai nga ai. Kadai wa mi rai yang rai ti nang a mayam rau gaw shat rau n kam sha ma ai. Masha ni na ra hkra kahpu kanau zawn re nga nga ga ai nga kade mi tsun yang tsun myit hta n rawng ai ga ni sha rai na re. Mayam ngu ai hpe gaw ti nang hpe galoi mung hkrit nga na matu jahkrit shama dip sha ra ai gaw marai shagu, amyu shagu chye na re. Ti nang n dip da yang shi bai gum lang wa na hpe hkrit ra ai a majaw rai nga ai. Dai re ai majaw mayam prat hpe gaw an-hte ni n mai lata nga ai. Nang ngai, dai ni hkam sha nga ai jam jau lam ni gaw mayam prat a jam jau lam ni rai nga ai. Nang ndai prat hpe ra a ni?

Dai ni na ten an-hte a mungdan galu kaba lam n nga ai, masha wa dip sha ai lam grai law ai, matsan ai lam amyu myu a majaw Maigan Mungdan in de kawm sa mat ra ai ni grai law nga ai hpe yawng chye nga na re. Maigan mungdan kaba ni gaw masha shada hkung ga hkat ai, rawt jat galu kaba lam ni hta mung grai lawan ai, simsa ai lam mung nga nga ai. Ga shadawn, dum nta nga shara kaw na hkawt an-hte buga hta madang tsaw ai ni gaw mungdan kaba ni a nyem dik htum she rai nga ai hpe mu lu na ga ai. Hpaji hparat lam ni hta mung Mungkan mungdan shagu hkap la ai hpaji ni hpe she sharin ya ma ai. Mung masha shim lam a matu mung grai sha chyim da ma ai. Rip kawp tara ni grai law ai hte grai simsa hkra galaw makawm maga da ma ai. Hkam ja lam ni a matu tsi jaw gawk ni hpe mung madan tsaw dik ai hku she galaw ma ai. Bungli galaw ai shaloi mung ti nang lu sha nga shabrai hta jan hkra jaw ma ai. Ti nang galaw ai daram bai lu la ai hkrai rai nga ai. Rai tim nang dum n-ta kaw nga ai zawn nga gaw hkam sha nga ai kun? Nye buga ngu nang tsun lu na kun? Nang kaja wa pyaw nga sai kun?

Asak hpe ap nawng let myu hte mungdan a matu shat kan hpe git nna gasat na ngu ai gaw tsun yang sha grai loi nga ai. Rai tim ta tut galaw nga ai ni a jam jau lam ni hpe yu yan gaw nang ngai pyi n myit da ai baw jam jau lam ni pru wa na hku re. Kade jam jau ai hpe moi... moi... nga tsun dan ai share shagan ni a ga hpe madat yang chye na re. Na yang gun grai lu ai zawn myu tsaw myit mung grai rawt wa ai rai tim jam jau na lam, ti nang tawn kau ra na a hkaw a hkang ni hpe myit dat yang gaw hkrit na zawn re ai hkra rai nga ai. Majan pa hta sinat pala lapran hta si du hte majan bu nga ai zawn galoi si na n chye ai sha shakut nga ra na ngu ai bungli, nang kade shakut tim nang bai lu la na shabrai gaw pandung n du shi yang n nga ai hku re. Ndai zawn a rang kaba la ai bungli hpe galaw ai gaw kadai mung n kam ai bungli ni hkrai rai nga ai. Rai tim ya ten hta dai a rang ni hpe bang na matu jin jin rai la nga ai myu tsaw hpyen la ni hpe yu yang ngai grai gaya ai hku re. A sak mung ngai hta grau kaji ai, hpaji mung ngai loi grau ai, n gun mung ngai grau ai, rai tim ngai shan hte daram manu n nga ai. Hpa majaw kun? Gara hku manu sharawt la ra ai baw kun?

1962 ning hta shangai wa nna ya du hkra asak 48 ning ting hpring sai an-hte a rawt malan prat gaw mahkrum madup grai law sai, majan mung grai gasat sai, masha mung sat sai, ti nang sha da mung sat hkat ga sai, awng dang ai lam mung lu ga sai, hkrat sum ai nam chyim mung chyim ga sai, sim sa ai lam mung la ga sai, rawt galu kaba lam mung shakut ga sai. Hpa hpe naw hkrit nga ra na rai ta?

(Ndai gaw Ta Tut a mung masa ning mu sha re.)

Posted in: Myi Jut