Dum n-ta Daw 4 (Gawng malai myit yu ya rit)

Company bungli ni hte kaja kyin kyin rai nga yang she nye a rung gawk na phone wa mi rawt ngoi wa nna gaw galaw nga ai bungli pyi she malap hkra bai rawt kajawng kau ai hku re. "Kadai wa mi ya ten bungli dai ram kyin nga yang me phone shaga a ta?" ngu myit let phone htai dat yang gaw nye a kanau wa mi jawng yu nna sa tau la na matu shi a lata jum phone (Handphone) hte shaga dat ai she rai nga a hka. Aww.. jawng pyi yu sai gaw i.

Ngai mung yawng gaw n chye sai rai tim ngai she dum dum ai gaw n dai rung gawk kaw nye a company bungli ni hkrai shakut nga ai hpe sha dum nga ai hku re. Nye a baw nu kata gum hpraw gara hku tam na nga ai hkrai she myit nga ai hte lai wa sai ten ni hpe gara hku mung n lu myit mat sani ai hku re. An-nau ni yawng 6 nga ai kaw na ya ngai hkrai sha dum n-ta ting a magam bungli ni hpe lit la nga ai hku re. Nu gaw n-ta hkrai sin ra mat nna ngai hpe garum na kadai mung n nga ai ga. Kanau ni yawng mung jawng lung nga ma ai. Ma Naw mahtang gaw moi na hte maren tsa chyu naw rai nna me nga nga ai. Wa Dim hpe mung shi ra ai gumhpraw jaw nna dum n-ta kaw na gawt shale kau ni ai. Ya gaw ngwi pyaw lam hkrai hkrai rai nga ai.

Dum n-ta hpe mung gram kau sai re ai majaw ya gaw prat dep wut dek n-ta she zen rai an-nau ni a dum n-ta wang gaw grai a rawng lu la nga ai. Dum n-ta a sut masa a matu gaw company langai hpaw da nna a rung a rai htaw shalai ai hte dut shabra ai lam ni hpe galaw nga ai hku re. Gara de sa tim maw daw rau, sha ai lu sha mung nam chyim nga la ai baw hkrai hkrai. Prat tup lu na n shadu da ai baw ngwi pyaw lam ni wa a kajawng sha dum n-ta de du shang wa ai majaw bin nga ai ma bin ni hpe tsun dan yang kadai mung n kam na re. Ngai mung n kam nga ai. Aww... ngwi pyaw ai ngu ai gaw n dai rai sam ai ngu myit nga ai hku re.

Ngai lai wa lai sa shagu hta e baw gum nna "Hkam kaja nga ai i lau ban wa?" nga nna hkap shaga shachyen ai ni mung grai law nga ai hte hkung ga la ra rai nga ai hpe hkam sha lu yang mung grai myit dik ai hku re. Jam jau ai prat hte ngwi pyaw ai prat gaw kade daram shai ai ngu ai hpe ngai ram kadai n chye na na re ngu pyi myit hta shadu kau sai hku re. Ndai lam ni yawng gaw ja gumhpraw a majaw galai shai mat ai ngu yang mung mai ai re. Gumhpraw, gumhpraw ngu ai gaw mungkan hta a hkyak nga a hka.

Ngai masha wa a npu e n nga ra ai a majaw nye a myit hta galoi mung grai myit simsa ai hte yup pyaw, sha mu rai nga ai hku re. Hpa sha ra tim masha wa hpe shangun dat sha re. Nye a company n pu e bungli galaw nga ai ni hpe yu nna shan hte ngai hpe hkung ga ai mu yang myit hta grai a rawng la dum ai hku re. Ngai rai sa, ngai nan rai sa. Ngai hpe kadai n gawn n san naw galoi gwi ai rai. Kadai wa me ngai hpe masha n sawn na rai. Kadai wa, kadai wa law. Ngai ra ai hku hkrai yawng rai ra na, ngai myit mang ai hku she shan hte hkawm sa ra na ngu ai "Ngai" ngu ai myit gaw grai nan nam chyim nga la ai hku re.

Bungli galaw ai ni lam ma shut hpyit ai lam galaw hkrup yang mung pawt dat, matsa dat rai, ngai shing di dat yang shan hte ngai hpe tawng ban wa ai ten hta n hkap la masu su nna lahka shayawm ya na law, bungli sha praw kau ya na law, hpa law, nya law nga nna jahkrit ai lam ni mung dum n-ta de du wa yang kanau ni hpe tsun dan nna manyi hpa bai bin n htawm garu gachyi nga grai myit pyaw ai hku re. Ngai galaw dat ai mabin ni a majaw nye a kanau ni manyi chyai hpa lu hkra lu galaw ai majaw myit dik la nga ai hku re.

Ndai zawn rai nga pyaw myit dik nga ai ten nye a baw nu kata de lama ni shang wa ai gaw, moi ngai mung nye a n pu na bungli galaw masha ni zawn bungli madu hpe hkrit ra ai ten ni na lam ni re. Ngai mung shan hte zawn grai hkrit lai wa sai hku re. Nye a bungli madu ngai hpe pawt ai ten, bungli shapraw kau na nga tsun ai ten, ndai ten ni hta dum n-ta e na gumhpraw shang lam langai sha rai nga ai nye a bungli sum mat yang dum n-ta kaw gara hku di na ngu ai myit ni hte grai hkrit let bungli madu hpe grai hpyi nyem lai wa sai hku re. Ya shan hte ngai hpe hkrit ai mung dai hte maren sha she n rai na dawng ngu myit nga ai hku re.

Nang mau mat na ngu ngai kam ai. Hpa majaw nga yang, yak hkak lam ni dai ram law la ai an-nau ni a dum n-ta wa a kajaung sha n dai zawn nga pyaw wa ai ngu ai gaw myit yak la nga ai. Ndai lam ni hpe ngai tsun lai wa sai hte maren ngai nan mung n kam la nga ai. Mahtai gaw jahpaw hking 5:30AM re ai majaw shawoi na hte maren yup rawt wa ai kaw chye ai hku re. Aww... ngai yup mang mang taw ai she rai a hka! Humm.... yup mang na ngai masha ni hpe chye myit ya ai zawn, ngai hpe up nga ai bungli madu ni mung chye myit yang gade sha hkrak na. Dai ni mung hka wa na matu rai n du shi ai shata na bungli la hka hpe shawng shaw la na matu naw pyi nyem tawng ban ra na re.

Yup ra kaw na rawt ra sana re, man naw myit la na jahpaw shat naw kyen sha na re ngu myit dat yang... "Dai hpawt sha na hpa mung n nga sai wa." ngu.

Posted in: Dumnta