Dum N-ta Daw 5 (Gara lam ta?)

"Chyet! ... chyet! .... chyet! ........"
Mungkan ting n sin e kaup nga ai hte n sen hte seng nna dai a ten hti jak (Clock) a n sen sha a ten man man ngoi nga ai hku re. Shani hkan e n sen kaji mi mung n na lu ai ndai a ten hti jak a n sen mung dai na she nye a na kata hta shi hkam bau langai mi hpe a ten man man dum sha ngoi bun ai zawn nga ngoi garu ai hte n lu yu ai lam hpe hkam sha nga ai hku re. Jahpaw jau jau rawt nna bungli naw galaw ra ai majaw shana jau jau yup yang she mai kaja ai rai tim a ten hti jak a n sen hpe mara shagun ra na zawn she nga hkra n lu yup hkraw nga ai hku re.

Kaja wa nga yang ngai hpe n lu yup hkra zing ri nga ai gaw dai n sen n re ai sha nye a baw nu kata kaw myit sum ru nga ai lam ni wa ngai hpe n yup hkra jasu nga ai majaw rai nga ai. Dai hpawt sha bungli madu kaw na du na shata ni a matu lahka hpe shata 3 na jau shaw la let wa ra ai hka ni yawng hpe wa kau sai a majaw myit ru ai lam loi yawm mat ai zawn zawn rai tim, du na shata masum tup lahka nlu, bungli ni hpe shakut ra na hpe gaw grai myit yu nga ai hku re. Ndai zawn sut masa mang hkang bin nga ai hta Nu mung lani hte lani grau grau she machyi sawng wa ai majaw mung rai nga ai. Shing gim masha ngu ai gaw galoi mung ra rawng ai lam gaw ding yang she rai nga a hka ngu bai myit lu ai. Ndai zawn dum n-ta hta yak hkak ai hpe chye na ya nga ai, kanau ma lu hpe bau maka ya nga ai, n nga mat sai Wa maga na jinghku dum n-ta kaw na ngai hpe la hka grau law ai bungli de shara madun mayu ai lam hpe dai ni sa tsun mat ai hku re.

Kalang ta na lu ai hte ngai shan hte hpe hpang na shata masum daram du hkra n dai bungli kaw na galaw ra ai majaw shata masum na yang she ngai bungli bai galai na matu mahtai jawt dat ai hku re. Mang hkang gaw, jinghku ni jaw na nga ai bungli gaw ndai shata hpang jahtum shaga ai ga re nga chye lu ai ga re. Jinghku ni tsun ai bungli gaw rung gawk kata galaw ai baw bungli rai nna, hpaji mung grai chye n ra ai. La hka sha brai mung ya ngai galaw nga ai bungli shaja hta htam mali, manga daram law jat ai majaw re. Ngai ya galaw nga ai bungli madu hpe shata masum tup hkra bungli hpe atsawm sha galaw na matu ga sadi jaw kau sai hte, ngai hka kap ai mang hkang the jam jau nga ai ten ngai hpe garum lai ai re majaw n dai zawn chyeju htang gaw n mai na re ngu mung myit lu ai hku re.

Ndai lam ni hpe ngai galaw nga ai bungli madu hpe tsun dan yang hpa ga mung n shaga ai sha zim nga nna, hpawt de she mahtai jaw na nga tsun let gayin mat ai hku re. Yawng chye ai hte maren nye a bungli madu gaw myit nau n galu ai masha rai nna yawng ma yawng hkrit gari ra ai wa mung rai nga ai. Shi ngai jam jau nga ai hte lahka jau htuk ya nna ngai hpe garum ai nga shiga a majaw bungli kata e nga ai bungli galaw masha ni yawng mau mat ai hte n dai zawn kalang mung n bin ga ai lam chye lu ai hku re. Rai tim dum n-ta a lam hpe chye na ya ai majaw bungli madu gaw ngai hpe garum dat ai re majaw ya jang ngai shi hpe ndai zawn chyeju htang yang gaw nye a lup sin hku ngai hkrai htu la ai hte bung nga ai nga nna nye a bungli galaw manang ni mung tsun jahta dan ma ai. Gumhpraw yak hkak ai a majaw bungli shaja ni hpe galaw nga ai rai tim ndai hta shabrai grau lu ai bungli kaja ni hpe gaw ngai mung tam nga ai hku re. Ya dai zawn re ai bungli hpe nye a shawng de la sa wa ya ai shaloi gaw n mai sha ai nam si hpe zawn yu ra nga ai gaw grai nan nga n pyaw ai majaw yup n lu nga ai.

Karai Kasang a "Hpyi mu, hpyi yang jaw na" nga ai ga sadi hpe hpung shara ni laban shani na nawku hta tsun ai hpe na yu ai majaw kyu mung hpyi kau sai hku re. Nu hpe tsun dan nna, nu mung nye a bungli a matu kyu hpyi ya nga ai. An-hte dum n-ta masha ni yawng a ngup hpe jahpring ya nga ai gaw nye a bungli rai nga ai. Ngai myit ru nga yang she a ten tup tsa chyu nang ai yang, Wa Dim hte Ma Naw, mung bungli kaja nga yang gaw bungli kaja de htawt ai baw re, sadi dung ai n dung ai n chye na ai nga nna sa grang bu taw ai majaw masin hta pawt mayu ai zawn zawn nga wa nna "NGAI GARA KAW MI BUNGLI GALAW YANG GALAW, NAN LAHKAWNG TSA MANU LU YANG RAI SAI N RE I TAW? ZIM RAI NNA LA SHA NGA MU. GA KAJI NAU HKUM SHANGAI!" ngu mung hta kau dat ai hku re. Shan pyi masha zawn n rai hkra tsa nang nga ai kaw ngai bai masin shalut dat ai majaw shana de tup mung galaw hkat kau sai majaw ya du hkra masin rai n kawp shi nna yup n lu ai ga kun mung n chye sai.

Masha ngu tai wa sai kawn gaw n dai zawn re ai lata yak la ai mang hkang ni prat a hpung gaw shagu nga ai rai sam ai. Ndai hpung gaw ni hta lata chye yang she masha tai ai a kyu nga na re ngu kam ai. Ya nye a prat hpung gaw mi hta mung lam kaja hpe lata chye ra ai ngu gaw chye tim gara hpe mahtang lata la ra na re ai hpe n chye nga ai. Chyeju nga ai hpe yu na kun shing n rai a myat nga ai hpe mahtang lata la ra ai baw kun? Ya ten e dum n-ta a mang hkang hpe loi mi hkyem sa jaw ai gaw jinghku ni madun ya ai lahka law law lu nna nau n ba ra ai baw bungli mahtang kaja nga ai. Rai tim chyeju nga ai bungli madu hpe mung ndai zawn gaw n kam chyeju htang nga ai. Shi ngai hpe kam nna gumhpraw mung shawng shaw ya ai hte dum n-ta a mang hkang hpe hkye ya ga sai re. Ngai gara hku galaw ra na hpe n chye myit nga ai.

Ndai zawn sha myit nga let hkying kade pyi rai sai kun. Hpawt de mung jau jau bungli naw sa ra na re wa. Humm! Nau myit nna kun nchye ai gara hku mung n lu yup hkraw nga ai. Myit ru sai wa re.

Posted in: Dumnta