Hkam sha lu ai hte

Ndai Ta Tut wa mung ndai shata, praw 5 ya shani galaw lai mat wa sai 48 lang na Rawt Malan poi kaw chyan lachyau rai sa du shang lawm lai wa sai hku re. Sa du yu la, mau na rai, Laiza pa e 5 ya ting ting sa a ngawk lai wa sai. Dum n-ta de bai du mat wa ai re majaw gaw, myit hta mung grai sim sa ai zawn zawn, grai yawn ai zawn zawn, mau ai zawn zawn, grai pyaw ai zawn zawn, marit ai zawn zawn nga hkam sha lam ni grai law hkra pru lai wa sai hpe ya bai tang madun dat ai.

Hpa hpe tsun mayu ai rai ta nga yang an-hte Jinghpaw Wunpawng sha ni a Shanglawt kanu rai nga ai KIO/A ni 1994 ning kaw na myen hte sim sa lam la da ai hte ya dai ni Jinghpaw Wunpawng buga mung rawt galu kaba gin ai daram mi n rai tim kachyi mi myit paw na daram gaw rai nga ai hpe mu lu ai majaw Sim Sa nga ai zawn zawn nga n tsa lam hpe mu lu ai hku re. Myitkyina hkan e mung Shanglawt KIO/A a hka wan jak n gun hte myi hprap wan ni htoi tu nga ai hte, maw daw lam, mahkrai ni, wut dek dum n-ta ni, bai Myen du salang ni hte Shanglawt du salang ni a Mung ga hkan e sim sa ai lam ni hpe hkrai hkrai na lu ai lam ni hpe moi na hta shai hkra mu lu, na lu ai majaw mung sim sa nga a hka ngu myit lu ai hku re.

Rai tim, ndai kachyi mi sim sa lam lu na matu jaw kau ra ai manu jahpu hpe bai myit dat yang myit hta grai yawn ai zawn zawn nga bai hkam sha ai hku re. Jinghpaw Wunpawng Mungdaw kata na n hprang ni Gala zawn zawn, Miwa zawn zawn, Myen zawn zawn re ai ni htaw chyu htaw dut sha kau ai ni hpe mung lai wa sai sim sa lam la ai 15 ning tup tup myi chyaw mu lu, hkam sha lu lai wa sai. Nan hte gaw a myu kaji sha re, hpa hpaji n rawng ai ni she re nga nna kam mara ra roi rip ai lam ni hpe mung shani sha gu, shata shagu, shaning shagu hkam sha lai wa sai. Rawt jat galu kaba wa ai wut dek n-ta ni, maw daw kaja ni, sut du kaba ni gaw an-hte Jinghpaw Wunpawng sha ni bai n rai nga ai hpe mung mu lu ai majaw yawn la nga ai hku re. Jinghpaw Wunpawng shayi sha ni Miwa ga de dut sha hkrum ai lam ni, ti nang mung kata e Myen ni roi rip kau ai lam ni gaw shing ra tara langai mi zawn bin pru nga ai ni gaw Sim Sa lam a manu jahpu ni rai nga ai.

Shanglawt sha naw lawt nga yang kadai mung kadai ra ai hku mung shawa ni shatsam da ai a hkang a ya hte kam mara galaw, hpung garan, shada da sat hkat, nat hkat, dip sha hkat ai lam ni hpe bai mu lu yang mung grai mau mat ai hku re. Moi an-hte Jinghpaw Wunpawng sha ni grai madi shadaw lai wa sai Shanglawt Asuya gaw KIO/A nga ai sha na ga ai. Ya dai ni bai yu dat yang lachyawk mi sha nga ai Mungdaw kata e NDAK, KDA, Lasang Aung Wa KIA hpung ni nga nna kasu kabrawng a yai a ya rai ga garan paw pru wa ai gaw Jinghpaw Wunpawng labau hta n tsawm dik htum labau ga si ni hku nna grin nga na sha rai nga sai. Na wa magan Myen a mayam hpyen hpung ni zawn zawn re wa nga ai Shanglawt garan hpung ni a majaw sha n mu, yup n pyaw nga ai. Jinghpaw ga shaga nna Myen tai nga ai a myu ni hpe mung mau nga ai hku re. Myen ngu ai ni dip sha ai hpe mung n hkye la ai sha n ga, ti nang nan mung bai dip sha jat rai nna me ti nang hpe shatsam da ai Mung shawa hpe chyeju dum nga ai lam ni gaw grai mau ra nga ai.

Rai tim ndai 48 lang na Rawt Malan poi hta gaw Myen hte an-hte a Shanglaw Asuya rai nga ai KIO/A ni loi li n sam n htuk wa ai zawn zawn nga ai shiga ni hpe mung na lu, bai Rawt Malan mung ga ni hta mung hpyen gaw Myen re, sadi ra nga saga ai, nga ai masa ni hpe maram lu ai majaw kabu pyaw ai zawn zawn mung hkam sha ai hku re. Maija Yang mang hkang a majaw Myen hte mung n htuk wa ai sha n ga Myen hpe n ra sharawng ai lam ni nga ai nga dap shawa a man e tsun shapraw wa ai KIO/A a ga ni a majaw Myen hte Shanglawt bai gap hkat wa na kun nga ai ga san ni mung myit kata e rawng wa sai hku re. Rawt Malan poi e dap ba shagu na gawng malai hpyen hpung ni a hpyen hprim hkawm ai lam ni hpe mu lu ai shaloi mung myu tsaw myit grai rawt wa ai zawn zawn nga hkam sha ai. Ngai nan Shanglawt hpyen la la mat na zawn nga hkam sha ai. Poi sa shawa hta an-hte Jinghpaw Wunpawng sha ni sha n rai, Jinghpaw Wunpawng Mungdan kata e shanu nga ai Myen, Sam, Gala ni mung Shanglawt hpe grai madi shadaw kam hpa ai hte myit rawt nga ma ai hpe mu yang gaw Jinghpaw Wunpawng Mungdan hpe gaw gap la na ten nyi wa sam sai ngu myit yu kabu pyaw nga ai hku re.

Lama wa sim sa lam rai n la shi ai shaloi na a ten ladaw ni bai du wa ai rai jaw gaw an-hte Jinghpaw Wunpawng sha ni yawng hkra moi na hte maren sha Shanglawt lu na lam hpe a ja a wa jawm madi shadaw garum shang lawm ra na re ngu mung myit sawn yu ra nga ga ai. Moi de Shanglawt nga yang n gun mung gun ya, majan mung jawm kasat ya rai yawng grai myit hkrum lai wa sai a ten ladawt ni hpe mung grai marit la ai hku re. An-hte a mung kata hta n shanu nga mat sai Jinghpaw Wunpawng Myu tsaw myu sha ni mung ti nang lu ai a tsam ni hte Shanglawt lu na lam yan hta jawm madi shadaw ra hkat nga ai. Nang ngai hpe Jinghpaw Wunpawng Mungdan ngu ai an-hte a Dum N-ta gaw grai she n marit nga na dawng, ngu Dum N-ta hpe marit ai sum tsan du Jinghpaw Wunpawng sha hku nna marit hkam sha let yawng hpe tang madun dat ai hku re.

Posted in: Myi Jut