Ja Chyum Ga

"Moi, nji nwa ni jung da ai,
Lamu ga jarit shadaw hpe, hkum sit
kau et."
(Ga Shagawp Laika 22:28)

Ndai chyum ga hpe 48 lang na rawt malan poi masat dingsat hplawng (T-shirt) hkan e shakap da ai rai nga ai. Karai Kasang gaw an-hte amyu sha ni shi jaw da ai tsawm htap la ai Wunpawng Buga hpe masha zasam ni up sha nga ai hpe n ra sharawng ai lam hpe ndai chyum ga hku chye na lu ai. An-hte a ji woi ji wa ni madu lai wa sai hte, an-hte ni hpe hkring htawng jaw da sai n dai lamu ga hpe gaw an-hte ni sha n lakawn la yang masha amyu ni lakawn la kau na sha re ngu kama ai.

An-hte a mungdan hpe masha ni up sha nga ai gaw, an-hte myu sha ni nan ti nang a dum n-ta hpe n kam up sha ai majaw masha ni sa lakawn la kau ai ngu ngai mu mada ai. Nang dum n-ta pyi n lu yang gara kaw sa nga na law. Ji woi ji wa ni du daw sai hkaw rai jung da lai wa sai lamu ga jarit hpe nang ngai manu n shadan yang gaw ji woi ji wa ni a kashu kasha ni ngu nna pyi n mai hkam la mat hkra ga ya ga hpa re ai lam langai mi rai nga ai.

An-hte a mungdan, an-hte a mungdan nga nna nang ngai tsun shaga wa ai ladaw wa grai na mat sai hku re. Moi Myen ni up sha lai wa sai hpang English ni bai up sha rai. Dai hpang gaw Japan ni bai hkrup mara rai up sha kau rai nna, ya hpang jahtum ngu na gaw Myen ni bai up sha taw nga sai hku re. An-hte a mungdan re nga ai kun ngu ai hpe mung myit yu ra sai ngu tsun mayu ai. Hpa majaw an-hte ni myit n hkrum hkraw ai kun ngu mung mau nga ai hku re. An-hte ni hpaji nau chye kung hpan nga ai majaw kun?

An-hte myu ni zup hpawng hpawng yang, marai kade lawm yang, ning mu mung kade lu le ai hpe yu yang gaw hpaji grai chye ai ni hkrai re ngu mu mada ai hku re. Rai tim an-hte ni wa dai hpaji ni hpe gara kaw jai lang ra ai re nga ai hpe n chye taw ai gaw grai nan sum kaba rai nga ai. Jinghpaw ga malai nga ai, "N-lu ai hta n-chye ai gaw gau yak ai" nga ai ga gaw grai she jaw nga a hka. An-hte myu sha ni hta n lu ai gaw grai taw nga ai. Lamu ga mung lu ai, n hprang tsu rai mung grai law ai, htung hking mung grai madang tsaw ai hte tsawm htap ai, makam masham mung yawng hta grau ai Karai hpe lu ai a myu re, laika mung lu ai. Hpa baw na ra nga a ta?

An-hte myu ni n lu ai hpa mung n nga ai zawn re tim hpa baw lu a ta nga yang hpa mung n lu ai a myu ni tai nga ai gaw yawn hpa rai nga ai. Jinghpaw (Kachin) nga masha a myu ni a man hta tsun yang, "Aww... Myen mung na a myu baw sang kasha ni wa i?" nga san katut ai gaw hpa baw a majaw kun? An-hte ni dai ni ndai zawn myu kaji tai nga ai ten hta she nang gaw hpa baw bin ai, ngai gaw hpa baw she galaw na, nga nna tsun htai lai hkat nga yang gaw galoi mi she nang ngai myit mada da ai shanglawt pan dung de lu du sana law. Na a myu hpe nang pyi manu n shadan yang kadai wa myi sa manu shadan sana law.

An-hte myu ni mungdan shanglawt lu na matu gaw ya kaw nna ti nang lu ai ah hkaw ah hkang ni hpe mahkawng nna awm dawm shanglawt lu wa ai du hkra shada ta kindun let shawng de gwi gwi hkawm sa wa ra sai hku re ngu yawng hpe saw shaga let, nau n na yang lu wa sana shanglawt pandung hpe myit shingran nga ai hku re.

Posted in: Shingran