Dum n-ta Daw 2 (Christmas hta madai ai lam)

Christmas mung shalai kau sai. Dumnta kata de Wa Dim du wa ai shaloi kaw na dumnta hta lum lum hkum hkum rai Christmas nlu galaw ai pyi grai na mat sai. Moi Wa naw nga ai ten gaw Chirstmas du jang dumnta kata e kyu hpyi hpawng ni galaw lai wa ai rai tim ya gaw yup mang pyi n mang mat sai. Nu mung yupra kaw chyu shanu ra mat ai hte an-nau ni htum bru htum bra rai nga pra mat ai majaw kun? Shing nrai Wa Dim a sum prat a majaw wa rai sai kun?

Manaw gaw shi a tsa lu manang ni hte rau Christmas hpe tsa rau shalai nga lu ai. Ngai gaw hpawt de sha na hte Nu a tsi manu a matu naw shakut ra nga ai le. Nu a matu Christmas kumhpa hku na ntsa palawng sha gaw lu mari ya na n hten ngu myit nga ai. Ya ten sumtsan de nga ai kanau ni mung Christmas hpe jinghku ni rau she n galaw nga na re ngu kam ai. Nu gaw ngai hpe jinghku ni hte sa nga na matu chyu chyu tsun shaja nga ai. Ngai n kam sa ai n re. Ngai mung masha ni zawn grai she pyaw mayu law. Nu hpe n kam hka ai majaw, dumnta hpe tsaw ra ai myit, majen ai myit, ngai n nga yang Wa Dim kam mara di kau na ni hpe myit ai majaw she re.

Masha ni Christmas mahkawn hkawn ai na yang myit hta grai hkam sha ai. Ngai Chirstmas hta nlu pyaw ai majaw nre ai sha hkun hkraw nga sai an-hte a dumnta hpe myit yu nna myit machyi nga ai. Wa nang hpa majaw jau jau an-hte hpe kau da a ni ngu san mayu nga ai. Wa Dim yan Ma Naw tsa lu marawn jahtau pyaw nga ai hpe na yang mung Wa Dim hpe grau grau myit machyi wa ai rai tim hpa mung n lu galaw ai nye hkum ngai hpe sha bai mara shagun la let myit ru nga ai. Nu a hkam ja lam kaja wa na matu mung shana shagu kyu hpyi let sha myit mada nga ai.

Nau nna yang shaning ning nan de du maw nga sai hpe mung myit dum let, shaning ning nan hta gaw naw ku jawng de ah lu sha gaw lu bang na matu mung naw shakut ra nga ai. Nu a tsi mung ma wa maga rai sai majaw tsi manu naw tam ra nga ai. Shana rai tim ya jang rawt ngoi rai bungli de naw sa ra sana rai nga ai. Jam jau ai lam law magang, dumnta hte Nu hpe grau grau tsaw ra wa ai zawn chyaw nga ai. Ma Naw hpe mung n hkru ai lam kaw na bai shaw la mayu ai myit gaw grai law wa magang rai nga ai. Ndai myit rawt wa ai hpe mai kaja ai lam re ngu sawn la ga nga yang gaw, myit hpe loi li shalan la lu ai hku re.

Shaning ning nan galai ngut ai hpang de mung dumnta a prat gaw ndai zawn sha naw rai nga na kun? Shaning ning nan a Chirstmas hpe mung ya na zawn sha gaw n kam tawt lai gwi sai. Ngai hpa baw galaw ra sana kun? Wa Dim hpe mahtang dumnta kaw na lu gawt shapru kau hkra galaw shakut yu na kun? Shing nrai kanau ni hpe mahtang jinghku ni kaw na dumnta de wa hkra shaga la nna Wa Dim hpe jawm gawt kau yang grai mai na kun? Dai hku galaw yang awng dang yang gaw hpa nra ai, rai tim hkrat sum yang Wa Dim gaw Nu hpe mung, Ngai hpe mung dumnta kaw na gawt shale kau ai hte Ma Naw hpe mayam shatai kau na ra ai ngu myit mung tsang ai.

Christmas shagu gaw dai ning na zawn n rai na re ngu kam let Christmas hta madai nga ai hku re.

Posted in: Dumnta