Dum n-ta Daw 1 (Ning Pawt)

Bungli hta grai ba ai majaw dumnta de bai du wa ai shaloi ga pyi nau n kam shaga mat hkra rai hka lu nna dawdap e naw dung nga yang nye Wa Dim gaw makau e wa dung nna tsa mari lu na matu nga gumhpraw sa pyi taw nga ai hku re. Pu ba nga ai majaw kun gaw n chye ai "N jaw ai, nang lu mayu yang nang hkrai gumhpraw tam la." ngu jahtau tsun dat hkrup ai hku re.

Mang hkang gaw dai kaw na hpang sai, "Na Kawa majing n re ai majaw ngai hpe yu kaji ai ga i? Na Nu hpe ngai n la yang kadai la na nnga sai majaw, matsan dum nna la da ya ai she re. Ngai hpe dai ram yu kaji ai i? Ndai nta ngai masha kaba re. Ngai galaw mayu ai hku ngai galaw na. Gumhpraw n lu jaw yang gaw ya jang nye nta kaw na yu!" , nga nna jahtau bun ai hku re.

Ya Wa Dim ngu ai gaw nye Nu a hpang la rai nga ai. Wa gaw si mat ai majaw hpang de Nu a matu dinghku Kawa nga yang n mai na zawn re ai majaw ya na Wa Dim rau hkungran la ai re. Rai tim Wa Dim gaw Nu rau rai nla shi yang gaw myu mi, ya bai rai yang gaw Wa Shakap Shai rai taw nga ai hku re. Nu hta e wa hte lu da ai kasha an-nau ni yawng 6 nga ai. Lakasha masum hte Numkasha masum re. Ndai hta ngai gaw kaba dik htum rai nga ai. Kanau ni yawng gaw jawng naw lung nga ai mjaw ngai gaw Bungli galaw let dumnta ting hpe bau lu hkra shakut nga ai hku re. Nu gaw Wa Dim nau sharu ai a majaw machyi sawng mat nna nta kaw na gara de pyi nlu sa hkra yup ra kaw hkrai machyi rawng nga ai hku re.

Nu gaw moi e an-hte nga ai mare kasha e grai tsawm ai shayi sha langai mi rai nga ai. Wa gaw Du amyu rai nna Wa a Kawa gaw ndai mare hpe up hkang ai wa re. Ah ji nnga mat ai hpang e Wa gaw ndai ginra hta Du tai wa nna ndai mare hpe up hkang lai wa sai. Mungdan Asuya policy galai wa ai hte maren Du magam amyu ni hpe nra wa ai majaw Wa gaw Du shara kaw na yu ya ra mat ai. Wa gaw nau myit ru mat ai majaw rai sam sai, dai hpang kaw na machyi chyu machyi nna nnga mat ai. Dai hpang Nu mung kam hpa na masha n nga ai majaw Lawu mung na du wa ai la langai mi rau hkung ran la nna ya du hkra nga nga ai hku re. Dai lawu mung na du wa ai wa gaw ya an-nau ni a Wa Dim rai nga ai.

Wa Dim a lam gaw mare e masha ni tsun dan ai majaw loi li gaw chye la ai hpe tsun dan na n ngai. Shi gaw lawu mung e nga ai shaloi hpyen la galaw lai wa ai re nga chye lu ai. Shi hta e moi kaw na Num lahkawng rau hkungran yu sai rai nna n htuk hkat ai majaw jahka kau nna ya masum lang ni na hta Nu rau hkungran da ai hpe chye lu ai. Shi gaw moi kaw na tsa hpe grai ra lu ai rai nna, hpyen la galaw ai hka na le ai kawn ya du hkra hpa bungli hpe mung atsawm sha galaw ai lam nnga ai ga re. Nu hte hkungran la ngut ai hpang kaw na dumnta kata e nga ai a rung a rai ni hpe dut sha let tsa chyu mari lu nna Nu hpe dingsa shingnrai an nau ni hpe dingsa rai nga nga ai re. shi a lam hpe tsun yang masin nau pawt mayu ai mjaw nau pyi n kam tsun ai. Ngai bungli shang ai ten kaw na ya du hkra shani shagu tsa manu chyu pyi sha nga ai re. Dumnta na rai ni du sha ai hte mung nlaw sha dum nna ya ngai bungli galaw ai manu shabrai du hkra pyi sha nga ai re.

Shawng e Nu gaw Wa Dim rau rai n la shi yang ngai hpe myit hkrum ai lam nga n nga hpe san lai wa sai re. Nu a matsan prat hte shi hkrai sha an-nau ni hpe bau na nmai bin na re ngu, ti nang hkum ti nang n kam ai majaw Nu san ai shaloi myit hkrum kau hkrup ai re. Ya she grai myit malai lu nga ai, ngai lama wa dai shaloi ti nang hkum ti nang kam let myit n hkrum kau yang ya ten ndai dumnta kade sha pyaw na wa ngu myit let masin n si maroi n ri rai nga ai gaw ya na zawn bungli kaw na wa ai ten Wa Dim gumhpraw pyi yang grau pawt mayu let myit malai lu nga ai grai na sai ga re. Ngai Wa Dim hpe ya she nta kaw na gawt kau ga ngu yang gaw grai hpang hkrat mat sai hku re. Shi mahtang she an-nau ni hpe gawt kau ai baw masa rai nga ai. Dumnta hpe mung masha ni a lata e pawng da ai sha n ga, dumnta kata na rai ni yawng hpe mung shi hkrai madu sha kau sai re majaw ya gaw shi ngu ai hku hkrai madat ra nga ai.

Ndai zawn yak hkak nga ai majaw kanau ni rai nga ai Ma La, Ma Hkaw, Ma Lu hte Ma Roi ni gaw mare kaba e nga ai jinghku ni hpang de sa machyu nga ma ai hku re. Ma Naw hte ngai gaw nu a hkam ja lam n kaja ai majaw Nu hpe majen ai hte Wa n nga mat ai ndai dumnta hpe nja ai majaw Wa Dim roi sha ai lam ni yawng hpe hkam jan let dumnta kata e nga nga ai hku re. Wa Dim a sumprat a majaw Ma Naw mung ngai hte ndai laman nau n htuk nga ai hku re. Ya mung Wa Dim tsa manu hpyi nga yang Ma Naw gaw nta lakang pawt e Wa Dim hte tsa rau sa lu na matu la nga ai hpe mu lu ai. Sha woi e nga yang gaw Nu hpe matsan dum nna gumhpraw jaw kau dat dat di ai mung tsun pyi n dang na daram rai sai hku re. Ngai ya na zawn hkam sha ai lam ni hpe yu matsan dum nga ai Mare kaba na jinghku ni kaw nga ai kanau ni gaw shan hte hpang de sa nga na matu grai lang shaga ai rai tim Nu hpe matsan dum ai hte dumnta hpe majen ai ngai gaw ning dang kau kau di ai majaw kanau ni mung nau nkam tsun mat ma sai hku re.

Wa Dim gaw shi hpyi da ai gumhpraw hpe ngai rai njaw shi ai majaw shi a lata hte nye a gumhpraw a lamatu nyi wa ai majaw hkam sha nga ai ni mung grai law sai, roi sha hkrum ai nau na ai majaw n ju ai myit mung grai law sai, matsin da nna myit kata kaw sha shazim kau ai pawt myit ni mung grai law sai, n kam tim shaga ra ai lam ni ganawn ra ai lam ni grai law sai re majaw rai sam ai, Wa Dim a myi man de nye a lata hte tawng dat hkrup dat ai hte Wa Dim gaw ga de kalang ta galau malap mat wa ai hpe mu dat ai Ma Naw mung put di di nna shut ai lam ni mara raw ya na matu tawng ban bang wa ai gaw kadai mung n kam na re.

Ngai mung n kam nga ai. Hpa majaw nga yang ngai shingran taw ai sha rai nna, nye a gumhpraw yawng hpe Wa Dim hte Ma Naw la mat nna ya ten tsa seng kaw grai she n pyaw nga ma dawng. Humm... ...

Posted in: Dumnta