Ban Mai Samahkyi Manau Poi Nam Chyim

Laika Sara: Sumru

Thai mungdan a dingdung maga Chiang Mai mare kaba hte nau ntsan ai Chiang Dao ginwang Ban Mai Samahkyi ngu ai shara hta anthe Jinghpaw katawng langai mi nga ai. Dai Jinghpaw kahtawng gaw Myen mung lamu ga jarit, Tachyilik hte nau ntsan ai shara rai nna de a makau grup yin hkan gaw Ahka, Lahu, Lawa, amyu kaji ni hte rau rai, jawm galaw lu galaw sha let Miwa kahtawng langai mi hte mung htingbu yep sha rai jawm nga nga ma ai. Mare ting gaw dinggai dingla mahkawn shabrang ma kaji ni hte alum ala rai htinggaw 73 nga ai Jinghpaw katawng rai nga ai.

Ban Mai Manau Shadung

Jahpawt manap jau jau yup rawt wa yang muhkup saiwan ni mung mare kahtawng ting hpe shing grup ga-up tawn da let, grai simani la ai nshung sama bat sha wai nga bung shi kasha gaw ndum shami bung ahpawt wa nna htat la ai palawng lum kaba hpe dinghkren shang wa ai gaw kraw salum sindai kata hta wa ahtu kashung hkra shangun nga ai. Grup yin e shing grup da ai bumtsaw ntsa na bum pungding makau hku abwi sha rai garet pru wa ai jan ninghkaw gaw hkum ting kashung lakyi hkam sha nga ai lam hpe tau chye ya let abwi sha tsan kau ya nna hkum ting hpe lum shangun ai namchyim gaw Ban Mai Samahkyi mare a laklai shangun ai nam chyim nan rai nga ai.

Mare kata de nnan du shang wa yang mahkawn shabrang, dinggai dingla ma kaji ni a mani sumsai hte hkap tau shakram la ai nsen ni gaw Wunpawng sha ni a htunghking lai len hpe nmat ai sha hkang zing tawn ai hpe asan sha mu lu nga ai. Ngai mung ndai ram pyaw la ai Jinghpaw katawng a labau hpe nchye nmai sai ngu nna shana maga de Jidwi dingla ni nga ai shara hpe sagawn nna lung wa yu na re ngu ngai wa manam ai Mare Salang Lahpai Ja Naw a nta kaw nna lam hkawm lung wa yang, tsawm la ai nsam hkum hkra hte mawn sumli da ai manau shadaw ni hpe wa mu mau nngai.

Manau maka ni hpe yu shinggrup chyai nga yang de a makau kaw shangu hte galup da ai htap mi re kawa nta hpe mu nna shang wa yu yang nta nhku kata wan dap hkun lahkawng hte yup gawk lahkawng rawng ai rai nna Jidwi dingla ni hpe sa jahkrum ai manam ni mung nta she ashun wa hkra law nga ma ai. Daphkun hku wan kra dung nga ai Jidwi dingla ni mung ngai hpe mu ai hte ngaishu ngaisha e shangdung rit nga hkap shachyen la ma ai. Dai shaloi ngai na myit hta mare buga de bai nhtang du wa ai zawn nga hkra kabu hkam sha kau nngai.

Ban Mai Samahkyi mare hpe gaw de byin wa ai gaw 1961 ning hta anhte Jinghpaw Wunpawng Myu sha ni Myen Asuya hpe rawt malan gasat hpang wa ai kaw nna KIA hpyen la ni gaw Thai mungdan kata Thamngawp Bum ngu ai shara kaw Hpyen Dap sa jung da let, maigan mungdan ni hte matut mahkai htinglet hkat ai shara rai nga ai. Shawng nnan mare de hpang wa ai gaw Bang Myau ngu ai shara kaw rai nna galaw lu galaw sha yak hkak ai majaw 1982 ning hta she ya na Ban Mai Samahkyi mare kahtawng hpe wa mu tam la ai lam chye lu ai. Dai shara gaw Miwa ni yi sun galaw sha ai shara rai nna hka mung grai taw grai yak ai shara re ai lam Miwa ni hte mung lamu ga kashun hkat nna shada da shuk shanut hkat nga yang 1983 ning hta Thai Asuya hku nna shingteng amying dai daw wa masat shagrin da ya ai lam Jidwi Waje Gam kaw na chye la lu ai.

Nau Shawng

Moi gaw Myihprap wan mung nnga Modaw lam mung nhku, lu hka mung grai yak, dai lam ni hpe myitdum shingran dat shagu ya dai ni du hkra kraw kata hta nshungsi hprwi hprwi nga hkra naw hkam sha myit dum lu nngai nga nna galu galang hkai tsun dan ai.

Dai hpang Thai Hkaw Hkam Jan hku nna anhte bum nga masha ni hpe wa gawan jahkrum da ai kaw nna she thai mung dan ting anhte Jinghpaw ni hpe loi li chye wa ma ai. Shawng daw e gaw kaga myu sha ni re ngu nna masu nga ra ai hpa majaw nga yang Kachin ngu yang kadai mung nchye ma ai majaw kaga myu kaji ni a mying hpe lang ra ai. Dai majaw anhte manau gaw nau ra sai, ndai zawn sha makoi nga yang gaw nmai sai ngu nna 2002 ning hta shawg nnan manau lu nau hpang la saga ai. Dai hpang 2004 ning hta kalang 2007 ning hta kalang, dai ning 2010 ning hte rai yang mali lang lu nau saga ai.

Dai ning na Zupra manau gaw Karai Kasang a chyeju san san hte sha nmyit mada ai sumdaw sumtsan makyin jinghku law law hte hkrum zup lu ai majaw mung tsun ndang hkra kabu myit pyaw nngai. Banmai Samahkyi a yaw shatawng shada ai manau gaw; No. 1 Anhte Wunpawng myu sha ni nhkrum hkat mat ai ni hkrum zup lu nna mahku mahkau grau grau ngang kang jat wa na matu yaw shatawng shada let galaw ga ai. No. 2 Thai Hkaw Hkam wa hkum nngwi npyaw ai hpe hkamja wa na matu hte kaga myu kaji ni hte mahku mahkau galaw lu na matu yaw shada nna galaw ga ai nga nna Jidwi Waje Gam galu galang tsun hkai dan mat wa ai kaw na matsing la lu ai hku re.

Lak lai nna mau na zawn re lam gaw manau poi sa ai masha myu baw hpan hkum hkra wa, sa shang manau lawm ai hpe mu lu nna moi anhte Wunpawng myu sha ni manau nnan chye nau hpang wa ai shaloi, lagat hpun kaba kaw namsi namsaw sa sha ai u ni hpe yu la nna nau hpang wa ai zawn rai, maigan amyu masha hpan law law hkum hkra wa sa shang nau ai hpe mu nna grai kabu n-gun lu arawng mi alu rai grai wa manau nang lawm kau sai. Ban Mai manau hpe November 26-27 lahkawng ya tup manau dum nna, du sa ai masha jahpan tara shang lakmat ta masat htu tawn ai gaw 567 tup re lam hpe manam tau Shayi sha Palawng Nang Awng kaw nna chye la lu ai.

Rawang

Manau poi hta n-gun mi alu rai sa shang manau lawm ai htingbu myu kaji ni hte rai yang gaw marai hkying mi jan gaw rai na re ngu tak maram lu ai. Ndai poi lamang ni hpe byin tai wa lu hkra woi awn zinlum galaw woi ai Salang Gauri Jawa Zau gaw lahkawng ya tup nsen htawn jak kaw nna Jinghpaw ga hte Thai ga hku du sa wa ai maigan masha ni hte anhte Wunpawng myu sha ni hpe asan sha chye na hkra ga htawn tsun shalai ya ai a majaw manau poi sa shang nau ai ni yawng mung ba ai she nna hkra manau wang pyi hkyawk mat na daram agying agang nau pa pa la sai hku re.

Shana na lamang hta yungwi Shingni ni hku nna Sara Kaba Rev. Jawng Shaw Yaw Ying, Nga Dau, Galau Ting Luk, Myinzai Lum Naw, Kareng Ah Roi Awng ni sa shang shangwi shapyaw ma ai. Grau nna maigan masha ni mau ma ai gaw du sa wa ai masha hkying mi jan hpe lahkawng ya tup shat lu sha grai mu hkra daw jaw lu ai majaw tsun nma hkra kajai tsun jahta mat wa masai hte Banmai Samahkyi a manau poi hpe Karai Kasang chyeju gawp e angwi pyaw galaw awngdang la lu sai rai nga mali ai law.

Posted in: Shagun Laika