A sak n ap, Prat hpe she ap ai hpyen la

Ndai kalang gaw ngai Ta Tut mung Jinghpaw Wunpawng Shanglawt Asuya, Hpyen Du jawng Masat yan 2 jawng yu ai hpyen du n kau mi rau jahta lu hkrup sai. Hpyen du langai mi, hpyen la langai mi ngu byin tai wa ai hte myit hta hkam sha ai lam ni, galaw ra ai lam ni, hkam la ra ai lam ni hpe myit mi a dik rai hkra san la lu, madat la lu ai majaw ngai Ta Tut grai myit pyaw dik sai. Laika hti Nu, Wa, Hpu nau ni yawng mung ngai Ta Tut madat la lu ai mahkrum madup ni hpe kau chye mi chye lu mu ga ngu ndai laika ngau hpe ka dat ai rai.

Mabyin gaw ngai Ta Tut mung mau mau rai Yi sa lam e wam dam nga yang seng langai mi kaw Ta Tut hte chye hkat ai hpyen du lahkawng masum dang coffee lu dung nga ai majaw shang jahta lawm sai. Shawng e gaw shanhte a mahkrum madup ni hpe san na ngu myit da ai lam n nga ai rai tim, shanhte hpyen la la mat wa ai hkam sha lam ni hte kahtet nga ai shanhte a myu tsaw myit rawng ai ga si ga ngau ni a majaw san byin mat wa sai.

Ndai hpyen du ni yawng gaw Lat Du ni rai nga ma ai. Lahpa hta ja nam pan langai mi shakap da ai rai tim, yu maya hpyen la ni hte mung rau sha hku hku hkau hkau rai tsun shaga ma ai. Ngai Ta Tut zawn mung masha ramma ni hte hkrum shagu myu tsaw myit lam, myusha labau lam, hkrat sum mat sai an-hte myusha ni a ahkaw ahkang ni hpe n gup she n chye tsu hkra tsun dan ma ai. Jinghpaw Wunpawng sha ni kade wa mying gum hkawng lai wa sai lam ni, Myen Mung ngu ai gaw de sa wa ai lam hta an-hte Jinghpaw Wunpawng sha ni gade daram shakut lawm lai wa sai lam ni hpe tsun n ma hkra hkai dan mayu ma ai.

Shanhte hpe yu yang hkrun lam kade hkawm, magam bungli kade law, kade pu ba ai rai tim pyaw pyaw sha nga ma ai. Ti nang a lahta na Du Salang ni ti nang hpe dam jaw ai ten, pawt katut ai ten ni hta rai tim dai Du Salang ni hpe mara n chye mu ma ai. Nang n pawt mayu ai i ngu san yang, "Ngai shut ai majaw ngai hpe sharai ai re" da. Lu sha n mu, nga shara n kaja la ai rai tim mani sum sai re ai shanhte a myi man ni gaw galoi mung maren sha rai taw nga ai. Moi kaw na matsan jam jau ai majaw wa rai sam ai kun?

Hpyen du langai mi hpe san yu ai. "Du Wa gaw moi gara kaw na re kun i? Du Wa na dum n-ta le." ngu san hkrup ai. "Ngai gaw Myitkyina Shata pru na re. Wa gaw Ja htu sha ai le." Ngai mau mat ai. Shi a Dum N-ta hpe ngai Ta Tut chye ai, ngai Ta Tut mu ga ai. Matsan jam jau la ai dum n-ta kaw na n rai nga ai. Hpyen la prat hta hkam sha ai jam jau lam ni gaw shi a dum n-ta na nga sat nga sa lam ni hte 'Wa shakap shai' rai nga ai. "Dai ni Du Wa ni hpa baw shat mai sha ai rai?" ngu san hkrup yang Arr Lu Si hpe hka rau gabrawng da ai.

Mani sum sai rai nna Jinghpaw Wunpawng labau hpe Mungkan hku shadang nna n gun mi a lu rai tsun dan nga ai. Ndai n gun a sam ni, myit masin marai ni gaw gara kaw na pru nga ai re kun? Myit mada na lam ni nga ai majaw kun? "Du Wa ni shabrai kade lu ai rai ta?" ngu yang, "E shabrai ngu ai baw gaw n nga ai law rai tim ti nang ra ai kaw jai lang lu na matu shata mi 10,000 (US$8) daram gaw lu ai le." Ngai Ta Tut Singapore ga e nga yang Taxi kalang jawn yang Singapore Dollar SGD$10 (US$7) n law htum ma ai. Ndai rai nga ai Shanglawt hpyen Du prat.

An-hte Jinghpaw Wunpawng Shanglawt Asuya a hpyen dap kata e Dap Ba, Dap Dung ni yawng rai yang 50 hkawt rai nga ai. Hpyen la yawng rai yang n law htum 35,000 kaw na 50,000 jan nga ai. Ndai zawn ti nang myu hte Mungdan a ahkaw ahkang a matu nga nna jam jau hkam nga ai masha dai ram law la nga ai. Mau hpa kaba rai nga ai. Hpyen la mung hpyen la madang zawn, hpyen du mung hpyen du madang zawn jam jau la nga ai. Shanhte a myit kata e, myu sha a matu, mungdan a matu galaw gun hpai nga ai bungli hpe kaji tim, kaba tim kang ka hkra galaw sa wa na hpe sha myit nga ma ai.

"Du Wa ni zawn re ai Shanglawt Hpyen la ngu ai ni gaw myu hte mungdan a matu asak hpe ap kau sai myu tsaw mung tsaw ni she rai sai i" ngu tsun ai. Dai shaloi ngai kachyi myi mung n myit mada da ai ga htai langai mi hpe dai hpyen Du wa kaw na lu la ai. "An-hte gaw Asak hpe ap nawng kau ai hpyen la sha n re, ti nang a prat hpe Myu hte Mungdan a matu ap nawng kau sai hpyen la ni she re" da. Mungkan n tsa ngai Ta Tut n dai zawn nga ai ga hpe n dai kalang sha naw na ga shi ai. "Prat hpe ap nawng kau ai da".

Myu tsaw rawt malan hpyen la langai tai wa ai hte asak hpe ap kau ai hpyen la sha n ga, prat ting hpe ap nawng ra ai. Ti nang a asak hpe pyi ap kau sai nga nna kam mara nga, kam mara galaw n mai nga ai. Ti nang a prat hpe ap kau sai re majaw ti nang a prat hta galaw gun hpai mat wa na lam ni yawng gaw myu hte mungdan rawt jat wa na lam ni hta madi shadaw byin ai lam ni sha rai ra nga ai. Prat hpe ap kau sai re majaw n dai prat ti nang hte n seng, Myu sha ni hte she seng mat sai ngu ai hpe tsun mayu ai rai nga ai.

Asak hpe sha ap nna prat hpe n ap ai ni gaw hpyen la la yang she tsa lu, kani lu, kam mara nga ai. Majan gasat wa ai hta rai tim lahta na matsun ai hpe n hkap la ti nang kam ai hku asak she sum mat hkra magrau grang lai mat ma ai. Ndai gaw asak hpe ap nawng ai myu tsaw myit re. Rai tim prat hpe ap nawng ai myu tsaw myit gaw ti nang galaw ai lam ni yawng gaw kaja ai lam ni rai ra ai. Lahta na matsun ni hpe kam ai rai tim, n kam ai rai tim myu sha lam yan a matu gun hpai ra ai. Dai mahtang she Myu Tsaw Hpyen la a jet rai nga ai.

"Hpyen la la yang a kyang hten mat na lu" ngu ai ndai ga gaw n dai prat hta shut mat sai ngu ngai shadu ai. Shanglawt hpyen la ngu ai gaw Prat hpe ap kau ai hpyen la, myu sha lam a matu kaja ai lam ni hta jin jin rai nga ra ai, ti nang ra ai hku n hkawm Mungdan hte Myusha ni a akyu tam ai lam hta she tsap nga ai myu tsaw hpyen la ni rai nga ra ai. Jinghpaw Wunpawng Mungdan rawt galu kaba wa u ga, kyu hpyi dat ai.

Posted in: Yi sa lam