Dum N'ta

Padang Dip Shaning Rai U Ga!

2012-01-07T02:59:00.001+08:00

Happy New Year! Ngwi Pyaw Ai Shaning n nan rai u ga law!

Photo: Facebook

2011 lai 2012 ning de du shang sai hte Mungkan shara shagu kaw nga ai Wunpawng Myu sha ni yawng, lahta na zawn nga kyu hpyi let sha ning n nan hpe hkap tau la na hpe n du lu, n mu lu tim, shing ran mu hkrup n ngai. Karai Kasang a chyeju san san hte anhte Jinghpaw Wunpawng sha ni dai ni na ten du hkra nga pra sak hkrung na hte hpyen wa hpe ning hkap lu ai a tsam marai ni hpe lu la lai wa sai re. Matut nna mung Karai Kasang tut e bau sin ai, Karai Kasang lata la ai amyu tai nga lu ya matu kyu hpyi ding yang rai nga ga ngu saw shaga n ngai. Shaning galai sai hte maren lai wa sai shaning hpe bai nhtang sawn sum ru yu n ngai.

2011 ning hta Myen Mung Asuya ning nan pru wa sai. Dai Asuya nan anhte Jinghpaw Wunpawng sha ni hpe shamyit na matu majan kaba hpaw, masing kaba ni jahkrat let, hpyen n gun kaba hte lung kasat hpang dat masai. Myu sha ni law law wa dum nta hting but hting ra ni hpe kau da let nam mali kata, tsin yam masha tai nga ra saga ai. Mara kata myu sha ni law law hpe tai Myen Hpyen ni sat kau masai. Myu a kanu, ning baw kaja shalat na kanu ni law law hpe roi rip sat kau masai. Myu a kyu tai na, htawm hpang na ning baw ning la ni rai nga ai ramma ni law law hpe rim majaw sat nat ai lam ni mung byin lai wa saga ai. Myu sha ni a sut gan dum nta ni hpe tai Myen Hpyen ni mya lu mya sha ya lai wa sai. Myen Asuya a Hkring Man ning baw wa a matsun hpe tai Myen Hpyen ni lapai hku hkan nang hkan sa wa ai gaw ya dai ni du hkra rai nga sai.

Karai Kasang a shaman chyeju a majaw dai ni du hkra Wunpawng Mungdan Shanglawt Asuya kaw nna Wunpawng Mungdan Shanglawt Hpyen Dap hpe matsun let Padang Hkrun Lam majan hpe hpaw let Myu sha ni a matut sak hkrung hkawm sa wa na ning pawt a hkaw a hkang hpe makap maga ya nga sai. Shanglawt Hpyen La share shagan ni hkala ai ni nga ai zawn a sak hpe ap nawng mat sai share shagan ni mung law law wa rai wa nga sai. Tai Myen Hpyen ni hpe mung Karai Kasang a shaman chyeju hte dang di dang dep ai made lu ning hkap da nga sai. Mungkan shara shagu nga ai Wunpawng Myu shani yawng myit mang langai hte myu a matu ang ai magam bungli ni hpe galaw sa wa masai.

Ndai zawn anhte ni Karai Kasang hta maju jung wa ai hte maren Satan wa mung bungli galaw nga sai. American Mungdan kaw nna woi awn let Myen Hpyen Asuya hpe madi shadaw ai lam ni mung nga wa sai. Miwa Asuya kaw nna mung anhte Wunpawng sha ni hpe dip sha na matu Myen wa hpe lak nak law law htaw jaw let shangun sha nga sai. Mala shala masha myit n rawng, shat ma mi sha na matu ti nang hkum ti nang gwi lu shatai ai Myen sawa ni mung Hpyen la la let Jinghpaw Wunpawng Buga de shani shagu yan she yan nna ya dai ni du hkra rai yang Myen Mung Asuya Hpyen Dap a 40% Htap shi kaw na Htap Mali ting du nga sai. Mishi lak nak kaba ni hte anhte Jinghpaw Wunpawng sha ni hpe labu wan hkut ni shamawng bung nga sai. Mare kaba hkan nga ai myu sha ni hpe bawm hkap kabaw jahkrit shama rai roi sha taw nga sai.

2012 ning de du shang wa sai hte maren tsin yam tsin dam ni gaw ya mung naw noi nang nga ai. Lani hte lani hpyen n gun kaba hte tai Sawa Myen Hpyen ni anhte Jinghpaw Wunpawng sha ni hpe gasat nga ding yang rai nga ai. Lama mi gaw galai shai mat na re ngu ai hpe ngai Ta Tut kam n ngai. Dai gaw hpa rai ta? Jinghpaw Wunpawng sha rai nga ai nang ngai ai myu tsaw myit rai nga ai. 2012 du wa sai hte nang ngai ai myu tsaw myit mung grau grau kaba wa na hpe myit mada n ngai. Nang ngai myu hpe tsaw, Mung hpe tsaw nga ding yang tai Myen Hpyen sha n ga Mungkan hpyen hpe du hkra lu ning hkap nga na re ngu mu mada lu n ngai. Myu tsaw myit kaba wa ai zawn ning mu ni mung kaba wa ra shaga ai. Majan kaba wa ai zawn lak nak ni mung kaba wa ra na sai. Dai hte maren hpaji ni mung grau grau rawng ra wa na sai.

Nang ngai a myut tsaw myit hpe a rang shatai let mu mamu lu malu hpaji ni hpe sharin hkaja let myu a matu mu gun hpai na matu tau hkrau myit shajin da ra saga ai. Nbungli, Lak Nak galaw ai hpaji kaw nna Kep Htap galaw ai hpaji ni du hkra a kyu n rawng ai langai mi mung n nga ai. Tsi sara ni tsi tsi, mung masa chye ai ni mung masa lam woi hpaw, ma rem chye ai ni ma rem, laika chye ai ni laika sharin, hpaga chye ga ai ni mungdan sut masa tam, lak nak chye ai ni lak nak galaw, maw daw chye gram ai ni maw daw gram galaw shapraw, dun ye chye ye ai ni dun ye ye, maza chye hta ai ni maza hta, rai chye ma chye yawng hpe a kyu jashawn mat wa yang anhte a myu hpe kadai wa roi lu sana law.

Jinghpaw Wunpawng sha ni Padang Dip Ai Shaning rai u ga ngu kyu hpyi dat n ngai law.

Hkung ga tut jaw let

2011-08-07T17:38:00.002+08:00

Dawng Hkawn Ga A'ng du

Myit hta tsin yam du

Yawng hte myit n pyaw lu

Hkung ga tut jaw let

Share shagan n'htoi et

Mungga madat let

Myit hta sumru let

N'gun ning ja lu

Hkung ga tut jaw let

Share shagan n'htoi et

Majan pa e maja let

Tai hpyen wa hpe ning hkap let

Myu tsaw shadang ngai

Hkung ga tut jaw let

Share shagan n'htoi et

Prat a majaw ngai

Tsin yam dap e hkrai

Jam jau jam hkau let

Hkung ga tut jaw let

Share shagan n'htoi et

Shanglawt lu hkra ngai

Hpyen num jang tai sai

Myu tsaw shayi ngai

Hkung ga tut jaw let

Share Shagan n'htoi et

Prat dep hpaji hte

Mare kaba de ngai

Myu a matu rai

Hkung ga tut jaw let

Share shagan n'htoi et

Myu hte Mungdan a matu 1975 ning August 10 ya shani Asak hpe ap nawng mat wa sai GOC hte malawm ni, Myu hte Mungdan a matu hkrat sum mat wa sai Share Shagan Ni yawng hpe tut e hkung ga jaw let...

(Lai wa sai 2009 ning na share shagan n'htoi hta Ta Tut ka lai wa ai
gashagawp hti na matu N'dai kaw dip dat u.)

Prat Dep Ai Jinghpaw Wunpawng Mungdan De...

Ta Tut

Prat Ning Nan De Lam Woi Na Majan (Ga Gale)

2011-08-07T05:23:00.000+08:00

Tony Cliff

(New-Generation War In Myanmar)

Photo: Jinghpaw Kasa Blog

Laiza, Myen Mung - "N'nan e gaw Myen hpyen la ni grai gwi ai zawn zawn rai htu lung wa ai le. Lam kaba n tsa hku jahtau ai hte nam hkan sinat ni gap bun rai nna lung wa ai. An-hte ni makoi let wang da ai hpe shan hte n chye ai gaw." Asak 27 ning Wunpawng Mungdan Shanglawt Hpyen Dap (KIA) Dung 23 kaw na hpyen ma Awng Myat tsun dan ai.

Juyl 16, Myitkyina Man Maw lam makau e shi hte shi a manaw manang ni marai 40 daram nam hkap (ambush) taw nga ma ai. Myen ni du wa ai shaloi Shanglawt Hpyen la langai Gang Bawm gang dat ai het Myen ni shara magup de hkrit let sinat ni hpe gap bang wa ai. Ndai majan poi gaw dai shani kaw na hpang yang 3 ya ting na mat ai. July 18 shana maga de, kawa ni hte gap da ai Hkaya bum hpyen dap de, a tsawm sha bai lu du wa ai hte hpyen ma ni gaw grai myit rawt ai hte majan a lam ni ma gin sup ai lam tsun nga tsun dan hkat nga ma ai.

Shan hte tsun dan taw ai lam ni gaw Myen a tak bawm gap ai motor pala hpyen dap makau de hkrat ai n sen a majaw jahkring mi tsim mat ai. Motor pala wan hkut gaw lamu hpe sin mat hkra jahkring mi ka'up kau ai. Beer hte silik n shang hkra lu bang let jak sinat hpe jum da nna majan a mabyin ni hpe ma langai mi tsun nga tsun dat taw nga ai. "An-hte ni Myen mang ni hpe lu hti ai daram hti yu ai le. Yawng rai yang 8 daram re. Mawdaw 4 5 daram mung kapaw ai majaw mang gaw grau law na re ngu shadu ai," Awng Myet tsun dan ai.

Photo: Irrawaddy

July 27, Awng Myat gaw dai Dap Dung hta asak kaba ai jahpan kaw lawm ai wa re. Hpyen La ni yawng agw asak 20 makau na hkrai rai nga ai. Shan hte yawng a matu gaw n dai majaw gaw numbat langai lang rai nga ai. Majan ginra kaw nna Kilometers 10 daram kaw, bum lapran hkan na lam ni hpe lai di dat yang Laiza hpe mu lu na rai nga ai. Masha hkum 10,000 jan nga nna Wunpawng Mungdan Shanglawt Asuya (KIO), KIA a up hkang Asuya, a daju mung rai nga ai. Laiza gaw Miwa hkran hte hkashi kasha langai mi sha din ai shara kaw nga ai re.

Maigan shiga ni hkan shapoi nga ai shiga ni hta Myen Hpen n'gun kaba mi Laiza de lung wa na re nga ai shiga hpe na lu nga ai. Jawng ni, Gat Dut Seng ni, Hotels ni gaw shawoi na zawn sha naw hpaw nga ai zawn masha ni mung hpaga lam ni hte shani shagu na bungli hpe hpe galaw nga ma ai. Rai tim Hpyen hprawng masha ni law law n shang wa na matu Miwa hkran kaw nna gate hpe jahpaw hking 6am kaw nna shana hking 6pm kaw du hkra pat da ai lam, lani the lani jat wa ai hpyen hprawng masha ni a malu masha lam hte nga sha ra lam ni gaw kaja byin nga ai mabyin ni hpe madi madun taw nga ai.

Photo: Irrawaddy

Hpaw mi, num hte makasha law law wa gas Jawng ni, Gawk Nu ni, Manau pa hkan e shanu nga ma ai. Ndai masha ni gaw June shata 9 ya shani Myen ni Shanglawt ni hpe gasat wa ai shaloi kaw nna ti nang mare hpe kabai kau let hpyen hprawng hprawng pru wa ai ni rai nga ma ai. June 9 ya shani Tarpein Madim, Laiza kawn Kilometers 50 dingda maga nga ai, shara kaw byin wa ai majan gaw 17 ting Myen hte Shanglawt a simsa lam gasadi hpe gayet daw kau sai rai nga ai.

1989 ning kaw nna Myen Mung ting a rawt malan hpung 15 daram Myen hte simsa lam la lai wa sai rai nga ai. Jinghpaw Mung gaw Myen Mungdan hta galoi mung kadai hte n bung let paw pru nga ai shara rai nga ai. Switzerland Mungdan hta htam lahkawng kaba nna Square Kilometers 89,000 kaba ai shara gaw ru di a myu ni law n'gun kaba let up hkang ai shara rai nga ai. Masha hkum 1.36Wan(2002 ning Myen Asuya tara shang n'dau ai jahpan, dai hpang n shapoi ga mat sai) nga ai shara gaw Mungdan rawt jat lam n'law htum jahpan shang let Mung daw a ga'ang hkup daram Nam mali Bum ni hte shing grup da ai shara rai nga ai.

Photo: Kachin Net

Hkrisatan law htum rai nna 1.2Wan daram nga ai ndai Kachin ru di a myu ni gaw Jinghpaw Mung daw, Sam Mung daw, Miwa mung, Gala mung ni hta nga pra nga ma ai. Masha hkum 300,000 daram gaw Miwa ga e nga nna shan hte hpe Jinpo nga ma ai. Labau hta hkan nna Kachin ni gaw ti nang a laika hpaji lam, sut masa lam, hkam ja lam, hkam ja lam ni hpe Myen mung a kaga rudi a my ni hta grau kaja hkra lu gaw de da ma ai.

Shanglawt the Myen gas 1994 ning hat sims a lam gasadi lek mat htu lai wa tim dai lam ni gaw Laika pa n tsa ai sha rai nna kaja wa mung masa lam ni hpe jahta ai lam ni n nga ai hku re. Dai simsa lam gaw Myen a Companies ni law law wa Jinghpaw Mungdaw a n hprang rai ni hpe htu shaw la na matu sha rai nga ai. Mungkan hta Lung seng pru dik htum Hpakan mung Myen ni a lahta hta hkrat sum mat ai hku re. Rai tim dai simsa lam la laika hpa gaw Mung masha ni yawng chye na matu n dau ai lam ni n nga lai wa sai.

Gareng La Nan*, Myitkyina kaw na Jawng shara gaw "17 ning simsa lam a majaw simsa lam loi li lu la ai, hpaga yung ga lam loi li rawt jat ai hte shinggim roi rip lam loi li yawm wa ai lam ni gaw lu la ai. Rai tim Mung masa lam hta hpa mung rawt jat ai lam n nga ai," nga tsun ai.

Photo: Kachin Net

Kaga rudi rawt malan hpung ni hte maren Wunpawng Mungdan Shanglawt Asuya kaw nna mung Awm Dawm rawt malan policy hpe dawm kaw nna ti nang Mung daw ti nang up hkang lu ai Federal Mung daw hte ti nang a htung hking the laili laika, a hkaw a hkang ni hpe hpyi sawng nga sai re.

Simsa lam a majaw Company kaba ni hpaw let lau ban nga ai n'kau Jinghpaw salang ni hta jan nna gaw yawng ngu na daram Simsa lam hpe Mung masa maw hpyi hpyi ai hku sha mu mada ma ai. Ndai majan n'nan byin wa na matu lam ni law law nga ai hku re. Dai hta n'hprang rai ni hte hkum tsup nga ai Jinghpaw Mungdaw hpe Myen ni a Company kaba ni gaw Lung Seng ni hpe maru marang rai hkra htu shaw ai lam ni byin wa sai re. Lung seng gaw moi de Shanglawt Asuya hpe maga lam hku madi shadaw ya ai hpaga kaba mung rai nga ai.

Hpaga hpung kaba ni rai nga ai Yuzana, Htoo Trading, Asia World ni gaw Jinghpaw mung e nga ai hka nu kaba ni hte dam lada ai shara ni hta shan hte a hpaga ni hpe kam mara galaw wa ma ai. Grau nna gaw Miwa ni a company ni hte pawng nna galaw ai Hka Wan Jak Madim ni mung rai nga ai. Dai hpaga ni hta na Miwa ni gaw hpun ni shaw, ja ni htu n'na jau man buga masha ni a akyu kaji mi hpi n lawm ai hku galaw wa ma ai.

Photo: Dum N'ta

Ndai lam ni gaw masha law law a myit hta Miwa hpe n ju ai lam ni hpe dawk bang ya nga ai hku re. "Shan hte ni Langu hpaga ni, Ja htu hpaga ni, Wan Jak hpaga lam kaba ni hpaw wa yang a rung a rai, bungli galaw masha kaw na hkawt yawng hpe Miwa mung kaw na sha woi la ma ai. Jau man buga masha ni a matu a kyu loi hpyi n'nga ai hku galaw wa ma ai," nga nna KIA magam gun langai mi tsun dan ai.

Ya ten hta grau nna mying kaba nga ai manga hkang gaw Mali N'mai zup hta galaw nga ai Hka Wan Jak Madim masing rai nga ai. Myitkyina, Jinghpaw Wunpawng ni a hting hking daju mung rai nga ai hta Megawatts 6,000 jan hpru ai n'dai madim hpe galaw nga ai hku re. Jinghpaw Wunpawng sha ni a matu gaw Manghkang kaba rai nga ai.

Makau grup yin yu sin hpung ni hte myit rawt ai ni hku nna sawk sagawn tam tawn ai jahpan ni hku nga yang Mali hka na madim a majaw hka nam Myen Mung de hka n law wa chye ai zawn Jinghpaw Wunpawng ginra ni hta hka kaba ai lam ni byin pru wa ai baw re nga ai. Bai nna masha law law a nga pra ai lam ni hpe hkra mai ai rai nga ai. Grau nna gaw, n'dai madim hta na hpru ai Wan ni yawng hpe Miwa ga de dut ya na majaw rai nga ai.

Photo: Google Images

Hpang jahtum na majan byin wa ai lam gaw 2009 ning hta Myen Hpyen Asuya kawn Wunpawng Mungdan Shanglawt Asuya hpe shan hte a n'pu e nga ai Jarit sin dap (BGF) gale shangun ai lam rai nga ai. "Ndai lam gaw an-hte hpe a sum jaw shangun ai lachyum sha re," nga nna ru di a myu ni a lam hpe a ten law law yu sin nga ai u hpung ni tsun nga ma ai re.

Wunpawng Mungdan Shanglawt Asuya hte kaga rudi rawt malan hpung ni rai nga ai Wa, Mon ni mung n dai BGF masing hpe n hkap la ai sha kaga masing ni hpe tang madun lai wa sai rai nga ai. Rai tim Myen Hpyen Asuya kawn dai masing ni hpe tsep kawp n hkap la lai wa sai.

June shata 9 ya shani na majan a gaw Shanglawt Asuya hte Myen Hpyen Asuya hpe tara shang ajan baw ai lam n'dau dat ai hte bung nga ai. "Shan-hte gaw n'dai mabyin hpe madung la nna an-hte a sara ni hpe zing la mayu ai re," nga nna KIO a mung shawa up hkang du Zau Awn kawn tsun wa ai. Gara hku mi nga yang nga, mabyin hpe yu maram dat yang Myen Hpyen Asuya kawn Shanglawt Asuya KIO hpe loi mi yu kaji kau ai lam hpe mu lu ai. Myen Hpyen Asuya kawn lai wa sai 2009 ning hta Kokang rawt malan hpung ni hpe n'htoi kadun mi hte sha gasat kau ai mabyin hpe KIO hta kalang bai byin na matu myit mada ai lam hpe maram lu ai.

Photo: Irrawaddy

"Padang Hkrun Lam Masing" nga ai laika si kaba shakap da ai Laiza Hotel a gawk nu gaw Majan masing ni hpe jahkrat nga ai Majan Command Post langai mi de gale mat sai hku re. Wunpawng Mungdan Shanglawt Hpyen Dap Tau Dap Awn Daju Du Daju Jum Du Kaba Gun Maw gaw KIO Asuya magam gun ni yawng a ning mu hpe ning nga tsun nga ai. "Myen Hpyen la ni hta marai n rawng ai. Bai shan hte a mung masha ni mung shan hte hpe n'madi shadaw ma ai." nga tsun ai.

Majan hta rim hkrum ai Myen Hpyen la Bawm masha masum hpe san htai galaw yu yang Du Kaba Gun Maw a ga jaw ai hpe madi shadaw nga ai. Aung Myo Hlat*, asak 36 ning Myen Hpyen Du, HkaLaYa Dap Dung 21 hpe hpa majaw majan hta shang lawm ai lam san yu yang grai na hkra myit yu nna "Ngai gaw Hpyen La, Order hpe madat ra ai," nga nna htai ai.

Photo: Jinghpaw Kasa Blog

Soe Myint*, asak 48 ning A Gyi lapai ta hta ning ma hte rai ai wa gaw shi gara hku hkala hkrum mat ai lam hpe ning nga tsun dan ai. "Ngai hpa majaw gasat ra ai hpe n chye ai, Ngai matsin ai gaw ngai sai ni grai htaw let malap mat ai. Bai ngai hpe yawng tawn da kau ma ai. Ngai bai dum wa ai shaloi gaw KIA a lata kaw rai taw sai." nga tsun dan ai.

Htoo Lay*, asak 22 ning, Karen ru di hpyen ma gaw lak nak kaba dap kaw magam gun ai wa rai nga ai. "Ngai hpe Hpyen dap de a tik a nang rai rim bang la ai she re. Ngai lai wa sai 3 ning hta Madalay wan leng daru kaw wan leng la taw ai shaloi Myen Hpyen dap kaw na rim mat hkrum ai. Ngai na shing ma kaw ning ma lu nna sin wum kaw makoi nga ai. KIA hpyen la ni LET WA YANG NANG HPE N GAP AI nga ai ga na ai majaw ngai le wa ai re. Ngai na lak nak hpe pyi ngai kalang n'gap ga ai." nga tsun dan ai.

Shi a manang lahkawng the karen Myen Hpyen La law law gaw shan hte a numbat langai lang majan hpe shang yu ai rai nga ai. Myen Mung Communist Hpyen Dap a hpyen la ding sa rai nga ai hte ru di rawt malan hpung law law hte chye hkat ai Aung Kyaw Zaw gaw "Myen hpyen la ni a a tsam gaw grai nan yawm taw sai," nga tsun dan ai hku re.

KIA kawn Myen Asuya de bawng masha ni hpe sa ya na lam laika shalai ai rai tim ya du hkra laika htang ai lam ni n nga ai hpe mu lu ai hku re. "An-hte mahtai n lu la ai," nga nna KIA magam gun langai mi tsun ai hku re. "Bawng masha ni bai Myen dap de wa ai rai yang shan-hte hpe Myen Hpyen Dap kaw nna tara ahkyak la ai lam ni mung mai byin wa ai. Shan-hte hpe lak nak shamat ai tara, magam hpe awng dang hkra nlu gun hpai ai tara ni hte htawng 7 ning daram mai hkrat wa ai" nga nna dai KIA magam gun sha bai kahtap sanglang dan ai hku re.

Image: Google Images

Rudi a myu ni hpe yu maram nga ai masha langai mi tsun ai hta, "Kachin ngu ai ni hpe masha law law wa gaw gasat gala ai lam hta hkrit ma ai. Shan hte gaw Mungkan Majan II hta mung English maga hku nna gasat lawm ai hte Japan ni hpe gau kau ai kaw mung Madung dat gasat lawm wa sai hte law law wa mung shakawn hkrum ai ni re. Shan-hte hta tsun ai ga nga ai 'An-hte lu galaw ai, Dai majaw an-hte lagaw an-hte lu tsap ai' nga ma ai," nga nna tsun dan ai.

Shanglawt hpyen la ni a myit hpe sharawt ya ai lam ni hta, Myen hpyen la ni a lak nak ni gaw Shanglawt Asuya kaw nga ai lak nak ni hte nau n shai ai sha madang maren daram rai nga ai majaw re. Hkaya hpyen dap hta Myen ni kawn hta la ai laknak ni hpe tawn da ma ai. Dai hta Myen Hpyen la ni a laika buk ni, dum n'ta masha sumla ni, phone ni, rung laika pa ni, hte kaga hkum hpai a rung a rai ni mung lawm nga ai. Myen Hpyen la ni lang ai sinat ni, Jat sinat ni, Mortars ni, Ta bawm ni hte kaga hkam bawm ni law law hpe tawn da ai hku re. Dai lak nak ni gaw dai ni prat na majan ni hta jai lang na malai Labau dum ni hta madun tawn da na grau mai na zawn rai nga ai.

Photo: Jinghpaw Kasa Blog

Shanglawt hpyen la ni gaw dai lak nak ni hpe pyaw pyaw hte sha madu ding sa rai nga ai Myen Hpyen Dap hpe gasat ai hta lang na rai nga ai. Shanglawt Asuya hta AK-47 hte bung ai sinat ni, Morars ni, Hkam Bawm ni hte kaga hpyen a rung a rai ni hpe galaw shaprawt ai jang rung ni hpe law law hpe sim lum ai shara ni law law hta galaw shapraw nga ai hpe mung na chye lu ai. KIA hpyen dap hta majan hpe ya jang lu gasat nna Professional madang du hkra lu gasat ai hpyen n'gun 8,000 kaw nna 10,000 jang nga ai zawn Mun Kaba (50,000s) rai nga ai Mung shawa hpyen hpung ni mung ya hkyak hkyak gasat nga ai majan pa ni hta shang lawm nga ai hku re.

Myen Hpyen dap a n'gun gaw lak nak kaba rai nga ai. Rai tim Miwa hkran the nyi kahte la ai Laiza zawn re ai shara ni hpe gasat na matu gaw grai yak la nga ai. Mare kaba ni de lam lahkawng hte sha mai matut mahkai ai Laiza gaw yi nam ta hta gasat na matu grai yak la nga ai. Lama wa Myen ni gasat wa ai rai yang gaw Shanglawt Asuya kawn Dingda maga de na lam ni hpe lu kaup ai n'gun nga ai lam mung chye lu ai. Lama wa Myen Hpyen Dap kawn lak nak kaba ni hpe lang ai rai yang gaw Miwa hkran de hkrat bang nna Mungkan a man hta mang hkang byin chye ai baw rai nga ai.

Photo: Jinghpaw Kasa Blog

Ya ten du hkra gaw KIA a masing hta ti nang a shara ni hpe makawp na matu sha rai nga ai. Dai majaw mahkrai ni hpe kapaw ai lam ni hpe Myen Asuya kawn Shanglawt Asuya hpe tara n shang uhpung ndau ai kaw nna galaw lai wa sai ku re. "An-hte hpe tara n shang nga nna tsun sai re majaw an-hte mung hkam bawm ni hte kaga makawp maga lam ni law law hpe jau shajin da sai," nga nna Shanglawt Hpyen Dap Dap Ba 5 Up Du Jum Du Kaba Kumbu Din kawn tsun dan wa ai hku re.

Photo: Jinghpaw Kasa Blog

Majan n'nan gaw shiny him kayak mahkak ni law law hpe mung byin shangun nga sai hku re. Ya laika ka nga ai shaloi sha pyi Hpyen Hprawng tsin yam masha 17,000 gaw Wunpawng Mungdan Shanglawt Asuya a up kang gin ra ni hta KIO garum gin tum lam kata shanu nga ma sai hku re. Laiza hta tsin yam masha 7,500 nga ai zawn kaga sharan hkan e mung 6,000 jan nga ai lam na chye lu ai. Bai nna ngam nga ai ni gaw Myitkyina zawn re ai Mare kaba ni hte Miwa mung kan e nga ai jing hku ni hpang de shanu nga masai. KIO gaw kawa gin sum 500 jan hpe gap tawn nna masha 7,000 hpe lakawn nga ai.

"Ya ten du okra gas KIO up hkang kaw na the kaga alu bang ai mash ni hte Makam Hpung ni kaw nna garum da ai. Mungdan shara shagu nga ai Jinghpaw Ramma ni la la wa sa garum nga ai. Rai tim a ten na wa ai hte simsa lam n lu yang gaw grai yak wa ai hte Mungdan kata, shing gan kaw na garum gin tum ai lam ni ra rawng wa na re," nga Laiza tsin yam lanu lakawn hpung masha La Rip tsun dan ai.

Photo: Jinghpaw Kasa Blog

Bai nna kam ging ai reports ni hta shing gim roi rim ai lam ni Myen Hpyen Dap kawn Mung shawa ni hpe tawt lai nga ai lam ni mu lu ai. Laiza daju Wunpawng Mungdan Shanglawt Amyu Shayi hpung kawn num sha ni hpe roi rip ai mabyin 18 hpe mu da ai hku re. N kau mi gaw sat kau hkrum ai ni mung lawm ng ai. Ndai mabyin ni gaw Jung shata 10 kawn 18 ya laman byin wa ai lam ni sha rai nga ai. Ya hkyak hkyak nga yang KIO mung shawa tsi jaw gawk kaw na Nurse tsi shara num hpe Myen Hpyen La ni roi rip ai lam byin lai wa sai hku re. N'dai tsi sara num gaw mare langai mi hta KIO kawn hpaw da ai mung shawa tsi jaw gawk kaw magam gun ai ai rai nga ai. "Tsi sara num ni hpe roi rip ai lam majan hpang ai kawn ya du hkra kalang mung n na yu ga ai," nga tsun ai.

Majan a majaw n myit mada da ai mabyin lahkawng byin wa ai hku re. Langai ngu na hta Jinghpaw Wunpawng myu sha ni Wunpawng Mungdan Shanglawt Asuya hpe tsep kawp madi shadaw ai lam lu la ai hku re. Lai wa sai ten hta a kyang hten KIO salang hte Du Kaba n kau mi a majaw Mung shawa a tsun ding lut ai lam ni hpe law law lang hkam sha lai wa sai hku re.

Photo: Irrawaddy

Lahkawng ngu na hat gaw BGF masing a majaw simsa lam la ai ten hta kaba wa ai law la ai Jinghpaw Wunpawng ramma ni hpe shadum jahprang dat ai lam rai nga ai. "Yawng gaw Majan shang na hkrai nga mat sai," nga nna hpa ga ga nga ai ramma hpa ga la langai mi gaw jahtau let Laban Naw ku ngut nna Laiza nawku jawng kawn le wa let tsun ai. "Jinghpaw Wunpawng sha ni lawt na ten du sai, Myen Hpyen a la ta kaw nna shanglawt lu ra sai. An-hte gaw Aung San Su Kyi hpe madi shadaw ai. Rai tim shi tsun ai gasat gala n galaw ai hku simsa ai hte shanglawt la na matsin gaw bung li n byin mat sai," nga matut tsun ai.

Majan a majaw KIA Hpyen Dap ai ning mu mung loi li gale mat ai hpe mu lu ai. "Simsa lam hpe Mung masa mahtai n lu tim ra ai Du Kaba hte Salang n'kau mi a n'gup ni mung pat mat sai," nga KIA hpyen la langai tsun ai. Jinghpaw Wunpawng shani yawng Majan hta lai kaga mahtai n nga ai hpe chye tim law malawng gaw simsa let sha nga mayu ma ai. Mung masa hku n tsa jahta nna Mung daw hpe bai lu la na matu myit sharawng ma ai.

Photo: Irrawaddy

KIO Asuya a ga shaga a hkaw a hkang lu Salang Kaba La Nan gaw Jinghpaw Wunpawng shani a ra sharawng ai lam hpe ning nga tsun dan ai hku re. "Langai, gap hkat jahkring ai hpe aten kadun shawng galaw na; Lahkawng, Myen Mungdan ting hta dai zawn byin ra na; Masum, rudi rawt malan hpung ni yawng a gawng malai rai nga ai United Nationalities Federal Council (UNFC) hte Myen Hpyen Asuya mung masa lam jahkrup na," ngu ai lam ni rai nga ai.

June shata 30 ya shani Myen Hpyen Asuya hte Shanglawt Asuya hkrum tsup hpawng let simsa lam jahta ai hta simsa lam de n lu du tim matut nna matut mahkai ai lam ni galaw nga ai hpe chye lu ai. Shanglawt Asuya kawn Myen Hpyen Asuya gaw simsa lam hpe daw dan nan a hkaw a hkang lu ai ni kawn n sa shang lawm ai lam hpe madi madun ai hku re. "Myen gaw an-hte hpe bungli rau galaw nna simsa lam la ga nga tsun ai. Rai tim mung masa myit hkrum la loi li sha pyi n lawm ai sha hpaga lam hpe sha tsun taw ai," nga Du Daju Jum Du Kaba Gun Maw tsun ai.

Photo: Dum N'ta

July shata ga a'ng hta byin lai wa ai Hkaya Majan gaw grai nan kaba ai hte hkrat sum ai lam law ai majan langai mi rai wa sai hku re. Dai hpang kawn majan kaji ni law law byin wa ai rai tim Myen Hpyen Asuya kawn Masin kaba nlu jahkrat ai hpe mu mada ai. Lahkawng maga hku nna n'dai laman lang hte lang hkrum tsup let simsa lam jahta wa ai rai tim mahtai n lu shi ai. Ndai hten hta Jinghpaw Wunpawng Mung shawa ni yawng hku nna sa tik tik let kaja wa ti nang lagaw ti nang lu tsap ai a hkaw ahkang lu ai simsa lam hpe lu na matu myit mada nga ai. Rai tim moi na zawn re ai simsa lam hpe gaw n ra sharawng nga ma sai hku re.

(P.S1 : Mying ni hta '*' shakap da ai gaw shim lam a matu mying madung ni hpe gale da ai re.

P.S2 : Tony Cliff a "New-Generation War In Myanmar hpe Jinghpaw hku bai yu htuk ai hku Ta Tut bai gale da ai re.)

Tony Cliff, a pseudonym, gaw Bangkok kaw daju ai sumla Jurnalist langai mi rai nga ai. Shi hpe matut mahkai mayu yang tonycliff7@gmail.com de matut la mai ai hku re.

Shiga ning mu

2011-07-19T15:24:00.000+08:00

Photo: Wikipidea

July 18th, 2011 ya shani Norway du Myen hpu nau ni a shiga dap Democratic Voice Of Burma (DVB) kaw nna Wunpawng Mungdan Shanglawt Asuya hte seng ai shi laika langai mi hpe lu hti hkrup n'ngai. Dai laika hta e ka da ai shi laika gaw Myen hpyen du langai hte hpyen la marai 5 hpe rim da ai hte seng nna ka da ai shi laika langai mi rai nga ai. Rai tim hti yu ai shaloi loi mi n'geng ai zawn nga ai hpe mu lu ai majaw Ngai Ta Tut laika ka madun dat n'ngai.

Yawng chye ai hte maren laiwa sai Mali N'mai zup, Hka madim kaba galaw ai bungli galaw shara kaw bawm law law lang kapaw wa ai shaloi Myen Asuya a shi laika kawn Wunpawng Mungdan Shanglawt Asuya hpe tara n shang uhpung 'Insurgent' ngu nna jai lang lai wa sai hpe mulu na rai nga ai. Dai hte maren an'hte Jinghpaw Wunpawng sha ni mung Myen Asuya sha an'hte hpe dai hku tsun ai nga lu myit la n ngai.

Rai tim dai ni na shiga ka ai ni hta Myen hku ka ai hte English (International version) hku ka ai lam hta shai ai lam ni law law hpe mu lu n'ngai. N'dai hta Associated Press (AP) shiga hta mung Wunpawng Mungdan Shanglawt Asuya hpe 'Insurgent' ngu nna lang ai hpe mu lu ai. Dai sha n'ga DVB shiga ni hta mung English hku ka ai shaloi Wunpawng Mungdan Shanglawt Asuya hpe 'Insurgent' ngu nna ka ai hpe mu lu ai. N'dai gaw majoi byin wa ai kun? Shing n'rai da sang galaw ai re ai kun?

Kaja mabyin, byin nga ai lam ni hpe chye nga ai ni pyi n'dai zawn nga ai 'Insurgent' ngu ai hpe hti na wa yang kaja wa an'hte hpe dai zawn nga ai ni shadu wa ma ai. Dai rai yang n'chye shi ai ni lu hti hkrup ai rai yang gaw gara hku byin wa na ngu ai hpe nang ngai yawng chye myit na rai nga ai. Bai DVB a shiga hta ka da ai hta Wunpawng Mungdan Shanglawt Asuya a majaw she hpyen yen tsin yam law law nga wa ai zawn nga nna ka da ai hpe mung lu maram mu ai.

Bai nna, dai tsin yam ni gaw kadai hpe hkrit nna kadai hpang de sa makoi nga ai lam, kadai gaw gara hku tsin yam ni hpe yu lakawn nga ai lam ni hpe mung a san a leng ka madun dan ai lam n nga ai hpe mu ai. Dai re ai majaw n dai lam hte seng nna yawng mayawng jawm myit yu na matu ngai Ta Tu laika ka dat n ngai. N'da mabyin gaw kaji la ai zawn rai tim a tsawm myit yu yang grai kaba ai mang hkang de gale wa mai ai. Mungkan a Wunpawng Mungdan shanglawt Asuya n'tsa na ning mu ni gale wa chye ai. Myen ni n'dai hpe a hkaw a hkang la wa chye ai majaw tang madun dat n'ngai.

Prat Dep ai Jinghpaw Wunpawng Mungdan De....

Ta Tut

Tang madun tawn ai DVB shiga:: DVB News Link

Awm Dawm Shanglawt ngu ai hta

2011-07-18T17:10:00.001+08:00

"Shanglawt lu mayu yang gaw, shanglawt lu ging ai hku hkawm sa ra ai. Shanglawt lu ging ai hku bungli galaw ra ai. Shanglawt lu ging ai hku myit hkawm sa ra ai. A kyang jahten ni hpe kabai kau da ra ai. Shanglawt lu ging ai hku maka tsawm ra ai. Shanglawt lu ging ai hku gahkin gumdin ra ai. Dai rai yang she awm dawm ai shanglawt hpe lu la na re." General Aung San, DVB news programe (16th July, 2011)

Ndai ga si hpe Myen Mungdan a chyeju madu rai nga ai Du Daju Jum Aung San tsun lai wa ai mung ga langai mi kaw na shaw da ai rai nga ai. Jinghpaw Wunpawng myu sha ni gaw shanglawt lu mayu ai a myu ni rai nga ai. Dai re ai majaw shanglawt la ai lam hta ti nang hkrai la yang a ten na ai majaw Aung San wa a gasadi hpe kam hpa nna Myen Mungdan hte rau shanglawt la lai wa sai rai nga ai.

Photo: Jinghpaw Kasa

Shanglawt lu mayu ai hta shanglawt lu hkra gara hku hkawm sa wa ra na ta? Hpyen wa a ga re ai majaw n madat ai n re sha a kyu rawng ai lam ni hpe gaw katsi la ra nga ga ai. Aung San wa tsun lai wa ai ga gaw grai nan jaw nga ai. Shanglawt lu mayu ai a myu rai yang gaw shanglawt lu hkra galaw sa wa ra ai. Shanglawt lu mayu ai rai yang shanglawt lu giing ai hku hkawm sa wa ra nga ga ai. Nyi dik ga shadawn gaw July 9, 2011 hta rawt malan lu mat sai Ding Da Sudan Mungdan hpe yu yang mu na rai nga ai. Shan hte gaw asak hte silat hpe a rang shatai nna shaning law law wa rawt malan tai wa sai hte ti nang hpe up sha nga ai hpyen wa ti nang hpe hkap la, shara jaw wa hkra lu galaw lai wa masai.

2005 ning hta Sudan Asuya hte simsa lam la wa ai hpe yu yang mu lu na rai nga ai. Asuya tai ai ni hku nna n dai rawt malan hpung ni hpe dai mungdaw a Asuya langai mi hku hkap la wa masai. Shan hte a up hkang ai lam ni hpe mung Mungkan ting hkap la ai madang de du hkra lu galaw sa wa ai hte Mungdan langai mi hpe lu up hkang sai ngu ai hte ti nang lagaw ti nang tsap lu sai ngu ai hpe madun dan lai wa sai. Dai hte maren maigan hpyen hpe gara hku lu ning hkap hkra galaw lu ai ngu ai hpe mung lu madun ai. Bai nna mungdan kata nga jawng nga ai Myu sha ni a madi shadaw ai lam hpe mung 100% lu hkap la masai. Dai lam ni hpe la kap let Sudan asuya gaw shan hte hpe Shanglawt jaw dat sai majaw dai ni kabu gara rai nga ma ai.

Photo: Irrawaddy

Jinghpaw Wunpawng sha ni hta n dai lam ni n mai byin wa ai kun? Ga san san ra nga ga ai. Kadai hpe san na ta? Rawt malan hpeyn hpung hpe woi awn nga ai ni hpe kun? Makam masham hpung hpe woi awn nga ai ni kun? Myen hpe san na kun? Myu yu hpa rai nga ai. Kaja wa shanglawt lu mayu ai a myu ni rai nga ga yang gaw shanglawt lu sai hpang e galaw ra ai lam ni hpe dai ni kaw nna galaw ra nga sai. Myit jasat hpe mung shanglawt lu sai ni hku myit ra nga ai. Mungdan langai mi hpe gaw de sa wa sai ni hku nna myit sawn la ra nga ga ai. Dai re ai majaw kadai hpe san na ngu ai hta ti nang hkum ti nang ga san san ra nga ga sai.

Ngai kaja wa Shanglawt lu mayu ai kun? Ngai kaja wa Jinghpaw Wunpawng Mungdan gaw de sa wa sa na kun? Dai ga san hpe lu htai ai hte gaw Shanglawt gara hku lu hkra galaw sa wa na lam hpe e ning gam hte ning gam myit sawn yu let galaw sa wa ra sai. Hpyen gasat nga ai ni sha shanglawt lu hkra galaw ai ni n rai nga ai. Mung shawa ngu ai gaw gara Mungdan, Shing gim uhpawng kaw rai tim a hkyak dik htum ai rai nga ai. Shing gim uhpawng ngu ai hta Jinghpaw Wunpawng myu sha rai nga sai nang ngai yawng a lit rai nga ai. Myu sha ngu ai gaw Mungdan hpe pawn ba ai ni rai ra nga ga ai. Dai rai yang she Mungkan hta kaja wa galu kaba ai a myu sha tai wa na rai nga ga ai.

Photo: RYAN LIBRE

Mungdan langai mi hpe gara hku pawn ba na ta? Mungkan ting hta e Karai Kasang jaw ai shaman chyeju hta jan nna kaga, masha e tam la ai a rung a rai, a hkaw a hkang, nyan hpaji ni yawng mayawng gaw lama ma shawng jaw nna she lu la ai baw hkrai rai nga ai. Mungdan langai mi hpe galaw sa wa ai lam hta ti nang maga kaw nna jaw kau ra ai lam ni mung law law wa rai na rai nga ai. Mung masha ngu ai tai wa na nang ngai yawng hta e Mungdan hpe pawn ba na matu jaw kau ra ai lam ni hte lu la na lam ni law law wa nga na rai nga ai. A hkaw a hkang, a hking a ten ni law law wa jaw kau ra na rai nga ai. Ndai lam ni hpe e Mungkan Mungdan ni a Labau ni hpe tam sawk sagawn dat yang mu lu na rai nga ai.

Mungdan ningbaw langai mi tsun wa ai ga nga ai.

"Shanglawt lu yang gaw n'dai myu sha ni, shanglawt lu hkra galaw ai wa hpe masin pawt na mara ai. Hpa majaw nga yang shanglawt n lu shi yang hta na lu ngut ai hpang grau bungli galaw wa na re. Masha hkum shagu yi sun hkau na ni hpe galaw ra na. Shaning shagu Asuya hpe Kang (Tax) jaw ra ai lam ni nga wa na. Ti nang kam ai hku n mai hkawm sa wa ai lam ni nga na. Mungkan hpe shachyut ai lam ni nga wa na. Dai re ai majaw myit masin hpe n shajin da ai ni gaw pawt wa na mara ai."

Photo: Google Images

Ndai mabyin ni gaw Chyum laika hta mung rawng nga ai. Maw she Isreaela a myu ni hpe Egudu mung kaw nna Hka nan mung de woi wa ai shaloi byin ai mabyin hpe yu yang chye na rai nga ai.(Holy Bible) Dai re ai majaw Mungdan langai mi hpe pawn ba wa na matu ti nang hkum ti nang ga san ni hpe san ra nga ga ai. Ngai Jin Jin rai sai kun? Lu hkam la ai a kyu law law nga wa na zawn hkrat sum mat na a hkaw a hkang ni mung law law wa rai nga ai. Ti nang n kam ai hpe galaw ra ai ten nga wa ai zawn galaw mayu ai lam hpe tawn kau da ra ai lam ni mung law law byin wa chye nga ai.

'Democracy Mungdan ngu ai gaw Asuya, Mung masha tsang shagu, Masan, Lu su, Ma kaji yawng gaw madang langai mi kaw sha tsap let Mungdan gaw da tara hpe masha law malawng ra sharawng ai hku gaw de sa wa ai shing gim uhpawng masa hpe tsun ai rai nga ai.' (Wikipedia) N'dai masa ni hpe an-hte Jinghpaw Wunpawng Myu sha ni dai ni kaw nna jai lang wa ra sa ga ai. Mungdan langai mi gaw de sa wa ai lam hta

Mung masa
Tara masa
Hpaga masa
Hpyen masa
Hpaji masa etc... lam ni law law wa lawm nga ai.

N'dai lam ni hta lang ngai gara hku shang lawm sa wa na. Gara madang hku hkawm sa wa na ngu ai lam ni hpe law law wa myit sawn yu ra sai. Mungdan gaw de sa wa ai ngu ai hta Mung masa lam ni hpe law law wa chye ra ai zawn dai Jai lang nga ai mung masa lam ni mung yawng ma yawng ra sharawng ai lam hku rai ra nga ai. Dai hte maren Tara masa lam hta mung myu sha ting hpe lu up hkang ai, teng man ai lam hku lu hkawm sa wa mai ai, rawt jat galu kaba wa ai lam nga ai tara masa ni hpe jai lang ra nga ai.

Dai hte maren myu sha ting a hpaga lam hpe mung masing jahkrat ra nga ai. Asuya a gum hpraw Asuya tam la, mung masha a gum hpraw mung masha tam la ai lam hku gaw n mai nga sai. Myu sha ni a hpaga lam gaw Asuya a hpaga lam, Asuya a hpaga lam gaw Mung shawa a hpaga lam rai ra nga ai. Karai Kasang jaw da ai n hprang rai ni hpe Mung sha wa, Ausya ya gara hkaw jai lang sa wa na lam ni hpe mung yawng mayawng jawm myit bawng ban sa wa ra na rai nga ai. Masha hkum ding dek bungli galaw ra wa na hte, kai lu kai sha lam, jak rung jak rai galaw sa wa na lam ni yawng mayawng lawm nga ai.

Hpyen la hte Mung shawa gaw langai sha rai ra nga ai. Myen mungdan tha mang hkang byin nga ai lam gaw ndai rai nga ai. Hpyen la gaw hpyen la, Mung shawa gaw mung shawa rai san san rai taw nga ai lam rai nga ai. Dai re ai majaw anhte Jinghpaw Wunpawng sha ni a myit masin hta Mung shawa gaw hpyen la, hpyen la gaw mung shawa ngu ai myit masin hpe bang da yang Mungdan langai mi gaw de sa wa ai lam hta yak hkak ai lam ni n nga na rai nga ai.

Photo: WP Net

Hpaji hparat lam hpe madung dat ra saga ai. Hpaji n chye yang mungkan a hpang de du mat na rai nga ai. Dai re ai majaw hpaji chye hkra shakut ra saga ai. Hpaji shakut ai ngu ai hta laika hpe sha hti nna shakut ai baw mung n rai nga ai. Jawng gawk kaw sha hpaji hpe lu la ai baw n rai nga ai. Dai ni na Jinghpaw Wunpawng myu sha ni hta ra kadawn nga ai lam gaw ndai nan rai nga ai. Mungdan gaw de sa wa ai lam hta ra mara mahkra hpe mai byin ai daram ti nang mungdan kaw nan ti nang lu galaw ai rai yang Mungdan rawt jat wa na rai nga ai.

Ga shadawn hku tsun ga nga yang, Mare e maza hta ai kaw nna up hkang ai du salang ni hte hpaji hkin jawng ni du hkra Jinghpaw Wunpawng sha ni rai ra nga ai. Shing rai yang she ti nang Mungdan kata na sut gan ni masha amyu ni hpang de n du mat ai sha ti nang amyu ni sha bai lu jai lang na rai nga ai. N'dai lam hpe byin tai hkra hkrang shale sa wa ai rai yang Mungkan hta prat dep nna myi man pa ai a myu sha tai wa lu na re ngu nna ngai Ta Tut a ning mu hpe n dai made myi tang madun dat n ngai.

Prat Dep Ai Jinghpaw Wunpawng Mungdan De....

Ta Tut

Madi shadaw ai Laika hte Web page ni

Wikipedia (http://www.wikipedia.org)
Holy Bible Organization (http://www.holybible.org)
Slg. Naw Hkam a Independence Ninggang Laika (http://kachinnews.com/kachin)
Democratic Voice of Burma Shi sumla hkrung lamang (http://burmese.dvb.no)
Structure of the United State Government (http://www.theusgov.com)

(P.S:: N'dai laika gaw ngai Ta Tut a ning mu hte ngai na ga ai, hti ga ai laika hkan na shaw mahkawn la nna ka madun da ai sha re lam chye shangun dat nngai.)

Nang Hkrai A Shanglawt Lam (Post From 17/06/2008 Kachin Road)

2011-07-11T21:15:00.000+08:00

Ta Tut
Kachin Road
17/06/2008 (Repost)

Photo: Wunpawng Net

An-hte Jinghpaw Wunpawng sha ni shanglawt lawt wa ai gaw shaning 40 ning jan, 50 ning de du wa sai hku re. Ndai ram na mat ai rai tim an-hte Jinghpaw Wunpawng sha ni gahkyin gumdin ai lam, rawt galu kaba ai lam ni gaw Level Zero kaw sha naw nga ai hpe yawng chye na re.

Ndai hku ngai tsun yang nang n kam hkam na re. Ndai zawn gahkyin gumdin ai lam n nga ai gaw, an-hte Jinghpaw Wunpawng sha ni, marai langai mi hkrai hta Myu tsaw myit n rawng ai majaw n re. Jinghpaw Wunpawng sha ni daram myu tsaw myit rawng ai amyu Mungkan hta grai taw ai hku re.

Hpa majaw ndai hku tsun a ta nga yang, Maigan du Jinghpaw Wunpawng sha ni shada gahkyin gumdin let naw ku hpawng ni, htung hking hte seng ai hpawng ni, manau nau, htawng ka ka ai lam ni hpe yu yu yang chye na re.

Bai an-hte myu ni gaw rawt galu kaba ai lam hpe grai ra sharawng ai amyu re ai ngu ngai mu mada ai. Hpaw majaw shanglawt lawt ai 40 ning jan rai tim rawt galu kaba ai lam hta Level Zero sha naw nga ai myusha ni wa rawt galu kaba ai lam hpe grai ra sharawng ai rai ta nga yang, nam kahtawng hkan e naw nga ai Jinghpaw Wunpawng sha ni gaw ti nang a mare kahtawng hta Hpaji Jawng hte Naw ku jawng sha gaw lu hkra galaw da ai hkrai re ai lam mu lu ai.

Jinghpaw Mung na mare shagu kahtawng shagu ngu na daram Hpaji jawng hte Naw ku jawng ni hpe mu lu ai hkrai re. Dum nta hting gaw 3, 4 dang nga jang gaw Naw ku jawng hte Hpaji jawng lu ai hkrai rai nga ai. Ndai gaw grai htap htuk ai, rawt galu kaba lam hta grai madi shadaw jaw ai lam kaba ni rai nga ai.

Hpa majaw wa masha wa a mayam prat kaw na n lu lawt hkraw ai ta? An-hte a prat gaw shamu magang lup wa magang re ai hkum pup nawng hta lup nga ai hte bung nga sai re.

Jinghpaw Wunpawng sha ni gaw moi prat kaw na ti nang lagaw ti nang tsap mayu ai, ti nang hkum ti nang grai kam ai lam mu lu ai. Ndai zawn re ai lam ni gaw mai kaja ai ngu yang mung mai ai zawn n kaja ai ngu yang mung mai ai lam ni rai nga ai.

Photo: Wunpawng Net

Hpa majaw n dai hku ngu ai rai ta nga yang, rawt malan lu ngut sai muysha, ti nang mungdan ti nang lu up hkang sai myusha, rawt galu kaba sai myusha ni rai nga ga yang gaw ti nang lagaw ti nang tsap ai lam, ti nang hkum ti nang grai kam ai lam ni gaw mai kaja ai lam rai nga ai.

Rai tim an-hte myusha ni gaw rawt galu kaba ai lam mung rai tang n du, rawt malan mung rai n lu re ai ten ti nang hkum ti nang grai kam let masha wa hte mung n htuk, ti nang hkrai ti nang Mungdan hpe hkye na lam tam ai lam gaw n mai bin shi nga ai.

Ngai, ti nang hkum ti nang hkam let ti nang lagaw ti nang tsap ai lam hpe shut ai ngu n tsun ai. Rai tim a hkying a ten rai n re shi ai, naw gahkyin gumdin ra ai majaw masha wa hte rau bung li naw galaw ra ga ai.

Na a ning mu hkrai n rai, masha wa mu ai hpe mung myit ya ra ai a hkying a ten rai nga ga ai. An-hte kaw nga nga sai Hpaji jawng ni, Naw ku jawng ni hpe rawt jat wa hkra ‘Upgrade’ galaw ai lam ni hta rau myit hkrum let galaw ra nga ga ai.

An-hte a grai htap htuk ai lai len hpe grau galu kaba wa hkra jawm shakut ra ai hte, a hkyin a ten a majaw ti nang ra sharawng ai hta yawng ra sharawng ai hpe grau manu shadan ra nga ga ai.

Nang hkrai n rai, ngai hkrai n rai, yawng hte myit hkrum ra nga ga ai ngu yawng hpe saw lajin dat ai rai...

Prat Dep Ai Jinghpaw Wunpawng Mungdan De...

Ta Tut

HPYEN YEN TSIN YAM NI HPE GARUM NA MATU BUNGLI SHAGA LAIKA

2011-07-11T20:26:00.000+08:00

Photo: Jinghpaw Kasa Blog

Dai ni Jinghpaw Kasa Blog hta mu hkrup ai lam langai mi hpe Jinghpaw Wunpawng sha ni law law wa mulu na matu kalang bai ndai Dum N'ta Blog e kahtap mara dat n ngai. Gin lam gaw Shanglawt hte Myen Asuya lapran majan a majaw Wunpawng Mungdan Shanglawt Asuya a gin ra de hprawng shang wa ai hpyen hprawng 20,000 jan hpe garum shing tau ai alm ni galaw sa wa ai lam hta shang lawm na matu bungli ga saw ai n'dau laika pa rai nga ai. Yak hkak hkrum nga ai myu sha ni hpe dang di dang dep ai hku garum sa wa ga ngu ngai Ta Tut a hkroi a noi saw lajin dat n ngai. Ja gumhpraw hku garum na matu Blog laika man a Lapai maga na Donation sumla kaw dip nna matut mahkai hkring dat ni hpe yu la ga.

Majan (Ga Shagawp)

2011-07-10T20:24:00.001+08:00

Majan

Democracy Mungdan de

A Myen wa tut shapoi let

Ralata poi hta masu dang

Mungkan ting hpe gayin na

Shanglawt yu kaji

Htim na jin

Htim dat yang gaw

Bungli n byin

Gaya kahpa Mungkan hta

Tsin yam ni pyi Shanglawt nga

Myen hpe kam yang

Si na da

Mare kabai sinpraw de hkrai

Kam hpa sha ra Shanglawt hkrai

Shawng lam ma hkra Shanglawt hta

Chyeju dum ai Karai hpe nga

Mungkan ting yawng garu nga

Shanglawt hpe she shing daw na nga

Tsa dan wa a Asuya

Baw she hpraw hkra myit ru nga

Simsa lam la masu ka

Shanglawt hpe htim na magim nga

Dazik pyi n nga Asuya

Gara hku Mung hpe shapyaw na

Masha ma'nya Salang tai

Myen a kasa byin na nga

Myu hpe shayaw, a ngawk ka

Gaya n chye manyi hpa

Myu tsaw shayi shadang yawng

Myu hpe hkye na dai ni rawt

Wo nang n nga shawng de hprang

Karai lam hta baw sin ding yang

Jinghpaw Wunpawng rawt jat hkra

Shanglawt lu hkra shakut ga law...

Prat Dep Ai Jinghpaw Wunpawng Mungdan De...

Ta Tut

Hkru Gaw Langai (Post from 17/06/2008 Kachin Road)

2011-07-05T23:07:00.001+08:00

Lai wa sai 2008 ning June shata praw 17 ya shani Kachin Road Blog hta mara lai wa ai laika ngau hpe bai mara dat n ngai. Kachin Road ngu ai blog hpe n mai lang mat hkra password ni n mu tam mat ai majaw ya dai ni mu mada nga ai Dum N'ta Blog hpe galaw hpang wa ai rai nga ai. Yawng gaw langai sha re ai hte myit hkrum ra sai ngu ai lam hpe Jinghpaw Wunpawng amyu sha ni chye dum hprang ra sai.

Ta Tut

Kachin Road

17/06/2008 (Repost)

Jinghpaw Wunpawng sha ni Rawang, Lisu, Maru, Lachik, Zaiwa, Jinghpaw yawng amyu 6 rai nga ai hku re. Ndai ni yang pawng dat yang amyu 6 lu ai hku re. Rai tim dai hku ngu dat yang, ndai amyu ni gaw n bung hkat ai, hkung hking n bung ai ngu nang shadut na ra ai. An-hte myu sha ni gaw pawng dat yang langai sha rai ra nga ga ai.

Hpa majaw ta nga yang, moi shawng de Jinghpaw Wunpawng sha ni manau nau yang manau wang langai mi kaw sha n dai amyu 6 hte yang pawng let amyu langai zawn sha rau ka lai wa sai ni hkrai rai nga ai majaw re.

Ndai manau ni hta Myen nlawm ai, Maigan ni n lawm ai, an-hte Jinghpaw Wunpawng sha ni hkrai re. Moi shawng e nat jaw jaw sha ai ten hta Jinghpaw Wunpawng sha ni gaw yawng hkra nat dumsa wa a ga hta langai sha rai rau hkawm sa wa sai ni rai nga ai. Dai ten hta laika hpaji mung n nga ai, Karai Kasang hpe mung n chye shi ai a ten, ndai a ten ni hta an-hte ni grai myit hkrum lai wa sa ga ai.

Hpa majaw Karai Kasang hpe chye ai a myu, Laika lu ai amyu rai wa ai shaloi n myit hkrum ai kun? Moi Maigan ni tsun ai Jinghpaw Wunpawng sha ni gaw 50 ning jan yang a myu mat mat sana ni re nga yu kaji kau sai kaw na ya dai ni 100 ning jan du hkra grin nga let rawt galu kaba wa ai a myu rai nga ai.

An-hte amyu sha ni Laika lu ngut ai hpang Karai Kasang a lam ni hpe sharin a chyin let grai rawt galu kaba wa ai hte hpa mung n chye ai Nam masha ni kawn ya dai ni Mungkan hta Kachin nga masha ni chye wa ai a myu rai nga ai.

Moi shawng de Roma hkaw hkam ni Hkrisatan ni hpe kasat shamyit nga ai a ten hta Hkrisatan ni gaw grau rawt galu kaba wa ai zawn an-hte Jinghpaw Wunpawng sha ni mung grai rawt galu kaba wa sa ga ai.

Photo: RYAN LIBRE

Rai tim ya dai ni an-hte myu sha ni law law wa ti nang a myu sha madang hpe malap kau let, Maigan wa a htung hking hpe yu n gun lu let, Maigan lai lai wa ai lam ni hpe myit yu yang grai myit machyi ai hku re.

Nang n nga, Ngai n nga yawng mayawng gaw Jinghpaw Wunpawng buga e naw nga ai shaloi “Ngai Maigan du yang bungli law law galaw na, gumhpraw law law wa la wa nna Jinghpaw Wunpawng Buga hpe rawt jat hkra ngai shakut na”, nga myit ai ni hkrai rai na re ngu kam ai. Ndai hku she rai yang gaw grai htap htuk ai hku re.

Rai tim myit shalai kau ai hku rai yang gaw n mai nga ai. Jinghpaw Wunpawng Buga naw ngam nga ai ni hpe “Nye a jing hku gaw n rai, shan hte a lam nga hte hpa n seng ai”, hku nga dam. Nang shachyen dat u, na a Mayu Dama n rai yang Kahpu Kanau rai nan rai na re ngu ngai kam ai.

Maigan du mat jang na a myit hta “An-hte Jinghpaw Wunpawng sha ni mung Miwa myusha ni zawn Maigan buga e ti nang a Mungdan lu hkra shakut na re”, nga myit na ndai. Myit yu ga an-hte Jinghpaw Wunpawng sha ni Jinghpaw Wunpawng Mungdan hta pyi chyat hkra n lu nga shi ai ni re.

Myusha ni yawng pawng yang pyi Myen Hpyen La ni daram rai n rai shi nga ai. Nang masha lachyawk mi hte gara hku Maigan wa a lamu ga hpe madu la na? An-hte gaw masha n gun rai n law shi ai hta ti nang lagaw ti nang tsap ai baw galaw dat yang gaw, Na a Mungdan hta masha 1 sha nga na ndai.

Dai gaw nang sha rai na ndai. Yawng rau pawng let langai sha tai ra nga ga ai. Nang hkrai sha nrai, yawng rai tim 1 sha rai ra nga ga ai. Ya ten ngai rawng nga ai nta hte ngai ga shadawn jaw mayu n ngai. Nye a yup gawk hta ngai hkrai n re ai sha manang langai mi rau rau rawng n ngai. Ja gumhpraw mang hkang a majaw rai nga ai.

Photo: RYAN LIBRE

Ndai hta Jinghpaw Wunpawng buga e ngam nga sai n ta na nye a yup gawk hpe grai marit ai hku re. Hpa majaw nga yang yup gawk langai mi hta manang wa rau pawng nga yang grai n pyaw ai hpe nang mung chye na ndai.

Yup gawk gaw kaji, rai gaw law, grai n shu n shang nga hkam sha na ndai. Bai nang yup ra shang ai a ten, nang yup rawt ai a ten ni gaw na a manang wa hte n bung na rai nga ai. Ndai hku rai yang nang gara hku galaw na?

Myit yu ga, myu 6 lam ai n dai Jinghpaw Wunpawng ngu ai hpe an-the yawng pawng yang 1 sha n rai yang gara hku rau nga na? Gara hku Mungdan lu na lam jahta na? Dai majaw myit hkrum ra sai.

Nang Maigan ga du nga ai wa mung, Mungdan kata naw ngam nga ta sai ni mung, Myu hte mungdan a matu nga Magam gun nga ai ni mung, Karai Kasang a mayam ni mung rau sha myit hkrum let Mungdan rawt galu kaba lam hpe jam galaw yang gaw an-hte myu ni a Shanglawt pandung gaw nang shadu ai hta grau nyi na ndai.

Dai majaw nang gara kaw nga nga ai rai tim ti nang myu hte Mungdan a matu shakut nga a yang gaw grai htap htuk ai lam rai na re ngu yawng hpe lajin dat ai law.

(P.S: Maigan ga du tim, ti nang a myu shalam hta yawng hte 1 sha tai lu na matu lajin ai lam san san sha yaw shada ai hpe shana dat ai.)

Prat Dep Ai Jinghpaw Wunpawng Mungdan De...

Ta Tut

Lawan lahkam ra sai lagaw lahkam ni

2011-07-05T02:28:00.004+08:00

Bungli Gaw Ga Hta Grau Yak

www.jinghpawkasa.blogspot.com

Ndai laman Myen hte Jinghpaw Wunpawng Mungdan Shanglawt Asuya KIO/A a majan ni a tsa e maram yu let myit hta lama mi hpe myit dum lu ai. Dang la ai majan ni mung law law rai nga sai hpe mu lu ai majaw mung myit pyaw le kabu nga n ngai. Ndai lam hpe Jinghpaw Wunpawng sha re ai ni kadai mung myit lu na re, myit dum na re ngu mung ngai Ta Tut kam n ngai. Gara hku mi rai yang rai Bungli gaw Ga hta grau yak ai hpe ngai Ta Tut mung chye da n ngai. Tsun dat na loi ai daram galaw yang yak ai hpe law law lang mu chye lu sai hte maren chye na n'ngai.

Majan baw ai ni mung baw sai hte Awng Dang Lam pawt hpe hpaw dat sai ngu mu mada n ngai. Jam jau ai lam ni mung ya kaw nna law htam ai de she rai wa na re ngu mu mada ai. Hpyen hprawng masha mung grau law wa sana sha re ai hte Shanglawt hpyen la/num mung grau law wa sa na re. Si hkala hkrum ai mung lawm wa sa na re. Hkrat sum ai shara ni nga ai zawn awng padang dip la lu ai shara ni mung nga na rai sai. Hkap tau hkalum la ai ni nga ai zawn ning hkap ai ni mung nga sana re.

Grai ya gara hku shajin sa wa na? Bungli ngu ai gaw Ga hta grau yak ai. Majan ngu ai mung tsun ai hta grau shuk ai hte yak la ai bungli kaba rai nga ai. Ndai mabyin ni kam tim n kam tim byin wa sai re ai majaw, tawt lai n lu sai n dai mang hkang ni hpe Karai Kasang Jaw ai a hkaw a hkang re ngu hkap la let Karai Kasang jaw ya ai nyan baw nu ni hte myit sawn sum ru yu nna myit shajin let bungli galaw sa wa ra sai ga re ngu ngai Ta Tut mu mada n ngai.

Yi Hku Wan Hkru

www.jinghpawkasa.blogspot.com

An-hte Jinghpaw Wunpawng sha ni ya ten hta myit rawt ai lam ni grai nga ai hpe mu mada lu ai hte kabu nga n ngai. Rai tim n dai lam ni hpe Yi Hku Wan Hkru ai zawn jahkring sha n shamyit kau lu na matu shadi ra nga ai. Ya sha sinat noi nna sadi maja nga tim loi na wa ai hte myit pu ba wa ai hte madi shadaw ai lam ni yawm mat na hpe ngai Ta Tut grai myit tsang nngai. Grau nna Ramma rai nga ai an-hte ni gaw myit masin grai gin sup ai ni re ai hte Karai Kasang jaw ai a hkaw a hkang hpe n gawn n sawn di kau na hpe myit tsang nga n ngai. Ngai Ta Tut nan mung dai zawn byin wa na hpe myit dum let tsang nga nngai.

Wan Htung Kaba Hkra Wan N'htaw Shawn Nga Ga

RYAN LIBRE: Irrawaddy

Yi Hku Wan Hkru n byin na matu an-hte ni grai shajin ra sai. 2010 October shata hta KIO/A Ning Baw Malai Du Kaba N'Ban La tsun lai mat wa ai mung ga hta, "An'hte gaw Mungkan ga kaw rai n'ga bye shi ai an'hte a kashu kasha ni a matu du hkra myit nna bungli galaw ra ai" nga nna tsun lai wa ai hpe bai myit dum lu ai. Moi ngai Ta Tut Dap Dung 3 Nga Gyang Bum Lagaw, Mung Ga Zup, Zai Awng Mare hta nga ai shaloi masha kaba ni galaw mung shangun ai ga gaw "Wan Htung Kaba taw nga na matu gaw Hpung Zang law law hta da ra ai" nga ai.

Ya dai ni na Ramma rai nga ai an-hte ni gaw Zang da ai Ju Hpun ni hte bung nga ai. Ra wa ai ten hta e hta ju lu la matu Zang da ai hpun ni re. Ndai ju pun ni hta wan sau rawng nna kata e makri rawng let ju yang nana ju ra nna wan n gun lu ai ju hpun kaja ni tai ra nga ga ai. Dai re ai majaw ya ten e an'hte ramma ni lu ai hpaji baw nu ni hte Mungkan a lam ni hpe law law wa hka ja ra sa ga ai. Shanglawt lu mat ai rai tim Jinghpaw Wunpawng Mungdan ngu ai Mungkan hta dawng hkawng wa lu na matu shakut ra nga ga ai. Galu Kaba wa hkra jawm shakut ra ga ai.

Shanglawt Lu Masing

RYAN LIBRE: Irrawaddy

Simsa lam mi la yang la, majan mi baw yang baw, Jinghpaw Wunpawng sha ni a pandung kaw Shanglawt lu na matu rai nga ai. Dai re ai majaw Karai Kasang jaw ya ai a hkaw a hkang lu ai a ten hta e law law wa shakut ra sai ngu mu mada ai. N bung li gawt ai ni grau chye gawt hkra, Computer chye lang ai ni grau chye lang hkra, Sumla gayet ai ni grau chye gayet hkra, Mahkawn hkawn ai ni grau chye hkawn hkra, Maw Daw Gau ai ni grau chye gau hkra, Shiga shapoi ai ni grau chye shapoi hkra, Hkau na htu ai ni Mam grau pru hkra, Sun galaw ai ni grau lu hkra, Hpaga ga ai ni grau lau ban hkra, Hpyen gasat ai ni grau chye gasat hkra shakut ra sai.

Mungdan langai gaw de sa wa ai lam hta hpaji yawng mayawng ra nga ai. N'ta chye galaw ai ni mung an'hte rai ra ai. Hpa bungli sha rai tim an'hte Jinghpaw Wunpawng sha ni galaw ai nan rai ra nga sai. Dai rai yang she Mungdan kaba langai mi hpe prat madang dep hkra lu gaw de sa wa lu na rai nga ai. An'hte Ramma ni galaw sa wa ai lam ni yawng hta Shanglawt Lu Masing kaba jahkrat nna galaw sa ra sai.

Jinghpaw Wunpawng Gaw Shanglawt Sha Lawt Na N're

RYAN LIBRE: Irrawaddy

Jinghpaw Wunpawng myu sha ni gaw prat tup shanglawt sha lawt nga na ni n re ai hpe dum ra sai. Shanglawt lu ai hte Mungdan kaba, a myu kaba gaw de sa wa na ni re ai majaw Maigan du ai ni mung maiga na hpaji hpe hkaja la nna mungdan hpe gaw de sa wa ra sai. Hpaga ga ai ni mung Mungdan gaw de sa wa ai hta ra ai kaw jai lang lu na matu gumhpraw law law wa lu ra sai. Yi, Sun, Hkau Na galaw ai ni mung myu sha ni yawng sha lu na matu du hkra galaw sa wa ra sai. Shing rai yang she an-hte myu ni rawt galu kaba wa sa na re ngu mu mada ai.

Shawng Lam Lahkam

Dai ni hta Bungli Jin dum sai ni gaw lawan ai hku buga de bai wa nna Myu sha rawt lam hta jawm shang lawm ra sai. Bungli N'Jin shi ai ni mung lawan jin lu hkra masing kaba ni jahkrat nna galaw sa wa ra sai. Ti nang hkum ti nang kaji dum ai baw a ten n rai nga sai. Ngai ngu ai gaw Jinghpaw Wunpawng Mungdan re ngu ai hpe hkam la let Shawng lam na lahkam ni hpe lawan wan htawt ra sai ngu mu mada n ngai.

Karai Kasang Lajang Ya Nga Ai

www.jinghpawkasa.blogspot.com

Byin wa ai lam ni gaw hkrat sum na matu n'rai grau grau nna rawt galu kaba wa na matu Karai Kasang Woi Awn ya ai lam nre ngu ai hpe chye da ra nga ga ai. Majan byin wa ai gaw majoi byin wa ai n're. Lat Gyi Chyang Ying zing ri sat hkrum ai gaw majoi byin wa ai n're. Hpyen Hprawng ai masha n dai daram law wa ai gaw majoi byin wa ai n're. Myen wa an'hte hpe gasat shamyit kau mayu ai myit hpe Karai Kasang shan hte kaw bang ya ai gaw majoi n're ai ngu ai hpe dum ra sai. Ngai Laika hpaji sharin ai majoi n re, Ngai Bungli galaw ai majoi n're ngu ai hpe dum nga ga.

www.jinghpawkasa.blogspot.com

Moi shawng de Maw She gaw Israel ni hpe Hka Nan de Egypt kaw na woi wa ai sha loi Egypt hkaw hkam wa a myit masin hpe hpa majaw shaja ya ai ngu ai hpe dum ra ai. Byin wa ai lam ni yawng gaw Karai Kasang an'hte hpe Myen ni a lata kaw na shalawt mayu ai majaw re ngu ai hpe chye dum hprang ra nga ga ai. Dai re ai majaw ti nang kaw du wa ai a hkaw a hkang ni gaw kaja ai rai tim n kaja ai rai tim Karai Kasang kaw na du wa ai ngu ai hpe chye dum hprang ra nga sai.

Dai a hkaw a hkang ni gaw Shanglawt lu wa na matu re ngu ai hpe dum let gara hku a kyu jashawn lu na ngu ai hpe myit sumru let shajin sa wa nga ngu ngai Ta Tut n dai hte mi tsun madi madun let laika ka dat n ngai rai...

Prat Dep Ai Jinghpaw Wunpawng Mungdan De...
Ta Tut

Ngai myit lu ai Myen a Baw Nu.

2011-06-16T14:11:00.001+08:00

Ndai laman gasat poi ni law law byin pru wa ai hte na lu ai shiga ni mung grai n gun lu ai hte myit pyaw mai ai shiga ni hkrai rai nga ai. Myen Hpyen Dap a A Myawk Dap (Gunners) hpe lu jahten kau ai hte n kau shiga ni hta Myen a Madaw hte Tank ni hpe lu jahten kau ai nga ai hpe chye lu ai. Myen ni sum chyu sum wa ai majaw myit rawt hpa rai nga ai rai tim maga mi hku nna mung Ngai Ta Tut myit tsang ai lam ni pru wa ai hpe Nu, Wa, Hpu, Nau ni mung lu hti ding lun lu na matu ka dat n ngai.

N Tsen Ai Lam

Myen Asuya a Hpyen n gun dai daram law ai ai kaw na hpa majaw ya hten hta Wunpawng Mungdan Shanglawt Hpyen Dap Kachin Independence Army (KIA) hte byin ai gasat poi ni hta n gun nau n law ai lam hpe myit yu ra nga ai. Lung wa ai nga ai Myen n gun kaba ni mung shadu da ai, tak da ai daram n law ai hpe mu mada nngai. Dai re ai majaw ndai lam hta lamama ra taw ai kun ngu ngai myit dum lu nngai. Myen ni lamama hpe la taw ai kun ngu ai ga san ni Ngai Ta Tut a myit kata de shang wa ai re.

Byin Mai Ai Lam

Photo: OnAsia

Ndai Myen Hpyen gaw an-hte Jinghpaw Wunpawng sha ni a myit masin hpe gasat taw ai ngu ngai mu mada ai. Myen Hpyen Asuya a du salang ni a matu Hpyen La 500-600 si hkala mat ai ngu ai gaw hpa n ra ai hpe mu chye lu ai. Bai nna sagawn la ai shiga n kau mi hta e Myen Hpyen la ni hta an-hte Jinghpaw Wunpawng sha Rawang a myu ni mung lawm ai hpe mu mada ai. Bai nna Laiza daju de htu da ai Myen Hpyen dap ni hta moi NDA-K rai nga ai, ya ga jarit sin dap ni hpe sa tawn da ai hpe mung mu mada ai. NDA-K ning baw ding sa hpe mung rim tawn da ai lam ni hpe mu lu ai.

Ndai gaw majoi byin nga ai kun? Shing n rai Myen wa gaw an-hte Jinghpaw Wunpawng sha ni a myit jasat hpe shatsaw ya nga ai kun? Shing rai myit shatsaw ya ai shaloi kaja wa myit tsaw mat nna Hpyen wa hpe yu kaji ai lam ni pru wa ai rai yang gaw an-hte Jinghpaw Wunpawng sha ni a hkrat sum lam de sa wa nga ai ngu ngai mu mada ai. Dai re ai majaw Ngai Ta Tut a myit masin kata myit n zim lu nga ai. Majan byin ai ngu ai gaw n kaja ai. Rai tim ya na majan a majaw Miwa Sawa ni hprawng mat sai nga ai majaw grai kabu n ngai.

Gara Hku Shajin Da Na

Photo: OnAsia

Myit tsaw ai wa gaw galoi mung hkrat sum ai hpe mu lu ai. Chyum laika hta hti yu tim myit tsaw ai wa gaw Karai Kasang a shaman chyeju hpe n lu hkam la nga ai. Dai re ai majaw myit hpe shagrit shanyem nna Karai Kasang hta manoi ra nga ai. An-hte byin ai, ngai galaw ai majaw byin ai ngu ai myit hpe tsep kawp shamat kau ra nga ai. Hpyen la ni sha n rai, Myu sha ni a myit hta n dai hpe dawk bang da ra nga ai. An-hte gaw amyu kaji re ai majaw galaw sa wa ai lam ni hta Karai Kasang a shaman chyeju lawm ra nga ai.

Dai Rai Yang Hkrit Nga Ra Na Kun?

Photo: BBC

Myit shagrit shanyem ai ngu ai hta hkrit nga ra ai ngu tsun ai n rai nga ai. Chyum laika hta lawm ai David zawn re ai, Solomon zawn re ai ni yawng mayawng gaw myit shagrit shanyem nna Karai Kasang a ga madat let shan hte galaw ai lam hta Karai Kasang lawm ai hpe myit dum ma ai. Ti nang gaw kaji ai re ngu ai hpe chye nna Karai Kasang lam ai hte myit n den shaja let hpyen wa hpe gwi gwi gasat ai shaloi Karai Kasang shan hte hpe awng dam lam jaw ai re.

Dai re ai majaw An-hte Jinghpaw Wunpawng sha ni yawng mayawng Karai Kasang hpe manoi let myit n den shaja Awng Dang Hkrum lam hpe rau sha rawt sa wa ga ngu...

Prat Dep Ai Jinghpaw Wunpawng Mungdan De...

Ta Tut

MAJAN SHANG NA JIN GRIM!!!

2011-06-14T00:46:00.001+08:00

!!! MAJAN SHANG NA JIN GRIM !!!

Myen Hpyen Asuya gaw Wunpawng Mungdan Shanglawt Asuya Kachin Independence Organization (KIO) hpe sim sa lam jahta na nga tsun nna gap hkat jahkring na matu matut wa sai hku re. Rai tim maga mi hku nna mung gap ai hpe n jahkring let Kachin Independence Army (KIA) Bum Sen dap a shawng lam post langai mi hpe zing la kau ai hku re.

Bai Myen gaw Lahkawng Ya daram matut hkam jan nna sim sa lam hpe la ya na matu KIO hpe tsun wa ai rai tim lahkawng ya ngu ai gaw grai na ai majaw dai ni Bat Langai ya shani 12PM du hkra sha la ya na re lam shana lai wa sai hpe chyelu ai.

Dai ni du hkra rai tim Myen hpyen dap ai gasat ai lam ni jahkring kau ai lam n nga ai hte lawu mung na hpyen n gun ni hpe mung bai shaga jat la ai lam chye lu ai. Bai nna shiga langai mi hta gaw ndai majan hpe Myitkyina kaw na MA PA HKA kaw nna jum ai n re nna NayPyiDaw kaw nna jum tek taw ai lam hpe mu chye lu ai.

Dai re ai majaw Wunpawng Mungdan Shanglawt Asuya Laiza Dai Lawn Rung kaw nna ning baw ni a matsun hte maren "Padang Hkrun Lam" hpyen man hpe Jinghpaw Mung ting gasat sa wa na matu Order laika shapraw dat sai lam chye lu ai. Jinghpaw Wunpawng Myu sha ni yawng hpe roi ai n dai Myen hpyen ni hpe hkam sharang na lam n nga sai majaw Dai ni kaw na Myu sha yawng gasat poi hta shang lawm wa na matu lajin dat n ngai.

Kaga hpu nau rudi a myu sha ni mung KIO hte rau Myen hpyen Asuya hpe gasat sa wa na re lam tsun wa ai hpe mu lu ai hku re. Bai nna Sam, Karen, Kareni ni mung gasat nga sai hte, Wa, Mongla hte kaga rudi a myu ni yawng Mung kata majan hpe hpaw hpang wa sana re lam chyelu ai.

Dai re ai majaw an-hte Jinghpaw Wunpawng sha ni yawng myu tsaw myit rawng ai hte magrau grang grang rai, ang ai shara kaw nna Myen hpyen Asuya hpe gasat sa wa ga ngu ngai Ta Tut saw lajin dat n ngai rai...

Prat Dep Ai Jinghpaw Wunpawng Mungdan De...

Ta Tut

Kadai hpe hkra ai kun?

2011-06-13T17:07:00.002+08:00

Na lu ai shiga

Dai ni sha Sang Gan, N'mawk e gap hkat ai hta Dap Ba 3 lawu, Dung 15 a shawng lam post rai nga ai Bun Sen post kaw na hting nut kau ra sai lam na chye lu ai. Myen a masha n gun, sanat kaji kaba n gun law law hte gasat ai kaw na 3 ya ngu na shaloi tat kau ra ai lam chye lu ai. Shawng lam de na Shanglawt hpyen la ni a magrau grang ai lam ni hpe na chye lu ai majaw shan hte a matu grai a rawng la ai hte shakawn nna kam hpa ai hku re.

Ndai Bum Sen post kaw hpyen ni nlu dang ai rai yang gaw Jinghpaw Mung de hpyen ngun kaba ni dat nna majan kaba hpaw wa na masa hpe mung mu lu ai. Ndai laman na majan hta Myen si hkala ai lam ni law law nga ai zawn Shanglawt hpyen dap kaw na mung hpyen la 4 kaw na 6 lapran hkrat sum ai hte 10 jan hkala n ba hkrum ai lam na chye lu ai. Myit hta grai nga n pyaw ai hte hkrit ai myit ni mung rawng wa ai hku re. Rai tim Shanglawt hpyen la ngu ai gaw hkrit nna sha ngut mat ai baw n re nga ai.

Hpa majaw gasat ra

Lak nak jahkrat kau ai rai yang mung si na lam sha nga ai, Myen wa gaw kadai hpe mung hkyem sa chye jaw, chye na ai baw a myu n re nga ai. Dai majaw hkrit myit kaw nna Myit n gun de gale la nna shawng de htim sa wa ai baw rai nga ai. Ndai laman na majan hta Shanglawt hpyen dap kaw na a lak mi wa htim gasat ai lam n nga ai sha Myen wa hpe ti nang shara makap maga ai da ram hku sha gasat wa ai hpe mu lu ai. Bai nna Shanglawt hpyen la ni a atsam gaw grau nna masha myit hte Mungkan kaw na tawn da ai tara ni hpe hkang nang ai lam mu lu ai.

Mungkan kaw na hkap la ai tara shang hpyen la myit jasat

Rang rut la ai ten kaw nna Mungkan Wunpawng kaw na masat da ai hpyen myit jasat ni hpe laika hpa hte rai sharin tawn ai lam ni hpe mung mu lu ai. Ndai gaw Shanglawt lawt nga ai, majoi majan gasat mayu ai madang hku n re ai sha, Mungdan myu kaba myit jasat ni hpe lang taw ai hku re. Hpyen wa hpe rim tawn ti mung masha re ai hte maren a tsawm a kawm di tawn da ai. Ndai lam ni gaw Myen wa hta htam kade mung grau shawng nga ai.

Myen hpyen dap kaw na sat kau ya ai Lat Gi Sau Ying a mang hpe mung a tsawm sha makoi mayang kau sai hte Myen wa a masha myit n rawng ai lai len ni hpe mu mada sai hku re. Dai re ai majaw Jinghpaw Wunpawng sha ni chye tawn da ra na gaw, dai zawn re ai Myen wa an-hte hpe up hkang nga yang gaw gara hku rai tim rawt jat wa na n rai nga ai hpe chye da ra ai. Ndai ten hta an-hte ni yawng myit n mai garan nga sai hpe chye na ra sai ngu mu mada nngai.

Ngai

N masu ai sha a san sha tsun ga nga yang, ngai gaw maigan e nga taw ai wa re. Rai tim majan gasat wa ai lam chye lu ai shaloi hkrit ai myit rawng wa ai hte buga de wa na n gwi wa ai myit ni rawng wa ai hku re. Ngai a Dum N'ta mung Laiza buga kaw nga ai rai nga ai. Dai majaw grau hkrit myit ni rawng wa ai. Rai tim shawng lam ai nga taw ai myu tsaw mung tsaw hpyen la ni a lam hpe myit dat ai shaloi nye hkum ngai grai n rai dum wa ai hte myit n pyaw wa ai. Ngai gaw maigan ga de pyaw pyaw nga taw ai ten Buga de na myu tsaw hpyen la, hpyen num ni gaw majan kata asak hpe ap nna Myu hte Mungdan a matu gasat nga ai.

Kyu hpyi garum ya ti pyi myit hta nga npyaw wa ai hte grai garum mayu wa ai. Kyu hpyi myit dum ya ai hte dang di dang dep ai lam law law kaw na mung garum mayu wa ai. Ndai zawn re ai myit hpe maigan e nga ai Jinghpaw Wunpawng sha ni law law wa hkam sha na re ngu kam ai. Lai wa sai shaning ni hta e Maigan ga na Jinghpaw Wunpawng sha ni gum hpraw mahkawng nna Shanglawt hpyen dap de garum ai nga na lu ai. Ya dai ni kaja wa gasat wa masai. Dai re ai majaw an-hte ni yawng Mungkan Mungdan ni hpe tsun dan ra sai. An-hte Wunpawng sha ni gaw kaja wa sim sa lam hpe ra sharawng ai hte ti nang Mung hte myu hpe tsaw ra ai ni re ai lam tsun dan ra sai.

Yawng rau sha

Federal Union hpe lawan ai hku galaw na matu Myen Asuya hpe tsun shadut ra sai. Panglong ga sadi hpe myit dum na matu yawng hpe shadut ra sai. Myen Asuya gaw n tara ai lam ni hpe galaw nga ai lam ni hpe tsun dan ra na a ten du sai ngu ngai shadu ai. An-hte a Shanglawt Asuya hpe hkra ai gaw kadai hpe hkra ai n rai, nang ngai yawng hpe hkra ai hte bung ai hpe chye ra sai. KIO/A ngu ai gaw an-hte rai nna, an-hte ni gaw Panglong ga sadi hpe shatup mayu ai ni re lam Mungkan hting hpe chye shangun ra sai. KIO/A ngu ai gaw Mungshawa, dapshawa yawng hpe tsun ai re ngu ai hpe Mungkan hpe tsun dan let byin pru wa na Mang hkang ni yawng hpe lata hkin dun let rau jawm gasat sa wa ga ngu...

Prat Dep Ai Jinghpaw Wunpawng Mungdan De...

Ta Tut

Ban Mai Samahkyi Manau Poi Nam Chyim

2010-12-31T10:38:00.001+08:00

Laika Sara: Sumru

Thai mungdan a dingdung maga Chiang Mai mare kaba hte nau ntsan ai Chiang Dao ginwang Ban Mai Samahkyi ngu ai shara hta anthe Jinghpaw katawng langai mi nga ai. Dai Jinghpaw kahtawng gaw Myen mung lamu ga jarit, Tachyilik hte nau ntsan ai shara rai nna de a makau grup yin hkan gaw Ahka, Lahu, Lawa, amyu kaji ni hte rau rai, jawm galaw lu galaw sha let Miwa kahtawng langai mi hte mung htingbu yep sha rai jawm nga nga ma ai. Mare ting gaw dinggai dingla mahkawn shabrang ma kaji ni hte alum ala rai htinggaw 73 nga ai Jinghpaw katawng rai nga ai.

Ban Mai Manau Shadung

Jahpawt manap jau jau yup rawt wa yang muhkup saiwan ni mung mare kahtawng ting hpe shing grup ga-up tawn da let, grai simani la ai nshung sama bat sha wai nga bung shi kasha gaw ndum shami bung ahpawt wa nna htat la ai palawng lum kaba hpe dinghkren shang wa ai gaw kraw salum sindai kata hta wa ahtu kashung hkra shangun nga ai. Grup yin e shing grup da ai bumtsaw ntsa na bum pungding makau hku abwi sha rai garet pru wa ai jan ninghkaw gaw hkum ting kashung lakyi hkam sha nga ai lam hpe tau chye ya let abwi sha tsan kau ya nna hkum ting hpe lum shangun ai namchyim gaw Ban Mai Samahkyi mare a laklai shangun ai nam chyim nan rai nga ai.

Mare kata de nnan du shang wa yang mahkawn shabrang, dinggai dingla ma kaji ni a mani sumsai hte hkap tau shakram la ai nsen ni gaw Wunpawng sha ni a htunghking lai len hpe nmat ai sha hkang zing tawn ai hpe asan sha mu lu nga ai. Ngai mung ndai ram pyaw la ai Jinghpaw katawng a labau hpe nchye nmai sai ngu nna shana maga de Jidwi dingla ni nga ai shara hpe sagawn nna lung wa yu na re ngu ngai wa manam ai Mare Salang Lahpai Ja Naw a nta kaw nna lam hkawm lung wa yang, tsawm la ai nsam hkum hkra hte mawn sumli da ai manau shadaw ni hpe wa mu mau nngai.

Manau maka ni hpe yu shinggrup chyai nga yang de a makau kaw shangu hte galup da ai htap mi re kawa nta hpe mu nna shang wa yu yang nta nhku kata wan dap hkun lahkawng hte yup gawk lahkawng rawng ai rai nna Jidwi dingla ni hpe sa jahkrum ai manam ni mung nta she ashun wa hkra law nga ma ai. Daphkun hku wan kra dung nga ai Jidwi dingla ni mung ngai hpe mu ai hte ngaishu ngaisha e shangdung rit nga hkap shachyen la ma ai. Dai shaloi ngai na myit hta mare buga de bai nhtang du wa ai zawn nga hkra kabu hkam sha kau nngai.

Ban Mai Samahkyi mare hpe gaw de byin wa ai gaw 1961 ning hta anhte Jinghpaw Wunpawng Myu sha ni Myen Asuya hpe rawt malan gasat hpang wa ai kaw nna KIA hpyen la ni gaw Thai mungdan kata Thamngawp Bum ngu ai shara kaw Hpyen Dap sa jung da let, maigan mungdan ni hte matut mahkai htinglet hkat ai shara rai nga ai. Shawng nnan mare de hpang wa ai gaw Bang Myau ngu ai shara kaw rai nna galaw lu galaw sha yak hkak ai majaw 1982 ning hta she ya na Ban Mai Samahkyi mare kahtawng hpe wa mu tam la ai lam chye lu ai. Dai shara gaw Miwa ni yi sun galaw sha ai shara rai nna hka mung grai taw grai yak ai shara re ai lam Miwa ni hte mung lamu ga kashun hkat nna shada da shuk shanut hkat nga yang 1983 ning hta Thai Asuya hku nna shingteng amying dai daw wa masat shagrin da ya ai lam Jidwi Waje Gam kaw na chye la lu ai.

Nau Shawng

Moi gaw Myihprap wan mung nnga Modaw lam mung nhku, lu hka mung grai yak, dai lam ni hpe myitdum shingran dat shagu ya dai ni du hkra kraw kata hta nshungsi hprwi hprwi nga hkra naw hkam sha myit dum lu nngai nga nna galu galang hkai tsun dan ai.

Dai hpang Thai Hkaw Hkam Jan hku nna anhte bum nga masha ni hpe wa gawan jahkrum da ai kaw nna she thai mung dan ting anhte Jinghpaw ni hpe loi li chye wa ma ai. Shawng daw e gaw kaga myu sha ni re ngu nna masu nga ra ai hpa majaw nga yang Kachin ngu yang kadai mung nchye ma ai majaw kaga myu kaji ni a mying hpe lang ra ai. Dai majaw anhte manau gaw nau ra sai, ndai zawn sha makoi nga yang gaw nmai sai ngu nna 2002 ning hta shawg nnan manau lu nau hpang la saga ai. Dai hpang 2004 ning hta kalang 2007 ning hta kalang, dai ning 2010 ning hte rai yang mali lang lu nau saga ai.

Dai ning na Zupra manau gaw Karai Kasang a chyeju san san hte sha nmyit mada ai sumdaw sumtsan makyin jinghku law law hte hkrum zup lu ai majaw mung tsun ndang hkra kabu myit pyaw nngai. Banmai Samahkyi a yaw shatawng shada ai manau gaw; No. 1 Anhte Wunpawng myu sha ni nhkrum hkat mat ai ni hkrum zup lu nna mahku mahkau grau grau ngang kang jat wa na matu yaw shatawng shada let galaw ga ai. No. 2 Thai Hkaw Hkam wa hkum nngwi npyaw ai hpe hkamja wa na matu hte kaga myu kaji ni hte mahku mahkau galaw lu na matu yaw shada nna galaw ga ai nga nna Jidwi Waje Gam galu galang tsun hkai dan mat wa ai kaw na matsing la lu ai hku re.

Lak lai nna mau na zawn re lam gaw manau poi sa ai masha myu baw hpan hkum hkra wa, sa shang manau lawm ai hpe mu lu nna moi anhte Wunpawng myu sha ni manau nnan chye nau hpang wa ai shaloi, lagat hpun kaba kaw namsi namsaw sa sha ai u ni hpe yu la nna nau hpang wa ai zawn rai, maigan amyu masha hpan law law hkum hkra wa sa shang nau ai hpe mu nna grai kabu n-gun lu arawng mi alu rai grai wa manau nang lawm kau sai. Ban Mai manau hpe November 26-27 lahkawng ya tup manau dum nna, du sa ai masha jahpan tara shang lakmat ta masat htu tawn ai gaw 567 tup re lam hpe manam tau Shayi sha Palawng Nang Awng kaw nna chye la lu ai.

Rawang

Manau poi hta n-gun mi alu rai sa shang manau lawm ai htingbu myu kaji ni hte rai yang gaw marai hkying mi jan gaw rai na re ngu tak maram lu ai. Ndai poi lamang ni hpe byin tai wa lu hkra woi awn zinlum galaw woi ai Salang Gauri Jawa Zau gaw lahkawng ya tup nsen htawn jak kaw nna Jinghpaw ga hte Thai ga hku du sa wa ai maigan masha ni hte anhte Wunpawng myu sha ni hpe asan sha chye na hkra ga htawn tsun shalai ya ai a majaw manau poi sa shang nau ai ni yawng mung ba ai she nna hkra manau wang pyi hkyawk mat na daram agying agang nau pa pa la sai hku re.

Shana na lamang hta yungwi Shingni ni hku nna Sara Kaba Rev. Jawng Shaw Yaw Ying, Nga Dau, Galau Ting Luk, Myinzai Lum Naw, Kareng Ah Roi Awng ni sa shang shangwi shapyaw ma ai. Grau nna maigan masha ni mau ma ai gaw du sa wa ai masha hkying mi jan hpe lahkawng ya tup shat lu sha grai mu hkra daw jaw lu ai majaw tsun nma hkra kajai tsun jahta mat wa masai hte Banmai Samahkyi a manau poi hpe Karai Kasang chyeju gawp e angwi pyaw galaw awngdang la lu sai rai nga mali ai law.

Mungkan hta n hkru htum ai masha

2010-06-01T01:24:00.007+08:00

Shinggim masha langai mi n hkru n kaja ai ngu ai gaw gara kaw yu nna daw dan ai rai kun? Dai ni na Mungkan hta n hkru n kaja ai ngu ai hpe masha langai a arawn alai ni hpe yu maram let daw dan ma ai. Masu ai, Masha ni a lapran gin jang ai, Masha sat ai, Manang wa hpe machyi makaw byin hkra galaw ai, Maw lu maw sha ai, Masha wa a prat hpe jahten sharun ya ai. Ndai lam ni hpe yu yang kaja ai langai mi mung n lawm ai re. Dai ni hpe galaw tawt lai ai masha hpe n hkru n kaja ai ngu an-hte ni law law lang daw dan lai wa saga ai.

Photo by: Wikipedia.org

German masha mung rai, Mungkan majan II hpe hpang dat ai wa mung rai, masha sen, wan kaba hpe sat ai wa mung rai re ai Adolf Hitler hpe gara hku mu mada ai kun? Mungkan hta n hkru n kaja dik htum wa hku nna Mungkan masha ni mu mada ma ai. National Socialist German Workers' Party (snr) Nazi Party ngu ai mung masa party hte shi a mungdan a ning baw taw wa ai rai nna Jew ni hpe madung dat n ju ai hte Jew the kaga myu baw sang masha Wan 17 (Sen 17) jan hpe sat kau ai lam chye lu ai. Ndai daram n kaja ai wa gaw Mungkan hta n kaja dik htum rai na re ngu yawng mayawng sawn la ma ai.

Bai nna laiwa sai shaning hta e Indonesia hta masha langai mi maka sha ni hpe sat sha ai nga ai shiga ni hpe mung na lu lai wa sai. Dai la wa gaw ma kasha ni hpe rem da nna 7 ning, 8 ning du jang sat sha kau kau di ai re nga tsun ai. Bai nna shi a prat hta ma kasha 41 hpe sat sha ngut sai nga nna shiga hta ka da ai hpe mulu ai. dai wa hpe Indonesia Asuya gaw Mungdan kata hta n hkru dik htum wa hku nna masat let si a ri jaw kau sai lam mu lu ai. Ndai wa hpe yu yang grai nna masha myit n rawng ai sha ti nang bau da ai ma hpe ti nang nan bai sat sha ai ngu ai gaw grai nnan hkri gari na zawn re ai shiga langai mi rai nga ai. Shi hpe n hkru dik htum ngu tsun na kun?

Shinggim masha langai mi n hkru ai lam ni hpe galaw wa ai gaw myit masin a majaw rai nga ai. Manghkang langai ngai byin wa ai hte shi a ning pawt hpe yu dat ga nga yang myit masin n hkrak ai a majaw rai nga ai. Kaning re ai myit masin a majaw n hkru ai bungli ni hpe galaw wa ai kun? Ti nang a myit masin kata hta ti nang hkrai sha rawng nna masha wa hpe shara n jaw lu ai ni a myit masin gaw n hkru ai bungli hpe galaw na loi dik htum rai nga ai. Masha langai mi ti nang hkum ti nang nau kam shalai kau nna masha wa tsun ai hpa lam hpe mung n lu madat, myit masin hta n lu hkap la ai rai yang gaw ti nang galaw taw ai hpe jaw ai hkrai shadu ma ai.

Mara kade kaba ai lam hpe galaw taw nga ai rai tim, ti nang galaw ai hpe ti nang jaw dum nna masha wa tsun ai ga hpe n hkap la ai majaw n hkru ai lam ni hpe galaw mat ai rai nga ai. Adolf Hitler hpe yu dat yang Jew masha ni hpe sat ai shaloi masha ni hku nna n dai hpe ning hkap ai rai tim shi a myit masin kata hta n shang shangun ai a majaw shi galaw ai hpe shi jaw dum lai wa sai hpe mu lu ai. Masha sat ai ngu ai gaw n hkru la ai bungli rai tim shi a myit hta Jew ni hpe sat ai gaw ti nang a myu hte mungdan a matu kaja ai lam hpe galaw nga ai re ngu nna hkam la nga ding yang rai nga ai. Dai majaw Jew law law lu sat magang shi a awng dang lam kaba magang re ai hpe shadu lai wa sai.

Dai ni na prat hta American myu sha ni law malawng gaw masha a myu ni hte tsun shaga ai lam hta, grai zai ai hpe mu lu na re. Gasha ga shagu matsa mawa ga ni hpe n tsun shalawm yang ga shaga n pyaw dum ai ni rai ma ai. Hpa majaw kun ngu ai myit yu dat yang shan hte a myit masin kata e masha wa a matu myit ya na a tsam n nga ai majaw re ai hpe mu mada ai. Dai ni na Jinghpaw Wunpawng shani hpa majaw masha a myu ni hte shingdaw dat yang grau nna si manyi nga ai kun? Mahtai gaw an-hte Jinghpaw Wunpawng sha ni gaw kaji ten kaw nna kaba wa ai ten du hkra ti nang a dum n-ta masha ni hte ahkum alum nga kaba wa ai ni law ai majaw masha wa hpe myit ya lu ai myit masin lu da ai ni hkrai rai nga ma ai.

Dai re ai majaw Mungkan hta n hkru htum ai wa gaw ti nang hkum ti nang nau kam shalai kau nna, masha wa a matu kaji mi mung shara n lu jaw ai masha rai nga ai. Laika hti kahpu kanau, myit su ni yawng mung myit shing wang hpe kaba da nna masha wa hpe ti nang a myit masin kata hta shara jaw lu ai rai taw gaw, hkum zup re ai Jinghpaw Mungdan lu gaw de sa wa na sha re ngu ndai laika ngau hte hpaji jaw dat mayu n ngai rai...

Amyu kaba ngu ai hta...

2010-05-22T02:41:00.001+08:00

Information Technology (IT) ngu ai Mungkan hpung tang hpaji gaw 3000BC ning daram kaw na shinggim masha ni jai lang wa masai. Dai ni na prat hpe gaw masha ni IT prat nga ma ai. Moi shawng de shara mi kaw na shara mi de laika shagun na nga yang masum mali ya kaw na, shata kaba hku na ra ai re. Dai ni na IT prat hta gaw Internet ngu ai digram kata kaw na E-mail hte grai lawan ai hku mai matut mahkai hkat nga sai. Mungkan sina kaw na Mungkan sinprawt de laika shagun yang pyi manit mi pyi n na ai sha laika hpe lu sa mai ai.

Mungkan hta IT n lang ai mungdan ngu ai n nga ai daram rai mat wa ai hpe mu lu ai. Myen mungdan kaw mung dai ni na prat hta IT hpe law law wa lang wa sai hpe mu lu ai. Asuya, Mung masha gawn hkang hpung ni (Non Governmental Organizations NGO), Hpaga hpung ni (Companies), Masha uhpung uhpawng digram ni (Social Network) yawng ngu na daram IT hpe madung dat a kyu jashawng nga ma ai. IT a majaw a ten kadun hte bungli hpe mai shangut ai. Masha n'gun law law wa n shaw ra ai. Manu hpa ai majaw dai ni na Mungkan hta madung dat lang ra ai Hpaji langai mi rai nga ai.

Moi na ni gaw mare kata nga ai ramma ni yawng zup na matu mare kata e wan dap kaba wut tawn da nna bungli ngut ai hte ramma ni yawng dai kaw zup let tsun jahta chyai ma ai. Shani byin lai wa ai lam ni, mare galu kaba lam ni, sum taw sum ra lam ni, makam masham lam ni hpe dai wan dap makau e tsun jahta ma ai. Bai Mungdan ting masa hku zup hpawng lu na matu shara lata, n htoi lata let poi kaba ni galaw nna zup hpawng ma ai. Tsun ra ai lam ni, bawng ban ra ai lam ni yawng hpe dai ten hta sha mai tsun ding lun hkat ai, mai bawng ban hkat ai rai nga ai. Dai ten n lu bawng ban yang gaw hpang na kalang dai zawn zup hpawng lu na ten hpe bai la ra ai. Ndai gaw moi shawng na masha ni zup hpawng ai ladat ni rai nga ai.

Dai ni na IT prat hta e Internet n tsa kaw Social Network ni hpe hpawt ning htan let kam ai ten hkrum shaga lu hkra galaw da ma ai. Ah ten n na ai, lawan ai hku masha law law wa kalang hta mai hkrum zup lu ai. Chatting ngu ai Online (digram mahkret n tsa) e ga shaga hkat ai hku nna mai hkrum zup ai zawn Online Video Chatting ngu ai Camera kaw na masha hkum hpe yu let tsun jahta hkat ai baw ni hte mai zup hpawng ai hku re. Moi shawng de na ladat ni hte shingdaw dat yu yang a ten, n'gun ni grai hkyem sa ai hpe mu lu ai. Dai ni an-hte Jinghpaw Wunpawng sha ni mung IT prat hta IT madang dep ai hku ramma ni law law wa sak hkrung nga sai hpe mu lu ai.

Ndai kaw ngai chye ai Jinghpaw ga hte Jinghpaw ni hkrai zup hpawng ai Social Network langai mi hpe tsun ga nga yang Wunpawng Zupra rai na re. Kaga mungkan ting madang hku jai lang nga ai Social Network ni grai law ai hku re. Facebook, Twitter, My Space, Friendster, Hi5 etc... Ndai Social Network ni hta mahsa mun, sen kaba hku shang lawm let Mungkan ting madang hku zup hpawng nga ai hpe mu lu ai. Ndai Wunpawng Zupra mung Social Network langai mi rai nna Jinghpaw ni hkrai san rai nga ai Network langai mi rai nga ai. Ndai hta manang tam ai lam ni, shada da matut mahkai hkat ai lam ni, ti nang hkam sha ai lam hpe manang ni hpe garan yu ai lam ni, manang wa hkam sha ai lam hta ti nang a ning mu ni hte ding lun yu ai lam ni hpe galaw ai lam mu lu ai.

Hpaji hte shiga ni hpe shada da galai garan hkat ai lam re ai majaw uhpung uhpawng langai mi, a myu sha langai mi hpe madang shatsaw ya ai, myu tsaw myit sha rawt ya ai lam re ai majaw grai htap htuk di la nga ai. Mungkan shara shagu de chyam bra nga ai hta ti nang du nga ai shara hkan na lam ni hte hpaji ni hpe garan hkat ai zawn buga de nga ai ramma ni mung buga a mabyin masa ni hte ning mu ni hpe tsun n dau hkat ai hpe mu lu ai. Masha amyu ni hta grau n tsaw tim grai gaw n hpang hkrat nga sai re lam mu mada lu ai. Blog ngu ai ti nang a hkam sha lam ni hpe garan ai laika man ni hpe mung law law wa mu lu wa sai. E.g. Shanglawt, Shanghtin, Nbwi Sam, Kachin Review, Dum N-ta etc... Shiga hte seng ai ni KNG, Kachin Net, Kachin Post, Kachin State, Kachin Voice, Today Kachin etc...

Ndai zawn ning mu ni hpe garan hkat ai hta amyu kaji myit myit nna matsa mawa nga tsun shaga hkat ai ni hpe mung Wunpawng Zupra hta mu lai wa sai. Kaga Social Network ni hkan e mungdai zawn re ai lam ni nga na hpe chye na lu ai. Ndai hta mu mada lu ai lam gaw digram n tsa (Online) hta sha tsun shaga hkat ai lam hta pyi myit n hkrum ai sha galaw hkat wa ai ra yang gaw amyu kaba byin tai wa lu na gaw grai yak na re ngu mu mada ai. Ndai prat na ramma ni hta ra nga ai gaw zai ladat hte hkawm sha chye ra ai hpaji re ngu ngai mu mada ai. Ti nang a hkam sha ai lam hpe tsun shdan shaleng dan ai lam hpe shut ai ngu n tsun mayu tim n jaw ai ngu mu mada ai. Ramma ni kaw na ning baw ning la ni byin tai wa na re ai majaw ramma ngu ai gaw grai a hkyak ai ngu mu mada ai.

Tsun shaga ai lam ni hta masha wa ti nang hpe nyet kau wa ai baw n byin na a hkyak la nga ai. Dai ni na IT prat hta kadai gaw kadai hpe shaga nga ai n chye lu ai re nga nna kam mara n mai tsun nga ai. Hpa majaw nga yang ti nang tsun dat ai ga ni gaw masha hkum ding dek kadai tsun ai re n chye lu ai rai tim Jinghpaw ramma ngu ai hpe gawng malai tai nga ai hpe myit dum ra nga ai. Masha kaba ni tsun ai ga malai nga ai. "Maka n kap ai" ngu ai ga re. Kaja wa myit yu ga ti nang bu hpun na htung hking bu hpun palawng hta Maka n kap yang gaw grai yu n tsawm la nga ai. Dai re ai majaw ti nang langai mi kam mara tsun dat ai a marang e Jinghpaw Ramma ting hpe masha ni Maka n kap ai ngu tsun kaw na hpe myit dum ra nga ai.

Bai nna sumla ni hpe madun ai lam ni hta mung ti nang amyu htung hking hte htap htuk ai sumla ni hpe sha madun yang kaja ai ngu mu mada ai. Ya part hta gaw sumla gayet ai lam hta htaw ra, le ra shadap da ai lam ni nga yang she prat dep ai ngu shadu ma ai. Rai nga ai dai zawn shadap dan yang masha law law wa myit shang sha ai zawn mying mung grai gum hkawng lawan nga ai. European langai mi dai zawn galaw yang kadai mung n kaja ai n shadu ma ai. American langai mi dai zawn shadap da yang tsawm ai ngu nna tsun shakawn na mara ai. Miwa, Japan, Korea ni dai hku rai taw yang masha ni grai ra sha na ma ai. Rai tim Jinghpaw langai mi dai zawn ti nang a Social Network kaw galaw dat yang Jinghpaw ni grai zai ma ai nga tsun na mara ai.

Hpa majaw nga yang ti nang gaw naw kaji kadun nga ai majaw rai nga ai. Ndai Mungdan kaba ni a a myu sha ni gaw shan hte hkum shan hte hpa galaw tim jaw ai hkrai sadu mat ma ai. Dai majaw Mungdan langai, a myu langai rawt jat mat jang Karai Kasang hpe malap kau wa ma ai. Dai zawn byin mat jang dai Mungdan, a myu sha hten run mat na matu grai loi la nga ai. Dai hte maren dai zawn chye dum, rai dum ai ni gaw ti nang hta naw kaji kadun nga ai ni galaw ai lam ni hpe mara grai chye tam ma ai. Dai re ai majaw ti nang Jinghpaw rai nga sai hte maren Jinghpaw ni a gawng malai tai nga ai majaw galaw sa wa ai lam ni yawng gaw sum num sumdi ai lam ni sha rai nga na hpe myit mada ra nga ga ai.

Ti nang shada da sha n rai, hpyen wa hte tsun shaga ai lam ni hta mung ti nang hku na mara tawt lai ai hku n byin hkra grai nan si manyi ra nga ai. Ti nang tsun dat ai ga a majaw ti nang hpe masha wa mara jaw n hkrum hkra sadi ra ai. Bai nna shada da mara madun nna sharai ai lam hta mung manang wa myit daw myit hten mat hkra n mai galaw nga ai. Shi hpe chye na hkra tsun shadum nna lam kaja de madi madun la ra ai. Dai hku rai yang she si manyi nna sum num sumdi re ai amyu kaba byin tai wa na re ngu mu mada ai. IT prat hta masha wa a madang hpe dep lu na matu ti nang hkrai gaw shawng de n mai sit mat na re. Amyu sha ting hpe ta woi hkin dun la nna shawng de lahkam sa wa ai gaw grai nna mai kaja ai ngu mu mada ai.

Jinghpaw myu sha ni IT prat hpe madang tsaw dik ai hku tawt lai lu u ga ngu kyu hpyi dat ai.

Tsit gat lawk

2010-04-29T22:34:00.018+08:00

Lung Seng gara kaw na pru? (Ga Hpaw)

Jinghpaw Buga gaw Tsit n sam hte Mungkan hta ming gum hkawng ai rai nga ai. Tsit tsawm ai bum pa layang ni, San tsit la ai Mali hka kaba, tsit tsawm la ai Mailung pun sau ni rai nga ai. Dai hta Tsit tsawm nna manu laja la ai hte masha shagu yu ra ai manu dan sut n lung Lung Seng gaw ming gum hkawng la ai zawn masha shagu lu madu mayu ai manu dan rai langai mi rai nga ai. Mungkan hta kaba dik Lung Seng n hkrun mung Jinghpaw Mung Hpakan buga hta sha nga ai re.

Miwa, Myen, Sam, Gala, Jinghpaw ni law law wa Company kaba ni hpaw, prat dep jak rung jak rai ni, masha n gun kaba ni hte shani shana htu sha nga ai gaw shaning ni grai na mat sai rai nga ai. Jinghpaw Lauban law law hpe mung sha prat ya ai Kanu buga rai nga ai Lung Seng dabang kaba Hpakan buga hta e gumhpraw law ai hte maren hten za ai lam mung law la nga ai. Ramma ni kaw na sak kung kaba ni du hkra Tsa Chyaru, Kani praw, Tsi mawan, Shawa Num ni law law hte hten za wa ai gaw mi chyaw nan rai nga ga ai. Jinghpaw Lauban law law paw pru ai zawn law law wa mung dai pyaw hpa lam ni hta sha prat hpe jahtum kau ma ai.

Madu shut nga sai Lung Seng

Ndai Tsit ai n sam hte ming gumhkawng nga ai Hpakan buga hpe moi shawng de Shanglawt Asuya KIO/A (Kachin Independence Organization/Army) ni up hkang lai wa sai rai nga ai. 1995 ning, simsa lam la ai shaloi Myen hpang de up kau sai hte dai hten kaw na ya du hkra Hpakan buga na Lung Seng hpaga ni yawng hpe Myen ni jum htet da ai rai nga ai. Manu law law dan ai Lung Seng ni hpe Mungkan de dut shabra ai shaloi Myen gumhpraw hte n rai Maigan Gumhpraw Euro ($) hte Lawu Myen Mung, Yangon Mare kaba hta sa htaw dut sha ra ai re. Lung Seng pru ai Hpakan Buga e gaw Lung Seng mari dut ai lam ni hpe Ga npu gat (Tara n shang) hku sha mai mari dut sha ai rai nga ai.

Dai majaw Hpakan Buga na Lung Seng a jaw e Myen Asuya gaw shaning shagu Euro ($) gumhpraw Wan Kaba shang gumhpraw nga ai rai nga ai. Mungkan ting hpe Lung Seng shabra ya ai Jinghpaw Mung hta e dai ni Lung Seng gun rai ni mari lu na grai yak la nga ai. Ga sadawn, Lung Seng Ta Hkawn kaja langai mi mari na matu grai yak la nga ai. Gumhpraw lu tim rai n lu tam ai baw prat de du wa sai rai nga ai. Yangon Mare kaba e dut sha ai Lung Seng ni hpe ngai mu yu n ngai. Lung Seng shagu ngu na daram Ta Hkawn kaja ni grai lu shapraw la ai baw hkrai rai nga ai. Rai tim dai Lung Seng ni gara de du mat nna hpa baw byin mat ai gaw chye ai masha nau n nga ai re.

Lung Seng gat lawk gara de ta?

Lung Seng manu mana shale ai Hpakan buga, Jinghpaw Mung hta hpa majaw Lung Seng gun rai gat lawk n nga ai rai ta? Jinghpaw ni Lung Seng galaw sha ai gaw ban kade pyi she rai wa sai. Rai tim dai ni du hkra Jinghpaw Buga e Lung Seng gun rai gat lawk n byi tai wa ai gaw kade a mara rai ai kun? An-hte myit yu hpa rai nga ai. Yawng hpe san dat yawng mahtai gaw langai sha pru wa ma ai. Dai gaw "Asuya kawn a hkaw a hkang n jaw ai majaw, Myen ni up sha nga ai majaw, Miwa ni gumhpraw rau ga up da ai majaw." N dai mahtai hpe sha ngai lu la ai. Ndai mahtai hpe ngai n lu hkap la ai lam ni nga ai hku re.

Lung Seng gat lawk n lu galaw ai lam ni.

Langai hku na gaw an-hte Jinghpaw Wunpawng sha ni Lung Seng hpe e a tawng a pa hku sha tam sha mayu nna gun rai galaw na hpaji hpe n kam sharin ai majaw re ngu mu mada ai. Chye ai ni mung nga na rai tim dai hpe a kyu n jashawn chye ai ngu mu mada ai. Myen Asuya n hkraw ai ngu nna jahpai let lung seng gun rai shatsawm ai lata hpaji hpe n gawn n sawn di ai majaw re ngu mu mada ai. Ndai gaw Nambat langai shut taw nga ai myit masa re.

Lahkawng hta Myen Mung hta shara n nga ai nga yang Miwa ga jarit Ruili (Shwe Li), Ying Jiang hkan e Myen, Sam, Miwa ni Lung Seng hpaga ga sha ai zawn gat lawk mai galaw la ai rai nga ai. Rai tim ngai mu mada ai daram gaw Jinghpaw Lauban ni dai shara hkan e du tim Lung Seng a tawng a pa hpe sha grau myit shang sha ai hpe mu lu ai. Ndai mung masha wa hpe gat lawk jaw kau ra ai a lam langai mi hku mu mada ai hku re.

Masum ngu na hta ti nang a Lung Seng a tawng a pa hpe masha wa hpe dut ya kau nna masha wa dai n lung hte sha bai shaprawt dat ai Lung Seng gun rai ni hpe mi na hta grau manu hpu ai hku bai mari lang ra ai a majaw gat lawk n lu hpaw ai re ngu mu mada ai. Ti nang a Lung Seng a tawng a pa hpe manu sha ja ma gang ti nang a hpa ga grau sum wa magang re ai hte bung ai ngu mu mada ai.

Gat lawk jum ai Miwa.

Ngai Guangzhou ngu ai Miwa mung na Lung Seng gat lawk de sa du yu yang mau mat ai. Lung Seng gun rai ni wa manu mana law hkra dut lu dut sha nga ai hpe mu lu ai. N dai lung seng gun rai ni yawng gaw Jinghpaw Mung, Hpakan buga na Lung Seng ni kaw na byin wa ai gun rai ni hkrai rai nga ai. Lung Seng hpaga galaw ai Companies yawng 10,000 jan hkawt dai shara kaw nga ai. Myen Mung na mari la ai Lung Seng a tawng a pa ni hpe gun rai bai shaprawt nna manu law law hte dut sha nga ai Seng ni hpe mung 1000, 10,000 lam mu lu ai majaw ngai mau mat ai.

Prat n'htang hkawm nga ai.

Jinghpaw Mung, Hpakan buga na Lung Seng n hkrun ni de Lung Seng sa tam tim dai ram law ai lung seng ni n nga sai. Lung Seng gat lawk ni yawng hpe Miwa ni jum da ai hpe mu lu ai. Hpakan buga na Lung Seng a tawng a pa ni a manu hpe shan hte tsun ai hku sha mai dut sha mat ai prat rai taw nga ai. Kaja wa nga yang Jinghpaw Buga kaw Lung Seng pru ai majaw Jinghpaw ni tsun ai manu hte shan hte mari lara ai rai nga ai. Rai tim ya gaw shan hte tsun ai manu hte dut ya ra mat ai prat rai taw nga sai re.

Ndai gaw hpa baw a majaw kun? Mahtai gaw ti nang buga hta e dai zawn kaba ai gat lawk n nga ai majaw rai nga ai. Shi n mari yang kadai manu n jaw ai ngu ai myit hte Hpakan buga na Lung Seng ni hpe kam ai hku manu daw dan ya nga ma ai re. Shan hte Miwa ni manu shayawm kau ya yang dai manu yawm ai hku sha Jinghpaw ni lu dut sha ai re. Shan hte Miwa ni bai Lung Seng gun rai dut ai shaloi manu jahpu yang Jinghpaw ni manu hpu hpu hte bai mari lang ra ai prat rai nga ai. Ndai gaw prat n htang hkawm nga ai hte bung ai ngu ngai mu mada ai.

Labau tai mat na tsang ai.

Ndai zawn sha naw byin nga ga nga yang kade n na ai hten ni hta e Lung Seng ngu ai hpe mu mayu jang Miwa ga de sa yu yu ra mat ai baw prat de du wa magang sana re ngu ngai shadu n ngai. Re, an-hte Jinghpaw Buga gaw Lung Seng pru dik htum hku nna Mungkan madang hta tsap nga ai rai tim dai gaw Labau sha tai mat nna ti nang buga manu dan rai hpe masha wa a Mungdan hta manu jahpu ja ja jaw let sa yu ra mat ai prat de du wa chye ai baw rai nga ai.

Dai majaw an-hte Jinghpaw Wunpawng sha ni gaw ya kaw nna ti nang lu da Lung Seng hpe ti nang nan gun rai lu shapraw hkra, Company kaba ni lu hpaw wa nna Mungkan Lung Seng gat lawk hpe ti nang a lata hta lu jum du lu hkra shakut ra sai rai nga ai. Lung Seng gun rai shapraw na matu lata hpaji ni hpe sharin ra yang mung sharin ra ai baw rai nga ai. Hpaji lu, gun rai mung lu rai yang gaw Lung Seng mari mayu ai ni an-hte Jinghpaw ni tsun ai manu hte mari ra ai prat de bai du wa na rai nga ai.

Ti nang a lata na Mungkan hpaga lam kaba. (Ga Dat)

Ramma nkau mi gaw Maigan sa nna laika buk manu mana htat ai baw laika hpaji sharin yang she gumhpraw mai tam la ai baw shadu ai ni law law naw nga ma ai. Kaja wa nga yang ti nang a lata hta rawng nga ai manu dan ai rai ni hpe ti nang nan gat lawk paw nna galaw lu galaw sha ai rai yang gaw grau nna shang gumhpraw lu la ai baw rai nga ai. "Myen Mung kaw na nga ai majaw hpa bungli n lu ai law. Malaysia sa na law. Thailand sa na law." Dai zawn nga nna mau nga ai ramma ni law law rai nga ai.

An-hte a lata hta n dai hpaga gat lawk hpe lu jum tek da ai rai chyawm gaw, Mungdan lu la na matu gasat wa ai ten hta mung madi shadaw kaba ni lu la wa mai ai baw re ngu mu mada ai. Jinghpaw Wunpawng sha ni lu sut lu su yang she Jinghpaw Wunpawng Hpyen dap mung n gun ja wa na. Jinghpaw Wunpawng Hpyen Dap n gun ja wa yang she Jinghpaw Wunpawng Mungdan gaw de ai lam hta ding bai ding na n nga na ngu mu mada ai.

Mung masa ngu ai gaw si nat lang ai ni sha nrai gumhpraw lang ai ni mung madi shadaw kaba mai tai nga ai ngu...

Madu hte Mayam

2010-03-26T14:35:00.003+08:00

Dai ni na Mungkan hta Madu a myu hte Mayam a myu ngu ai nga ai ngu ai hpe Mungkan labau ni hpe hti dat ai hte a san sha mu lu na re. N kau Mungdan ni gaw ti nang Mungdan gaw masha Mungdan ni hta grau ai shadu nna, "An hte a Mungdan hta Madu hte Mayam ngu ai madang n gin hka ai" nga nna tsun ma ai. Rai tim Madu hte Mayam ngu ai gaw gara Myu baw sang, mungdan ni hta rai tim dai ni du hkra naw nga nga ai.

Tsun yang gaw n kaja ai, rai tim 'N tsun yang n chye, n tam yang n mu, n hpaw yang n mai shang' nga ai zawn an hte Jinghpaw Wunpawng sha ni a kata baw sang ni hta mung n dai zawn Madu myit hte Mayam myit ni naw nga ai. Ngai gaw hpa baw a myu re ai majaw grau ai, ngai gaw hpa baw baw sang re ai majaw grau tsaw ai nga ai myit rawng ai.

Ndai zawn Madu ngu ai hte Mayam ngu ai lapran hta e Mungkan n nan de ai shaloi kaw na part hte prat ban hte ban n htuk hkat, n ju hkat, majan baw hkat rai wa ma ai. Madu ngu ai ni mung Mayam ngu ai ni hpe dip sha mayu ai, roi sha mayu ma ai. Dai hte maren Mayam ngu ai ni mung dip sha n hkam ai, gum lang mayu ai, rawt malan mayu ma ai. Ndai gaw Madu ngu ai ni hte Mayam ngu ai ni a n htuk dik htum shara rai nga ai.

Ndai hpe e Gumchying gumsa prat hte Gumrawng gumsa prat ngu nna ga garan da ma ai. Gumchying gumsa, Du magam ni up sha ai prat kaw nna 'Gumrawng gumsa' ngu ai, dai du magam ni hpe rawt malan ai prat ni mung dai ni du hkra rai nga ai. Ndai prat lahkawng nga ai hta na ya dai ni an-hte Jinghpaw Wunpawng myu sha ni hpe Myen wa e up hkang nga ai lam yan gaw Gumchying gumsa prat madang hta sha nga ai hpe u lu ai.

Lai wa sai ten ni hta Myen Mungdan hpe Engilsh ni up lai wa sai. Dai ten hta e Myen Mungdan ting hpe rawt jawt galu kaba wa hkra nga nna Engilsh Asuya gaw lam ni baw, Wan Leng lam ni shachyaw, N bungli pa ni gap ya, Mare kaba ni hpe shatsawm ya rai galaw lai wa sai. Rai tim up hkang ai wa gaw English wa re ai majaw Myen ni gaw shan hte hkum shan hte Mayam ngu hkam la ma ai. Dai majaw rawt malan wa masai.

Japan wa du wa ai shani mung ti nang a mare buga na num kasha ni hpe roi rip jahten ya ai, masha ni hpe mara kata sat kau ya ai, rim ai, mung masha ni a a rung a rai ni hpe mya lu mya sha ya lai wa ma sai. Dai zawn ti nang hpe zing ri la ai wa hpe mung jinghku hku nga ai kaw na, hpyen hku gale kau let Myen ni hpe mayam yam sha ai ni ngu hkam la let gasat lai wa ma sai.

English wa Myen Mungdan ting hpe Awm dawm shanglawt jaw na nga ai shaloi Myen ni a ning baw Aung San wa gaw Myen ni hkrai galaw yang n lu ai baw re ai hpe chye ai majaw, Ru di a myu ni rai nga ai an-hte Jinghpaw, Sam, Hkang ni hpe galoi mung mayam n shatai na ngu ai gasadi jaw let Myen Mung hpe jawm hkyen la na matu garum hpyi ai hte an-hte mung garum lai wa saga ai.

Lamu ga madu rai nga ai an-hte Ru di a myu ni a garum ya ai hte Myen Mungdan gaw masha ni a up hkang ai mayam prat kaw nna lawt lu lai wa saga ai. Dai ni Myen a myu ni gaw an-hte lamu ga madu ni hpe bai up hkang sha wa masai. Ga sadi n dung ma ai. Ya prat na Myen ni tsun ai gaw, "Hpyen Asuya re ai majaw an-hte ni yawng hpe roi sha ai she re. Myen ni Ru di a myu ni hpe roi sha mayu ai n re." nga nna law law lang tsun nga ma ai.

Rai tim an-hte Jinghpaw Wunpawng sha ni hpa baw majaw rawt malan wa a ta? Kade a prat hta rawt malan wa ai rai ta? Hpu nau a myu baw sang ni a hpang jahtum hta she rawt malan ai a myu ni an-hte rai ga ai. Sai kaja nna hpang hkrat nga ai kun? N rai nga ai. English wa hpe mung hkap gasat, Japan wa hpe mung hkap gasat re ai an-hte Jinghpaw Wunpawng sha ni a Sai gaw dai daram n kaji la nga ai. Hpa baw majaw hpang hkrat nna she rawt malan wa ai rai a ta?

Ti nang woi awn nna gaw de da ai Mungpawng Mungdan langai mi hpe n kam jahten kau ai majaw re. Jinghpaw Wunpawng ngu ai n nga yang Myen Mungdan ngu ai n nga ai. Dai re ai majaw dai ni a Myen amyu sha ni yu katsi la nga ai U Nu' ngu ai wa a prat hta an-hte a myu sha ni hpe mayam zawn sha n rai, Gwi zawn pyi n sawn la wa ai majaw rawt malan wa ai she re. Hpyen Asuya hpe sha rawt malan ai n re. An-hte hpe dip sha nna mayam shatai mayu nga ai a myu ni hpe rawt malan ai she rai nga ai.

An-hte Jinghpaw Wunpawng lamu ga madu ni gaw Madu myit rawng ai. Mayam n kam tai ai majaw gumlang ai. Ga sadi n dung ai wa hpe gasat ai. Mungpawng Mungdan hpe jahten kau ai ni hpe n ra sharawng ai majaw rawt malan ai a myu ni re ngu hkam la ai. Kadai Asuya myi lung yang lung, an-hte Jinghpaw Wunpawng buga hpe mayam shatai kau mayu ai myit rawng ai wa hpe gaw gasat na re. Dai ni na Mungkan hta Madu ngu ai ni gaw ti nang hkum ti nang madu lu ai ni hpe tsun ma ai. Mayam ngu ai prat gaw lai wa mat sai. Masha wa a n pu e bungli galaw tim mayam ngu kadai n sawn la ai prat de du nga saga ai.

An-hte hpe Mayam ngu ai ni, Dip sha mayu ai ni, Shamyit kau mayu ai ni, Ga sadi n dung ai ni, Myen zawn re ai ni sha an-hte a buga hpe madu sha nga ding sa gaw Mungkan n htum ding sa a nut na ni gaw a nga nga na sha re ngu...

(Ta Tut a ning mu sha rai nga ai.)

U Ju Naw Hka Lu

2010-02-28T02:11:00.002+08:00

Ngai na ga ai Jinghpaw ga malai langai mi nga ai. Ndai ga malai hpe masha kaba langai mi tsun dan ai kaw na matsin da lu ai ga re. "U Ju Naw Hka Lu zawn rai ga law!" nga ai ga re. Ndai ga hpe moi na ji woi ji wa ni gaw ga hkin gumdin nga ga ngu ai hpe tsun ai hta lang ai ga rai nga ai. Ngai n dai ga hpe Jinghpaw lauban langai mi kaw na na ga ai re. Lachyum grai sung ai ga re ngu nna myit hkam sha lu ai majaw ya na zawn ka matsin dat ai.

Ndai U Ju Naw ngu ai baw U gaw u nawng u wa rau nga ai baw U a myu langai mi re. Anhte Jinghpaw Buga Hka hku ga de nga malawng ai baw U re ai lam chye lu ai. Ndai U Ju Naw u a lak lai ai lam gaw shan hte u nawng a ning baw wa hka lu ai hte rau ngam nga ai U ni yawng hka lu ra ai lam rai nga ai. Ti nang hpa baw bungli mi galaw taw nga ai rai tim ti nang a Ning baw wa hka shi de pyen nna hka yu lu ai hte ngam nga ai malawm ni yawng gaw ti nang a bungli ni hpe kabai kau da nna e dai ning baw wa hpang hkan nna hka lu yu ra ma ai.

Ndai U Ju Naw a lak lai ai lai len hpe anhte a Ji Woi Ji Wa ni mu hkrum nna "U Ju Naw Hka Lu zawn rai ga law!" ngu ai ga malai hpe tsun hpang wa ma ai da. Myit hkrum ai ngu ai hta lang ai ga malai rai ai majaw lachyum grai nan sung ai ngu mu mada n ngai. Ya dai ni a Jinghpaw Wunpawng buga hta an hte a myu sha ni hta mung n dai ga malai hpe shadik ra sai ngu ngai mu mada ai. Ti nang lu ai a tsam hte ti nang a buga hpe makap maga ai gaw Mungkan madang dep lak nak ni hta grau n gun kaba ai ngu mu mada ai.

Makawn langai mi na ga ai. Jinghpaw ni shanglawt n nan lawt wa yang htuk da ai mahkawn gasi re. "Wunpawng Mungdan lu la na matu tsaw ra ai bawk hpe, Manmaw ga e ngam kau da ra sai." Ndai gaw Manmaw Ga hte Sam Mung Ga na Jinghpaw Wunpawng shanglawt share shagan ni hpe shagrau da ai mahkawn rai nga ai. Ti nang a sum tsaw, madu jan, kashu kasha, buga, dum n-ta ni hpe kau da let nam shang nna ti nang a mungdan lu la na matu Myen hpe rawt malan gasat wa ai share shagan myit hpe mu lu ai.

Dai ni ndai zawn re ai share shagan ni anhte bai tai ra na ten du sai ngu...

A sak n ap, Prat hpe she ap ai hpyen la

2010-01-13T18:48:00.007+08:00

Ndai kalang gaw ngai Ta Tut mung Jinghpaw Wunpawng Shanglawt Asuya, Hpyen Du jawng Masat yan 2 jawng yu ai hpyen du n kau mi rau jahta lu hkrup sai. Hpyen du langai mi, hpyen la langai mi ngu byin tai wa ai hte myit hta hkam sha ai lam ni, galaw ra ai lam ni, hkam la ra ai lam ni hpe myit mi a dik rai hkra san la lu, madat la lu ai majaw ngai Ta Tut grai myit pyaw dik sai. Laika hti Nu, Wa, Hpu nau ni yawng mung ngai Ta Tut madat la lu ai mahkrum madup ni hpe kau chye mi chye lu mu ga ngu ndai laika ngau hpe ka dat ai rai.

Mabyin gaw ngai Ta Tut mung mau mau rai Yi sa lam e wam dam nga yang seng langai mi kaw Ta Tut hte chye hkat ai hpyen du lahkawng masum dang coffee lu dung nga ai majaw shang jahta lawm sai. Shawng e gaw shanhte a mahkrum madup ni hpe san na ngu myit da ai lam n nga ai rai tim, shanhte hpyen la la mat wa ai hkam sha lam ni hte kahtet nga ai shanhte a myu tsaw myit rawng ai ga si ga ngau ni a majaw san byin mat wa sai.

Ndai hpyen du ni yawng gaw Lat Du ni rai nga ma ai. Lahpa hta ja nam pan langai mi shakap da ai rai tim, yu maya hpyen la ni hte mung rau sha hku hku hkau hkau rai tsun shaga ma ai. Ngai Ta Tut zawn mung masha ramma ni hte hkrum shagu myu tsaw myit lam, myusha labau lam, hkrat sum mat sai an-hte myusha ni a ahkaw ahkang ni hpe n gup she n chye tsu hkra tsun dan ma ai. Jinghpaw Wunpawng sha ni kade wa mying gum hkawng lai wa sai lam ni, Myen Mung ngu ai gaw de sa wa ai lam hta an-hte Jinghpaw Wunpawng sha ni gade daram shakut lawm lai wa sai lam ni hpe tsun n ma hkra hkai dan mayu ma ai.

Shanhte hpe yu yang hkrun lam kade hkawm, magam bungli kade law, kade pu ba ai rai tim pyaw pyaw sha nga ma ai. Ti nang a lahta na Du Salang ni ti nang hpe dam jaw ai ten, pawt katut ai ten ni hta rai tim dai Du Salang ni hpe mara n chye mu ma ai. Nang n pawt mayu ai i ngu san yang, "Ngai shut ai majaw ngai hpe sharai ai re" da. Lu sha n mu, nga shara n kaja la ai rai tim mani sum sai re ai shanhte a myi man ni gaw galoi mung maren sha rai taw nga ai. Moi kaw na matsan jam jau ai majaw wa rai sam ai kun?

Hpyen du langai mi hpe san yu ai. "Du Wa gaw moi gara kaw na re kun i? Du Wa na dum n-ta le." ngu san hkrup ai. "Ngai gaw Myitkyina Shata pru na re. Wa gaw Ja htu sha ai le." Ngai mau mat ai. Shi a Dum N-ta hpe ngai Ta Tut chye ai, ngai Ta Tut mu ga ai. Matsan jam jau la ai dum n-ta kaw na n rai nga ai. Hpyen la prat hta hkam sha ai jam jau lam ni gaw shi a dum n-ta na nga sat nga sa lam ni hte 'Wa shakap shai' rai nga ai. "Dai ni Du Wa ni hpa baw shat mai sha ai rai?" ngu san hkrup yang Arr Lu Si hpe hka rau gabrawng da ai.

Mani sum sai rai nna Jinghpaw Wunpawng labau hpe Mungkan hku shadang nna n gun mi a lu rai tsun dan nga ai. Ndai n gun a sam ni, myit masin marai ni gaw gara kaw na pru nga ai re kun? Myit mada na lam ni nga ai majaw kun? "Du Wa ni shabrai kade lu ai rai ta?" ngu yang, "E shabrai ngu ai baw gaw n nga ai law rai tim ti nang ra ai kaw jai lang lu na matu shata mi 10,000 (US$8) daram gaw lu ai le." Ngai Ta Tut Singapore ga e nga yang Taxi kalang jawn yang Singapore Dollar SGD$10 (US$7) n law htum ma ai. Ndai rai nga ai Shanglawt hpyen Du prat.

An-hte Jinghpaw Wunpawng Shanglawt Asuya a hpyen dap kata e Dap Ba, Dap Dung ni yawng rai yang 50 hkawt rai nga ai. Hpyen la yawng rai yang n law htum 35,000 kaw na 50,000 jan nga ai. Ndai zawn ti nang myu hte Mungdan a ahkaw ahkang a matu nga nna jam jau hkam nga ai masha dai ram law la nga ai. Mau hpa kaba rai nga ai. Hpyen la mung hpyen la madang zawn, hpyen du mung hpyen du madang zawn jam jau la nga ai. Shanhte a myit kata e, myu sha a matu, mungdan a matu galaw gun hpai nga ai bungli hpe kaji tim, kaba tim kang ka hkra galaw sa wa na hpe sha myit nga ma ai.

"Du Wa ni zawn re ai Shanglawt Hpyen la ngu ai ni gaw myu hte mungdan a matu asak hpe ap kau sai myu tsaw mung tsaw ni she rai sai i" ngu tsun ai. Dai shaloi ngai kachyi myi mung n myit mada da ai ga htai langai mi hpe dai hpyen Du wa kaw na lu la ai. "An-hte gaw Asak hpe ap nawng kau ai hpyen la sha n re, ti nang a prat hpe Myu hte Mungdan a matu ap nawng kau sai hpyen la ni she re" da. Mungkan n tsa ngai Ta Tut n dai zawn nga ai ga hpe n dai kalang sha naw na ga shi ai. "Prat hpe ap nawng kau ai da".

Myu tsaw rawt malan hpyen la langai tai wa ai hte asak hpe ap kau ai hpyen la sha n ga, prat ting hpe ap nawng ra ai. Ti nang a asak hpe pyi ap kau sai nga nna kam mara nga, kam mara galaw n mai nga ai. Ti nang a prat hpe ap kau sai re majaw ti nang a prat hta galaw gun hpai mat wa na lam ni yawng gaw myu hte mungdan rawt jat wa na lam ni hta madi shadaw byin ai lam ni sha rai ra nga ai. Prat hpe ap kau sai re majaw n dai prat ti nang hte n seng, Myu sha ni hte she seng mat sai ngu ai hpe tsun mayu ai rai nga ai.

Asak hpe sha ap nna prat hpe n ap ai ni gaw hpyen la la yang she tsa lu, kani lu, kam mara nga ai. Majan gasat wa ai hta rai tim lahta na matsun ai hpe n hkap la ti nang kam ai hku asak she sum mat hkra magrau grang lai mat ma ai. Ndai gaw asak hpe ap nawng ai myu tsaw myit re. Rai tim prat hpe ap nawng ai myu tsaw myit gaw ti nang galaw ai lam ni yawng gaw kaja ai lam ni rai ra ai. Lahta na matsun ni hpe kam ai rai tim, n kam ai rai tim myu sha lam yan a matu gun hpai ra ai. Dai mahtang she Myu Tsaw Hpyen la a jet rai nga ai.

"Hpyen la la yang a kyang hten mat na lu" ngu ai ndai ga gaw n dai prat hta shut mat sai ngu ngai shadu ai. Shanglawt hpyen la ngu ai gaw Prat hpe ap kau ai hpyen la, myu sha lam a matu kaja ai lam ni hta jin jin rai nga ra ai, ti nang ra ai hku n hkawm Mungdan hte Myusha ni a akyu tam ai lam hta she tsap nga ai myu tsaw hpyen la ni rai nga ra ai. Jinghpaw Wunpawng Mungdan rawt galu kaba wa u ga, kyu hpyi dat ai.

Sak hkrung ng'rai (Living Hell)

2010-01-09T11:06:00.003+08:00

Katsi dat, kahtet dat. Hkum hkrang ting makret makrat nga grai nga n pyaw la ai. Hkali bu ai kun? Waw shang ai wa rai sai kun? N'chyi n'gu nga la ai. Baw mung sin, hkum mung kahtet, sai shan ni yawng kapaw le wa na zawn. Myit kata mung si wa na wa kun, hkrung nga na wa rai sai kun? Ngai gara kaw du nga ai nga n chye mat hkra myi ni gabrim gabram nga baw sin la sai. Kan mung machyi, shat kan a na wa lu wa sai kun? Masin salum hta mung n htu hte galun da ya ai zawn shamu shagu machyi ai. Yu hkraw kata ju ju taw ai zawn hka sha lu yang pyi machyi la ai. Kadai wa mi ju sa bang da ya sai rai ta?

Mana bu wa ai zawn mung kan ting myi hprat galam nga ai. Makau e nga ai lu hka kawk kaw kadawng bang mat na zawn nga, ga gin hku de mahtang sa mahkoi mat na kun? Zai bru tawng sha pyi grai kaba la ai zawn nga ai. Sin wawp hpe n dum matsut rau pat da ya ai zawn n sa n hkru sa nga ai. Galeng yu yang si wa na zawn nga, dung nga yang nga rai di de shang taw ai zawn nga ai. Pu kan ni hpe shaw ju sha ya ai zawn nga grai machyi la ai. Baw nu hpe hpaw nna majap n tsin ru bang ya ai zawn baw ting kaprep nga ai. Lagaw lata ni hpe n htu rau galep ya ai zawn nga si mat yang she kaja na wa rai sai kun?

Mungkan ga gaw yup gawk kun? Masha grai law hkra rawng nga ai zawn nga grai chyat la nga ai. Shat sha yang mung jum n mu, jum bai jat yang gaw jum hka mat. Majap makret yang dwi ai zawn ga, jum dwi sha yang hka ai zawn. Hpun n tsa lung dung la pyaw pyaw yu na kun? Ting se dum di mahkawn hkawn nga ra na kun? Shakum ni ngai hpang de sit wa ai kun? Mungkan ting kaji wa ai kun? N sa sa n hkru ai majaw grai ba la ai zawn nga, n sa n sa yang grau pyaw ai baw kun? Myi kaw na sai pru ai kun, myi pri mahtang rai ai kun? Ladi sai mung pru wa ai zawn nga, na kaw na mung sai pru wa sam ai kun?

Baw nu kata bawm kapaw dat ai zawn, hkum ting a yai a ya nga mat ai zawn. Makau grup yin e kadai nga ai kun? Masha kun? Du sat kun? Satan wa rai sai kun? Myit kata "Ngai kadai ta? Ngai kadai ta?" nga tsun nga ai. Ngai n re rai tim shi hkrai shi tsun nga ai. Ngai gaw machyi nga ai rai tim hkum hkrang gaw shi hte shi bungli galaw nga ai. Ngai galaw ai n're, rai tim shi hkrai shi bungli galaw nga ai. Kadai wa ngai hpe hkang taw ai kun? Ngai masha kun? Jak rai kun?

Wan mang kata lam hkawm chyai na kun? Hka kata e she rawng nga na kun? Kahtet ai lam ni ning dang kau let Putao de she lung mat na kun? Nam dum e rawng tim manam ai lam n nga, maza sum pun hta mung ngwi pyaw yup mang shalai ai. Moi gaw Uru hka, Laiza hka shi ngut yang ya gaw Mali hka de da. Dakasu jawng hta pyi hpraw sai nga, nawng nang chyum jawng pyi n lawt, gara ga de she sa nga na. Yak sai yak sai. Sak hkrung ng'rai 'Living Hell' ngu ai n dai rai sam sai.

NGA O I WE

2010-01-09T01:54:00.005+08:00

Mong dvn te we

Shvla wa ya:ngo kvt Chxm dxng me.

Dvsi se ri luq we

Shvla wa ya :ngo kvt Nga nxng nvm wa

Ka ang pvn luq we

Shvla w a ya:ngo kvt dvsi tiq long wa

Gwa lvm luq tvm we

Shvla wa yv :ngo kvt vrvm vra we taq tiq long

Dvdvm mo we taq ma bong we

Shala wa ya:ngo ke ni Pandung tiq long

Dvsi bvnli te we

Shvla wa ya:ngo kvt Chxm dxng me tiq long

Na te, Nga te rvwing we

Shvla wa ya:ngo kvt nxng maq shvng be tiq long wa

Nga lvpvt taq nga shxn we

Shvla wa ya:ngo kvt Chxm dxng me o tvrong na e i.

Nga o mong svng nga shong shx:nge

Nga o i we Mong dvn ie

Nga o Chxm dxng me kaq nga shong shx :nge

Nga o Chxm dxng me ie

Nga o Mong, Nga o Chxm dxng me

Nga shong shx:nge.

Kr (Phillipine) kaw nna 'Ngai Madu Ai' ga shagawp hpe Rawang hku ga gale da ai.

Ngai Madu ai

2009-12-16T08:37:00.004+08:00

Mungdan kaba la ai

Kaja wa nga yang Dum N-ta langai

Myusha ni law la ai

Kaja wa nga yang an-nau ni hkrai

Tsun shaga ai ga law la ai

Kaja wa nga yang Amyu langai

Bu hpun suli law la ai

Kaja wa nga yang manau langai sha nau ai

Myit ai lam ni shai la ai

Kaja wa nga yang pandung langai

Myusha bungli kaba la ai

Kaja wa nga yang dum n-ta langai

Nang grau, ngai grau tsun ma ai

Kaja wa nga yang an-hte yawng langai

Nye prat hte ngai nga ma ai

Kaja wa nga yang dum n-ta a shadaw nang rai

Nye a Mungdan hpe ngai tsaw ai

Ngai madu ai Mungdan rai nga ai

Nye a Dum N-ta hpe ngai tsaw ai

Ngai madu ai Dum N-ta rai nga ai

Nye a Mungdan, Nye a Dum N-ta

Ngai tsaw ai

Ngai, ramma ning mu

2009-12-14T06:18:00.005+08:00

A ten lu ai lani mi hta e ngai Ta Tut hte Mungkan hta madang dep ai Singapore Mungdan a Dakasu (University) jawng lung nga ai Jinghpaw Wunpawng Ramma langai mi hte an-hte Jinghpaw Wunpawng shani a shawng de galaw sa wa ra ai Mung masa lam, Sut masa lam, Hkam ja lam, Hpaji lam hte Hpyen masa lam ni hpe jahta lu ai. Mungkan hta an-hte Jinghpaw Wunpawng sha ni a madang, grit nyem nga ai an-hte Jinghpaw Wunpawng shani a myi hpaw, na na lu na lam ni hte Jinghpaw Wunpawng Shanglawt Asuya (KIO/A) a galaw sa wa ra ai lam ni hpe mung ti nang hkrai a ning mu ni hte lawu na hte maren jahta lai wa sai.

Mungkan hta Mying gumhkawng nga ai Mungdan ning baw ni a myit masa, Mungdan up hkang ai lam ni, Jinghpaw Wunpawng myu sha ni a Mungkan hta ya ten du nga ai madang ni hte Mungkan makau grup yin gawn sin lam ni hpe mung jahta hkrup sai. American, Miwa, hte kaga Mungdan kaba ni a Mungdan kaji ni n tsa tawn da ai myit masa ni hte galaw nga ai lam ni hpe mung sung sung myit yu let jahta kyin bu nga ga ai.

Myu sha lam yan hte seng nna mung myi rai n hpaw shi ai Wunpawng buga de nga ai hpu nau ni hpe myi jahpaw ya lu na lam hte seng nna mung jahta byin ai. Kadai hta mung myu tsaw myit ngu ai gaw rawng nga ai, dai myu tsaw myit hpe a rang shatai let myusha rawt jat lam hpe myit dat yu yang mahtai kaja ni lawan ai hku pru wa ai hte dai hpe tatut lu galaw a kyu jashawn ai rai yang grai a kyu rawng ai lam ni rai na re ngu myit lu nga ai.

Numbat langai ngu na hta Mungkan Mungdan ni hta e n gun nga ai American, Miwa ni a an-hte Jinghpaw Wunpawng sha ni hpe akyu gara hku jaw lu ai lam hte ding bai ding na gara hku lu jaw ai lam ni hpe mung jahta byin sai. American Mungdan ngu ai gaw Mungkan hta n gun ja dik htum Mungdan langai mi rai nga ai hta Hpyen masa, Mung masa, Hpaga masa lam a myu myu hku nna Mungkan Mungdan ni law malawng a shamyet shanat shara langai mi mung rai nga ai.

N dai hta mu mada lu ai lam langai myi gaw American ngu ai gaw ti nang hpe n hkra, ti nang a akyu hkam sha lam n lu ai zawn re ai lam ni hpe koi yen ai lam ni hpe mu lu ai. Mungkan ting a Hpaga lam, Mung masa lam, Hpyen masa lam ni hta a myat kaba sha nga ai rai tim ti nang lu la ai daram bai htang jaw ai lam gaw yawm la nga ai ngu mu mada ga ai. Ga shadawn Myen Mung Asuya hte kanawn mazum ai lam ni hpe yu yang an-hte Jinghpaw Wunpawng sha ni rawt malan mat wa na lam hta ding bai ding na lu jaw dik htum Mungdan langai mi hku nna mung mu mada nga ga ai.

Bai nna Miwa Gumsan Mungdan ngu ai mung shi a kyu n lu hkam sha ai baw bungli hpe gaw galoi mung n galaw ai hpe mu mada ai. Moi shawng de Myen hte American ni a kanawn mazum lam hkrak nga ai ten Miwa Gumsan Mungdan gaw Myen Mung a Communist Party ni hpe n gun ram ram jaw let Myen Asuya hte gasat lai wa ai rai tim dai ni ti nang a kyu lu mai ai Myen Asuya a prat hta gaw ganawn mazum lam ni hpe law law galaw wa ai hta sha n ga, Hpyen masa hku, Mung masa lam hku law law wa garum nig tau jaw ai lam hpe mu mada ai majaw Sadi maja ra ai Mungdan langai mi hku mu mada ai.

Numbat lahkawng ngu ai hta American Mungdan hte kanawn mazum ai mungdan ni a Mung masa lam rai nga ai Democracy hte Miwa Gumsan Mungdan hte malawm ni jai lang nga ai Communist Mung masa lam hpe mung shing daw let jahta byin ai. Democracy ngu ai gaw Mungkan hta mying gum hkawng ai hte masha shagu ra sharawng nga ai marai langai hkrai ai rawt malan lam hpe madung dat da ai hpe mu mada ai.

Democracy Mung masa hpe jai lang nga ai Mungdan ni lawm malawng hpe maram yu ga nga yang rawt galu kaba nga ai Mungdan ni hta kaji kadun wa nga ai Mungdan ni mung law nga ai hpe mu lu ai. 'Hpa majaw rai ta?' ngu ai ga san hpe tai yu ai shaloi gaw Democracy ngu ai hpe jai lang n chye ai majaw rai na re ngu mu mada ai. Democracy ngu ai gaw Sinna mungdan ni a Mung masa lam yan langai mi rai nga ai hte an-hte Asia mungdan ni a htung hking hte shai la nga ai. Dai majaw n dai hpe jai lang ai hta grai sadi ra na re ngu mu mada ai lam jahta byin sai.

Bai Communist ngu ai Mung masa lam hpe myit yu saga ai. Miwa Gumsan Mungdan a Mung masa lam hpe yu yang a san sha chye lu na re ngu ngai mu mada n ngai. Communist jai lang ai Mungdan ni hpe yu yang Mungkan hte matut mahkai ai lam nau n nga ai hte marai langai hkrai a rawt malan lam hpe nau n gun n jaw ai lam mu mada ai. Mung pawng Mungdan langai byin tai wa na matu gaw Communist Mung masa lam hte rai yang myit n hkrum lam ni law law byin chye wa ai hpe Myen Mung Communist a labau hpe yu yang chye lu na re.

1982 ning hkan kaw nna Miwa, Myen, Sam hte Jinghpaw Wunpawng sha ni law law wa Myen Mung Communist hpe madi shadaw let gasat lai wa ai rai tim 1988, 1989 ning de du wa ai shaloi gaw u hpung kata myit mang ai lam ni n bung wa ai hte shada da gali galaw rai hka bra mat ai kaw du hkra byin lai wa sai re. N dai mabyin hpe maram yu ai rai yang Communist ngu ai Mung masa lam yan a pru wa na mahtai ni hpe mu lu nga ai. Democracy hte Communist, n dai Mung masa lam lahkawng yan hpe an-hte Myu sha ni sung sung myit yu ra nga ga ai.

Numbat masum ngu na gaw an-hte Jinghpaw Wunpawng sha ni hte Myen mung kata a shanu nga ai kaga hpu nau myu sha ni a htung hking ni hpe Myen Asuya a tek jum, up hkang nga ai lam ni hte seng ai mabyin ni hpe jahta byin ai. Hkyak hkyak ga shadawn jaw ga nga yang Maimaw ginwang na manau shadung hpe baw kau shangun ai lam hpe mu lu na re ngu shadu n ngai. 2007, 2008 ning hkan e Myen Asuya Mungkan kaw na sadi maja yu nga ai ten An-hte myu sha ni a htung hking poi rai nga ai Manau poi kaba ni hpe laja lana galaw shangun lai wa sai.

N dai lam gaw Maigan Mungdan ni a ning mu hta 'Myen mung kata na myu sha ni poi kaba ni galaw nna grai pyaw nga ma ai' ngu ai ning mu hpe lu mat hkra an-hte a htunghking hpe akyu jashawn la ai lam re ngu mu mada lu ai. Bai n ra ai ten du ai hte ya na zawn Manmaw ginwang a manau shadung hpe baw kau shangun ai zawn re ai mabyin ni pru wa nga ai. Jinghpaw Wunpawng sha ni nga ai shara hta e, Jinghpaw Wunpawng Manau shadung hpe jun da ai gaw mara nga a ni? Myit sawn yu hpa rai nga sai.

Nu bat mali hta Jinghpaw Wunpawng sha ni a langai sha ngam sai Jinghpaw Wunpawng Shanglawt Asuya a galaw sa nga ai mung masa lam ni hte seng nna loi ding lun yu nga ga ai. Moi shawng de Jinghpaw Wunpawng Shanglawt Asuya kaw na mung masha ni hte matut mahkai ai lam ra kadawn mat ai lam hpe mara ngu mu mada ga ai. Shut mat ai lam ni hpe byeng kau nna shawng de lahkam sa wa ai lam ni hta mai kaja ai lam ni hte woi awn sa wa na hpe ja ja n gun jaw ga ai. Mung masa Asuya langai mi hku nna hkawm sa wa ai lam yan hta e, Mung masa Asuya langai mi hta ra kadawn nga ai lam ni hpe ti nang (Kachin Independence Organization/Army) KIO/A hta lu jahpring bang la ra nga ai.

Ga shadawn ti nang lagaw ti nang tsap wa ai lam ni hta Tara lam, Sut masa lam, Hpaji hparat lam, Mung masha gawn hkang lam, Hkam ja lam ni, Hpyen masa lam ni hpe n gun dat nga ai hta shi lam yan hte shi hpaji kung nga sai ni hte, mahkrum madup law nga sai ni bawng ban let shawng de hkawm sa wa na lam hpe tsan tsan lu myit, tau hkrau shajin lu ra ai lam ni nga ra ga ai. Mung masha gawn hkang ai hta ti nang a Mung masha ngu ai hpe dan dan leng leng mu mada lu na a hkyak la nga ai hte ti nang a Mung masha ni a Hpaji lam, Sut masa, Tara kaup lu ai lam, Hpyen masa lam ni hpe ja ja n gun jaw ra ai ngu mu mada lu ai.

Mung shawa tsi rung ni gap ai lam, Hpaji jawng ni hpe gaw gap ai lam, Hkrun lam baw ai lam, Hpyen masa gat hkai ai lam ni hta ra kadawn nga ai lam ni hpe Ramma ni hpe a kyu jashawn let galaw sa wa yang mai kaja ai lam mu mada ai. Hpaji hparat lam hta, hpaji chye nga sai Kanu kawa, Ramma ni hpe myit sharawt ai hte ti nang up hkang gin ra ni hta e nga ai Hpaji jawng ni, College ni hkan e shara jaw nna hpaji garan gachyan ai rai yang grai htap htu ai rai nga ai. Bai nna Ramma ni hpe e laika hpaji sharin la lu na matu hpaji a rang law law bang yang mai kaja nga ai. Ti nang up hkang ai shara ni a hpaji madang gaw Myen Asuya hpaji madang hta tsaw lu ai daram lu tsaw hkra galaw lu ai rai yang mai kaja la nga ai.

Hkam ja lam hta mung Jinghpaw Wunpawng sha ni hta Doctor byin nga sai ni hpe ti nang up hkang ai n pu de lu woi la ai rai yang mai kaja la nga ai. Dai hta sha n ga ti nang a hpaji jawng ni kaw na tsi hpaji ni hpe lu sharin ya ai hte ning tawn ai ni hpe Mungkan madang de du hkra sharawt ya lu ai rai yang kaja dik ai lam rai nga ai. Hkam ja lam up hkang ai lam hta Buget tam ai lam ni, Mungkan hte matut mahkai lam ni hte shi Department hte shi lu hpaw ning htan mat ai rai yang gaw Hkam ja lam up hkang ai lam ni gaw grai madang dep wa na re ngu mu mada lu n ngai.

Tara hpaji ni hta Mungkan madang hku du dep mat sai ni hpe shara lu jaw ai rai yang mung an-hte a Mung masa lam grai awng dang wa ai baw rai na re ngu mu mada ai. Tara hte seng ai lam ni gaw Mungdan langai mi hta a hkyak dik htum ai shara hta tsap nga ai rai nga ai. Tara n kaja ai Mungdan gaw rawt galu kaba lam n nga ai. Dai re ai majaw n dai lam hta Mungkan madang dep wa ai hku lu lahkam mat wa ai rai yang gaw shanglawt lu na ten gaw n tsan sana re ngu mu mada ai.

Mung masha gawn hkang ai ngu ai hta ti nang a ginra gaw Myen wa a ginra hte shai ai lam ni hte ti nang a mung masha ngu nna lu tsun na a kyak la nga ai. Ti nang lagaw ti nang tsap sa wa lu na matu ti nang a ginra e ti nang a Mung masha ni hpe ID (Identity Card) ni lu shapraw ai rai yang grai htap htuk nga ai. Maw daw jak rung jak rai ni hpe License lu jaw ai lam ni, ti nang ginra de pru shang ai mung shawa hpe ja ja lu gawn hkang ai lam ni nga ai rai yang gaw tara up ai, madang nga ai Myu sha asuya langai mi byin tai wa lu na re ngu mu mada ai.

Hpaga lam hta e mung Hpung dut, Kang hta, Lung seng htu ai hta jan nna kaga hkai sun lam, jak rung jak rai, ni de lu lahkam ai hte Myen Mung, Gala Mung, Miwa mung ni hta hpaga gin ra (Market) lu tam mat wa ai rai yang gaw grai htap hktuk nga ai. Ga shadawn n'gu, hkai nu, nam si nam saw, hpalap, rubber ni hpe law law lu shapraw ai hte hpaga gin ra kaba ni de lu jashawn ai rai yang an-hte a hpaga lam gaw grai rawt galu kaba wa mai nga ai ngu nna mung jahta byin sai.

Numbat manga ngu na hta hten za wa nga ai Jinghpaw Wunpawng ramma ni a prat hpe tsun jahta yu ai. Hten za wa ai ngu ai hta 'Gara hku byin wa ai hpe hten za wa ai ngu tsun ai kun?' ngu ai lam hpe sung sung myit yu ra nga ai. Kani ya, Tsa ya tai nga ai ni hpe hten za nga ai ngu tsun mai nga ai. Bai nna Kani ya n rai, Tsa ya n rai ai sha, Amyu sha ni a matu, Mungdan a matu, Ding hku a matu a kyu n rawng ai ni hpe mung hten za wa sai ngu mu mada ai. Hpaji lam, Sut masa lam, Makam masham lam ni kade lu ai rai tim, dai hpe tatut a kyu n lu jashawn ai rai yang gaw hten za wa ai ramma jahpan kaw ngai Tatut mung lawm wa nga ai.

Jinghpaw Wupawng sha tai shangun ai Karai Kasang gaw an-hte hpe hpa baw galaw shangun nga ai ngu ai hpe myit yu ra nga ai. Jinghpaw Wunpawng tai nna ti nang a Amyu sha ni kaji kadun nga ai hpe hkye la na gaw marai langai hkrai ai shangai wa ai kaw na lu da ai magam lit langai mi re ngu ngai mu mada n ngai. Ti nang kalu kaba na, ti nang lu su nga mai na lam hpe sha myit let ti nang ra ai lam hpe ti nang hkrai hkawm mat ai rai yang gaw ti nang hkum ti nang Jinghpaw Wunpawng sha rai nga ai ngu ai hpe gara hku hkrang madun la na ngu ai hpe myit yu ra saga ai.

Numbat kru ngu na hta myi n hpaw, na n na shi ai buga e nga ai an-hte a hpu nau ni hpe myi hpaw, na na shangu ra nga ai. Ndai myi hpaw, na na shangun ga ngu ai hta kalang ta English ga sharin, Computer lang shangun, laika hti sharin re ai lam ni hpe sha tsun mayu ai n rai nga ai. Shani shagu byin nga ai, galaw nga ai lam ni hte myi jahpaw ya mai nga ai. Ga shadawn gaw din gin sup ai lam hte seng nna Mungkan ting madang hku tsun dan dat ai hte myi hpaw mat ai ni mung nga ai. Yu ngwi (Music) lam hte seng nna Myen mung madang sha n nga, Mungkan madang hku tsun sanglang dan yang mung myi hpaw wa mai nga ai.

N law dik htum myi man myit, shat sha re ai shani shagu na bungli ni hpe galai shai dat ya ai hte sha pyi myi mai jahpaw, na mai sha na la nga ai. Mungkan hta Myen mungdan langai sha n re ai lam hpe chye shangun ra nga ai. Gara lam hta rai tim Mungkan hku shadang nna mai yu ai lam hpe sharin la ra nga ai. Ndai lam ni hpe tatut lu galaw mat ai rai yang Bum hkring hkrawng e naw nga nga ai an-hte a myu sha ni myi hpaw na na wa na re ngu tsun jahta hkrup nga ai.

Hpang jahtum ngu na gaw Maigan mungdan ni de du mat sai Wunpawng myu sha ni, n dum shamyi ti nang a htung hking, laili laika, sat lawat ni galai shai mat wa ai hte Myu tsaw, mung tsaw myit n i yawm wa ai lam hpe tsun jahta hkrup ai. Yawng ngu n tsun ai rai tim law malawng ngu mu mada ai. Ti nang hkum ti nang n dum ai rai tim masha wa yu yang mu mada lu ai galai shai mat ai a rawn a lai ni grai law hkra nga ga ai. Laika ngau lahta daw de ka lai wa sai hte maren Democracy Mung masa lam yang hpe jai lang nga ai Mungdan ni de du mat sai ni hta Myu sha rawt malan lam hta ti nang hkrai a rawt malan lam hpe grau madung dat wa ai hpe mu mada lu n ngai.

N dai mabyin ni gaw Jinghapw Wunpawng Shanglawt hpung ni a u hpung kata e byin lai wa sai mayun hkum hpa sha, a rawng a ya hpe madung dat ai lam ni a majaw ngu mung gaw mai tsun ai rai tim shut mat ai masha lachyawk mi a majaw a myu ting hpe kau da na ngu ai gaw n mai nga ai. Shut ai lam nga yang shut ai ni hpyi nyem ra ai zawn, hpyi nyem hkrum ai ni mung mara dat ya ra nga ai.

Bai nna Maigan de du nga ai Jinghapw Wunpawng sha ni marai langai hkrai ti nang chye da ai machye machyang ni hpe yu kaji ai lam ni mung nga ai hku re. Ti nang chye da ai lam ni hte Myu sha lam yang hta n lu tsap, hpaji nlu jaw ai hkrai shadu nga ma ai ngu mu mada ai. N rai nga ai, lahta e kalai wa sai hte maren kaji kadun nga ai, myi rai n hpaw, n rai n na shi ai an-hte a hpu nau ni gaw nang chye da ai hpaji ni hta grai naw grit nyem nga ai. Dai ni hpe nang chye da ai lam, mahkrum madup ni hpe sha tsun dan ai rai tim shan hte a myi, na ni hpe mai jahpaw ya nga ai. Marai langai hkrai a n gun, hpaji ni gaw Mungdan langai mi gaw de sa wa ai hta grai a hkyak la nga ai ngu mu mada ai.

Ndai zawn rai Mungkan lam, Mung masa lam, Myu sha lam hte marai langai hkrai a lam ni hpe tsun Singapore e nga ai Dakasu jawng ma langai mi hte ngai Ta Tut jahta byin lai wa sai. Nda zawn jahta ai lam ni hpe marai hkum ding dek shagu lu galaw ai rai nna ti nang bawng ban ai lam ni hpe masha shagu chye lu hkra garan gachyan (Sharing) lu galaw ai rai yang tatut galaw sa wa ra na Myu sha lam, Mung masa lam, Sut masa lam ni gaw pandung nga ai, rawt galu kaba wa ai tsun jahta, bawng ban hpawng ni rai wa na re ngu mu mada let n dai laika ngau hpe hpung dim dat sai rai.

2009 ning November na Dum N-ta hte Ta Tut

2009-12-05T22:08:00.001+08:00

Shawng nnan Dum N-ta masha ni hpe Happy Christmas ngu nna shakram dat n ngai. Ndai laman laika n lu ka mat ai a majaw mung hpu shawng, hpu ba ni hpe grai tawngban ai. Laiwa sai November shata htum wa maga de ngai kanau Ta Tut wa nau n rau mat ai majaw laika ni hpe bat lahkawng jan ting nlu ka mara mat ai. Dum N-ta hpe n lu san seng dat ai majaw Dum N-ta masha ni hte manam ni hpe grai a gam sai wa re. Ta Tut hpe chye na mara raw ya na hpe kam dat n ngai.

Lai wa sai November shata hta e Mungkan shara shagu hta nga ai Hkristan hpung masha ni gaw Karai Kasang hpe chyeju shakawn ai Chyeju dum poi (Thanksgiving) ni hpe galaw ma ai. Ngai, Ta Tut, mung Singapore kaw nga let Singapore Jinghpaw Hkristan Kanau Mazum Hpawng (Singapore Kachin Christan Fellowship) hta Chyeju dum poi shang lawm lai wa sai hku re. Jinghpaw Mung, Dum N-ta buga de mung shara shagu, nawku jawng shagu ngu na daram chyeju dum poi ni hpe e wu wu di di rai galaw lai wa sai lam shiga ni hte manaw manang ni kawn la kap let ngai Ta Tut chye la lu sai.

Chyeju dum poi ngu ai hta American ni gaw shan hte shawng hpang dat ai poi re, nga nna grai myit a rawng la nga ma ai. An-hte Jinghpaw ni she American ni galaw ai kaw hkan galaw nang ai zawn zawn nga nna tsun ma ai. Kaja wa nga yang an-hte Jinghpaw Wunpawng sha ni a Chyeju dum poi gaw, American ngu ai Mungkan ga n tsa nga ai re pyi n chye shi ai shaloi kaw na, moi ji woi ji wa ni Hpan wa ning sang, Chye wa ning chyang hpe chyeju dum ai lam ni hpe galaw lai wa ai majaw dai ni du hkra naw galaw nga ai she re lam chye lu ai. Dai majaw an-hte Jinghpaw ni gaw American ni galaw ai kaw hkan galaw ai kaga Mungkan na Mungdan ni hta grau madang tsaw ai ngu na kun gaw n chye sai.

Ndai chyeju dum poi ni hpe galaw ai November shata ni hta na, dai ning 2009 ning a November shata gaw loi mi lak lai ai lam ni byin pru nga ai hpe mu mada lu ai. Nambat langai hpe tsun ga nga yang Man Maw Gin Wang e galaw lai wa sai Numbat lahkawng lang na N-lung n-nan sha Chyeju dum poi, Sut Manau poi, gaw lak lai la nga ai. Shaning ni grai na mat ai hpang de she ya na zawn masha law law hte wu wu di di rai Sut manau lu nau ai lam gaw ga hkin gumdin nga ai Jinghpaw Wunpawng sha ni a kum la rai na re ngu mu mada lu ai. Htunghking hte myu hpe tsaw ra ai Jinghpaw Wunpawng sha ni re ngu nna mu mada lu nngai.

Numbat lahkawng ngu na gaw Maigan shara shagu de nga ai Jinghpaw Wunpawng sha ni a Chyeju dum poi ni re. Laiwa sai shaning ni hta mung Chyeju dum poi hpe galaw na re ngu ngai kam ai. Rai tim ngai Ta Tut a ning mu hku nga yang dai ning galaw ai Chyeju dum poi ni gaw laiwa sai shaning ni hta galaw lai wa ai chyeju dum poi ni hte n bung ai sha lak lai nna poi kaba ni byin tai nga na re ngu ngai shadu n ngai. Thailand, Malaysia de an-hte Jinghpaw Wunpawng sha ni sadu mat ai grai law mat sai majaw ya na zawn ngai Ta Tut a ning mu pru wa ai rai nga ai. Mungkan shara shagu na Jinghpaw Wunpawng sha ni a chyeju dum poi ni hpe Internet Di hkram n tsa ni hta e mu lu ai majaw mung rai na re.

Numbat masum ngu na ngaw, maigan de du mat wa sai an-hte Jinghpaw Wunpawng sha ni hta dai ning na Chyeju dum poi ni hta myu hte mungdan a lam ni hpe grau myit shang sha let kyu hpyi shaja ai lam ni rai na re ngu ngai mu mada lu n ngai. 2009 ning a mung masa lam ni a majaw Dum N-ta de nga ai jinghku jingyu ni hte Wunpawng mungdan a shim lam ni nau n gring wa ai majaw mung rai na re ngu mu mada lu ai. Ti nang KIO hte Myen hpyen Asuya a manghkang ni a majaw yawng gaw Mungmasa lam hpe myit shang sha ai hte Jinghpaw Wunpawng Mungdan a shawng lam hpe myit tsang ai majaw ngu yang grau jaw na kun n chye.

Numbat mali ngu na gaw ti nang KIO hte mung masha ni n dai 2009 a chyeju dum poi hta grau nna hku hkau ai hte nyi htep ai hku ganawn mazum ai lam hpe mu lu ai. Chyeju dum poi ni hpe ti nang KIO up hkang ginra ni hta e poi kaba ni hku nna galaw let mung shawa, dap shawa ni law law n gun mi a lu rai wu wu di di galaw lu ai lam ni hpe la kap let ngai Ta Tut mu mada ai re. Lai wa sai ten ni hta chye ju dum poi ni hpe galaw ai rai tim dai ning 2009 ning daram gaw n gun n lu dum ai. Man Maw Gin Wang e galaw ai Sut Manau poi kaba de mung ti nang KIO dap shawa 1000 jan shang lawm ai lam ni hpe yu yang gaw ngai Ta Tut a ning mu ni hpe madi shadaw ya nga sai kun ngu.

Numbat manga ngu na gaw dai ning 2009 ning November shata e an-hte Jinghpaw Wunpawng Blogger ni a E-mail ni hkan e sa da ya ai New Democratic Army-Kachin NDA-K (Ya Myen hpyen Asuya de lak nak jahkrat mat sai Jinghpaw Wunpawng Mungmasa hpung)a Myen hpyen la galaw na matu Training la nga ai du langai mi ti nang KIO kaw na manang wa hpe laika shagun ai re nga ai laika langai mi grai mawng mat ai hku re. Ndai laika hpe lu hti ai ni yawn gaw n dai laika gaw masu ai laika (snr) laika ka ai wa baw nu n grin ai hku mu mada ma ai re. Jinghpaw Wunpawng Blogger langai mi rai nga ai Shang Htin (http://www.shanghtin.co.cc) a laika man hta ka dai ai hpe la kap let ngai Ta Tut a ning mu jaw nga ai lam hpe mu lu ai. Ndai gaw an-hte Jinghpaw Wunpawng sha ni a nya ka n re ai lam hpe lu madun dat ai lam la ngai mi re ngu kam ai.

Ndai zawn byin wa ai lam ni gaw an-hte Jinghpaw Wunpawng sha ni grau nna gahkyin gumdin wa sai lam rai sai kun ngu. Man Maw e galaw ai Sut Manau a matu grai myit n gun lu ai. Wunpawng sha langai mi hku nna grai a rawng la nngai. An-hte Jinghpaw Wunpawng sha ni nga mu nga mai, gahkyin gumdin wa ai lam hpe yu n ju, hkrit tsang na gaw Mungkan n-tsa Myen Hpyen Asuya lang ai sha nga na re. An-hte a Man Maw Manau pa hpe bilat hte nyep da ai hpe sadi jaw ai lam n nga ai sha a htu kadawng kau ya ai. Manau poi ngu ai hte manau gawk nu hte Jinghpaw Wunpawng sha ni a masin salum Manau Shadung hpe baw kau shangun ai. Manau pa hpe a htu kau ya ai gaw an-hte Jinghpaw Wunpawng buga hpe htu kau ai hte bung nga ai. Manau gawk nu hpe run kau shangun ai gaw Mungdan hpe jahten sharun kau ya ai hte bung nga ai. Manau Shadung hpe baw kau shangun ai gaw a myu ting hpe shamat hkau na matu a pawt kaw ya baw kabai kau ai hte bung nga ai. Jinghpaw Wunpawng sha rai yang kadai mung n lu hkam sha na re ngu ngai Ta Tut mu mada ai.

An-hte Jinghpaw Wunpawng sha ni Maigan shara shagu de chyam bra mat ai gaw gahkyin gum din lam hta n gun yawm mat ai sha n nga, Mungdan hpe gaw de la na matu n gun kaba sum mat ai hte bung na re ngu ngai Ta Tut kam n ngai. Maigan du tim ti nang a htung hkin hpe gaw n malap na re ngu ngai Ta Tut kam hpa n ngai. Rai tim nyi htep nna rau gahkyin gumdin ai gaw grau n gun lu nga ai. Tsan tsan kaw na gahkyin gumdin ai lam gaw kade wa myit rawt ai rai tim n gun n lu la nga ai ngu mu mada lu ai. Ngai Ta Tut galoi mung tsun ai gaw, "Ngai gumhpraw hte hpaji law law lu yang Wunpawng Mungdan hpe bai wa gasat la na" nga ma ai. Jaw nga ai, maigan mungdan ni a hpaji, jagumhpraw ni gaw an-hte Mungdan hta gau madang tsaw, mai tam la nga ai. Kaja wa teng nga ai kun? Ngai Ta Tut a myit hta "Ngai ja gumhpraw, hpaji hkum ai shani Wunpawng Mungdan n nga mat yang gara hku di na..."

Ngai Ta Tut shani shagu an-hte Jinghapw Wunpawng Mungdan a shiga ni hpe madat la nga ai. A ten lu shagu Dum N-ta de Phone hte matut mahkai let, masa ni hpe galoi mung maram yu nga ai. Ya ti nagn KIO kaw na n dai lam tsun dat sai da. Myen gaw htaw ra hku galaw dat sai da. N dai hku daw dan ma ai da. Nga ai shiga ni gaw grai law la nga ai. Shani shagu a shiga ni gaw n kahtap ai sha galoi mung ning nan hkrai rai nga ai. Grau nna gaw dai ning 2009 ning hta ngai Ta Tut mung masa lam ni hpe grau myit shang sha let la yu nga ai. Lama wa ti nang KIO hte Myen Hpyen ni gap hkat wa yang gara hku di na kun? KIO kaw wa nna sa gasat lawm na kun? Shing n rai tsan tsan kaw na sha shiga maram yu nga na kun? Ngai gara hku galaw ra na. A ten kadun bungli (Part Time Job) galaw nna gumhpraw tam let ti nang KIO de shagun ya na kun? Jinghpaw Wunpawng sha Sen Shi jan (1,000,000+) jan nga ai gaw, marai mi lani mi 1$USD mahkawn tim lani mi American Sen Shi jan lu nga ai ngu mung sawn yu rai nga ai. Kaja wa myit shang sha nga ai kun? Ngai Ta Tut mying hte bung hkra ta tut bungli galaw nga ai kun? Myit yu let mau nga ai.

Chyeju dum poi ni hta e mungshawa ni hte dap shawa ni grau nna hku hkau let Yu Ngwi Pyin Ra (Stage Show) lamang ni yu, Manau ni rau nau, Tsa ni rau lu, kani rau lu let pyaw la nga ai. Mung shawa hte hpyen dap "Hka" hte "Nga" zawn rau kanawn nga ma ai. Ngai Ta Tut rai yang gaw hpyen dap kaw grai pu ba ai lam ni gaw mung shawa ni hte hkrum yang she grai pyaw mat ai majaw hpyen dap de pyi n kam wa sai. "Ngai Ta Tut hpyen hprawng hprawng mat na kun? Mung masa gaw n kaja la ai hte, majan mi byin wa yang a laga si mat na ra ai" Ta Tut a myit hta n dai zawn re ai myit ni pru wa yang gaw kadai machyi a ta? Ngai Ta Tut hkrat sum yang Myusha lam yan hkrat sum mat wa na. Ti nang KIO hkrat sum mat na. Wunpawng Mungdan hkrat sum mat na. Htung hking hkrat sum mat wa na. Jinghpaw Wunpawng myu sha ngu ai Mungkan n tsa hta htum mat wa na. Ngai Ta Tut kade a kyak ai hpe ya she myit lu n ngai.

Ngai Ta Tut gaw myen laika nau n chye nga ai. Tsang 10 awng hkra lu htai ai rai tim Myen laika hpe gaw a tsawm n chye ka ai. Lama wa lu ka la ai rai tim Myen ni hpe gaw gara hku n dep nga ai. Myen wa Jinghpaw laika kade chye ai rai tim ngai Ta Tut hpe gaw dep na n re. Ngai Ta Tut, ti nang KIO kaw na manang wa hpe laika shagun mayu ai rai yang hpa baw laika hte shagun na kun? Ngai Ta Tut gaw Jinghpaw Wunpawng shadang sha re majaw Jinghpaw hku shagun na rai nga ai. Lai wa sai shata hta e NDA-K kaw na du wa shagun dat ai laika langai mi an-hte Jinghpaw Wunpawng Bloggers ni hpang de grai mawng mat ai hku re. Lahta na ngai Ta Tut a ning mu hpe yu dat yang gaw ndai lam nigaw Myen ni galaw ai rai sam ai she ngu shadu wa ai. Lak Nak jahkrat mat sai ni hpe a kyu jashawn let n dai zawn galaw ai lam ni mung htawm hpang de grai nga wa na re ngu ngai Ta Tut shadu ai. Nang NDA-K, Kachin Defence Army KDA hpyen la wa, Ta Tut wa galaw nga ai Mungmasa lam rai n htum mat shi nga ai. Yup rawt jang gaw myi man myit ra nga ai. Nang yup rawt sai kun?

Ta Tut a ning mu ni hpe madun dat ai rai nga ai. Bai nna e du wa na December 12 ya shani gaw Ta Tut hte Dum N-ta masha ni yawng Dum N-ta a shangai n htoi hpe myit dum ra na n htoi rai nga ai. Dum N-ta hpe gaw de ai laning mi pring na rai sai ngu ai lam hpe mung Ta Tut Dum N-ta masha ni hpang de shana dat n ngai. Ngwi pyaw ai Hkrisamat shata rai nga u ga ngu kyu hpyi ya dat ai.

Yup Mang Ni A Ning Gam (snr) Shakrep Mungdan de jahkring mi.

2009-11-17T00:29:00.005+08:00

Shana hkying 10:00PM hta Singapore Mungdan, Golden Mile Complex e gumhpraw galai kyin bu si nga ai. Ngai Ta Tut, Singapore kaw na Malaysia de jahkring mi sa chyai na matu mawdaw daru Golden Mile e Singapore gumhpraw Dollar hpe Malaysian gumhpraw Ringgit de galai nga ai. 10:30PM hta le na mawdaw lekmat mari lang let mawdaw rawt na ten hpe la nga sai. Nau n-na ai sha maw daw rawt mat wa sai hte jahkring mi nga yang Malaysia Mungdan de shang wa na Mahkrai pawt de du wa ai majaw maw daw kaw na yu let Maigan masha pru shang gawn hkang dap (Immigration) de shang ai.

Ndai mahkrai lai sai hte Malaysia mungdan de shang sai ngu myit nga ai. Hpa mung n hkrit n tsang ra ai sha Malaysia hkran de du wa sai. Shana re ai majaw ngai Ta Tut wa mung yup malap mat let maw daw n tsa e yup mang she mang hkra hkan mat sai. Hkying kade na mat ai n chye, lam n tsa e kade lang hkring lai mat ai n chye dat ai sha Malaysia Mungdan a mare daju Kuala Lumpur (KL) mare kaba hta jahpawt hkying 3:30AM hta du mat sai rai nga ai. Yup su yup mang rai, ti nang a n hpye hpe hta gun let Maw daw shap (Taxi) lang nna jinghku ni a dum n-ta hkring dat hpe jaw let jawn mat wa sai. Du ai hte jinghku ni hkap tau la nna shara jaw ai hte kalang ta yup pyaw mat sai.

Yup nga ai ten gaya gayoi nga wa ai majaw mahkyit chyu mahkyit sai hte jahpaw du yang chye dat ai gaw Shakrep grai kawa ai nga ai hpe tsun dan ma ai majaw Shakrep kawa katut ai hpe chye lu ai hte kawa hkam da ai shara hkan e mahkyit chyu mahkyit nga sai re. Hpa mi nga tim an-hte Jinghpaw Wunpawng sha ni sha n ga Myen mungdan hta jam jau let lu na sha na bu na hpun na yak hkak ai ni yawng mayawng gaw n dai shara hta sa zup let ti nang a shawng lam hpe Mungkan Hpung (United Nations) de ap da ai shara hte shawng lam a yup mang ni de du wa na matu ning gam langai mi rai nga ai shara hta n-dai zawn hkap tau la na jinghku jingyu ni lu ai majaw grai kabu ai.

Kadai mung kade a kan bau lam hte ti nang a sak hkrung lam a matu shakut shaja nga ra ai n dai shara ni hta Jinghku manam ni hpe grai hkap la kam ai gaw an-hte Jinghpaw Wunpawng sha ni sha rai na re ngu ngai Ta Tut shadu ai. Gara mungdan, mungkan de du mat ai rai tim ti nang a ru sai, htung hking, myusha hte Mungdan hpe n malap ai Jinghpaw Wunpawng sha ni rai nga ma ai ngu ngai Ta Tut a rawng la let myit dik ya nga ai. Ti nang a Mungdan, buga ni hta nga lu nga sha na lam yak hkak ai majaw du sa wa ai n dai shara ni hta e lu sha na lam, nga na lam ni gaw grai yak hkak la nga ai. No. 3 Mungdan kaba ni de lu du na matu n dai shara ni hta e byin mai ai hku nga ra ai prat ni gaw grai pu ba la nga ai hpe mung mu lu ai hku re.

Ndai shara de ngai Ta Tut 2008 ning hta mung kalang mi du ga sai hte ya mung shai mat ai lam n nga ai sha, moi na hte maren rai nga ai hpe mu ai. Masha ni kade shang, kade pru, kade galai mat ai rai tim n dai shara hkan nga ai masha ni yawng a mang hkang ni gaw n galai shai nga ai. UN cards rai n lu la shi ai ni mung dai lu la hkra shakut nga ai hte shing gan mung n le gwi hkra hkrit nga ai ni mung nga ma ai. Nga ai shara n-ta kata ni hta e masha a sai hpe chyup chye ai Shakrep ni grai nga ai zawn shing gan de mung masha a sai, ja gumhpraw ni hpe chyup chye ai Shakrep ni grai nga ai lam hpe Malaysai nga Jinghpaw Wunpawng n kau mi tsun dan ai majaw chye lu ai.

Ngai Ta Tut n dai laika rau ka shaleng dan ai hta ta tut hkam sha nga ai mabyin ni gaw grau jam jau la nga ai. Bu hpun lu sha na lam ni a matu ti nang a Mungdan e n galaw ga yu ai mayam bungli ni hpe myit kaji let sha galaw sha ra ai. Malaysia masha ni a masha zawn n nawn ai hku tsun shaga ai lam ni hpe mung kam sharang ra nga ai. Hpa lam mi byin wa ai rai tim masha ni hte shadawn yang galoi mung baw gum let sha hkawm sa ra nga ai. Masha wa hpe hpa mara n galaw da ai rai tim Balik (Police) hpe mu ai hte lagu lagut rai hkawm sa ra ai lam ni gaw grai jam jau la nga ai. Pandung ngu ai mungdan kaba ni a shaga ai lam ni hte ndai zawn re ai prat ni hta na lawan lawt lu na matu sha kyu hpyi shaja nga ra ma ai.

Shana yup ai shaloi, sai chyup chye ai Shakrep ni gaw n hkring n sa masha a sai hpe shara shagu kaw na gawa chyup shaw la ai zawn Malaysia kawna Balik ni hte bungli madu ni mung jam jau la nga ai myusha ni kaw na ja gumhpraw, n gun a tsam, a ten hte sai ni hpe chyup saw la nga ma ai. Kadai hpe hkrum tim shi hte shi gaw jam jau ai mau mwi ni hpe hkai dan lu ma ai. Madat sha madat tim mung n shung si she rawng rawng nga hkra chye na myit sawn la lu ai. Mungdan a ning baw ni nan mung ndai zawn ti nang hpe kam hpa let sa machyu nga ai jam jau masha ni kawna sai chyup lu ai lam ni nga ai. Rim la lu ai masha ni hpe dut sha ai lam ni, gumhpraw a grip a rip rai hpyi ai lam ni, roi ai lam ni gaw a hkying ten shagu, shara shagu, masha shagu hta hkam sha, byin nga ai lam ni rai nga ai.

Ngai Ta Tut lahkawng ya sha sa shanu ai shaloi Shakrep grai kawa hkam la ai zawn shani shagu nga pra ra ai Jinghpaw Wunpawng sha ni kade wa hkam sha na hpe chye na lu ai. Jahkring mi sha hkam sha lu ai pyi grai jam jau ai zawn nga kam sha let n lu hkam jan lu ai majaw, shawng de kaw na nga let galoi mung sai chyup hkrum nga ai ni gara hku hkam sha nga na ngu ai gaw Ta Tut mung n chye tsun mat sai. Htaw ra kaw Balik ni masha rim ai da, n dai kaw gaw rim mat sai da, kadai kun gaw dut sha hkrum sai da, kadai kun hpe gaw bungli madu ni a dup gayet ai da, bungli shabrai n jaw ai da nga ai, da ni grai law hkra hpe mung na lu, chye lu, mu lu ai majaw grai myit n pyaw ya ai.

Kaning re ai sak hkrung lam, gam maka ni hta rai tim pyaw ai lam ni hpe chye tam, mu tam let galaw lu ai an-hte Wunpawng sha ni a atsam hpe gaw ngai Ta Tut mung grai shagrau mayu n ngai. Jinghpaw Wunpawng sha ni a Nawku jawng nga ai, Christmas, Shaning N nan, Chyeju dum poi ni hpe mung galaw ma ai. Myit pyaw hpa poi lamang ni hte htung hkying ni hpe gara hku mung n lu kabai kau ai an-hte Jinghpaw Wunpawng sha ni a rawn a lai ni hpe mung grai shagrau ai. Ya ngai Ta Tut du nga ai ten hta mung Hkung ran poi lahkawn hpe galaw nga ma ai. Ngai Ta Tut kalang mung n chye hkat ga ai, n mu ga ai rai tim Hkung Ran poi hta sa shang lawm lai wa sai.

Shadang Bawk Di hte Shayi Htang Htoi yan a Hkrisatan dinghku n nan de ai lamang hta ngai sa shang lawm ai re. Jinghpaw Wunpawng buga hte kade tsan gang nga ai rai tim ti nang a htung hking hpe n malap kau ai sha hkung ran bu hpun palawng ni hpe Jinghapw soi palawng, n hpye, n htu n nga, ni hte grai tsawm htap hkra mu lu ai. Chye hkat ai mi rai yang rai, n chye hkat ai mi rai yang rai manyi sum sai rai yawng hpe hkap tau let chyeju dum ga hpe n hkring n sa let tsun shaga nga ai Num n nan, La n nan yan hpe mu lu ai. Yawng hpe tsaw ra myit hte hkap tau chyeju dum nga ai zawn shan a Dinghku n nan mung yawng a kyu hpyi ga hte maren ngwi pyaw ai hkrisatan ding hku byin tai lu u ga ngu ngai Ta Tut mung kyu hpyi lawm ya n ngai.

Malaysai Mungdan e du nga ai Jinghpaw Wunpawng sha ni a myu tsaw myit gaw Wunpawng buga e naw ngam nga ai ni hta n grau tim n yawm na re ngu ngai Ta Tut shadu n ngai. Hpa lam hta rai tim ti nang Jinghpaw Wunpawng sha ni hte rau rau rai galaw ai lam ni hte yawng myit hkrum nga ai hpe yu yang chye lu na re. Kadai mung kade a myit masin kata hta e ti nang a buga Dum N-ta hpe myit dum nga na re ngu mung myit sawn chye na ya lu ai. Ti nang a shawng lam sak hkrung lam hpe Dum N-ta buga e nga ai hta grau rawt jat na ngu sawn lu ai majaw n dai yup mang ni a ning gam langai mi rai nga ai Malaysai Mungdan e sa jam jau hkam nga ai rai tim myit kata e gaw ti nang a buga de she du nga ai ni mung grai law nga ma ai.

Ya Malaysia kaw na Singapore Mungdan de bai wa ai lam n tsa e ngai Ta Tut a myit kata Shakrep gawa hkang ni gaya nga ai zawn myit sawn sum ru yu na lam ni grai law hkra ngam nga sai. Grau kaja ai prat yup mang ni a matu ning gam langai mi gaw Shakrep ni hkrai zing ri nga ai Shakrep Mungdan she rai nga ai hpe ta tut sa mu hkam sha lu ai. Ndai yup mang ni a ning gam langai mi hta Shakrep ni sai chyup la ya shagu ti nang hkrap let myit kaji nga ai hta Kanu Wunpawng Buga gaw grau myit n pyaw let masin machyi nga ai hpe nang chye yang ti nang ra ai pandung du ai hte lawan ai hku Kanu buga de bai wa rit ngu...

Jeju n dep ai

2009-11-09T23:57:00.002+08:00

July shata re ai majaw rai sam ai, marang jahkring hkring htu ai majaw shingan de hkawm sa na matu yak hkak ai hku re. Dingdung Korea Mungdan a Dingdung maga de panglai n-tsa e nga ai Jeju-do zinlawng gaw tsawm htap la ai majaw sachyai na matu grai mying kaba ai shara langai mi rai nga ai. Ndai Jeju-do zinlawng gaw Korea Mungdan hta kaba dik htum zinlawng rai ai sha n ga, Korea Mungdan a lak lai dik htum ti nang shara ti nang up hkang Asuya, Special Self-governing Province, rai nga ai.

Ndai Jeju-do zinglawng n tsa e mare kaba 3 nga ai hku re. Panglai hka mung san tsawm la ai hte grai tsawm ai hka hking gau ni lu da ai majaw mung maigan hkawm sa masha ni myit shang sha ai shara langai mi rai nga ai. Jeju zinglawng gaw Wan Bum (Volcano) kapaw ai kaw na byin wa ai zinglawng re ai majaw n lung ni yawng a chyang (Black) n sam hkrai rai nga ai.

Jawng dat ai majaw galaw hpa n nga mau nga ai ten manang langai mi International Youth Fellowship (IYF) kaw na woi awn galaw ai World Youth Camp nga ai da nga nna shachyen ya ai majaw grai myit shang sa let sagawn yu yang manu mung nau n ma ai sha mai shang lawm ai nga ai majaw grai kabu mat ai. Marai langai mi Singapore Dollar 300SGD bang nna shang lawm ra ai hte nbung li lekmat hpe gaw ti nang jahpu hte ti nang sa ra ai re. Visa hte seng nna mung IYF kaw na lit la ya ma ai majaw mayak mahkak nau n nga ai hku re.

TG Thai International Airway kaw na manu hpa dik n bungli lekmat mari lang let zatka hkan e sha mu ga ai Korea Mungdan de sa du yu sai hku re. Dollar 650SGD htum ai n bungli hkrun lam gaw hkying hkum 5 chyen sha jawn ra ai hkrun lam hpe hkying hkum 9 jan ting jawn kau sai hku re. De a chyeju majaw Hongkong hpe nbung li pa kawn na kaji mi mu ga sai.

Visa shawk ai shaloi na lam hpe naw tsun dan na. IYF kaw na lit la let Visa shawk ya ai rai tim shawng ning le wa ai shiga gaw nkaja la nga ai. Myen re ai majaw visa n lu jaw ai nga korea maigan kyit hkai rung kaw na tsun wa ai majaw grai mau lai kau sai. Myen Asuya a majaw an-hte Jinghpaw ni sari poi ai hku re. Akyu chyu hpyi shaja let dai Korea kyit hkai rung de hkrai sa san san di yang hpang jahtum e visa jaw ya ai hte chyan la chyau rai Korea ga du lu du ga mat ai hku re.

Camp hpe bat 2 galaw ai hte yawng pawng bat 3 Korea ga hpe sin praw sinna dingdung dingda chyam hkra wam kau da sai. Jinghpaw myusha lu tai ai hpe gaw arawng la ai rai tim ti nang Mungdan ti nang nlu up ai a majaw Myen hkrai hkrai shadu ma ai. Sha chyen shaga ai shaloi masha ni hta grau aten la nna sanglang dan ra ai hku re.

Myit hta gaw Myen sha du katut ai gaw si mat ai hta pyi grau nra dum n ngai. Dai majaw maigan manang ni rau hkrum shagu ti nang gaw Jinghpaw Wunpawng sha re ai lam, Myen hte gara hku shai ai lam ni hpe she ba hkra tsun dan ra ai hku re. Mungdan rawt malan lu ra ai lam ni kaw dai mung lawm ai hku re.

Ya Jeju-do zinlawng kaw du ai lam hpe bai matut yu ga. Camp lung ai re majaw Camp maw daw ni rau htaw hkawm, le hkawm rai nna grai wam kau sai. Bum ni, hka panglai hking gau ni, hkai lu hkai sha ai sun ni, jawng ni grai law hkra yu wam kau da sai. Tsawm nga ai. Mying kaba ai hte htap htuk hkra shi hte shi yu pyaw, nga pyaw na zawn rai nga ai.

Camp re ai majaw zup hpawng hpe gaw lani mi 3 lang galaw ai. Zup hpawng galaw ai shara gaw Korea mungdan hte ASEAN mungdan ni hkrum zup let zup hpawng galaw ai shara Jeju ICC gawk nu kaba hta galaw ai re. Dai kaw Myen Mungdan a dawng hkawn jun da ai hpe mung mu lu ai majaw chyan lachyau rai sumla (photo) gayet la ai. Myit hta gaw N htu 2 chyik chyai re ai dawng hkawn hpe n dai kaw mu lu yang kade kaja na ngu.

Tsit tsawm la ai hpun ni hpe bum ni she hpring hkra mu mada lu ai. Htap 6 nga ai Manam Jarawp (Hotel) kaw na yu dat yang panglai hking gau kaw na jahtum n mu lu hkra tsit tsawm ai Jeju zinlawng hpe tsawm htap la ai hku mu mada lu ai. Ndai a majaw mung Maigan masha ni law malawng sa chyai let ndai tsam htap ai lam ni hpe yu myi n gun la ma ai rai sam ai ngu sawn yu ai.

Ngai Jinghpaw Wunpawng myu sha rai ai majaw kun gaw n chye sai. Ndai ram tsawm htap la nga ai shara kaw du nga ai rai tim nye myit hta "Rai tim (But)" ngu ai ga si naw pru nga ai hku re. Ndai tsit sawm ai bum ni, palayang ni gaw Jinghpaw Wunpawng buga e mu ga ai tsit tsawm la ai bum ni, palayang ni hpe n dep nga ai. Myit man lata ai gaw n re rai tim a tsawm yu ga nga yang kaja nan Jinghpaw Wunpawng buga hta n grau nga ai.

Ndai Jeju zing lawng sha n ga, Korea mungdan ting tu ai hpun ni gaw marau hpun hkrai rai nga ai. An-hte Jinghpaw Wunpawnwg Buga e tu ai hpun ni gaw baw hpan hkum ai hte, Kaba ai hte, tsaw ai hte, tsawm ai hte grai law hkra rau tsawm htap nga ai. Palayang ni mung an-hte Jinghpaw Wunpawng buga hpe gara hku n dep nga ai. An-hte a buga grau tsawm la nga ai. Ndai zawn re ai Jeju zinlawng hte Korea Mungda gaw mungkan hta grai mying gum hkawng nga ai.

An-hte a buga hpe n dep ai Jeju gaw Mungkan hta grai mying gum hkawng yang an-hte a buga gaw hpa baw byin nga sai kun? An-hte a buga hta si hkrung si htan hkum ai, Myen mung kata hta sha pyi tsawm htap ai lam hta an-hte Jinghpaw Wunpawng buga gaw masha a myu wa a mtu mying gum hkawng nga ai. Ndai zawn tsawm htap la ai shara ni, hpun ni, bum ni gaw dai ni hten zar lam de du nga sai.

Gumhpraw a rang law law shaw nna hpun ni hpe dut ai, bum ni hpe htu nna lung seng tam ai, Palayang ni hpe htu nna ja tam ai, Hka ni hpe pat nna jak rung jak rai in shachyaw let masha amyu ni hpe dut ya nga sai. Hkye la na gaw kade a lit rai nga a ta? KIO/A a lit kun? Nang a lit kun? Nye a lit wa kun? Kadai hkye la na kun? Gara hku matut byin wa na kun?

Gasan ni san nga na malai ti nang hkum ti nang lit la, manu shadan let myu sha lam yan hta rawt tsap nna yawng hte pawng galaw ai lam gaw mahtai kaja rai na re ngu ngai sha du n ngai.

An-hte a Mungdan hpe kara mungdan mung n dep ai ngu ai hpe matsing let manu shadan, a hkyak la sa wa ga ngu.

Yi sa lam

2009-11-05T01:54:00.003+08:00

Yi wa kaw du yang galoi shagu Shing Tawn Pan manam ai baw shadu ai hku re. Woi Maw gin wang kata Sanpai mare sa ai lam n tsa hta nga ai Aung Ja Yang ngu ai kahtawng hta nye Dum N-ta a Yi nga ai hku re. Mak Chyawk Si (Orange) sun hte gayau let bum de gaw yi hkai sha ai re. Myikyina e jawng lung nga ten jawng dat shagu Yi de wa chyai chyai re ai hpe ya du hkra marit nga ai. Yi kaw hkai ai nam law nam lap ni hte shat shadu jaw yang grai sha shang ai. Ban kade sha bang kau ai pyi malap hkra sha ai. Yi wa kaw dung nna yu dat yang Mungkan ting hpe n tsa kaw na yu nga ai zawn nga hkam sha ai.

Jinghpaw Wunpawng sha ni a lam tsun ga nga yang hkrang yi a lam n lawm n mai rai nga ai. Bum ni hpe hkyen, sharaw nat, mam ting rai nna galaw lu galaw sha ai n dai kan bau bungli hpe n galaw ga ai Jinghpaw Wunpawng Dum N-ta myi nga na n sha du ai. An-hte Jinghpaw Wunpawng sha ni a htung kying langai mi zawn rai nga ai ngu mu lu ai. Ya prat e kade lauban mat ai Dum N-ta ni rai tim, sun mari let yi kyen sha ma ai hku re. Hpa majaw nga yang Jinghpaw Wunpawng nga yang n dai Yi a sama hpe gara hku mung n lu hka ai hpe mu lu ai. Mare Kaba de shangai nna mare kaba de nga man mat sai ni hpe gaw n chye tsun ai rai tim law malawng ngu na gaw n dai hkarang Yi hpe marit na re ngu ngai kam ai.

Shaning tup pu ba da ai lam ni hpe November shata du yang Karai Kasang hpe chyeju dum ai chyeju dum poi hta n gun a woi la ai. Mare Kaba de nga ai ni rai tim ndai November shata du yang Chyeju dum poi ni hta Yi hkan e hkai lu hkai sha ai baw Mam, Saba si, Shing Tawn pan, Majap, Bak Hkri Si ni a ga shagawp ni hpe hti, hkrang shala let galaw ma ai re. Dai hte maren ngai Ta Tut a dum nta e mung Yi galaw sha ai hku re. Yi n hkai shi yang N-pun Gu ai shaloi mung hpun hta ai hte tsing magang ai the li hku ding sa ni hpe nat ai lam ni galaw ai hta grai pyaw dum ai hku re. Rai nga ai ba ai baw bungli rai tim ba pyaw ai ngu she tsun ai baw kun n chye mat sai.

Yi de sa yang lam kaw Hting Ka gun let hkawm ai lam ni hpe grai marit ai hku re. Lam kade kaji, kade magaw, kade ja ai hkrun lam rai tim pyaw nga ai. Grai ba nga ai rai tim Yi wa kaw du yang Kum Gyin Si sha na matu myit hta bang dat ai hte rau lagaw ni grai tsang wa ai zawn a lawan sha lagat dat dat re ai. Yi wa hpe bum a tsaw dik htum ai shara hta gap da ai majaw hkring sa ai ten n bung bung ai hpe grai pyaw ai hku re. Yi sa lam hta kadawng grai lung ra ai. Dai ten kadawng lung nna n tsa du yang dai n bung bung ai hpe lu hkam sha na re ngu myit let kadawng grai lu lung ai hku re. Kadawng lung ngu let hpang de bai gayin yu let Ngai grai byin ai ngu myit hta a rawng la ai.

Yi sa lam hta Yi du wa ai shara kaw ti nang a Yi hpe Gai Hpan kum da ai shara ni nga ai. Dai Gai Hpang hpe chying hka n hpaw ai sha n tsa hku lai na matu lakang ni galaw da ai re. Dai lakang hpe lung yang Yi de du sai ngu grai myit pyaw la ai. Yi Wa de du hkra lung wa ra na lam hpe a tsawm n ga law da ai rai tim grai lung pyaw dum ai. Yi Wa de yu wa ai lam makau e hkai da ai Sa Ba Si hpun ni hta a si si nga ai hpe yu let grai myit pyaw ai. Majap si nj si nga yang 4, 5 di nna Yi Wa kaw jap htu htu sha na ngu myit ai ten mung grai law ai re. Jinghpaw Wunpawng sha rai nna kun gaw n chye ai, majap n jap yang shat mai hta jum n lam ai hkrai shadu ai.

Yi sa lam hta ba gaw ba nga ai rai tim Majap jap htu sa ai zawn sha, kade jap tim mu dum pyaw dum nga ai. Yi lam hta kalang lang kashawt kataw ai lam ni nga ai. Rai tim n machyi nga ai, yi de du yang na pyaw hpa ni hpe myit let grai pyaw nga ai. Mare Kaba hta pyaw hpa shara ni de sa ai hta nga yang Yi sa lam gaw grau pyaw la nga ai. Yi sa lam hta myit da ai lam ni hte Pandung nga ai majaw lam num she shang na lam n nga ai. Yi du yang galaw na grai law nga ai. Hpa majaw nga yang Yi e galaw ai bungli yawng gaw pyaw hpa lam zawn nye myit hpe shapyaw ya nga ai majaw re.

Pu ba ai lam ni, myit ru ai lam ni yawng gaw dai Yi sa lam kaw sha hkoi mat mat re ai. Jinghpaw Wunpawng sha lu tai ai majaw Karai Kasang hpe chyeju dum ai hta Yi lu sa ai a majaw mung lawm nga ai. Prat dep jak rai ni, hpaji ni n ra ai sha praw tsawm la ai myit masin salum hte ti nang kan bau na matu galaw lu galaw sha ai bungli rai nga ai. Masu ai lam n nga ai, shing jawng na hpa n nga ai, n ju n dawng na lam hpa n nga ai. Byi wa ai lam yawng gaw tsaw ra ai lam, pyaw ai lam, myit dik ai lam ni hkrai pru wa ai shara Yi sa lam hpe grai dum ai hku re.

Rai tim ya ten dai Yi sa lam hta tsa sam Myen Hpyen dap ni dung let Yi sa lam e an-hte Jinghpaw Wunpawng shayi sha ni hpe roi rip sat kau ai lam ni nga ai majaw pyaw la ai Yi sa lam ni gaw hkrit hpa lam ni she tai wa sai. Ngwi pyaw simsa let myit ru myit tsang lam hpa n nga ai n dai Yi sa lam ni hpe kaga a myu sha ni madu sha nga masai. An-hte a ji woi ji wa ni kaw na ngwi pyaw let nga pra wa ai n dai Yi sa lam ni hpe bai a dawt gasat la let pyaw la ai Yi sa lam hpe kalang bai hkawm mayu n ngai.

Yi sa lam, ngai du hkra bai wa na n ngai.

Hkrit ai majaw (reason)

2009-11-02T05:58:00.007+08:00

Bungli langai mi hpe galaw ai hta shi hte shi majaw (reason) hte shi nga ai hku re. Kan si ai majaw shat sha ai, yu hkraw hkraw' ai majaw hka lu ai, sak hkrung ra ai majaw n sa sa ra ai, kan bau ra ai majaw jagum hpraw tam ai. Lam shagu gaw shi majaw hte shi byin nga ai hkrai rai nga ai. Laika hpaji sharin ai, masha man hta myi man pa na matu, rawt galu kaba wa na matu rai nga ai. Masha n kau mi gaw ti nang galaw nga ai bungli hpe masha wa e a grip a rip rai galaw shangun ai majaw n kam tim matsun hpe hkan nang shatup ra ai ni mung nga ma ai. Hpyen La ngu ai prat hpe yu yu ga.

Myen hpyen la la ai ni a prat hpe yu dat yang ti nang n kam, lahta na matsun hpe n lu ning le ai a majaw hpyen la la nga ai ni grai law nga ai. Dai hku nga yang "hpyen la she nga ai ni hpa rai nna me dai ram hkrit nga ma ai kun?" nga nna myit sawn yu na lam mung nga ai hku re. Hkrit nga ai hpyen la ni a myit hpe mung n mau ra ai, hpa majaw nga yang hpyen tara hta lahta na matsun hpe n hkan yang si a ri jaw hkrum ai lam ni a majaw rai nga ai. Moi England mungdan e hpyen la langai mi lahta na matsun hte tsa lu shangun ai hpe tsa n lu na matu kanu hpe gasadi jaw da ai nga nna matsun hpe ning le let tsa n lu ai majaw si a ri jaw hkrum ai lam Mungkan hta mau hpa langai mi hku na ga ai hku re.

Majaw (reason) ngu ai hta hkrit nna galaw ra ai ngu ai majaw gaw gasadi n dung ai sha n nga magrau grang ai hpyen la byin tai na matu grai yak hkak la nga ai. Laiwa sai 2009, August shata e byin lai wa sai hpu nau Kokang hpyen hpung ni hte Myen Asuya a majan hta Myen maga de na hpyen hprawng hprawng ai masha law la ai hte si hkrum ai hpyen la mung law la nga ai. De a majaw majan hpe lit la ai Myen lit hkam Du Kaba langai mi hpe mara tam dam jaw ai lam ni Myen hpyen dap kata byin lai wa sai hpe yawng chye na re ngu kam ai. Hpa majaw n dai zawn byin ai rai a ta nga yang Myen hpyen la ni a hpyen magam gun ra ai Majaw (reason) gaw hkrit ra ai a majaw rai nga ai.

Hpyen dap, Mungdan (snr) Myusha lam yan ni hta e uhpung uhpawng kata e dai hkrit ai ngu ai Majaw shang wa ai shani gaw hpa bungli mi galaw ai rai tim awng dang na lam hte grai tsan wa ai zawn a rang grai hkrat sum wa ai lam ni byin wa chye ai baw rai nga ai. Hkrit ai majaw bungli hta maju n lu jung ai, hkrit ai majaw bungli hpe kang ka hkra n lu galaw ai, hkrit ai majaw magrau n grang ai, hkrit ai majaw hprawng ai, hkrit ai majaw a sum jaw kau ra wa ai. Ndai lam ni yawng gaw Hpyen dap, Mungdan (snr) Myusha ni hpe jahtum wa chye ai sadi ra dik htum hpyen kaba rai nga ai. Kadai ni hkrit nga ai kun? Kadai wa hprawng na matu myit tawn ai kun? Kadai wa a sum jaw na matu shajin da nga ai kun?

Hkrit ai ngu ai Majaw (reason) hta shi a lam ni grai law hkra naw nga ai hku re. Hpa majaw hkrit ra ai kun? Lahta e kalai wa sai hte maren si na hpe hkrit ai majaw n byin ging ai lam ni byin wa sai Myen Hpyen dap a ladat hpe yu yang kasi la hpa rai nga ai. N gin ai sha ti nang a hpu nau ni law law si jawng ma wa ai hpe mu lu ai. Bai n kau mi gaw masha wa a matu hkrit ya ai ni mung nga ma ai. Ti nang a majaw masha wa hkam sha ra na hpe n kam yu ma ai. Ti nang a majaw dum n-ta masha ni jam jau na, ti nang a majaw jing hku jing yu ni jam jau na, ti nang a majaw a myu sha ni jam jau na hpe n kam yu ai majaw hkrit nga ai ni mung grai law nga ma ai. Ngai mu lu ai ning mu hku nga yang n dai zawn hkrit ra ai lam mung hkrit ging ai lam ni re ngu mu lu ai.

Jinghpaw Wunpawng Mungdan Shanglawt Ausya KIO/A (Kachin Independence Organization/Army) ni a ya hten na masa lam ni hpe maram yu yang dai zawn hkrit ai Majaw (reasons) law law nga ai ngu mu mada ai hku re. N kau mi ti nang sak si hkrum na hpe hkrit ma ai, n kau mi ti nang dum n-ta masha ni a shim lam ai majaw hkrit ma ai, n kau mi ti nan myu sha ni jam jau na hpe n yu gwi ai majaw hkrit ma ai. Dai hku nga yang ti nang hkum ti nang, ti nang a dum n-ta masha ni, ti nang a myu sha ni hpe san yu ga. Nan-hte hkrit ma ai kun? Mungshawa zuphpawng ni galaw ai hta mung shawa ni a ning mu ni hpe tsun tai lai wa ai shaloi hkrit nga ma ai kun (snr) n hkrit ai kun ngu ai mahtai hpe chye lu na masai ngu kam ai hku re. Dai rai yang Myusha ni hkrit nga ai gaw n rai na sai ngu kam ai hku re.

Ti nang a jinghku jingyu ni hte dum-nta masha ni hkrit ma ai kun? Laiwa sai shata ni hta na masa ni hpe yu ga nga yang hkrit nga ma ai hpe mu lu ai hku re. Nkau mi hkrit nga ai zawn n kau mi gaw sadi maja ai lam ni mung nga ma ai. Ndai hta hkrit ai hte sadi ai lam gaw bai shai nga ai. Sadi maja ai ngu ai gaw hkrit ai jaw n rai, shing ma kaw ba da ai ma ti nang hpe n kawa na matu sadi maja ai ga she re ngu mu mada lu ai. Rai tim n kau mi gaw kaja wa nan hkrit nga ma ai hpe mung mu maram lu ai. Majan byin wa na zawn nga yang a kroi a noi nga, mang hkang chyu tam nna a put a pai nga ai lam ni gaw hkrit ai majaw rai nga ai. Dai hku nga yang Jinghku Jingyu ni hte dum n-ta masha ni gaw hkrit ai hte n hkrit ai ni shada Tsa Htam Manga shi hpra rai na re ngu mu mada ai.

Ti nang hkum ti nang san yu ga. Ti nang si na hpe hkrit ai majaw kun? Teng na re ngu kam ai. Ndai mungkan n tsa si na hpe n hkrit ai masha n nga na re ngu kam ai hku re. Mungkan ting hta grau dik htum Karai Kasang a kasha shing tai, Mungkan ga hpe yubak n sin kaw na hkye mawoi la ai Madu Yesu pyi "Ndai gawm hpe ngai kaw na yan kau lu yang yan kau ya rit" nga Kawa Karai Kasang hpang de kyu hpyi ai ten nga ga ai hku re. Islam ni shata shagu mungkan shara magup e si hkam nna bawm kapau nga ai ni rai tim, rai n si shi ai shaloi si na hpe gaw hkrit ma ai. Dai hku nga yang gaw ti nang sak si na hpe hkrit ai majaw ngu mai sawn la sai re ngu mu lu ai.

Rai nga ai Majan ngu ai hpe gaw yawng mayawng hkrit ra ga ai. Masha law law a sak si hkrum wa ra ai zawn Myusha ting jam jau hkrum wa ai baw rai nga ai. Ti nang tsaw ra dik htum ni hpe tat sum wa chye ai. Hpang jahtum ti nang hkum ti nang pyi si wa chye nga ai. Hkrit ra nga ga ai.

Hkrit ra ai hta an-hte Jinghpaw Wunpawng sha ni hkrit jaw ra ai ngu ngai mu sawn lu n ngai. Ga shadawn gawk lahkawn hta maga mi e Hkanghki bang da nna maga mi e lapu bang dai ai hta gawk langai ngai kaw shang ra na nga yang gara gawk hpe lata na rai? Dai hpe myit yu ra ai ngu mu mada lu ai. Re Myen wa hpe gasat yang majan byin wa nna masha law law wa jam jau hkrum wa na rai nga ai. Rai tim lak nak jahkrat kau ai rai yang masha law law sha n ga, ti nang hkum ti nang mung, ti nang a kashu kasha, shu mashi shu masha yaw gaw masha wa a mayam yam ra ai prat de du wa ai baw re ngu mu mada lu n ngai. Hkanghki nga ai gawk de shang na kun, lapu nga ai gawk de shang na kun ngu ai hpe gaw ti nang hkum ti nang nan daw dan yang she mai byi ai baw re ngu mu mada ai.

Myen hpyen wa a n gun gaw law la nga ai. Myen hpyen la ni mung hkrit ai majaw gasat wa na sha re. An-hte mung hkrit ai majaw bai gasat ra nga ga ai. Dai hta shan-hte(Myen Hpyen la ni) hkrit ai Majaw (reason) hte an-hte Jinghpaw Wunpawng sha ni hkrit ai Majaw (reason) n bung nga ai hpe mu chye ra nga ga ai. An-hte hkrit ai gaw ti nang a mungdan the myusha ni mayam yam ra mat na hpe tsang ai majaw, ti nang a n-ta hpe masha wa madu la kau ya na hkrit ai majaw magrau grang grang hpyen wa hpe gasat ra na ga ai. Dai zawn hkrti ai majaw magrau grang, ding man ai hku gasat la ra nga ga ai.

Dai majaw hkrit ai myit hta Majaw (reason) hpe chye lata la let ti nang a myu hte mungdan, ti nang a jinghku jingyu, ti nang a dum n-ta masha, ti nang hkum ti nang makawp maga na matu magrau grang let kangka ai Shanglawt hpyen la ni tai ra ga ai ngu nye a mung masa myi jut hpe garan gachyan dat n ngai rai.

Goi e...

2009-10-24T23:13:00.010+08:00

Goi e...

Shaning ni gaw lai she lai,

Ladu hkrum ten ya bai du

Jahkring mi ngu yang dingla wa

Shabrang ngu yang Ah Ji nga

Kashu pyi she lu sai da.

Karai e Kasang e...

Shanglawt lawt ai na sai da

Myutsaw myit ni yawm wa nga

Mung yu ngu yang ding hku yu

Mungdan ngu yang hting ra tam

Myu a matu shakut nga

Hkum hkrang hpum wa ai she mu.

La pai ngu yang la hkra nga

N-gup hta gaw myit hkrum nga

Kadai wa me sa kam na

Jinghpaw ngu yang Wunpawng nga

Wunpawng ngu yang Kachin nga

Jahtawng sha htu tim galaw saw

Gara hku me rawt jat na.

Lata hkindun baw kabye

Hpyen wa hpe she baw gum ya

10 ning jan sai da

Rawt mu Malan mu dai ni hta

An-hte maka an-hte ka

Rawt malan hkring htawng

Bai sha chyaw na

Nang ngai yawng a lit rai nga.

(KIO 49 ning ladu hkrum ai October 25 ya shani a matu ka dat ai gashagawp re. Shut ai lam nga yang mara raw dat ya marit.)

Hkawm nga ai

2009-10-19T10:33:00.006+08:00

Hkawm taw nga ai. Hkrun lam kade galu ai re n chye, pandung ngu ai hpe myit masin hta sha dawk bang da nna hkawm nga ai. Kade na sai re n chye, gara kaw na hpang ai re n chye, gara de yawng nga ai re n chye. Myit mada lam gaw chyip she chyap, myit n mu sin praw, sinna, ding dung, ding da gara de re n chye tim hkawm nga ai hku re. Lam woi garum na kadai n nga, n sen mung n na, mungkan ting katsi katsang, ngai hkrai sa kun?

Kalang lang kataw ai ten hta myit daw myit hten mat ai zawn nga hkam sha tim pandung shadaw ngu ai hpe myit hta shaja bang let bai rawt hkawm ai ten mung grai law sai. Grai na sai majaw Lagaw mung grai machyi sai. Rai tim hkawm nga ding yang rai nga ai. Kalaang lang myit kaji wa ai hte hkrit myit ni rawng wa yang n bung sha bung tim hkrit chye wa ai ten ni mung nga ai. Rai tim naw she hkawm nga ding yang re.

Kalang lang grai ba ai ten hkring sa nga yang bai n kam rawt mat na zawn nga hkra myit ba ai. Yup ai kaw na bai n rawt mat u ga ngu kyu hpyi ai ten ni mung nga ai. Shawng lam de na ngai hpe la nga ai tsin yam ni hpe tau hkrau myit chye lu ai majaw grai n kam hkawm sai. Lai wa sai lam ni hpe myit dat yang du wa na ten ni hpe grai n ra sharawng ai. Ndai zawn re ai ten ni hta hpawt de ngu ai hpe grai n ra sharawng wa ai ten ni mung nga ai. Rai tim hkawm nga ding yang rai nga ai.

Kalang lang hkawm na ai ten myit kata hta pandung ngu ai hpe shingran yu ai ten ni mung nga ai. Grai tsawm la ai yup mang langai zawn nga hkam sha tim dai pandung hpa baw re ai hpe n chye mat ai ten ni mung nga ai. Hpraw ai kun? Chyang ai kun? Pyaw ai kun? Jam jau ai kun? Shaman chyeju kun? Tsin yam wa rai sai kun? Ndai yup mang ni a majaw shawng lam nu ai hpe matut hkawm na matu myit shaja let matut hkawm nga ai.

Kalang lang hkring sa ai ten, ngai gara kaw du nga sai kun ngu bai myit sawn yu ai ten ni mung nga ai. Myit kata hta dam lada la ai zai bru jang kaw hkawm nga ai zawn nga hkam sha ai. Panglai n tsa lam dam mat ai masha zawn nga gara de sa na n chye ai sha wam dam hkawm nga ai zawn nga hkam sha ai. Ngai shawng de sa taw ai gaw re ai kun ngu ti nang hkum ti nang san la ai ten ni mung nga ai. Shawng de sa ai kun? Hpang de mahtang hting lut taw nga sai kun? Rai tim hkawm nga ding yang rai nga ai.

Kalang lang sha ra ra hta du yang dai hpe pandung shadu, myit yak ai ten ni mung nga ai. Ndai rai sai kun? Pu ba la ai majaw pandung lawan du mayu ai myit hte dai shara ni hpe pandung shadu, na na wa hkring sa ai ten ni mung nga ai. Rai tim myit hta n kawn jam jau ai lam ni n yawm ai hte myit n dik na shara n nga ai lam ni a majaw pandung ngu ai shara kaja de du na matu bai matut hkawm sa wa ai.

Pu ba la sai. N kam hkawm mat hkra myit htum nga sai. Galoi mi she du na kun? Kadai wa me pandung du hkra lu hkawm na kun? Rai tim hkawm nga ding yang rai nga ai.

Dum N-ta Daw 7 (Hpyen la la ai prat)

2009-09-27T04:15:00.005+08:00

"RA NA GAM SENG!"

"DU!"

"LAIKA DU AI SA LA!"

"MAI SA DU WA!"

Du wa hpe salam kau da nna hpang de pai hkra pai kawm let daw dap kaw na pru wa sai hku re. Shing gan du ai hte kalang ta dai laika hpe laika sumbu kaw na shaw hti yu yang nye kanau Ma Kaw kaw na du wa ai laika rai nga ai.

Laika gaw n dai hku rai nga ai,

De,
Hpu ba A Nu grai machyi taw nga ai. Ya hte sha mung tsi rung de 3 ya dang rawng ra ai. Jinghku ni mung yu gaw yu tim nau n kam yu ai zawn zawn rai wa masai. Kanau ni yawng mung myi man gara kaw n da sai. Garum chyu chyu hpyi ai majaw an nau ni hpe hpyi nau n kam hkrum wa masai. Hpu ba nang hpyen la la mat ai a majaw mung n dai jam jau lam ni grau sawng wa ai zawn zawn rai nga ai. A hkun lu yang gaw n ta de shata mi daram naw she wa rit. DC mai shawk ai rai yang mung shawk la nna hpyen la hkum galaw shanu. Ya hte mung gaw yak wa ai hte hpu ba a matu mung tsang ya ra ai majaw kanau ni grai myit ru nga ma ai. Wa Dim mung n ta bai pawng da sai da dai hpe ma naw shaw la ra nga ai. Gum hpraw gara kaw na n lu la lang ai majaw grai myit ru ai. Dum N-ta a matu a kyu n rawng ai dai hpyen la bungli hpe gaw hkum galaw sanu law. Dum N-ta hta nga mu nga mai ai ni a kasha ni she dai zawn hpyen la galaw ai baw re. Ya hpu ba nang n nga yang n dai Dum N-ta hten sana sha re majaw lawan ai hku a hkang hpyi nna wa rit. Hkung ga let,
Kanau Ma hkawn

Baw pungting kaw mu a chye ya ai zawn nga hkra myit ru sai hku re. A ga, hpyen la la ai ngu ai gaw hpa a matu mung n kaja ai rai sam ai ngu she myit wa sai hku re. Hpyen la tai wa ai lam hpe myit yu yang mung ngai kam nna tai ai hku n re sha hpyen lahkawn ai kaw lam sha mat wa ai majaw grai myit n gut ai sha a hkaw a hkang lu ai hte hprawng na hkrai myit da ai hku re. Nye prat prat wa galoi she kam kaja pru na kun nchye ya du hkra hkam sha nga ai jam jau lam ni gaw ladi matu she hkri na zawn zawn nga hkra, hkrap gaw n rai manyi gaw n rai re hkam sha bu si nga n ngai.

Maning 2008 ning, December 23 ya shani, an-hte ni htu sha nga ai Ja maw dabang hta Christmas poi galaw nga yang hpyen sa lahkawn ai KIA hpyen la ni kaw rim hkrum nna Training shata 6 a hkrit nna ya Laiza A Len bum daju e mu galaw nga ai hku re. Ndai hta gaw kam kaja ai ngu na kun gaw n chye sai, Dap Ba 1 hta Training jaw ai rai tim mu gaw Ginjaw de ang ai majaw nau n ba ai ngu yang mung gaw mai tsun nga ai. Gin jaw salang a ra na galaw ai ngu ai gaw hpyen la ni kaw na tsawm ra mi hkyem sa ai baw bungli ngu yang mung gaw mai tsun nga ai. Moi kaw na bungli shaja hkrai hkrai galaw sha wa ai a majaw ya hpyen la prat na bungli ni hpe mung a tsam sha dang galaw ai hku re. A wa a jing hku ni jaw ai bungli hpe n galaw, rai dum ai majaw ja sa htu ai ngu yang kani ya kanoi she tai mat. Rai tim Hpyen la la mat ai majaw kani gaw bai lu je la kau ai hku re.

Shani shagu na bungli gaw Du Wa sa ai de hkan, Du Wa a a rung a rai ni hpe hkrut ya, shat hkyen ya, Du wa gara sa yang gara hkan nang nna ra ai ni hpe galaw ya ra ai hku re. Du jan, shing n rai Du wa a kasha ni nga yang gaw ngai Gam Seng bungli loi hkyem sa ai hku re. Rai hkrut ai hta jan nna kaga bungli ni hpe shan hte galaw ya ai majaw Ra na langai mi hku nna loi gaw hkyem sa nga ai. Shana de rau yang Guard hpyen la ni rau baw lung htawng rai rai re ai hku re. Judy mung Guard ni she bai lit la ai majaw ra na galaw ai gaw tsawm ra hkyem sa nga ai. Du Kaba kaw hkan ai re majaw Jinghpaw mung KIO up hkang gin ra ni de tsawm ra mi chyam hkra lu hkawm sa ai hku re. Myitkyina de manau poi sa ai zawn, Myen ni hte zup hpawng nga ai zawn re ai shaloi gaw PA Du Wa kaw a hkang pyi nna Nu hpe gaw lu gawan wan re ai hku re.

Ngai hkrai wa mi rai yang gaw n dai hpyen la la ai prat hpe grai ra sharawng ai hku re. Magam bungli mung nau n law ai majaw mung rai na re ngu shadu ai. Guard hpyen la ni hpe yu yang shani shagu sinat pai nna RAWT SANA!!! nga ai Guard du wa a n sen na ai hte nang hpa mi galaw taw ai rai yang rai kalang ta si nat pai nna Guard mawdaw de lagat lung ra ra re ai mang hkan ni naw nga ai hku re. Ra na galaw ai ngu ai gaw Du Wa gara sa na nga ai ni hpe mung jau nna tau hkrau chye da ai majaw shajin ai lam ni naw lu galaw nga ai. Kalang lang mu galaw shut yang dam katut ai hta jan nna kaga yawng gaw grai hkyem sa ai bungli rai nga ai. Ra na ngu ai gaw Rank langai mung n kap hpyen dap ting hta nyem dik htum madang kaw mi nga ai rai tim Myu hte Mungdan a matu bungli galaw ai wa re ngu arawng gaw lu mala ai hku re.

Hpyen la galaw ai shata 4 sha na ai rai tim prat mi na sai zawn nga hkam sha ai hku re. Ndai laman Mung masa nau n kaja ai majaw Du Kawa a shim lam a matu Guard sha n rai rung dung hpyen la kaji kaba yawng lak nak hkrak hte majan a matu sadi maja let nga nga ai majaw nau n rau ai hku re. Ndai zawn yak hkak nga ai ten hta Hpyen la ni a myit hta majan hpe sadi ai masha hte la nga ai majaw nga ai zawn n kam nna prawng mayu ai ni mung nga ma ai. Hpyen la n nan galaw ai shaloi ti nang a myit kaji mi mung n lam ai sha shang lawm wa ai rai tim hpyen dap a sharin a chyin ai hte mi chyawm hkam sha mu hkrup ai ma hkrum madup n kau mi a majaw hte mi kawn rawng nga ai myu tsaw myit ni grau grau dan dawng wa ai ni a a majaw hpyen la la ai lam hpe grai a rawng la taw nga sai hku re. Majan ngu ai gaw n kaja ai rai tim myu hte mungdan a matu ngu ai ga baw a majaw nam chyim rawng ai hte myusha ni hpe a kyu jashawn lu ai bungli langai mi re ngu mung mu mada wa ai hku re.

Ya Ma Kaw a laika hpe mu hti ai majaw grai myit n pyaw nga n ngai. Gara hku di na kun? Ndai ten grai ra a hkyak nga ai ten hta she n dai zawn manghkan byi wa ai gaw nye a matu grai lata yak ai lam lahkawng n tsa kaw tsap nga ia zawn nga hkam sha lu n ngai. Hpyen la hprawng wa mi tai mat yang mung Myu hte Mungdan n tsa hka kaba kap ai zawn nga pra tup hkam sha mat na hpe n ra sharawng ai. A hkang hpyi nna wa tim ngai hpa n lu galaw ai hta n ga grau myit n pyaw na lam sha nga ai. Ndai Nu Wa ni gaw de da ai Dum N-ta gaw nye a prat hta htum mat sana hpe mung n ra sharawng ai hku re.

Rai tim Dum N-ta kaji langai mi nga mu nga mai na matu gaw de a Mungdan rai nga ai Dum N-ta kaba ngwi pyaw na a hkyak nga ai. Dum N-ta kaba n nga yang Dum N-ta kaji ni gara hku n nga lu ai ngu ai hpe ngai mu lu ai. Hpun ngu ai n nga yang de n tsa e nga ai U Tsip ni gara kaw n tsip nga ai. Dai majaw U Tsip hpe hkye mayu yang Hpun hpe shawng n kadawng mat hkra hkye la ra na re ngu myit daw dan let laika hpe sinpu kaw bang nna ra ai bungli ni hpe shawoi na hte maren sa galaw mat sai.

Nang, Jinghpaw Wunpawng a gam maka

2009-09-02T04:51:00.005+08:00

Kokang gaw daw mi mat mat sai hku re. Moi shawng de kaw na lang wa ai lak nak hte sha jahten kau hkrum ai ga rai nga ai. Ya mung Jinghpaw Wunpawng Mungdan Shanglawt Asuya a daju Laiza de Myen hpyen du ni shiga sa ai zawn zawn rai nna myit jahka ya nga ai hku re. Ndai hpe chye nga ning len dai mahkam kaw hkrat mat mat re ai hpung ni grai law lai wa sai. Nyi dik htum ga shadawn gaw Kokang hpung rai sai ga re.

Ndai bat laman Jinghpaw Wunpawng Mungdan Shanglawt Asuya KIO/A hte Myen Asuya lapran bai gap hkat wa na zawn zawn re ai lam hpe mu lu ai hku re. Jinghpaw Mung kaw na Mung masha law law wa gaw ti nang dum n-ta ni hta e malu masha ni hpe kahkyin ai lam ni mung mu mada ai hku re. Bat mi laman daw dan na n dai bai gap na n gap na daw dan lam gaw gap hkat wa na de mahtang grai madung dat nga ai hku re. Gap hkat wa yang gara hku galaw na?

Majan ngu ai gaw kade a matu mung n kaja ai re. Simsa lam ngu ai hpe sha yawng mayawng ra sharawng ai ga re. Rai tim ya ten hta e Simsa lam n re ai simsa lam a majaw grai jam jau hkrum wa ai hta n sa sa na shara n nga wa hkra byin wa sai majaw bai gap hkat ra wa sana re. Moi shawng de an-hte mu ga na ga ai majan hte gaw n bung sana re ngu kam ai. Myen wa mung shaning law law wa n gun mahkawng da sai hte maren Jinghpaw Shanglawt Asuya mung shi hte shi gaw shagreng da lu sai re majaw gap hkat wa ai rai yang moi na hta grau sawng wa na hpe mu mada lu ai.

Sinat kaji loi li sha kabaw ai baw majan n re ai sha Mungdan kaba ni gasat hkat wa ai zawn rai wa na hte hkrat sum ai lam ni mung kaba wa na re ngu maram lu ai. Awng dam lam kaba lu mayu yang gaw a rang law law bang ra ai nga ai hte maren a rang bang na ten mung du wa sana re ngu shadu ai. Dai a rang bang ai ten hta nang ngai shang lawm lu na a hkyak nga ai. Moi shawng de kaw na ya du hkra myu tsaw myit lam grai jahta wa sai an-nau ni ya ten Myu tsaw myit hpe ta tut galaw sa wa ra na a ten re ai majaw yawng shajin let lu malu n gun a tsam ma hkra hte shakut na a hkyak la nga ai.

An-hte n shakut yang myit mada lam ngu ai n nga mat wa na ra ai. Htawm hpang de na shu mashi shu masha ngu ai gaw n hkoi mat wa na ra ai. Masha a myu wa a mayam prat de prat tup shang mat wa na ra ai re majaw ti nang hta lu ai a tsam ma hkra hte Myen wa hpe hkap gasat shaprawt kau ra na a ten du wa sana re ngu maram lu ai. Ti nang hkum ti nang masha langai sha re ai maw nga nna hkyem sa lam tam yang gaw Kokang hpung ni zawn masha 700 jan ting lak nak jahkrat mat ra ai masa hte bung wa na hku re.

Dai zawn rai mat yang gaw an-hte Jinghpaw Wunpawng myu sha ni a n gun kaba yawm mat na re majaw masha hkum ding dek shakut ra na re. Ti nang hkum ti nang Myu sha lam yan hta manu kade dan ai hpe dum nga ga ngu saw shaga mayu ai. Nang n nga yang Jinghpaw Wunpawng Mungdan n mai de nga ai. Nang grai a hkyak nga ai. Nang sha Jinghpaw Wunpawng Mungdan hpe lu gaw de ai ngu ai hpe sep kawm dum nga ga. Jinghpaw Wunpawng Myusha ni a gam maka gaw nang hte grai seng nga ai. Nang sharawt la yang she amyu rawt wa na re ngu ai hpe dum nga ga.

Jinghpaw Wunpawng Mungdan hte Jinghpaw Wunpawng a myu sha gaw nang shakut ya yang she rawt galu kaba wa na re ngu htet dat mayu n ngai.

Shagan kade hkrat

2009-08-17T11:22:00.006+08:00

Aww... shagan shagan,

Nang hkrat yang grai tsawm ai nga ma ai.

Simsa lam a matu nang ap nawng hkra,

Nang hkrat yang grai kam kaja ai nga ma ai.

Sinda hpe kaduk shatai hkra,

Nang naw nga yang grau tsawm ai.

Shana na tsawm n sam ni n hten mat hkra,

Nang hpe shagrau nga ma ai.

Shingra maka a zing ri ai hpe hkam la hkra,

Nang jam jau ai lam kadai n chye ai.

Sinmak ai hpe rawt malan lu hkra,

Shagan kade naw hkrat yang she jahpaw du na.

HKRAT SUM MAT WA SAI MYIT RUM SHARE SHAGAN NI HPE HKUNG GA.. JAW!

(August 10 ya shani ang ai Share Shagan n htoi a matu hkrat sum mat sai Share Shagan ni hpe hkung ga jaw dat n ngai.)

Shawng myit yu u

2009-08-04T20:02:00.004+08:00

Kalang mi hta prat dep ai mare langai mi nga ai. Dai mare hta e matsan dum n-ta langai mi hta e Kawa, Kanu, Kasha num sha, shan nu wa ni marai masum nga ai da. Kawa gaw kan bau bungli a matu gaw gap Company (Construction) langai mi hta e bungli shaja galaw ai hku re. Manu shabrai nau n law tim shan nu wa ni sha na sha gaw lu tam ai hku re. Dai wa gaw bungli shaja ga law ai masha re ai majaw tsa hpe galoi mung lu ai hku re.

Bungli ngut jang galoi mung tsa lu nna shi a pu ba ai lam hpe shabran la la re ai majaw tsa ya kaba hku na grai mying gum hkawng ai hku re. Rai tim lani mi hta gaw shi a bungli ngut ai hpang dai shata na shabrai hta loi jan hkra shi hpe shi a company madu wa jaw dat ai majaw grai pyaw nna manang ni rau tsa lu ai loi shajan kau ai. Dai majaw jan du mat ai hte shi mung tsa grai nang mat ai majaw lam pyi n lu hkawm mat ai madang kaw du mat ai hku re.

Dai zawn re nga ai majaw shi gaw shi hkum shi n dang ai hpe chye nna Taxi shaga nna Taxi kaw jawn let shi a dum n-ta hkring dat tsun dan ai hte dai de sa ya rit nga tsun sai. Dai hku tsun let shi a sum bu kaw na gumhpraw Dollar $100 tan hpe Taxi gawt ai Driver hpe jaw ai hku re. Taxi la mung tsun ai hkring dat de du hkra woi wa na matu maw daw hpe hkawm hpang sai. Hpung gaw ni hpe lai, lam n tsa hta grai na hkra Taxi jawn nna lam n she ni kaw shang dat ai hte dai tsa ya wa tsun ai hkring dat de du sai.

Tsa ya wa mung Taxi hkring ai hpe chye ai hte "Du sai i?" ngu san yang du sai hpe chye ai majaw Taxi kaw na yu nna Taxi Driver hpe "Ngai jaw da ai gumhpraw kaw na ang ai hte la nna ngam ai hpe bai jaw rit ngu tsun dat sai. Taxi la wa gaw kalang mi mung n na ga ai ga hpe na dat ai zawn zawn mau mat nna shi hpe tsun ai gaw, "Hkau wa! Nang ngai hpe gara kaw na gumhpraw jaw ai wa mi. Ngai Taxi manu rai n lu shi n ngai. Taxi manu naw jaw rit." nga htan dat ai.

Tsa ya wa gaw grai masin pawt mat ai hte, "Nang ngai hpe tsa ya nga nna roi ai i? Nang hpe ngai Dollar $100 jaw da sai re le. Gumhpraw ngam lawan bai jaw. Ngai hpe dai hku masu yang lu na zawn shadu ai i?" nga nna pawt bang wa sai hku re. Taxi la wa mung shi gumhpraw rai n lu shi ai lam Taxi shabrai jaw na matu hpyi chyu hpyi wa sai hku re. Dai hpang gaw shan lata du mat ai kaw du hkra ga law hkat wa masai.

Nang shut ai ngai jaw ai nga nna htwi hkat taw nga yang makau hku lai wa ai Balik ni mu nna lahkawng yan hpe rim let Balik dap de woi mat wa masai. Balik dap kaw du yang gaw Taxi la wa mung shi jaw ai hku tsun, tsa ya wa mung shi jaw ai hku tsun dan wa sai re. Balik du wa gaw dai hpe na jang tsa ya wa hpe shut ai ngu tsun nna Taxi shabrai mung jaw ra na, hkyuk htawng mung bat mi rawng na hku tara daw dan ya sai.

Ndai hta tsa ya wa gaw grai pawt mat sai hku re. Bat mi tup hkyuk htawng kaw rawng ra, Taxi manu mung bai jaw ra re ai majaw Balik du wa hpe grai n ju mat sai hku re. Hkyuk htawng kaw bat mi rawng ngut ai hpang shi le wa ai shani e shi gaw grai pawt let Jak sau dut ai seng de sa mat wa sai. Shi lu ai gumhpraw rau Jaksau pung mi mari wa nna Balik dap de bai sa wa sai. Balik dap shawng kaw du ai hte dai Jak sau ni hpe shi a hkum hta jaw bun la nna wan hkret hpe shaji let jahtau bu nga ai hku re.

Shi jahtau ai gaw "Balik du wa! Nang ngai hpe n tara ai hku jeyang kau ai majaw ya jang sa tawng ban rit! N tawng ban jang ngai n dai kaw nye hkum ngai nat kau na." nga nna jahtau bu nga ai. Balik ni mung n dai zawn re nna bai sa marawn rawn re ai masha grai law mu ga sai hte shi gaw tsa ya mung re ai majaw majoi tsun nga ai re ngu nna kadai mung a hkyak n la ya ma ai. Dai hpe mu jang ndai tsa ya wa gaw grai masin pawt nga sai hku re.

Kade n na yang shi gaw kaja nan shi hkum shi nat dat sai hte Balik ni mung lagat le wa nna me wan sat garum sai. Tsi rung de du mat sai hku re. Tsa ya wa gaw tsi rung kaw du wa ai rai tim jahtau ding yang rai nga ai. "Ngai Taxi manu jaw sai re! ngai Taxi manu jaw sai!" nga nna tsun jahtau bu nga ai. Kadai hpe mu tim dai hku hkrai hkrai ngu tsun dan nga lu ai hku re. Tsi sara ni hpe mu yang mung dai hku ngu tsun wu ai.

Ti nang hkum ti nang nat la ai re majaw Asuya kaw na mung lit n la ya ai majaw Tsi rung manu hpe ti nang nan shaw ra ai majaw gumhpraw n lu ai shi gaw nta de mahtang wa mat sai hku re. Hkum ting nat katut da ai shi gaw si wa na daram nan machyi sawng nga sai. Shi a madu jan hte kasha yan mung hpa n chye galaw hkrap chyu hkrap nga bu ai. Tsa ya wa chyawm gaw shani shagu lu ai n gun rau "Ngai Taxi manu jaw sai! Ngai jaw ai! Ngai jaw ai!" nga tsun jahtau bu nga ai.

Lani mi gaw Hkristan hkalup hpung sara langai mi gaw dai tsa ya wa a n-ta de sa chyai ai hku re. Hpung sara wa shang wa ai hte dai tsa ya wa gaw "Sara, ngai jaw ai! Ngai Taxi manu jaw sai!" ngu teng man ai lam kaw gwi gwi tsap gwi ai lam hpe tsun dan nga lu ai. Shi hkum shi mung grai a rawng la nga ai hku re. Hpa majaw nga yang ten man ai lam a matu a sak hpe pyi jaw kau gwi ai masha re ai majaw grai myit dik nga lu ai. Dai hte maren dai mare hta mung shi gaw teng man ai lam a matu a sak hpe pyi jaw kau gwi ai la wa re nga nna grai mying gum hkawng nga sai.

Rai tim sa chyai ai Hkristan hkalup hpung sara wa gaw "Nang gaw grai a nya ai masha a gawk she rai nga ai!" nga tsun dat sai. Ndai tsa ya wa gaw dai hpe na jang grai pawt mat sai hte "Sara! Ngai hpe shut ai nga yang sara n dai n-ta kaw na ya jang pru mat wa u. Galoi mung hkum sa chyai sa!" nga gawt nga bu sai. Hpung sara wa bai tsun ai gaw "Ngai grai kam sa nna sa ai n re. Na n-ta mung masha ni grai kam sa na zawn re ai n-ta n re." nga bai tan wu ai.

Tsa ya wa gaw "Dai rai jang hpa kyi wa mi tam sha hkawm nga a ta?" nga matsa mawa nga tsun wa ai hku re. Sara wa gaw "Nang gaw Taxi manu a matu sha na hkum nang nat la ai. Teng man ai lam a matu nga a sak hpe pyi jaw kau gwi nga ai. Rai tim na a dum n-ta masha ni hpe myit yu ai kun? Shan hte gara hku hkam sha na. Taxi manu gaw kade mung n re. De a majaw sha na hkum nang nat la ai ngu ai gaw dan nga a ni? Nang a tsawm gaw myit yu nna galaw ai rai a ni?" ngu tsun wu ai.

Tsa ya wa gaw hpa ga mung n shaga mat sai. Shi a madu jan hte kasha hpe yu yang gaw hpa mung n nga, zim rai myi pri si sha hkrat nga ma ai. Shi hkum shi bai yu yang mung masha zawn pyi n rai mat sai. Hpa mung n mai galaw mat sai. Bungli mung n mai galaw mat sai. Dum n-ta kaw hpa baw rau sha sana law. Shi myit yu magang myit n gut magan rai wa sai. Sara wa wa mat ai hpang du hkra shi gaw hpa ga mung n sha ga mat sai. Shi hkum shi grai n rai dum mat sai hku re.

"Aww!! Ngai jahkring mi laman pawt ai a majaw nye prat ting jam jau hkrum mat sai. Nye kasha, nye madu jan. Gara hku a sak matut sa na law. Ngai grai n kang ka ai. Ngai hpa majaw jau jau n myit yu ai sha dai hku galaw ai. Grai myit malai lu ai." Yawng gaw hpang hkrat mat sai. "Ngai n re. Nye hkum ngai nat na matu myit ai ngai n re. Nye a myit kata dai myit n rawng ai. Hpa majaw ngai nat dat ai rai sai kun? Ngai n chye mat sai."

Shata 3, 4 hpang e dai tsa ya wa gaw wan hkru da ai a na ni hte sha n nga mat sai hku re.

PS:: Ndai gaw kaja byin lai wa ai mabyi hpe lakap let ka da ai re. Pastor Ock Soo Park a mungga kaw na hpe htap htuk hkra Ta Tut bai ka da ai re. An-hte mung hpa mi galaw yang galaw, Yesu a myit hte Tsadan a myit hpe chye ging hka yang gaw grai pyaw ai prat hpe lu madu na re ngu....

Myit Mada Shara (Hope)

2009-08-01T15:31:00.006+08:00

Grai gahtet ai shara rai nga ai. Gara maga de yu tim zai bru jang hkrai hkrai. Yawng gaw bung bung san ai hkrai. Gara de sa na kun? Nau gahte ai majaw hka mung grai lu mayu sai. Lusha n lu sha ai mung grai na sai. Lagaw tsu, n gun mung n rawng sai. Lagaw lahkam htawt na matu grai myit yak nga ai.

Jan grai gahtet ai zai bru jang hta e Kawa hte Kasha yan, asak lawt na lam tam let hkrun lam hkawm nga ma ai. Hpang de hting lut na matu mung grai tsan mat sai. Makau grup yin de mung hpa baw nga ai re n chye nga ai. Zai bru jang a ga ang e kun, makau e kun, gara kaw kun? N chye nga ai. Lam langai sha nga ai gaw shawng lam rai nga ai.

"A Wa! An-lahkawng ndai kadai mung n nga ai zai bru jang n tsa kaw si mat na sha rai sai. Ngai grai hkrit ai A Wa! Heee~~~~~"
Kasha gaw hkrap let Kawa hpe tsun nga ai.
"A Wa! Ngai n kam hkawm sai, Grai ba ai. Lagaw n lu htawt sai."
"Ma! Hpa hkum tsang yaw, Ya an-lahkawng sin prawt de ding ding sa taw ai grai na sai. Nau n na yang htaw ra hkran de du sana sha re. Dai kaw du yang malu masha grai law hkra lu sha sa na sha re. Hka mung lu lu na, nang ra sha ai baw yawng lu sha na sha re sai. Lam sha matut hkawm u yaw."

"A Wa! Ngai n lu hkawm sai. Si mat na zawn nga hkra pu ba nga ai A Wa!" Kasha gaw tsun ai.
"Ma e! Jahkring mi hkring la nna bai hkawm ga i."
Bai matut hkawm sai. Galoi she du na, du gaw du na kun mung n chye ai hkrun lam hpe shan Wa bai matut hkawm nga masai. N mu lu shi ai Pandung hpe myit hta n gun shatai let hkrun lam hpe matut hkawm nga ma ai.

Lahkawng, masum ya na ai hpang lam hkawm nga ai shaloi Kasha gaw a kajawng sha jahtau tsun dat ai gaw "A Wa! Htaw Kaw yu u! An lahkawng si na sha rai sai. Lup, lup, lup!! Masha si hkang le!"
Kasha gaw hkrap let jahtau tsun dan nga bu ai. Grai hkrit ai hte sha kasha gaw kawa hpe tsun dan nga ai rai tim Kawa a myi man hta gaw gabu ai n sam hpe mu lu nga ai.
"Hkum hkrit ma! Lup ngu ai gaw nang tsun ai zawn masha si ai hpe lup da ai gaw re. Rai tim n dai masha si ai hpe lup kau da ai masha ni nga ai majaw lup ngu ai byin wa ai re. Dai majaw ndai makau e mare nga na ngu shadu ai. Naw hkawm yu u. Mare hpe mu na sha rai sai. Yaw!"
Kawa a myit hta e myit mada shara lu ai hte grai kabu nga ai hku re. Rai tim kasha gaw naw hkrap nga ai hte "A Wa nang ngai hpe masu ai. Nang ngai hpe dai hku hkrai nga tsun nna hkawm shangun ai grai na sai. Ya mung naw masu nga ai."

Kawa a tsun a sawng ai hte Myit mada shara jaw ai a majaw Kasha a n gun ni bai jat wa ai hte shakut nna lam matut hkawm wa masai. Jahpawt maga de du wa sai rai tim naw jau ai majaw n sin naw sin nga ai hku re. Nau n na ai shaloi htaw loi tsan ai shara kaw wan tu taw ai hpe mu lu ai majaw shan wa grai pyaw ai hte dai shara de du hkra lagat sa wa masai. Kaja wa nan Kawa tsun ai hte maren dai kaw mare kasha rai nga taw ai hku re. Shan gaw dai mare kaw na malu masha ni hkru hkru kat kat lu sha let grai pyaw ai hte yup lu masai. Kasha a myit hta Kawa hpe grai chyeju dum nga ai hku re. Shi hpe lam matut hkawm na matu Myit mada lam jaw ya ai majaw chyeju dum nga lu ai.

PS:: 2009 International Youth Fellowship World Camp Korea hta Pastor Ock Soo Park tsun mat wa ai mau mwi hpe htap htuk hkra Ta Tut kawn bai ka da ai re.

IYF (International Youth Fellowship): www.iyf.org
Pastor Ock Soo Park: www.ocksoopark.com

Hkung Ran Kum Hpa

2009-07-09T07:52:00.006+08:00

Kalang mi hta hpung sara langai mi hta moi jawng kaji kaw na rau hkau wa ai shi a manang num kasha langai mi gaw a sak a prat ram wa ai hte Hkrisatan dinghku de sa wa na matu hkung ran poi de shi hpe shaga ai da. Ndai hpung sara wa mung ti nang a manang wa shaga ai re majaw kade tsan ai kaw n mi rai tim lu du hkra sa na nga nna myit daw dan da lu ai da.

Shi a manang jan mung ti nang a hkung ran poi hta hkau dik htum manang ni sa du na matu kyen lajang nga ai hpe na lu ai hte grai kabu myit pyaw ai da. Hkung ran poi hpe galaw ai shara hte ndai hpung sara wa a magam gun ai buga gaw loi tsan ai majaw jau jau sa yang she a ten dep na hpe mung dai hpung sara wa myit tawn da ai hte hkyen mung hkyen da sai hku re.

Shi a buga hpung de a hkang mung tang da ai hte manang jan a hkung ran poi a matu kumhpa hpa baw jaw ra na ngu ai hpe mung myit let baw nu hkraw nga ai hku re. A kajawng sha shi lama myi myit lu ai hte dai hpe hkung ran kum hpa hku jaw na matu myit lu sai hte grai kabu ai hku re. Ndai hpung sara wa gaw shi jaw na hkung ran kum hpa gaw grai kaja ai hte grai htap htuk ai re ngu shi hkrai shi grai myit pyaw nga lu ai da. (P.S:: Au Ra Li na Hkung Ran Kum Hpa baw n re ai yaw :P)

Dai hkung ran poi galaw na num n nan jan mung shi a la n nan wa hpe manang ni yawng sa du na re lam tsun dan ai hte shan lahkawng yan grai kabu nga ai hku re. Hkung ran poi lamang a matu tau hkrau shajin ai lam ni mung ngut wa magang ai hte hkung ran poi a ten mung du wa magang sai hku re. Sum tsan na jinghku jingyu ni gaw lau du wa magang sai hte manam shara ni hpe tau hkrau hkyen lajang da ai hte maren shara madun ya masai.

Num n nan jan a manang ni mung du wa magang sai hku re. Rai tim dai manam ni hta e shi hte grai hkau ai shi a manang hpung sara wa gaw rai n du wa shi ai hpe chye lu ai hte mang hkan hpa mi nga ai kun nga shi a la n nan wa hte tsun nna myit pu ya nga ma ai. Kaja wa nan du lu hkra du sa wa na nga nna ga sadi jaw da ai shi a manang wa hpe la nga ai hku re. Hkung ran poi gaw hpang na matu lahkawng, masum ya shara sai. Ya ten n du wa yang shi a manang hpung sara wa gaw shi a hkung ran poi hpe n lu dep na sha rai sai ngu myit pu nga ma ai da.

Hkung ran poi jahpawt hta e gaw num n nan jan a manang wa rai nga ai dai hpung sara wa a mu gun nga ai mare kaw na manam langai mi du sa wa ai hte num nan jan hpe hpung sara wa gaw buga hpung hta e a hkyak ai bungli nga ai majaw n lu du sai lam tsun dan ai hku re. Myit gaw grai n pyaw tim gara hku n chye di ai lam, lu du hkra sa wa na nga tim Karai Kasang a mu gun masha re ai majaw Karai Kasang a amu hpe she grau galaw ra ai nga dai du sa wa ai manam kawn num n nan jan a matu ga htet dat ai da.

Masha gaw n lu du tim shi jaw mayu ai hkung ran kum hpa hpe gaw dai manam wa rau shagun dat ai lam hpe mung chye lu ai hku re. Dai manam wa gaw num nan jan hte la n nan yan a matu hpung sara wa hku nna chyum laika gasi shagun dat ai nga tsun dan ai hte num n nan yan la n nan gaw grai kabu ma ai hku re. Ti nang a hkung ran poi hta Chyumga hkung ran hkum hpa lu la ai ngu ai gaw grai kabu hpa re ngu shan hkam la ma ai da.

Bai shan gaw dai chyumga hpe n hti shi ai sha manam ni yawng a shawng kaw hti na matu Hkungran poi lamang hpe woi awn ai hpung sara wa hpang de shalai ya dat ai da. Ndai hkung ran poi hpe woi awn nga ai hpung sara wa gaw a sak a prat ram ram kaba sai hte myi nau n mu lu ai lam chye lu ai hku re. Num n nan yan la n nan mung shan a manang hpung sara wa jaw dat ai hkung ran kum hpa chyum ga hpe mai sau pa e ka da n htawm dai hpung sara kaba wa hpang de shalai ya ma ai da.

Dai num n nan jan a manang hpung sara wa jaw dat ai chyum ga gaw n dai hku re ai da "Tsaw ra ai myit hta e hkrit kang ai myit n rawng lu ai; hkrit kang ai myit a ri hkrum nga ai majaw, hkum chyip re ai tsaw ra ai myit gaw, hkrit kang ai myit hpe shaden kau wu ai: hkrit kang nga ai wa chawm gaw, tsaw ra ai myit garai n hkum lu ai. Yawhan A Shagun Dat Ai Laika Langai 4:18" re ai da.

Rai tim dai hpe mai sau pa hta e gaw Yawhan A Shagawn Dat Ai Laika Langai 4:18 ngu nna sha ka dai lam chye lu ai. Dai mai sau pa hpe gaw hkung ran poi woi awn ai hpung sara wa hpe shalai ya dat sai hte hkung ran poi mung hpang wa magan sai hku re. Hkung ran poi lamang hte maren lamang ni langai hte langai ngut wa magan sai. Ga sadi la ai, ja ta chyawp jaw ai, hkung ran lai mat htu ai lam ni ngut wa magan sai hku re.

Lamang ni yawng ngut wa mahka e gaw hkung ran poi woi awn ai dai hpung sara kaba wa hku nna Special lamang langai mi hku nna num n nan jan a manang wa shagun dat ai chyum laika hpe hti dan na a ten du wa sai hku re. Hpung sara kaba wa mung dai shi hpe jaw da ai mai sau pa hpe yu nna shi a chyum laika hpe galam nga lu ai. Nau n na yang shi gaw dai chyum ga hpe lu tam sai hte dai hpe n sen ja ja rau du sa shawa yawng na lu na matu hti dat sai da.

Shawng n nan hku nna n dai chyum laika gaw num n nan jan hte grai hku hkau ai manang hpung sara wa num n nan jan a matu lak san shagun dat ai hkung ran kum hpa rai nga malu ai. Yawng a tsawm sha madat hkam la ga. "Yawhan A Laika 4:18. Kaning rai nme law, nang la manga lu yu nit dai; ya na la gaw, na a madu wa n rai lit dai; ndai lam hta nang teng ai ga tsun nit dai, ngu nna shi hpe tsun wu ai."

Yawng mani hpa hpe hti la nna prat htup ngwi pyaw hkam ja nga mu ga ngu kyu hpyi ya let...

A mying shing ten

2009-07-02T00:33:00.004+08:00

Bai rai sai. "Rai wa sai, rai wa sai nga yang Tsa Dan wa e nyawp!" nga ai moi Myitkyina, Shata Pru kaw na hpung up sara langai tsun ai ga hpe bai dum wa ai hku re. State Security Force (SSF) ngu ai hpe na ga ma ai kun? An-hte a Wunpawng Mungdan Shawnglawt Asuya Kachin Independence Organization (KIO) gaw Wunpawng Mungdan Shawnglawt Hpyen Dap Kachin Independence Army (KIA) hpe dai SSF nga ai baw de gale sa wa na matu Myen Asuya hpe tsun wa ai nga chye lu ai hku re.

Ga shadawn Ningbaw ngu ai hpe yu yu ga. Ningbaw ngu ai mying de lu du hkra kade she shakut ra ai, myit kade shuk ai, jam jau ai, masha ni a tsun ding lun ai lam ni hpe hkam jan ra ai, masha law law a asak, pandung ni hpe tek jum nna galoi mung sadi maja ra ai. Hpyen la ngu ai hpe yu yu ga. Hpyen la ngu nna ti nang hkum ti nang shaga ai hte ti nang a asak hpe ti nang a hpyen dap, ti nang a Mungdan, ti nang a Amyu sha ni a matu jaw kau sai ngu ai lachyum rai nga ai. Dai kaw baw hpan ni bai amyu myu rai pru wa na re. Asuya hpyen la, Shanglawt hpyen la, Mung shawa hpyen la, Myu tsaw hpyen la. Dai zawn ti nang galaw nga ai magam bungli hte seng nna a mying shing ten ni mung baw hpan amyu myu hku bai pru wa ai hku re.

Moi shawng de, Shanglawt hpyen la hpe mu yang grai pyaw ai, grai a rawng lu dum ai, grai myit kam hpa ai. An-hte yawng a pandung hpe lu du hkra shakut ya taw ai ni, chyeju madu ni ngu myit hta hkam sha ai. Hpyen la gaw hpyen la sha re, rai tim Shanglawt hpyen la nga yang grai myit su ai, myit gawp ai, ti nang amyu sha hpe makawp maga ai, ngai hpe makawp maga ai ngu hkam sha ai. Shanglawt hpyen la langai ngai makau e tsap taw yang lamu kasa nye a makau e tsap taw ai zawn ngu shadu ai. Shanglawt makawn ni na yang myit nau rawt wa nna a ga hpe pyi lahtum dat na zawn zawn nga hkam sha ai. A mying shing ten gaw grai nan a hkyak la nga ai.

Ya ten hta e dai Shanglawt Hpyen Dap ngu ai a mying shing ten hpe SSF ngu nna kadai shaga mayu na law. An-hte Jinghpaw Wunpawng Myu sha ni a SSF hpyen dap ngu na kun? KSSF (Kachin State Security Force) ngu na i? KIO/A (Kachin Independence Organization/Army) ngu ai a mying shin ten hpe labau galaw kau na a ten rai n du shi nga ai. Jinghpaw Wunpawng Mungdan lu la ai shani, Republic Of Kachin Army ngu nna gale la lu ai shani she a mying shing ten ding sa hpe labau shatai ga ngu hpaji jau dat mayu n ngai.

N ju dik ai

2009-06-30T01:00:00.004+08:00

Wunpawng hpe n ju ai,

Wunpawng n nga yang an-hte n hka ai.

Chyu rum hpe n ju ai,

Dai rum rai yang an-hte n hka ai.

Myit hkrum ai hpe n ju ai,

Myit langai sha rai yang an-hte n hka ai.

U hpung hpe n ju ai,

Yawng langai sha rai yang an-hte n hka ai.

Tsa sam wa hpe n ju ai,

An-nau ni hkrai rai yang an-hte n hka ai.

Manam hpe n ju ai,

Madu hkrai rai yang an-hte n hka ai.

N ju dik ai, n ju dik ai.

An-hte galoi n hka ga ngu...

Nang grai a hkyak ai

2009-06-26T22:07:00.005+08:00

"Ndai ngut yang htaw ra bai, htaw ra ngut yang le ra bai, le ra ngut yang gaw n dai bai" nga ai hpa galoi mung manghkang gaw a nga nga ai hka. Lama mi lu yang lama mi bai ra, myit dik sai ngu yang lama mi bai bin wa, pru wa chye ai gaw an-hte mungkan shingim masha ni a htung langai mi rai nga ai. Nang ngai a manghkang kaji ni zawn mungdan langai, a myu langai mi a manghkang kaba ni mung dai zawn sha rai nga ai.

Shiga ni hta na lu ai hku nga yang gaw Wunpawng Mungdan Shanglawt Asuya KIO/A gaw nang ngai nra sharawng nga ai Myen Asuya a ga jarit sin hpyen dap gale na lam hpe ning dang kau ai lam chye lu ai. Grai kaja ai, kabu hpa shi ga langai mi rai nga ai. Kadai mung n ra ai bungli hpe gaw n galaw ai baw re ngu nna mung chye lu, chye na ya nga ai ning baw ni hpe mung a ra ngu nna gaw tsun mayu nngai. Bai ndai lam a majaw Wunpawng Mungdan Shangalwt Asuya hpe n kam yu mat sai Jinghpaw Wunpawng myusha law law mung bai myit shang sha wa ai hte hpaji, n gun jaw ai lam ni hpe mu lu ai majaw Karai Kasang lam woi ai lam wa rai sam ai ngu mung kabu nga ai.

Chyum Laika hta sakse law law nga ai, Karai Kasang gaw shi a amyu hpe hkye mayu yang tsin yam ni hpe shawng hkrum shangun nna, dai a myu shi hpe hpyi jahtaw ai ten, myit kraw lawang yawng hte shi hpe kam ai ten hta sha shi a myu hpe hkye la ai lam ni law law mu lu, hti lu n ngai. Ya gaw yang ngu na daram myit masin langai hte sha Myen hpe gasat kau nna ti nang a mungdan hpe gaw de sa wa na ngu ai myit masin ni hte hpring chyat nga na sai ngu mung shadu nngai.

Moi ji woi ji wa ni a prat kaw nna makawp maga wa ai an-hte a Jinghpaw Wunpawng buga gaw loi loi hte sha masha wa a ta de n mai hkrat sum mat nga ai. Shaning law law wa du daw sai hkaw lai wa sai rawt malan masin kaba ndai hpe mung Myen wa jaw ai ahkaw ahkang lachyawk mi hte sha gaw gara hku lu galai na law. An-hte sha na yu ai ni pyi n kam jaw kau ai rai yang Myen hpe gasat nna ti nang a makau na myit rum ni si mat wa ai hpe mu yu ga, hkrum sha ga ai ni gaw grau myit rawt na re ngu ngai kam ai. Nang hte grai hkau nna galoi mung rau sha bungli galaw nga ai tsaw ra manang wa hpe ti nang a myi chyaw hta gap sat kau ya ai hpyen wa hpe hput di di nna shi a mayam tai na ngu ai gaw kadai wa myit lu na rai ta? Bang da ai arang ni dai ram law ai gaw hpa baw pandung a majaw re ai hpe yawng chye nga ga ai. An-hte ni yawng myit hkrum let kade kaba ai hpyen hpe mi rai yang rai mungkan sha n htum ding sa gasat na rai nga ai. Kadai wa mi hkrit nga a ta?

Myit n pyaw na lam gaw pru wa nga sai. Dum n-ta langai mi hta kasha law law nga ai kaw na n kau ni gaw grai myit su ai. N kau ni myit n su tim madat mara ai majaw myit su wa ai. Rai tim n kau mi gaw sharin shaga magang grau grau lawn wa ai ni mung nga ai hku re. Prat hte prat, ban hte ban hka kap na lam hpe hpa majaw galaw mayu ai hpe gaw shi mung chye na na n re ngu ngai kam ai. Kanu kaw na hka, ti nang ding hku ti nang sha chyip na nga nna pru mat ai NDAK gaw myen a mayan dai na nga nna arawng she la hkra rai tsun wa ai hpe shiga ni hta mu lu ai hku re.

Shanhte gaw Asuya hpe ning hkap ai shanglawt hpung n re ai da. Myit yu ga, shanglawt ngu ai u hpung a nam chyim gaw hpa rai a ta? Taw shang hte gaw Myen hpe shanglawt ai n rai yang gaw Jinghpaw Wunpawng sha ni hpe shanglawt ai ga i? Masha ni dang sha yang gaw kanu hpang de bai wa rit le. Hpa majaw wam dam hkawm nga a ni? DKBA zawn ti nang a myusha ni a mayen mahtoi bun ai hpe hkam mayu a ni? Masha wa hte pawng nna ti nang kanu hpe bai n htang gayet mayu ai kasha bin mayu ai i? Dum n-ta langai hta rau nga ai an-hte a hting gaw hpe hpa majaw nang jahten mayu a ni?

Ti nang hkum ti nang a hkyak n re ai ngu nna myit ai ni gaw ti nang langai hkrai a akyu hpe sha tam mat ma ai. Nang langai sha re ngu nna n ahkyak ai ngu hkum shadu dam. An-hte langai hkrai gaw grai a hkyak ai hkrai rai nga ai. Kanu langai mi hta kasha gade mi law yang law, kasha shagu gaw dai kanu a matu a hkyak dik ai hkrai rai nga ai. Nang langai mi yawm mat jang an-hte a mungkan hten mat na hpe myit dum ra nga ai. Nang langai mi n lawm ai majaw an-hte ji woi ji wa prat kaw nna lu mayu lai wa ai pangdung gaw an-hte hte grai tsan mat na hpe myit dum ra nga ai.

Nang grai a hkyak nga ai hpe dum ga.

Dum N-ta Daw 6 (Ngai hkrai a matu n re ai majaw!)

2009-05-29T14:09:00.010+08:00

Dai hpawt mung bungli de bai sa wa ra sai. Bungli de sa ra shagu nye myit kata hta e ngarai di de jahkrung shang sha ngun ai zawn hkrai nawn nga ai. Kade n kam tim kan hkru na matu bai rawt ra sai. Shani tup bai pu ba ra sai. Myit dat yang ru ru nga hkam sha ai. La di matu pyi hkri wa ai zawn nawn ai. Ga, shing gim masha sa tai ai wa shut sam sai she ngu kalang lang gaw myit hkrup ai hku re. Karai Kasang e, Karai e.

Jing hku ni matut ya ai lahka shabrai kaja, hkem ma hkem sa ai baw bungli hpe baw ganga kau nna, moi kaw na galaw wa ai hte chyeju ma nga ai bungli shaja hpang de gayin mat wa ai hpe myit malai lu ai zawn nga hkam sha ai. Ndai zawn jahpawt e yup rawt nna bungli de sa maw yang galoi mung ndai zawn chyu nga hkam sha ai. Dai ten hta ngai hpa majaw jing hku ni ma dun ai bungli hpe n hkap la ai rai kun ngu bai myit sum ru yu ai hku re. Kaja wa nga yang dai bungli ga ya ngai galaw nga ai bungli hta grai nan hkem sa la nga ai. Shing nyip kata e sha bungli galaw ra ai hte lahka shabrai mung grai law hkra jaw ai dai bungli hpe ngai bai myit dum dum rai nga nna myit n gut hkraw nga ai gaw shata lahkawng pyi rai sa hka!

Jahpawt shagu galaw nga ai hte maren lai wa sai shat lahkawng jan na grai hkrak ai ngu ngai kam da ai a hkaw a hkang hpe baw ganga kau ai lam mabyin hpe bai shing ran nga ai hku re.

Ngai hpe bungli kaja jaw na nga nna Ma Lu hpe bau maka nga ai "Wa" hpang maga na jinghku wa tsun wa ngut ai hpang shani e ngai gaw bungli de she hpang hkrat hkra shana tup n yup nna myit kau sai hte bungli madu hpang tsun jahta hpaji hpyi chyam yu sai hku re. Bungli madu gaw "Nang zawn re a tsam rawng nna, bungli hta kang ka ai wa hpe tat kau na matu gaw grai naw myit yu ra ai rai tim na a matu grau kaja ai bungli de mahtang sa yang kaja na re" nga tsun wa ai hku re. Ngai mung dai zawn nga ai ga hpe bungli madu kaw na na lu ai majaw grai kabu ai hte jinghku wa hpang de sa mat wa sai hku re. Bungli madu hpe mung bai sa chyai chyai rai na ngu nna sha hkram kau da sai hte sa wa sai.

Lagaw leng hpe gabye let loi loi rai sit sa wa sai. Lam n tsa e bungli nnan a lam ni hpe law law wa shing ran kau sai hku re. Bungli galaw jang shabrai mung law law lu na hte sa boi n tsa e sha dung nga ra na. Dai lam ni hpe myit yu let myit kata e grai myit dik taw ai hku re. Ngai kalang mi lau ban ban ai yup mang mu ga ai hku re. Dai yup mang ni kaja wa byin wa na matu ya ngai sa galaw na bungli gaw garum na re ngu kam ai hku re. Dum N-ta tsawm tsawm re ai ni, rung gawk ni, Cell Phone ni, Maw Daw kaja ni, malu masha kaja ni, ngai pyi n lu myit dang hkra law la wlu na re ngu myit let kabu nga ai hku re. Ngai kaw gum hpraw law law lu jang gaw Wa Dim hpe mung n hkrit ra sai hte, Nu hpe mung tsi kaja ni hte rau tsi lu, tsi shamai la na re ngu mung kam nga ai. Ndai zawn nye a matu kaja la ai bungli gaw Karai Kasang kaw na du sa ai shaman chyeju ni she rai sam sai ngu mung shadu ai. Ngai Kyu Hpyi ai ga, Nu a Kyu Hpyi ai ga ni hpe Wa Karai Kasang na ya sai ngu myit kata hta chyeju sha kawn nga ai hku re. Aww... nye prat kaja wa galai shai wa sana sha rai nga a hka ngu mau ai zawn zawn, kabu ai zawn zawn. Myit mada da ai shani de lu du sana sha re. Kanau ni hpe mung Dum N-ta de bai shaga la nna moi Wa naw nga yang na zawn sha Dum N-ta hta yawng hkrum hkrum zup zup rai lu nga sana sha re, kabu la nga ai.

Dai zawn myit shingran let jinghku ni hpang de nye a lagaw leng jahten rau gau ngwi ngwi sha sit sa wa sai. Du ai hte a lawan sha chying hka a kawk sai hte chying hka sa hpaw la ai nsen hpe mung na lu sai. Chying hka hpawt ai shaloi yu dat yang chying hka sa hpaw la ai gaw Ma Lu rai taw ai majaw "Kaja nga ai kun?" ngu san let shi a lam ni hpe shawng san yu sai hku re. Ma Lu mung jinghku ni grai myit kaja ai lam hte ngai hpa majaw sadu ai lam hpe san ai majaw mi sha lam n tsa e myit shing ran da ai lam ni hpe tsun dan ai hku re. Ma Lu mung na kabu nga ai hte jinghku ni hpe shaga ya na matu tsun sai hte wa shaga sai. Jinghku n-ta madu wa sa wa nna ngai gara hku daw dan sai lam hpe san ai majaw dai lam ni hpe tsun dan ai hte bungli ding sa madu mung myit hkrum ai lam tsun dan sai. Ngai hpa baw shawng galaw ra na ta ngu yang, hpawt de she bungli nnan de sa na lam tsun nna dai na gaw nta de shawng wa magang u nga ai. Ngai mung n-ta na Nu hpe ndai shiga tsun dan mayu ai majaw kalang ta Dum N-ta de wa sai hte dai shiga hpe na ai Nu mung kabu nga lu ai. Rai tim bungli ding sa hpe chyeju nlu htang shi ai majaw myit n pyaw ai nga Nu tsun ai hte ngai mung dai hte maren hkam sha ai.

Gara kaw na nawa ai re kun hpyi n chye ai, ngai Nu a yup gawk kaw na pru wa ai hte Ma Naw yan Wa Dim gaw ngai hpe hpa majaw bungli kaw na pru mat ai lam hpe san ma ai. Grai pawt taw ai n sam rau san ma ai majaw ngai mung masin hta wa nna pawt mayu wa ai hte "Ngai nkam galaw di le, taw nan rau hpa seng a ta?" ngu tsun jahtau bun dat sai. Manga hkang bai hpang sai. "An a tsa manu gara hku di na law. Bungli nkam galaw nna gumhpraw nlu jaw yang gaw nye nta npu kaw na pru mat u! Le!! Gwi, Wa zawn rai lam makau hkan e sha sa nga u!" nga Wa Dim gaw ngai hpe jahtau sai hku re. Ma Naw mung jat jat bai nga, kalang lang nye a kanau ma jing gaw rai ai kun ngu myit dat dat di nngai. Dai hpang ngai mung "Na a nta hta ngai grai nga mayu nna nga taw ai n re. Nu a majaw sha re. Bai ndai nta mung na nta nre. Wa jaw da ai an-nau ni a hkring htawng she re!" ngu bai jahtau bun sai. Dai hpang hpa gaw hpa rai sai kun pyi n chye sai, shi pawt ngai pawt rai aten ni htum wa ai hte Nu hpe mung bai zing ri rai ai majaw bungli nnan lu ai majaw re ngu tsun dat yang she dai majawn ngut kre mat ai hku re. Grai pawt mayu ai rai tim Nu a myit man a majaw ngai asum jawt kau sai.

Hpang shani e jinghku wa rau bungli nnan a bungli madu hpang sa jahikrum sai hku re. Dai shaloi bungli madu a rung gawk e ngai hpe ga san ni san, ngai mung chye mayu ai ni san, rai sai hte bungli galaw na matu ra rawng ai lam ni hpe tsun dan sai. Mang hkang gaw hpru wa sai hku re. Ngai gaw laika hpaji hta mung nkaja ai majaw rung bungli ni galaw na matu yak nga ai nga tsun sai hte ra ai hpaji ni hpe sharin la na matu kaga mare kaba e nga ai bungli de shawng ngai hpe sa shangun na nga ai hku re. Bai dai ladaw gau laning mi jan, hkawng ning hkawt rai na hte, dai ten hta jaw na lahka sha brai gaw bungli ding sa e jaw ai lahka shabrai hta loi yawm nga ai hku re. Galaw na n galaw na ma htai jaw sha ngun ai shaloi ngai myit ra ai aten du sai ngu myit dum ai hku re. Bai dai bungli madu hpe ngai hpe myit yu na ten jaw rit ngu, hpang shani she mahtai jaw na ngu tsun yang grai pawt sai hku re. "Ngai gaw na jinghku wa a myi man tau let nang zawn re ai masha hpe bungli jaw na ngu yang nang gaw hpa baw mi rai dum nna naw myit ra na rai?" nga sai hte jinghku wa tawng ban ya ai hte hpawt de ma htai jaw na ngu tsun kau da sai. "Ngai gaw Dum Nta a bungli galaw ai majaw syhan hte hte shawng jahkrup ra ai." ngu mung tsun sai. N-ta du a tsawm sha bai myit yu yang gaw ya lu da ai bungli ding n nan gaw nye a matu nan n rai nga ai ngu hkam sha lu ai. Hpa majaw nga yang gara lam hta mung ngai hpe kaji myi pyi n chye na ya ai bungli hta ngai gara hku mung ngwi pyaw sim sa ai sha bungli lu galaw lu n re ai hpe ngai chye nga ai majaw re.

"Grai gaw a gam ai rai tim ndai bungli gaw nye a matu n rai na re ngu ngai shadu ai majaw bungli hpe n lu hkap la sai" ngu hpang jahpawt tsun kau nna ndai bungli dingsa de bai wa ai hku re. Humm!!! Ngai galaw ai bungli hpe ngai chye na nga nngai kun?

Ah Cha EEe!!!! Bungli hpang hkrat wa sai le. Lagaw leng, lagaw leng gaw taw? Ngai lu ngai lu, ga un a lu. Wan nhtaw shaw di chyawm galun a lu!!!!!!

Ning hkap ga ai

2009-05-14T17:49:00.009+08:00

GA JARIT HPYEN DAP GALE SA WA NA LAM HPE A JA A WA NING HKAP AI LAM HPE NDAU DAT N NGAI. LAWU DE NA TANG MADUN ALAI KA HPE MATUT HTI NA MATU SAW SHAGA DAT AI.

Jinghpaw Wunpawng Shanglawt Asuya hpe Ga Jarit Sin Hpyen Dap De Galai Sa Wa Na Lam Hpe Ning Hkap Ai Lam

An-hte Jinghpaw Wunpawng sha ni gaw moi laiwa sai shaning 50 ning Myen hpe gasat nna du daw sai hkaw ai lam ni law law nga lai wa sai hpe mu chye lu ai. Myen Asuya maga de na simsa lam la nna ti nang a gin ra hpe gaw sharawt na matu tang madun wa ai majaw rawt galu kaba wa na matu she simsa lam la lai wa ai re ngu kam ai. Hpa majaw n chye, ning pawt n nga ai Myen a tsun jahkrit ai hku hkan nna Ga jarit sin sa wa na law. Myen wa jaw ai a hkaw a hkang ni hpe lu ai daram la da nna hpang jahtum e awm dawm shanglawt lu hkra shakut na nga nna KIO/A du salang ni a mungga ni hta law law lang na ga ga ai. Ndai zawn ga jarit hpyen dap gale sa wa ai gaw a hkaw a hkang kaba ngu gara hku mung n mu mada lu ai. Ti nang lu da ai a hkaw a hkang ni hpe tat sum wa ai re ngu mu mada ai. Dai hte maren ti nang a hpyen dap hpe mung masha wa hpang de jaw kau na gaw Jinghpaw Wunpawng sha ni ra sharawng ai lam n re ngu mung mu mada ai. Ga sadi ni hpe jahpawt shagu tsun jahtau nga ai Shanglawt hpyen la ni a ga hta lak nak n jahkrat na ga ai nga ai hpe na lu ai. Ga jarit sin hpyen dap gale nna Myen a n pu de shang wa ai lam gaw Lak nak jahkrat ai hta n ga, hpyen dap ting hpe Myen wa hpang de jahkrat jaw kau ai ga rai na re ngu kam ai. Seng ang ai Ningbaw Ningla ni mung n dai Myen a tang madun ai lam hpe hkap la ga ai rai yang gaw Prat tup, kashu kasha a ru a rat prat du hkra Karai Kasang jaw ai ari hte labau hka kaba hkrum na re ngu mung kam ai. Dai re ai majaw Seng Ang ai Ningbaw ni hku nna mung a ja a wa sawn sum ru yu na matu tang madun dat ai. Ndai Ga jarit hpyen dap gale sa wa na lam hpe Dum N-Ta Blog (Ta Tut) kaw na a ja a wa ning hkap ai lam shana dat n ngai.

Dum N-Ta Blog

(http://www.dumnta.blogspot.com)

Ta Tut

t2.life@yahoo.com

Ga san ni

2009-05-09T19:54:00.005+08:00

May shata 2 ya shani e Myitkyina e duju ai, myen a Dingdung ginwang ginjaw hpyen dap hta e ti nang KIO/A a ningbaw ni hpe Myen Du Kaba Mungdaw Up wa hkrum shaga wa ai hta ti nang KIO/A hpe gajarit shimlam dap shatai na hku tsun wa ai lam hpe yawng chye na sai. Myit mung n pyaw ai zawn myit mung grai kahtet nga ai. Ningbaw ni gara hku galaw na ma ai kun? Kadai mung ndai lam hpe gaw myit shang sha nga na ma ai.

Dai zup hpawng hta ti nang KIO/A kaw na mahtai n jaw ai sha May shata 20 ya shani bai hkrum zup na matu Myen kawn lajin dat ma ai da. Ndai gaw ngai gaw tsun ngut sai, nang hpe myit na ten jaw na. Dai ten du yang ngai hpe mahtai kaja jaw na ngu myit mada ai, ngu ai ga rai nga lu ai. Gara hku ta?

Nan-hte ningbaw ni myit ai hpe an-hte ni kam let hkan nang na ga ai nga ai ni nga ai zawn, nan hte galoi mung dai zawn sha re, prat tup rai tim nan hte galaw ai lam gaw awng dang na n re nga nna pawt taw ai ni mung nga na ma ai. Nang gaw taw? Ngai gaw taw?

Ngai myit ai hpe tsun ga nga yang gaw, Masha amyu wa a n pu e shang nna galu kaba lam tam ai gaw gara hku mung n mai byin na re ngu shadu ai. Mungkan n tsa e nga ai myu baw shang shagu a labau ni hta masha wa a amyu hpe yu lakawn ya nna galu kaba wa hkra makawp maga ya ai amyu ya du hkra rai tim n mu yu ga ai. Miwa i? American i? English i? Russia i? Myen i? Kadai law, kadai nga a ni! Miwa, American, English hte Russia ni gaw moi kaw nna amyu bawsang law law hte gaw de da ai Mungdan kaba ni rai nga ai. Miwa mung hta ga n bung ai amyu tsa lam nga ai. Russia mung dai hte maren sha zawn kaga mungdan ni mung maren sha re. Miwa munghta nga ai kaga myu ni galu kaba nga ai hpe mu a ni? An-hte myu ni gaw ya she masha wa hte kanawn na matu myit nga ai re. Jau jau dip shahkrum nga sai amyu ni gaw moi shaning hkying kaba hku dip sha hkrum nga ma ai re.

Ndai ngai Ta Tut mu mada ai lam ni hpe gaw mungdan ningbaw ni, manaw manang ni mung myit lu ai hkrai rai na re ngu kam ai. Ndai hpe chye nga ning len, ti nang amyu hpe sin mak nga ai shawng lam de gaw n woi sa wa na re ngu mungdan ningbaw ni hpe mung kam ai. Ndai hpe chye ai majaw ti nang myu a matu lu ai shara kaw na mungdan bungli hpe galaw garum nga na re ngu mung ngai, manaw manang ni hpe kam ai. Mungdan lam hta shawng tsap nga sai myu tsaw share shagan ni mung sadi maja nga na re ngu kam ai. Dai rai yang kadai hpe gaw n mai kam a ta? Myen hpe i? Ngai hkrai ngai i? Shing nrai Nang hpe i? Myen hpe gaw jau jau kaw na n mai kam ai gaw 100% yawng chye sai re. Ti nang hkum ti nang she san yu ga. Nang kaja wa myu tsaw myit rawng nga a ni? Myu tsaw myit a majaw hpa hpe mung n hkrit n tsang myu amatu galaw na matu jin jin rai sani. Kadai mung chye ai hte maren, amyu langai lawt lu na matu gaw hpyen dap hte sha dang di lu ai baw n rai nga ai. Nang ngai sa pra nga ai Mungkan gaw moi na mungkan n rai sai. Hpahpe mung shi a lam hte lam galaw yang she awng dang ai baw re. Majan gasat dang shagu mungdan lu ai baw mungkan mung n rai nga ai. Dai re ai majaw kadai mung kadai ang ai shara kaw na bungli galaw ra saga ai.

Ngai laiwa sai May shata 8 ya shani na Hkitpyaing shiga dap kawn shapoi da ai shiga langai mi hpe lu hti ai hku re. Hpa baw hpe mulu ai rai ta nga yang, KIO/A gaw myen asuya hpe ning hkap nga ai hpung ni hta No.2 kaba dik htum hpung re nga chye lu ai. Madat yang gaw grai kaja ai zawn nga ai rai tim hpa majaw No.1 n lu rai nga ai ta? KNU zawn majan kasat nga ai hpung mung n rai, amyu nau kaji ai majaw masha n law ai mung nrai re ai wa. Hpa majaw No.2 kaw sha du taw ai rai ta? Wa mung na hpyen dap hta hpyen n gun masha 30,000 jan nga ai nga chye lu ai. Ti nang KIO/A hta gaw masha n gun 5,000 jan nga ai nga chye lu ai. Hpa majaw ta? An-hte amyu ni kaw masha n nga ai majaw kun? Kani yar, tsa yar hkrai re ai majaw kun? Nre! Kani yar, tsa yar law malawng gaw a kyang bai galai shai na matu hpyen dap de sa katut nna hpyen la galaw nga ma ai. Dai rai yang hpyen dap hta mat nga ai masha ni gaw ganing san ai ni rai ta? Masha kaja ni yawng mat taw nga ai.

Shanglawt hpyen la ni hta hpaji chye ai masha kade nga a ni? Jinghpaw Wunpawng myu sha ni gaw laika hpaji n chye ai a gawk ni hkrai hpring nga ai majaw myu hte mungdan bungli galaw na matu hpaji chye ai masha nnga ai ga kun? Kalang lang ngai hkrai ngai myit yu nna san yu yu re ai ga san nga ai. Hpaji chye ai Wunpawng myu sha langai mi, myu tsaw mung tsaw myit rawng ai Jinghpaw Wunpawng sha langai mi, htung hking hpe tsaw ra ai Jinghpaw Wunpawng sha rai nga a ni? A san sha tsun ga nga yang ngai masha kaja (Normal Person) gaw rai nga a ni? Nang gaw taw?

Dum N-ta Daw 5 (Gara lam ta?)

2009-03-29T18:17:00.017+08:00

"Chyet! ... chyet! .... chyet! ........"
Mungkan ting n sin e kaup nga ai hte n sen hte seng nna dai a ten hti jak (Clock) a n sen sha a ten man man ngoi nga ai hku re. Shani hkan e n sen kaji mi mung n na lu ai ndai a ten hti jak a n sen mung dai na she nye a na kata hta shi hkam bau langai mi hpe a ten man man dum sha ngoi bun ai zawn nga ngoi garu ai hte n lu yu ai lam hpe hkam sha nga ai hku re. Jahpaw jau jau rawt nna bungli naw galaw ra ai majaw shana jau jau yup yang she mai kaja ai rai tim a ten hti jak a n sen hpe mara shagun ra na zawn she nga hkra n lu yup hkraw nga ai hku re.

Kaja wa nga yang ngai hpe n lu yup hkra zing ri nga ai gaw dai n sen n re ai sha nye a baw nu kata kaw myit sum ru nga ai lam ni wa ngai hpe n yup hkra jasu nga ai majaw rai nga ai. Dai hpawt sha bungli madu kaw na du na shata ni a matu lahka hpe shata 3 na jau shaw la let wa ra ai hka ni yawng hpe wa kau sai a majaw myit ru ai lam loi yawm mat ai zawn zawn rai tim, du na shata masum tup lahka nlu, bungli ni hpe shakut ra na hpe gaw grai myit yu nga ai hku re. Ndai zawn sut masa mang hkang bin nga ai hta Nu mung lani hte lani grau grau she machyi sawng wa ai majaw mung rai nga ai. Shing gim masha ngu ai gaw galoi mung ra rawng ai lam gaw ding yang she rai nga a hka ngu bai myit lu ai. Ndai zawn dum n-ta hta yak hkak ai hpe chye na ya nga ai, kanau ma lu hpe bau maka ya nga ai, n nga mat sai Wa maga na jinghku dum n-ta kaw na ngai hpe la hka grau law ai bungli de shara madun mayu ai lam hpe dai ni sa tsun mat ai hku re.

Kalang ta na lu ai hte ngai shan hte hpe hpang na shata masum daram du hkra n dai bungli kaw na galaw ra ai majaw shata masum na yang she ngai bungli bai galai na matu mahtai jawt dat ai hku re. Mang hkang gaw, jinghku ni jaw na nga ai bungli gaw ndai shata hpang jahtum shaga ai ga re nga chye lu ai ga re. Jinghku ni tsun ai bungli gaw rung gawk kata galaw ai baw bungli rai nna, hpaji mung grai chye n ra ai. La hka sha brai mung ya ngai galaw nga ai bungli shaja hta htam mali, manga daram law jat ai majaw re. Ngai ya galaw nga ai bungli madu hpe shata masum tup hkra bungli hpe atsawm sha galaw na matu ga sadi jaw kau sai hte, ngai hka kap ai mang hkang the jam jau nga ai ten ngai hpe garum lai ai re majaw n dai zawn chyeju htang gaw n mai na re ngu mung myit lu ai hku re.

Ndai lam ni hpe ngai galaw nga ai bungli madu hpe tsun dan yang hpa ga mung n shaga ai sha zim nga nna, hpawt de she mahtai jaw na nga tsun let gayin mat ai hku re. Yawng chye ai hte maren nye a bungli madu gaw myit nau n galu ai masha rai nna yawng ma yawng hkrit gari ra ai wa mung rai nga ai. Shi ngai jam jau nga ai hte lahka jau htuk ya nna ngai hpe garum ai nga shiga a majaw bungli kata e nga ai bungli galaw masha ni yawng mau mat ai hte n dai zawn kalang mung n bin ga ai lam chye lu ai hku re. Rai tim dum n-ta a lam hpe chye na ya ai majaw bungli madu gaw ngai hpe garum dat ai re majaw ya jang ngai shi hpe ndai zawn chyeju htang yang gaw nye a lup sin hku ngai hkrai htu la ai hte bung nga ai nga nna nye a bungli galaw manang ni mung tsun jahta dan ma ai. Gumhpraw yak hkak ai a majaw bungli shaja ni hpe galaw nga ai rai tim ndai hta shabrai grau lu ai bungli kaja ni hpe gaw ngai mung tam nga ai hku re. Ya dai zawn re ai bungli hpe nye a shawng de la sa wa ya ai shaloi gaw n mai sha ai nam si hpe zawn yu ra nga ai gaw grai nan nga n pyaw ai majaw yup n lu nga ai.

Karai Kasang a "Hpyi mu, hpyi yang jaw na" nga ai ga sadi hpe hpung shara ni laban shani na nawku hta tsun ai hpe na yu ai majaw kyu mung hpyi kau sai hku re. Nu hpe tsun dan nna, nu mung nye a bungli a matu kyu hpyi ya nga ai. An-hte dum n-ta masha ni yawng a ngup hpe jahpring ya nga ai gaw nye a bungli rai nga ai. Ngai myit ru nga yang she a ten tup tsa chyu nang ai yang, Wa Dim hte Ma Naw, mung bungli kaja nga yang gaw bungli kaja de htawt ai baw re, sadi dung ai n dung ai n chye na ai nga nna sa grang bu taw ai majaw masin hta pawt mayu ai zawn zawn nga wa nna "NGAI GARA KAW MI BUNGLI GALAW YANG GALAW, NAN LAHKAWNG TSA MANU LU YANG RAI SAI N RE I TAW? ZIM RAI NNA LA SHA NGA MU. GA KAJI NAU HKUM SHANGAI!" ngu mung hta kau dat ai hku re. Shan pyi masha zawn n rai hkra tsa nang nga ai kaw ngai bai masin shalut dat ai majaw shana de tup mung galaw hkat kau sai majaw ya du hkra masin rai n kawp shi nna yup n lu ai ga kun mung n chye sai.

Masha ngu tai wa sai kawn gaw n dai zawn re ai lata yak la ai mang hkang ni prat a hpung gaw shagu nga ai rai sam ai. Ndai hpung gaw ni hta lata chye yang she masha tai ai a kyu nga na re ngu kam ai. Ya nye a prat hpung gaw mi hta mung lam kaja hpe lata chye ra ai ngu gaw chye tim gara hpe mahtang lata la ra na re ai hpe n chye nga ai. Chyeju nga ai hpe yu na kun shing n rai a myat nga ai hpe mahtang lata la ra ai baw kun? Ya ten e dum n-ta a mang hkang hpe loi mi hkyem sa jaw ai gaw jinghku ni madun ya ai lahka law law lu nna nau n ba ra ai baw bungli mahtang kaja nga ai. Rai tim chyeju nga ai bungli madu hpe mung ndai zawn gaw n kam chyeju htang nga ai. Shi ngai hpe kam nna gumhpraw mung shawng shaw ya ai hte dum n-ta a mang hkang hpe hkye ya ga sai re. Ngai gara hku galaw ra na hpe n chye myit nga ai.

Ndai zawn sha myit nga let hkying kade pyi rai sai kun. Hpawt de mung jau jau bungli naw sa ra na re wa. Humm! Nau myit nna kun nchye ai gara hku mung n lu yup hkraw nga ai. Myit ru sai wa re.

Hten mat ai mare

2009-03-22T18:41:00.006+08:00

Moi shawng de, nam maling kaba kata e grai ngwi pyaw sim sa ai mare kasha langai mi nga ai da. Ndai mare hta dum nta hting gaw 30 jan nga lai wa sai da. Ndai mare makau hta e gaw grai kaba ai hka nawng kaba langai mi hte de a makaw e grai shim ai nam maling bum kaba mung nga lu ai da. Ndai zawn nam maling, hka nawng kaba hte dai mare kaji gaw grai ngwi pyaw nga ma ai da.

Ndai mare hpe yu yang grai ngwi pyaw nga ai hte lu na sha na mung hpa n tsang ra hkra hkai lu hkai sha lam ni mung grai kaja ai da. Bai lamu marang mung shi a ten hte a ten grai kaja nga ai hte machyi makaw hpa mung nnga ai nga ma ai. Ndai zawn grai ngwi nga ai gaw ndai mare makau e nga ai hka nawng kaba kata e nga ai Baren Kaba (Dragon) langai mi hku nna bau sin ya ai majaw re lam chye lu ai.

Ndai baren hpe shaning shagu mare masha langai ngai hpe jaw sha yang shaning tup mare hpe bau sin makawp maga ya nga ai lam chye lu ai. Masha nlu sha yang gaw mare kaw machyi makaw kaba ni hkrum wa ai zawn lamu marang mung n kaja wa ai hte grai jam jau wa na re nga ma ai. Dai majaw laning mi hta kalang ngu na hku masha jahkrum hpe hka nawng de sa nna Baren kaba hpe jaw sha ra ai hku re.

Ndai zawn shaning law law wa nga lai wa ai hpang, lani mi na nhtoi hta n myit mada ai sha masha shan sha chye ai Galang Kaba (Eagle) langai mi gaw hka nawng kaba makau e nga ai, grai shim ai nam mali bum e sa du tsip tsip ai da. Ndai Galang Kaba gaw grai kaba ai majaw, shi a sing kaw langai mi gaw nta shangu n gaw daram kaba nna n gup mahka dat yang, hku wan daram kaba ai da. Dai re ai majaw n dai Galang kaba gaw shani shagu shi lu sha na matu mare e nga ai du sat yam nga ni hpe rim sha sha re ai da.

Ndai zawn shani shagu rim sha sha re nga ai majaw mare masha ni a du sat yam nga ni yawng htum mat wa ai hte ma kaji ni hpe du hkra rim sha wa ai majaw mare masha ni gaw grai hkrit gari ai hte Baren kaba hpe garum hpyi ma ai da. Ndai zawn garum hpyi ai lam hta mare masha masum hpe jaw sha nna Galang hpe rim sat kau na matu hpyi sawn ai hte maren Baren mung hkap la let Galang hpe rim na matu hka nawn kaw na nam maling bum de rawt sa wa ai da.

Ndai zawn Baren hte Galang hkrum hkat ai shaloi Baren gaw Galang hpe lu rim ai hte sat kau hkyem yang Galang gaw Baren hpe ning ngu tsun ai da, "Ngai hpe sat kau yang nang a matu mung akyu n nga ai. Nang laning mi tup rai yang she masha langai lngai sha lu sha ai gaw na a matu n law na re ngu ngai kam ai. Nang daram kaba ai wa masha kaji sha law ai hpe sha sha nna laning mi tup kan si taw nga ai hpe mung ngai chye ai. Dai re ai majaw ngai rau pawng nna mare ting hpe kalang ta lu sha hkra galaw ga." ngu nna tsun ai da.

Dai shaloi Baren mung grai kabu mat ai hte Galang a ning mu hpe hkap la nu ai da. Dai hpang Baren gaw mare de bai wa nna mare masha ni hpe "Galang gaw grai n gun ja ai majaw hkarang kawng kaw rai yang ngai n dang ai. Shi hpe hka de du hkra lu shaga sa yang gaw ngai lu rim na re" nga nna mare masha ni hpe tsun ai da. Dai hpang mare masha ni hpe hka nawng ga-ang de hka li kaba rau sa nga shangun dat ai da. Mare masha ni mung dai ga hpe n myit yu ai sha kam nna Baren tsun ai hku galaw ma ai da. Hka ga-ang e du ai hte hka li hpe gup kau nna mare masha ni yawng hpe sha kau ai da.

Mau mwi gaw ndai kaw ngut sai hku re.

Dum n-ta Daw 4 (Gawng malai myit yu ya rit)

2009-03-05T09:33:00.009+08:00

Company bungli ni hte kaja kyin kyin rai nga yang she nye a rung gawk na phone wa mi rawt ngoi wa nna gaw galaw nga ai bungli pyi she malap hkra bai rawt kajawng kau ai hku re. "Kadai wa mi ya ten bungli dai ram kyin nga yang me phone shaga a ta?" ngu myit let phone htai dat yang gaw nye a kanau wa mi jawng yu nna sa tau la na matu shi a lata jum phone (Handphone) hte shaga dat ai she rai nga a hka. Aww.. jawng pyi yu sai gaw i.

Ngai mung yawng gaw n chye sai rai tim ngai she dum dum ai gaw n dai rung gawk kaw nye a company bungli ni hkrai shakut nga ai hpe sha dum nga ai hku re. Nye a baw nu kata gum hpraw gara hku tam na nga ai hkrai she myit nga ai hte lai wa sai ten ni hpe gara hku mung n lu myit mat sani ai hku re. An-nau ni yawng 6 nga ai kaw na ya ngai hkrai sha dum n-ta ting a magam bungli ni hpe lit la nga ai hku re. Nu gaw n-ta hkrai sin ra mat nna ngai hpe garum na kadai mung n nga ai ga. Kanau ni yawng mung jawng lung nga ma ai. Ma Naw mahtang gaw moi na hte maren tsa chyu naw rai nna me nga nga ai. Wa Dim hpe mung shi ra ai gumhpraw jaw nna dum n-ta kaw na gawt shale kau ni ai. Ya gaw ngwi pyaw lam hkrai hkrai rai nga ai.

Dum n-ta hpe mung gram kau sai re ai majaw ya gaw prat dep wut dek n-ta she zen rai an-nau ni a dum n-ta wang gaw grai a rawng lu la nga ai. Dum n-ta a sut masa a matu gaw company langai hpaw da nna a rung a rai htaw shalai ai hte dut shabra ai lam ni hpe galaw nga ai hku re. Gara de sa tim maw daw rau, sha ai lu sha mung nam chyim nga la ai baw hkrai hkrai. Prat tup lu na n shadu da ai baw ngwi pyaw lam ni wa a kajawng sha dum n-ta de du shang wa ai majaw bin nga ai ma bin ni hpe tsun dan yang kadai mung n kam na re. Ngai mung n kam nga ai. Aww... ngwi pyaw ai ngu ai gaw n dai rai sam ai ngu myit nga ai hku re.

Ngai lai wa lai sa shagu hta e baw gum nna "Hkam kaja nga ai i lau ban wa?" nga nna hkap shaga shachyen ai ni mung grai law nga ai hte hkung ga la ra rai nga ai hpe hkam sha lu yang mung grai myit dik ai hku re. Jam jau ai prat hte ngwi pyaw ai prat gaw kade daram shai ai ngu ai hpe ngai ram kadai n chye na na re ngu pyi myit hta shadu kau sai hku re. Ndai lam ni yawng gaw ja gumhpraw a majaw galai shai mat ai ngu yang mung mai ai re. Gumhpraw, gumhpraw ngu ai gaw mungkan hta a hkyak nga a hka.

Ngai masha wa a npu e n nga ra ai a majaw nye a myit hta galoi mung grai myit simsa ai hte yup pyaw, sha mu rai nga ai hku re. Hpa sha ra tim masha wa hpe shangun dat sha re. Nye a company n pu e bungli galaw nga ai ni hpe yu nna shan hte ngai hpe hkung ga ai mu yang myit hta grai a rawng la dum ai hku re. Ngai rai sa, ngai nan rai sa. Ngai hpe kadai n gawn n san naw galoi gwi ai rai. Kadai wa me ngai hpe masha n sawn na rai. Kadai wa, kadai wa law. Ngai ra ai hku hkrai yawng rai ra na, ngai myit mang ai hku she shan hte hkawm sa ra na ngu ai "Ngai" ngu ai myit gaw grai nan nam chyim nga la ai hku re.

Bungli galaw ai ni lam ma shut hpyit ai lam galaw hkrup yang mung pawt dat, matsa dat rai, ngai shing di dat yang shan hte ngai hpe tawng ban wa ai ten hta n hkap la masu su nna lahka shayawm ya na law, bungli sha praw kau ya na law, hpa law, nya law nga nna jahkrit ai lam ni mung dum n-ta de du wa yang kanau ni hpe tsun dan nna manyi hpa bai bin n htawm garu gachyi nga grai myit pyaw ai hku re. Ngai galaw dat ai mabin ni a majaw nye a kanau ni manyi chyai hpa lu hkra lu galaw ai majaw myit dik la nga ai hku re.

Ndai zawn rai nga pyaw myit dik nga ai ten nye a baw nu kata de lama ni shang wa ai gaw, moi ngai mung nye a n pu na bungli galaw masha ni zawn bungli madu hpe hkrit ra ai ten ni na lam ni re. Ngai mung shan hte zawn grai hkrit lai wa sai hku re. Nye a bungli madu ngai hpe pawt ai ten, bungli shapraw kau na nga tsun ai ten, ndai ten ni hta dum n-ta e na gumhpraw shang lam langai sha rai nga ai nye a bungli sum mat yang dum n-ta kaw gara hku di na ngu ai myit ni hte grai hkrit let bungli madu hpe grai hpyi nyem lai wa sai hku re. Ya shan hte ngai hpe hkrit ai mung dai hte maren sha she n rai na dawng ngu myit nga ai hku re.

Nang mau mat na ngu ngai kam ai. Hpa majaw nga yang, yak hkak lam ni dai ram law la ai an-nau ni a dum n-ta wa a kajaung sha n dai zawn nga pyaw wa ai ngu ai gaw myit yak la nga ai. Ndai lam ni hpe ngai tsun lai wa sai hte maren ngai nan mung n kam la nga ai. Mahtai gaw jahpaw hking 5:30AM re ai majaw shawoi na hte maren yup rawt wa ai kaw chye ai hku re. Aww... ngai yup mang mang taw ai she rai a hka! Humm.... yup mang na ngai masha ni hpe chye myit ya ai zawn, ngai hpe up nga ai bungli madu ni mung chye myit yang gade sha hkrak na. Dai ni mung hka wa na matu rai n du shi ai shata na bungli la hka hpe shawng shaw la na matu naw pyi nyem tawng ban ra na re.

Yup ra kaw na rawt ra sana re, man naw myit la na jahpaw shat naw kyen sha na re ngu myit dat yang... "Dai hpawt sha na hpa mung n nga sai wa." ngu.

Tsap na shara ganang ta

2009-03-03T02:57:00.008+08:00

2010 ning hta Myen Mungdan ting madang hku ra lata poi kaba galaw na matu 2008 ning hta galaw lai mat wa sai ra lata poi kaw na daw dan la lu sai hte Myen Asuya ni mung dai ra lata poi a matu shajin ai lam ni law law galaw nga ai gaw nang ngai a myi n pu kaw sha bin nga sai hku re. Ndai lam hpe kaja ai, n kaja ai nga tsun jahta hkat nga ai hpe mung na lu, chye lu na masai.

2009 ning a 48 ning hpring rawt malan poi kaba galaw nga ai ten kaw nna Maija Yang mare kaw mang hkang bin ai hte Myen, Miwa hte Jinghpaw Wunpawng Mungdan Shanglawt Asuya KIO/A ni ganoi noi galaw, lata shalai hkat lai wa sai re. Ndai lam ni rai n hpang shi ai ten kaw na, Miwa Asuya gaw Laiza Muk Lum lamu ga jarit hta Mini Great Wall gap nga ai hpe mung mu lu sai. Myen Asuya ni KIO/A a dap ba (4) gin ra rai nga ai lahta Sam Mung kaw na shanglawt hpyen dap ni hpe dawm la kau na matu tsun shadut wa ai ni hpe mung na lu ga sai. Shanglawt KIO/A hte Jinghpaw Myusha ni lapran myit shuk na matu Simsa lam la gasadi ni hpe mung masu shabra ai lam ni hpe Myen Asuya ni galaw ai lam mung na lu sai. Jinghpaw Wunpawng Mungdaw kata e nga ai Myen Hpyen dap ni n gun shaja nga ai hte Shanglawt KIO/A kaw na mung hpyen n gun shaja nga ai hpe na lu sai.

2010 ning ra lata poi hta shang lawm na matu masing kaji mi mung n nga ai nga nna 48 ning hpring rawt malan poi kaba kaw na tsun lai wa sai hte, hpyen masa lam hta galoi mung jin jin rai nga na matu mung tsun laiw a sai re. Ndai lam ni hpe na lu, chye lu ai hte maram yu yang Shanglawt KIO/A hte Myen Asuya lapran hta manghkang ni, lani hte lani grau grau kaba wa ai hpe mu maram lu ai hku re. Nang shaja ai majaw ngai shaja ai, nang sha nya ai majaw ngai sha nya ai, nang sat ai majaw ngai sat ai nga nna galaw hkat nga ai hpe mung na lu chye lu ai majaw yawng sadi maja nga ai hpe mung mu lu ai. Myen Asuya wa kade n gun shaja da ai hte KIO/A wa kade n gun shaja da ai hpe chyawm gaw kadai mung n chye maram na re ngu kam ai. Rai tim 48 ning hpring rawt malan poi kaba hta tsun lai wa ai ga ni hta Myen wa a 2010 ning ra lata poi hpe n hkap la ai lam ni mung lawm nga ai majaw Myen Asuya hku nna lama ma galaw nga na re ngu mung kam ai hku re.

2009 ning hta ndai zawn mung masa lam ni bai kahtet wa ai ten hta, moi mung bin lai wa sai hte maren htawm hpang de mung bai bin na re ngu kam ta ai majan kaw an-hte Jinghpaw Wunpawng buga de du shang wa sana kun? Ndai zawn majan kaba bai bin wa ai rai yang nang ngai gara shara kaw tsap ra na rai kun? Ndai ga san ni hpe ya ten an-hte ni ti nang hkum ti nang san ra ai ten du wa sai ngu ngai myit shadu ai hku re. "Moi nye wa ga shanglawt hpyen la la nna myu hte mungdan a matu a sak hpe pyi ap kau sai", "Moi nye nu gaw shanglawt hpyen la ni hpe n gun gun jaw lai wa sai", "Moi ngai gaw Myen hprawng grai hprawng kau sai", "Moi an-hte hting gaw ni majan a majaw Maigan mungdan de htawt ra ai kaw du hkra jam jau kau sai", Moi... Moi... Moi... Moi... nga ai ga ni hpe ngai na lai wa ai gaw 15 ning pyi hpring lai wa sai hku re. Ndai zawn re ai mabin ni hpe na yang an-hte myu sha ni ti nang amyu a matu n ap nawng ai masha grai taw a hka ngu mu mada ai hku re. Hkung ga mung grai hkung ga ai hku re.

1994 ning hta simsa lam la ngut ai kaw na dai ni du hkra rai yang 15 ning hpring sai hku re. An-hte ni majan bai bin yang gara maga tsap na hpe grai myit yak ai shara kaw tsap nga sai hku re. Simsa lam la ngut ai hpang an-hte ni ndai simsa lam hta pyaw mat ai masha ni grai law nga masai majaw mung re. Majan hpe grai pu ba yu sai ni hkrai rai nga ai. Ya na ramma ni n chye tim kanu kawa ni a prat hta gara hku bin wa sai lam ni hpe tsun dan ai majaw mung na yu na masai. Nang gara kaw tsap na kun? Myen wa a mayam mahtang tai na kun, hprawng na kun, shing n rai Shanglawt hpyen la nang lu tai na kun, ? Grai myit yak nga na re ngu mung kam ai hku re. Majan kasat ai a majaw moi nga ai shanglawt hpung kaba langai sha re ai kaw na NDAK hte KDA nga nna lahkawng ga garan mat ai hpe yawng chye na re. Ndai gaw shan hte ni Myu tsaw myi n rawng ai a majaw re ngu gaw n mai tsun nga ga ai. Simsa lam la dai ai a majaw ga garan mat ai hpung ni hpe mung chye lu na ga ai. Kadai galaw ai gaw jaw nga ai kun?

Myen wa a mayam tai ai gaw simsa lam mi la yang la mayam gaw mayam sha tai nga na ga ai. Hpa majaw nga yang Asuya a ga hpe kam shut nna Myen wa a n pu e nga lai wa ai gaw nang ngai rai n shangai shi ai kaw na rai nga sai. Mayam tai nga ai ten hta masha wa dip sha ai, shagari shanyem da hkrum ai lam ni gaw shing ra tara langai mi rai nga ai. Kadai wa mi rai yang rai ti nang a mayam rau gaw shat rau n kam sha ma ai. Masha ni na ra hkra kahpu kanau zawn re nga nga ga ai nga kade mi tsun yang tsun myit hta n rawng ai ga ni sha rai na re. Mayam ngu ai hpe gaw ti nang hpe galoi mung hkrit nga na matu jahkrit shama dip sha ra ai gaw marai shagu, amyu shagu chye na re. Ti nang n dip da yang shi bai gum lang wa na hpe hkrit ra ai a majaw rai nga ai. Dai re ai majaw mayam prat hpe gaw an-hte ni n mai lata nga ai. Nang ngai, dai ni hkam sha nga ai jam jau lam ni gaw mayam prat a jam jau lam ni rai nga ai. Nang ndai prat hpe ra a ni?

Dai ni na ten an-hte a mungdan galu kaba lam n nga ai, masha wa dip sha ai lam grai law ai, matsan ai lam amyu myu a majaw Maigan Mungdan in de kawm sa mat ra ai ni grai law nga ai hpe yawng chye nga na re. Maigan mungdan kaba ni gaw masha shada hkung ga hkat ai, rawt jat galu kaba lam ni hta mung grai lawan ai, simsa ai lam mung nga nga ai. Ga shadawn, dum nta nga shara kaw na hkawt an-hte buga hta madang tsaw ai ni gaw mungdan kaba ni a nyem dik htum she rai nga ai hpe mu lu na ga ai. Hpaji hparat lam ni hta mung Mungkan mungdan shagu hkap la ai hpaji ni hpe she sharin ya ma ai. Mung masha shim lam a matu mung grai sha chyim da ma ai. Rip kawp tara ni grai law ai hte grai simsa hkra galaw makawm maga da ma ai. Hkam ja lam ni a matu tsi jaw gawk ni hpe mung madan tsaw dik ai hku she galaw ma ai. Bungli galaw ai shaloi mung ti nang lu sha nga shabrai hta jan hkra jaw ma ai. Ti nang galaw ai daram bai lu la ai hkrai rai nga ai. Rai tim nang dum n-ta kaw nga ai zawn nga gaw hkam sha nga ai kun? Nye buga ngu nang tsun lu na kun? Nang kaja wa pyaw nga sai kun?

Asak hpe ap nawng let myu hte mungdan a matu shat kan hpe git nna gasat na ngu ai gaw tsun yang sha grai loi nga ai. Rai tim ta tut galaw nga ai ni a jam jau lam ni hpe yu yan gaw nang ngai pyi n myit da ai baw jam jau lam ni pru wa na hku re. Kade jam jau ai hpe moi... moi... nga tsun dan ai share shagan ni a ga hpe madat yang chye na re. Na yang gun grai lu ai zawn myu tsaw myit mung grai rawt wa ai rai tim jam jau na lam, ti nang tawn kau ra na a hkaw a hkang ni hpe myit dat yang gaw hkrit na zawn re ai hkra rai nga ai. Majan pa hta sinat pala lapran hta si du hte majan bu nga ai zawn galoi si na n chye ai sha shakut nga ra na ngu ai bungli, nang kade shakut tim nang bai lu la na shabrai gaw pandung n du shi yang n nga ai hku re. Ndai zawn a rang kaba la ai bungli hpe galaw ai gaw kadai mung n kam ai bungli ni hkrai rai nga ai. Rai tim ya ten hta dai a rang ni hpe bang na matu jin jin rai la nga ai myu tsaw hpyen la ni hpe yu yang ngai grai gaya ai hku re. A sak mung ngai hta grau kaji ai, hpaji mung ngai loi grau ai, n gun mung ngai grau ai, rai tim ngai shan hte daram manu n nga ai. Hpa majaw kun? Gara hku manu sharawt la ra ai baw kun?

1962 ning hta shangai wa nna ya du hkra asak 48 ning ting hpring sai an-hte a rawt malan prat gaw mahkrum madup grai law sai, majan mung grai gasat sai, masha mung sat sai, ti nang sha da mung sat hkat ga sai, awng dang ai lam mung lu ga sai, hkrat sum ai nam chyim mung chyim ga sai, sim sa ai lam mung la ga sai, rawt galu kaba lam mung shakut ga sai. Hpa hpe naw hkrit nga ra na rai ta?

(Ndai gaw Ta Tut a mung masa ning mu sha re.)

N kabu gwi ai

2009-02-22T20:28:00.005+08:00

48 ning hpring rawt malan poi hpe Laiza Muk Lum e February shata 3 ya kaw na 6 ya shani du hkra mung shawa, dap shawa law law hte wu wu di di rai galaw laiwa sai hpe yawng chye na sai. Ndai zawn an-hte Jinghpaw Wunpawng Mungdan kata e nga nga ai amyu baw sang kaji kaba yawng hkra ndai rawt malan poi kaba de shang lawm wa masai hku re. Ndai hta Jinghpaw Wunpawng sha, Sam, Miwa, Myen, Gala ni law law shang lawm wa masai. Makam masha hpung ni mung law law wa shang lawm wa sai hku re.

Myen Bukda hpung ki ni mung ndai rawt malan poi de marai 50 jan n shaga ai sha du shang lawm wa masai hpe chye lu ai. Ndai zawn Jinghpaw Mungdan kata nga ai amyu sha gu, makam masham hpung shagu na ni sa du shang lawm wa ai hpe mu lu ai majaw ngai Jinghpaw Wunpawng Shadang sha langai mi hku nna grai a rawng la ai hku re. Ndai zawn kalang mi mung n na ga ai Bukda hpung ki ni sa lawm wa ai nga ai majaw, an-hte Jinghpaw Wunpawng sha ni kaw sa machyu kam hpa nga ma ai ngu mung mu lu ai hku re. Mungdan langai mi gaw de na matu gaw dai mungdan kata nga ai amyu baw sang ni yawng, makam masham hpung ni yawng hkra shang lawm ra ai ngu mung chye na nga ai.

Rai tim ndai zawn Bukda hpung ki ni shang lawm wa ai hpe ngai Jinghpaw Wunpawng shadang sha langai mi hku nna nau n sen ai zawn zawn re ai myit ni baw nu kata pru wa ai majaw, laika hti myit su ni chye na matu ndai laika hte shana dat ai. Ndai zawn mungdan kata nga ai ni yawng myit hkrum nga ai gaw grai kaja ai mabin langai mi rai nga ai hku re. Yawng chye ai hte maren an-hte myu sha ni gaw Hkrisatan tai ai masha law dik rai nga ai. Ndai zawn makam masham n bung ai ni hte rau ta hkindun nna bungli kaba galaw ai lam ni hta an-hte ni sadi ra ai lam ni law law nga ai ngu ngai mu mada ai hku re.

Hpu nau Karen myu sha ni hpe yawng chye na re ngu kam ai. Karen ni gaw an-hte Jinghpaw Wunpawng myu sha ni a shawng e shawng rawt malan wa sai a myu sha ni rai nga ai. Karen National Union (KNU), ya dai ni du hkra Myen Asuya rau majan naw bu nga ai, u hpung kaba hte n gun ja dik htum shanglawt hpung kaba langai mi hku nna Myen Mungdan kata hta ming kaba nga ai a myu rai nga ai. Hpu nau Karen myu sha ni mung an-hte Jinghpaw Wunpawng sha ni hte maren sha Hkrisatan law dik ai myu sha rai nga ai. Ndai zawn n gun kaba dik la ai ndai shanglawt hpung ni hpe Myen ni gaw lu hkra garan ga kau nna u hpung jahka let n gun shayawm kau ya ai hku re.

Myu langai mi hpe myit garan ya lawan dik htum lam gaw makam masham lam garan kau ya ai lam rai nga ai. An-hte Jinghpaw Wunpawng sha ni mung moi shawng de makam masham a majaw shada da n ju n dawng rai, ding hku kata madu wa hte madu jan n htuk hkat mat ai lam ni byin ga sai hpe yawng chyen na sai. Hpu nau Karen myu sha ni kaw mung Hkrisatan hte Bukda makam masham hpe myit n hkrum hkra galaw nna KNU kawn DKBA (Democratic Karen Buddhist Army) ngu ai paw pru wa hkra jahka kau ya ai hpe mu lu ai hku re. Ya ten hta ndai Karen hpung yan gaw shada da bai gasat hkat nga ai hku re. DKBA gaw Myen Asuya rau pawng nna ya ten ti nang a myu sha ni a mare ni hpe jahten saza nga ai gaw shani shagu na shiga ni hta mu lu nga ai majaw myit n pyaw ya nga ai.

Ndai zawn re ai mabin ni an-hte myu sha ni a kata hta bin pru wa yang an-hte ni gara hku hparan la na ngu ai hpe shawng myit yu ra nga ai. Dai re ai majaw ti nang rau a myu n bung ai ni hpe bungli kaba n mai galaw shangun nga ai hku re. Shi sa wa yang hkap la na, rai tim shi hte rau gaw bungli galaw n mai nga ai ngu myit yu lu ai hte ngai Ta Tut wa a ning mu myi jut hpe tang madun dat ai hku re.

Ja Chyum Ga

2009-02-21T18:26:00.004+08:00

"Moi, nji nwa ni jung da ai,
Lamu ga jarit shadaw hpe, hkum sit
kau et."
(Ga Shagawp Laika 22:28)

Ndai chyum ga hpe 48 lang na rawt malan poi masat dingsat hplawng (T-shirt) hkan e shakap da ai rai nga ai. Karai Kasang gaw an-hte amyu sha ni shi jaw da ai tsawm htap la ai Wunpawng Buga hpe masha zasam ni up sha nga ai hpe n ra sharawng ai lam hpe ndai chyum ga hku chye na lu ai. An-hte a ji woi ji wa ni madu lai wa sai hte, an-hte ni hpe hkring htawng jaw da sai n dai lamu ga hpe gaw an-hte ni sha n lakawn la yang masha amyu ni lakawn la kau na sha re ngu kama ai.

An-hte a mungdan hpe masha ni up sha nga ai gaw, an-hte myu sha ni nan ti nang a dum n-ta hpe n kam up sha ai majaw masha ni sa lakawn la kau ai ngu ngai mu mada ai. Nang dum n-ta pyi n lu yang gara kaw sa nga na law. Ji woi ji wa ni du daw sai hkaw rai jung da lai wa sai lamu ga jarit hpe nang ngai manu n shadan yang gaw ji woi ji wa ni a kashu kasha ni ngu nna pyi n mai hkam la mat hkra ga ya ga hpa re ai lam langai mi rai nga ai.

An-hte a mungdan, an-hte a mungdan nga nna nang ngai tsun shaga wa ai ladaw wa grai na mat sai hku re. Moi Myen ni up sha lai wa sai hpang English ni bai up sha rai. Dai hpang gaw Japan ni bai hkrup mara rai up sha kau rai nna, ya hpang jahtum ngu na gaw Myen ni bai up sha taw nga sai hku re. An-hte a mungdan re nga ai kun ngu ai hpe mung myit yu ra sai ngu tsun mayu ai. Hpa majaw an-hte ni myit n hkrum hkraw ai kun ngu mung mau nga ai hku re. An-hte ni hpaji nau chye kung hpan nga ai majaw kun?

An-hte myu ni zup hpawng hpawng yang, marai kade lawm yang, ning mu mung kade lu le ai hpe yu yang gaw hpaji grai chye ai ni hkrai re ngu mu mada ai hku re. Rai tim an-hte ni wa dai hpaji ni hpe gara kaw jai lang ra ai re nga ai hpe n chye taw ai gaw grai nan sum kaba rai nga ai. Jinghpaw ga malai nga ai, "N-lu ai hta n-chye ai gaw gau yak ai" nga ai ga gaw grai she jaw nga a hka. An-hte myu sha ni hta n lu ai gaw grai taw nga ai. Lamu ga mung lu ai, n hprang tsu rai mung grai law ai, htung hking mung grai madang tsaw ai hte tsawm htap ai, makam masham mung yawng hta grau ai Karai hpe lu ai a myu re, laika mung lu ai. Hpa baw na ra nga a ta?

An-hte myu ni n lu ai hpa mung n nga ai zawn re tim hpa baw lu a ta nga yang hpa mung n lu ai a myu ni tai nga ai gaw yawn hpa rai nga ai. Jinghpaw (Kachin) nga masha a myu ni a man hta tsun yang, "Aww... Myen mung na a myu baw sang kasha ni wa i?" nga san katut ai gaw hpa baw a majaw kun? An-hte ni dai ni ndai zawn myu kaji tai nga ai ten hta she nang gaw hpa baw bin ai, ngai gaw hpa baw she galaw na, nga nna tsun htai lai hkat nga yang gaw galoi mi she nang ngai myit mada da ai shanglawt pan dung de lu du sana law. Na a myu hpe nang pyi manu n shadan yang kadai wa myi sa manu shadan sana law.

An-hte myu ni mungdan shanglawt lu na matu gaw ya kaw nna ti nang lu ai ah hkaw ah hkang ni hpe mahkawng nna awm dawm shanglawt lu wa ai du hkra shada ta kindun let shawng de gwi gwi hkawm sa wa ra sai hku re ngu yawng hpe saw shaga let, nau n na yang lu wa sana shanglawt pandung hpe myit shingran nga ai hku re.

Hkam sha lu ai hte

2009-02-13T01:20:00.006+08:00

Ndai Ta Tut wa mung ndai shata, praw 5 ya shani galaw lai mat wa sai 48 lang na Rawt Malan poi kaw chyan lachyau rai sa du shang lawm lai wa sai hku re. Sa du yu la, mau na rai, Laiza pa e 5 ya ting ting sa a ngawk lai wa sai. Dum n-ta de bai du mat wa ai re majaw gaw, myit hta mung grai sim sa ai zawn zawn, grai yawn ai zawn zawn, mau ai zawn zawn, grai pyaw ai zawn zawn, marit ai zawn zawn nga hkam sha lam ni grai law hkra pru lai wa sai hpe ya bai tang madun dat ai.

Hpa hpe tsun mayu ai rai ta nga yang an-hte Jinghpaw Wunpawng sha ni a Shanglawt kanu rai nga ai KIO/A ni 1994 ning kaw na myen hte sim sa lam la da ai hte ya dai ni Jinghpaw Wunpawng buga mung rawt galu kaba gin ai daram mi n rai tim kachyi mi myit paw na daram gaw rai nga ai hpe mu lu ai majaw Sim Sa nga ai zawn zawn nga n tsa lam hpe mu lu ai hku re. Myitkyina hkan e mung Shanglawt KIO/A a hka wan jak n gun hte myi hprap wan ni htoi tu nga ai hte, maw daw lam, mahkrai ni, wut dek dum n-ta ni, bai Myen du salang ni hte Shanglawt du salang ni a Mung ga hkan e sim sa ai lam ni hpe hkrai hkrai na lu ai lam ni hpe moi na hta shai hkra mu lu, na lu ai majaw mung sim sa nga a hka ngu myit lu ai hku re.

Rai tim, ndai kachyi mi sim sa lam lu na matu jaw kau ra ai manu jahpu hpe bai myit dat yang myit hta grai yawn ai zawn zawn nga bai hkam sha ai hku re. Jinghpaw Wunpawng Mungdaw kata na n hprang ni Gala zawn zawn, Miwa zawn zawn, Myen zawn zawn re ai ni htaw chyu htaw dut sha kau ai ni hpe mung lai wa sai sim sa lam la ai 15 ning tup tup myi chyaw mu lu, hkam sha lu lai wa sai. Nan hte gaw a myu kaji sha re, hpa hpaji n rawng ai ni she re nga nna kam mara ra roi rip ai lam ni hpe mung shani sha gu, shata shagu, shaning shagu hkam sha lai wa sai. Rawt jat galu kaba wa ai wut dek n-ta ni, maw daw kaja ni, sut du kaba ni gaw an-hte Jinghpaw Wunpawng sha ni bai n rai nga ai hpe mung mu lu ai majaw yawn la nga ai hku re. Jinghpaw Wunpawng shayi sha ni Miwa ga de dut sha hkrum ai lam ni, ti nang mung kata e Myen ni roi rip kau ai lam ni gaw shing ra tara langai mi zawn bin pru nga ai ni gaw Sim Sa lam a manu jahpu ni rai nga ai.

Shanglawt sha naw lawt nga yang kadai mung kadai ra ai hku mung shawa ni shatsam da ai a hkang a ya hte kam mara galaw, hpung garan, shada da sat hkat, nat hkat, dip sha hkat ai lam ni hpe bai mu lu yang mung grai mau mat ai hku re. Moi an-hte Jinghpaw Wunpawng sha ni grai madi shadaw lai wa sai Shanglawt Asuya gaw KIO/A nga ai sha na ga ai. Ya dai ni bai yu dat yang lachyawk mi sha nga ai Mungdaw kata e NDAK, KDA, Lasang Aung Wa KIA hpung ni nga nna kasu kabrawng a yai a ya rai ga garan paw pru wa ai gaw Jinghpaw Wunpawng labau hta n tsawm dik htum labau ga si ni hku nna grin nga na sha rai nga sai. Na wa magan Myen a mayam hpyen hpung ni zawn zawn re wa nga ai Shanglawt garan hpung ni a majaw sha n mu, yup n pyaw nga ai. Jinghpaw ga shaga nna Myen tai nga ai a myu ni hpe mung mau nga ai hku re. Myen ngu ai ni dip sha ai hpe mung n hkye la ai sha n ga, ti nang nan mung bai dip sha jat rai nna me ti nang hpe shatsam da ai Mung shawa hpe chyeju dum nga ai lam ni gaw grai mau ra nga ai.

Rai tim ndai 48 lang na Rawt Malan poi hta gaw Myen hte an-hte a Shanglaw Asuya rai nga ai KIO/A ni loi li n sam n htuk wa ai zawn zawn nga ai shiga ni hpe mung na lu, bai Rawt Malan mung ga ni hta mung hpyen gaw Myen re, sadi ra nga saga ai, nga ai masa ni hpe maram lu ai majaw kabu pyaw ai zawn zawn mung hkam sha ai hku re. Maija Yang mang hkang a majaw Myen hte mung n htuk wa ai sha n ga Myen hpe n ra sharawng ai lam ni nga ai nga dap shawa a man e tsun shapraw wa ai KIO/A a ga ni a majaw Myen hte Shanglawt bai gap hkat wa na kun nga ai ga san ni mung myit kata e rawng wa sai hku re. Rawt Malan poi e dap ba shagu na gawng malai hpyen hpung ni a hpyen hprim hkawm ai lam ni hpe mu lu ai shaloi mung myu tsaw myit grai rawt wa ai zawn zawn nga hkam sha ai. Ngai nan Shanglawt hpyen la la mat na zawn nga hkam sha ai. Poi sa shawa hta an-hte Jinghpaw Wunpawng sha ni sha n rai, Jinghpaw Wunpawng Mungdan kata e shanu nga ai Myen, Sam, Gala ni mung Shanglawt hpe grai madi shadaw kam hpa ai hte myit rawt nga ma ai hpe mu yang gaw Jinghpaw Wunpawng Mungdan hpe gaw gap la na ten nyi wa sam sai ngu myit yu kabu pyaw nga ai hku re.

Lama wa sim sa lam rai n la shi ai shaloi na a ten ladaw ni bai du wa ai rai jaw gaw an-hte Jinghpaw Wunpawng sha ni yawng hkra moi na hte maren sha Shanglawt lu na lam hpe a ja a wa jawm madi shadaw garum shang lawm ra na re ngu mung myit sawn yu ra nga ga ai. Moi de Shanglawt nga yang n gun mung gun ya, majan mung jawm kasat ya rai yawng grai myit hkrum lai wa sai a ten ladawt ni hpe mung grai marit la ai hku re. An-hte a mung kata hta n shanu nga mat sai Jinghpaw Wunpawng Myu tsaw myu sha ni mung ti nang lu ai a tsam ni hte Shanglawt lu na lam yan hta jawm madi shadaw ra hkat nga ai. Nang ngai hpe Jinghpaw Wunpawng Mungdan ngu ai an-hte a Dum N-ta gaw grai she n marit nga na dawng, ngu Dum N-ta hpe marit ai sum tsan du Jinghpaw Wunpawng sha hku nna marit hkam sha let yawng hpe tang madun dat ai hku re.

Dum n-ta Daw 3 (Lagaw leng mang hkang)

2009-01-03T08:38:00.009+08:00

Dai hpawt gaw yup loi jau rawt ai hte myi man myit la nna manap shat hpe kyen sha la ai ga re. Nye a jahpawt shagu na manap shat gaw shat shadu ai shaloi lu la ai di kap hpe jan kaw jahkraw la nna jum rau kahtawk sha let, shata hku n galai sai hpahka pa hpe hka hpun lum nup nup nga ai rau tsing let ngup hta akrawt akrap nga ngoi ai baw jahpawt sha rai nga ai.

Manap shat sha ngut sai hte gaw a sak matut na matu bungli de sa wa sai hku re. Masha ni mawdaw, sengke jawn nga ai ten jak n kap ai baw Mungkan hta shawng ning pru lai wa sai lagaw leng ngu ai jak hte mawdaw, sengke ni hpe n mu masu su let jawn a nyak sa wa ra ai prat re. Lam e lagaw leng jawn nga let lai wa sai shata na lagaw leng hte seng ai mabin langai mi hpe bai myit yu nga ai.

Wa Dim hte Ma Naw gaw shawoi na hte maren tsa lu na gumhpraw nlu ai majaw ngai kaw shagen shakat rai sa pyi a nya nga ai hku re. Ngai mung Nu a matu tsi mari kau sai re majaw gumhpraw n nga mat nna gara kaw na n chye tam ya ai sha n ga ngai kaw nan mung gumhpraw hte seng nna shingna pyi n mu, sama pyi n manam ai hpe chye jang Wa Dim hte Ma Naw gaw ndai ya jawng nga ai lagaw leng hpe dut sha na matu la mat wa masai re.

Kaning n chye di, dai lagaw leng n nga mat yang bungli de jahpawt aten dep lu sa na gaw grai yak mat na hte bungli hpang hkrat yang lahka n jaw na lam ni hpe myit yu nna myit grai pu ba nga ai hku re. Ma Naw tsa hkru nna nta de du wa ai ten san yu yang lagaw leng hpe tsa seng kaw tsa bu mi rau pawng da sai lam chye ai hte jing hku ni hpa lagaw leng sa shaw na matu gumhpraw hkoi yu sai hku re.

Kanau ni nga ai jinghku nta ni de mung sa yu yang, kanau ni hpe bau ya ai hpe pyi chyeju dum ram sai, tsa pawng lu da ai lagaw leng hpe gaw n lu shaw ya ai nga tsun gawt dat ma ai re. Ma Kaw hte Ma Lu yan hpe garum pyi yu yang, myit hta maroi n ri ai lam, Wa Dim hpe n ju ai lam ni chyu jahta nna gumhprawt gaw n lu jaw ya ai nga bai tsun ntang dat ma ai.

Ngai mung hpang jahtaum kaning n chye di ai majaw dai lagaw leng pawng da ai tsa seng de hkre hkre sa nna, lagaw leng hpe bai jaw rit, gumhpraw lu ai hte kalang hta hka sa wa na nngai ngu tsun nna hput di di let tawng ban bang dat yang she tsa seng madu ngai hpe matsan dum nna hka wa na matu shata mi a hkang jaw dat sai hte gabu gara lagaw leng hpe bai n htang la wa sai hku re.

Ya ngai ndai lagaw leng hpe jawng nga ai shata mi na wa sai, ngai ya du hkra hka n lu wa shi ai majaw myit grai n pyaw nga ai. Tsa seng madu ngai kaw gumhpraw pyi yang kaning di tsun na mung nchye mat sai. Lagaw leng hpe mahtang la kau u ngu tsun na kun? Shing nrai gumhpraw mahtang lu hkra shakut na kun? Myit chyu myit nna lagaw leng gawt wa yang shawng e nga ai wan shadaw hpe sa a dawt nna, lagaw leng hpe bai jahten hkrup kau sai hku re.

"Baw hpye ai kaw majap kai lang rau adup ya" ai zawn nga "hka hta marang jat" rai mang hkang kaw mang hkang bai pru wa sai ga re. Lagaw leng hpe lagaw leng gram lajang ai seng langai mi kaw ap kau da nna bungli n hpang hkrat na matu lawan ai hku lagaw rau lagat sa mat wa sai. Grai ba ai rai tim myi hta na myipri ni gaw lwi hkrai lwi pru wa sai. Wa naw nga yang mari jaw da ai lagaw leng hpe ngai n lu bau maka dat na grai tsang nga ai.

Ndai lam ni hpe Wa Dim hpe tsun dan hkrup ai rai yang gaw yu hku hpe lung pu shatai nna dum n-ta hpe dut kau nna hparan na hku hkrai tsun wa na hpe mung ngai shawng mu mada nga we ai. Lai wa sai ten hta Nu machyi sawng wa yang mung ya na zawn nga hkrai tsun wa wa re ai majaw re. Dai hta Ma Naw gaw shi daw chyen mi lu la na hkrai shadu nna Wa Dim hpang maga hku nna a nya chyu a nya hkan na hpe mung n kam na ai.

Bungli kaw du ai shaloi gaw nau ba nna ga pyi n lu shaga nga ai ten bungli ning baw wa nye a baw kaw shi a ta lapin rau sa gayen let hpang hkrat ai majaw shata mi na bungli jahpu n lu jaw ai nga tsun jahtau bun dat ai hpe na ai hte kalang ta ladi matu she hkri wa hkra yawn gau sai hku re. Myit hta ru nga hpa mung n chye galaw wa hkra myit machyi nga ai ten bungli galaw na matu bai shajin wa rai sai.

Nye prat, dum n-ta na prat, an-nau ni a prat gaw ndai zawn n jahtum na re ngu kam ai hku re.

Ngwi pyaw ai shaning nnan rai u ga

2009-01-01T16:32:00.007+08:00

2009 ning a shawng ning nnan na jahpawt hta E-mail hte C-Box kaw yu dat yang manang ni yawng Happy New Year nga ai hte kyu hpyi ya ma ai majaw ngai myit hta grai pyaw ai hku re. Yawng hpe mung Happy New Year ngu dumnta kaw na bai kyu hpyi ya dat nngai. Yawng 2009 shaning nnan hte htawm hpang de du wa na shaning law law hta ngwi pyaw hkam kaja ai lam gaw galoi mung manang ni hte rau rai nga u ga ngu kyu hpyi ya dat ai hku re.

2008 ning a hpang jahtum shani rai nga ai mani gaw ngai jawng kaw San Poi nga ai majaw jahpawt maga de San Poi sa htai ai hku re. Laika nau n lu ai majaw shawng shana kawn n yup ai sha laika ni hpe hti matsing la nna sa htai ai majaw ram daw gaw lu htai la sai hku re. San Poi htai ngut ai hpang gaw hkum n pyaw ai zawn zawn nga wa ai hpang, Singapore na nshung ta kade da ram gahtet ai rai tim hka li bu wa ai zawn nga kashung chyu kashung wa ai hpang gaw baw machyi ai zawn mung nga wa nna n ta de lawan ai hku wa mat ai.

2009 ning hpe hkap tau la ai Singapore na poi de sa na matu manang ni rau tsun jahta da ngut sai rai tim baw machyi ai hpe gara hku mung n lu hkam sha sai majaw nta kaw mahtang wa yup mat ai. Singapore du Jinghpaw Wunpawng sha ni a shaning nnan hkap hpawng de mung nlu du mat, nta kaw mung wa yup kau ai majaw dai hpawt she lu rawt wa sai ga re. Shaning galai ai shaloi she machyi hkrum mat ai majaw dai hpawt she yawng hpe shaning nnan a matu kyu hpyi ya lu sai ga re.

2009 ning a jahpawt hta gaw baw mung n machyi mat sai, manang ni a kyu hpyi ya ai majaw mung grai kabu ai hte baw machyi ai pyi gara de du mat ai pyi n chye mat sai ga re. Dai majaw dai ni she shaning nna post mara na re ngu ya she laika ka bang dat ai ga re. Yawng ngwi pyaw hkam kaja nga mu ga ngu kyu hpyi dat ai.

Dum n-ta Daw 2 (Christmas hta madai ai lam)

2008-12-31T00:39:00.009+08:00

Christmas mung shalai kau sai. Dumnta kata de Wa Dim du wa ai shaloi kaw na dumnta hta lum lum hkum hkum rai Christmas nlu galaw ai pyi grai na mat sai. Moi Wa naw nga ai ten gaw Chirstmas du jang dumnta kata e kyu hpyi hpawng ni galaw lai wa ai rai tim ya gaw yup mang pyi n mang mat sai. Nu mung yupra kaw chyu shanu ra mat ai hte an-nau ni htum bru htum bra rai nga pra mat ai majaw kun? Shing nrai Wa Dim a sum prat a majaw wa rai sai kun?

Manaw gaw shi a tsa lu manang ni hte rau Christmas hpe tsa rau shalai nga lu ai. Ngai gaw hpawt de sha na hte Nu a tsi manu a matu naw shakut ra nga ai le. Nu a matu Christmas kumhpa hku na ntsa palawng sha gaw lu mari ya na n hten ngu myit nga ai. Ya ten sumtsan de nga ai kanau ni mung Christmas hpe jinghku ni rau she n galaw nga na re ngu kam ai. Nu gaw ngai hpe jinghku ni hte sa nga na matu chyu chyu tsun shaja nga ai. Ngai n kam sa ai n re. Ngai mung masha ni zawn grai she pyaw mayu law. Nu hpe n kam hka ai majaw, dumnta hpe tsaw ra ai myit, majen ai myit, ngai n nga yang Wa Dim kam mara di kau na ni hpe myit ai majaw she re.

Masha ni Christmas mahkawn hkawn ai na yang myit hta grai hkam sha ai. Ngai Chirstmas hta nlu pyaw ai majaw nre ai sha hkun hkraw nga sai an-hte a dumnta hpe myit yu nna myit machyi nga ai. Wa nang hpa majaw jau jau an-hte hpe kau da a ni ngu san mayu nga ai. Wa Dim yan Ma Naw tsa lu marawn jahtau pyaw nga ai hpe na yang mung Wa Dim hpe grau grau myit machyi wa ai rai tim hpa mung n lu galaw ai nye hkum ngai hpe sha bai mara shagun la let myit ru nga ai. Nu a hkam ja lam kaja wa na matu mung shana shagu kyu hpyi let sha myit mada nga ai.

Nau nna yang shaning ning nan de du maw nga sai hpe mung myit dum let, shaning ning nan hta gaw naw ku jawng de ah lu sha gaw lu bang na matu mung naw shakut ra nga ai. Nu a tsi mung ma wa maga rai sai majaw tsi manu naw tam ra nga ai. Shana rai tim ya jang rawt ngoi rai bungli de naw sa ra sana rai nga ai. Jam jau ai lam law magang, dumnta hte Nu hpe grau grau tsaw ra wa ai zawn chyaw nga ai. Ma Naw hpe mung n hkru ai lam kaw na bai shaw la mayu ai myit gaw grai law wa magang rai nga ai. Ndai myit rawt wa ai hpe mai kaja ai lam re ngu sawn la ga nga yang gaw, myit hpe loi li shalan la lu ai hku re.

Shaning ning nan galai ngut ai hpang de mung dumnta a prat gaw ndai zawn sha naw rai nga na kun? Shaning ning nan a Chirstmas hpe mung ya na zawn sha gaw n kam tawt lai gwi sai. Ngai hpa baw galaw ra sana kun? Wa Dim hpe mahtang dumnta kaw na lu gawt shapru kau hkra galaw shakut yu na kun? Shing nrai kanau ni hpe mahtang jinghku ni kaw na dumnta de wa hkra shaga la nna Wa Dim hpe jawm gawt kau yang grai mai na kun? Dai hku galaw yang awng dang yang gaw hpa nra ai, rai tim hkrat sum yang Wa Dim gaw Nu hpe mung, Ngai hpe mung dumnta kaw na gawt shale kau ai hte Ma Naw hpe mayam shatai kau na ra ai ngu myit mung tsang ai.

Christmas shagu gaw dai ning na zawn n rai na re ngu kam let Christmas hta madai nga ai hku re.

Dum n-ta Daw 1 (Ning Pawt)

2008-12-29T02:57:00.007+08:00

Bungli hta grai ba ai majaw dumnta de bai du wa ai shaloi ga pyi nau n kam shaga mat hkra rai hka lu nna dawdap e naw dung nga yang nye Wa Dim gaw makau e wa dung nna tsa mari lu na matu nga gumhpraw sa pyi taw nga ai hku re. Pu ba nga ai majaw kun gaw n chye ai "N jaw ai, nang lu mayu yang nang hkrai gumhpraw tam la." ngu jahtau tsun dat hkrup ai hku re.

Mang hkang gaw dai kaw na hpang sai, "Na Kawa majing n re ai majaw ngai hpe yu kaji ai ga i? Na Nu hpe ngai n la yang kadai la na nnga sai majaw, matsan dum nna la da ya ai she re. Ngai hpe dai ram yu kaji ai i? Ndai nta ngai masha kaba re. Ngai galaw mayu ai hku ngai galaw na. Gumhpraw n lu jaw yang gaw ya jang nye nta kaw na yu!" , nga nna jahtau bun ai hku re.

Ya Wa Dim ngu ai gaw nye Nu a hpang la rai nga ai. Wa gaw si mat ai majaw hpang de Nu a matu dinghku Kawa nga yang n mai na zawn re ai majaw ya na Wa Dim rau hkungran la ai re. Rai tim Wa Dim gaw Nu rau rai nla shi yang gaw myu mi, ya bai rai yang gaw Wa Shakap Shai rai taw nga ai hku re. Nu hta e wa hte lu da ai kasha an-nau ni yawng 6 nga ai. Lakasha masum hte Numkasha masum re. Ndai hta ngai gaw kaba dik htum rai nga ai. Kanau ni yawng gaw jawng naw lung nga ai mjaw ngai gaw Bungli galaw let dumnta ting hpe bau lu hkra shakut nga ai hku re. Nu gaw Wa Dim nau sharu ai a majaw machyi sawng mat nna nta kaw na gara de pyi nlu sa hkra yup ra kaw hkrai machyi rawng nga ai hku re.

Nu gaw moi e an-hte nga ai mare kasha e grai tsawm ai shayi sha langai mi rai nga ai. Wa gaw Du amyu rai nna Wa a Kawa gaw ndai mare hpe up hkang ai wa re. Ah ji nnga mat ai hpang e Wa gaw ndai ginra hta Du tai wa nna ndai mare hpe up hkang lai wa sai. Mungdan Asuya policy galai wa ai hte maren Du magam amyu ni hpe nra wa ai majaw Wa gaw Du shara kaw na yu ya ra mat ai. Wa gaw nau myit ru mat ai majaw rai sam sai, dai hpang kaw na machyi chyu machyi nna nnga mat ai. Dai hpang Nu mung kam hpa na masha n nga ai majaw Lawu mung na du wa ai la langai mi rau hkung ran la nna ya du hkra nga nga ai hku re. Dai lawu mung na du wa ai wa gaw ya an-nau ni a Wa Dim rai nga ai.

Wa Dim a lam gaw mare e masha ni tsun dan ai majaw loi li gaw chye la ai hpe tsun dan na n ngai. Shi gaw lawu mung e nga ai shaloi hpyen la galaw lai wa ai re nga chye lu ai. Shi hta e moi kaw na Num lahkawng rau hkungran yu sai rai nna n htuk hkat ai majaw jahka kau nna ya masum lang ni na hta Nu rau hkungran da ai hpe chye lu ai. Shi gaw moi kaw na tsa hpe grai ra lu ai rai nna, hpyen la galaw ai hka na le ai kawn ya du hkra hpa bungli hpe mung atsawm sha galaw ai lam nnga ai ga re. Nu hte hkungran la ngut ai hpang kaw na dumnta kata e nga ai a rung a rai ni hpe dut sha let tsa chyu mari lu nna Nu hpe dingsa shingnrai an nau ni hpe dingsa rai nga nga ai re. shi a lam hpe tsun yang masin nau pawt mayu ai mjaw nau pyi n kam tsun ai. Ngai bungli shang ai ten kaw na ya du hkra shani shagu tsa manu chyu pyi sha nga ai re. Dumnta na rai ni du sha ai hte mung nlaw sha dum nna ya ngai bungli galaw ai manu shabrai du hkra pyi sha nga ai re.

Shawng e Nu gaw Wa Dim rau rai n la shi yang ngai hpe myit hkrum ai lam nga n nga hpe san lai wa sai re. Nu a matsan prat hte shi hkrai sha an-nau ni hpe bau na nmai bin na re ngu, ti nang hkum ti nang n kam ai majaw Nu san ai shaloi myit hkrum kau hkrup ai re. Ya she grai myit malai lu nga ai, ngai lama wa dai shaloi ti nang hkum ti nang kam let myit n hkrum kau yang ya ten ndai dumnta kade sha pyaw na wa ngu myit let masin n si maroi n ri rai nga ai gaw ya na zawn bungli kaw na wa ai ten Wa Dim gumhpraw pyi yang grau pawt mayu let myit malai lu nga ai grai na sai ga re. Ngai Wa Dim hpe ya she nta kaw na gawt kau ga ngu yang gaw grai hpang hkrat mat sai hku re. Shi mahtang she an-nau ni hpe gawt kau ai baw masa rai nga ai. Dumnta hpe mung masha ni a lata e pawng da ai sha n ga, dumnta kata na rai ni yawng hpe mung shi hkrai madu sha kau sai re majaw ya gaw shi ngu ai hku hkrai madat ra nga ai.

Ndai zawn yak hkak nga ai majaw kanau ni rai nga ai Ma La, Ma Hkaw, Ma Lu hte Ma Roi ni gaw mare kaba e nga ai jinghku ni hpang de sa machyu nga ma ai hku re. Ma Naw hte ngai gaw nu a hkam ja lam n kaja ai majaw Nu hpe majen ai hte Wa n nga mat ai ndai dumnta hpe nja ai majaw Wa Dim roi sha ai lam ni yawng hpe hkam jan let dumnta kata e nga nga ai hku re. Wa Dim a sumprat a majaw Ma Naw mung ngai hte ndai laman nau n htuk nga ai hku re. Ya mung Wa Dim tsa manu hpyi nga yang Ma Naw gaw nta lakang pawt e Wa Dim hte tsa rau sa lu na matu la nga ai hpe mu lu ai. Sha woi e nga yang gaw Nu hpe matsan dum nna gumhpraw jaw kau dat dat di ai mung tsun pyi n dang na daram rai sai hku re. Ngai ya na zawn hkam sha ai lam ni hpe yu matsan dum nga ai Mare kaba na jinghku ni kaw nga ai kanau ni gaw shan hte hpang de sa nga na matu grai lang shaga ai rai tim Nu hpe matsan dum ai hte dumnta hpe majen ai ngai gaw ning dang kau kau di ai majaw kanau ni mung nau nkam tsun mat ma sai hku re.

Wa Dim gaw shi hpyi da ai gumhpraw hpe ngai rai njaw shi ai majaw shi a lata hte nye a gumhpraw a lamatu nyi wa ai majaw hkam sha nga ai ni mung grai law sai, roi sha hkrum ai nau na ai majaw n ju ai myit mung grai law sai, matsin da nna myit kata kaw sha shazim kau ai pawt myit ni mung grai law sai, n kam tim shaga ra ai lam ni ganawn ra ai lam ni grai law sai re majaw rai sam ai, Wa Dim a myi man de nye a lata hte tawng dat hkrup dat ai hte Wa Dim gaw ga de kalang ta galau malap mat wa ai hpe mu dat ai Ma Naw mung put di di nna shut ai lam ni mara raw ya na matu tawng ban bang wa ai gaw kadai mung n kam na re.

Ngai mung n kam nga ai. Hpa majaw nga yang ngai shingran taw ai sha rai nna, nye a gumhpraw yawng hpe Wa Dim hte Ma Naw la mat nna ya ten tsa seng kaw grai she n pyaw nga ma dawng. Humm... ...

Aww... Ngai hpa baw wa mi galaw lai wa sata?

2008-12-22T00:52:00.007+08:00

Dai ni gaw baw loi li machyi nga ai hte laban re ai majaw yup ra kaw shara jahtuk nga let Cartoon sumla hkrung langai mi rai nga ai "Bee Movie" kaw na ga langai mi hpe myit dum wa ai majaw rawt ngoi rai laika ka bang wa let laika hti manang ni hpe myi n gun bai shayawm ya na matu ndai post hpe mara dat ai hku re.

Ndai laika ka nga ai hten gaw shani rai tim post bai mara ai ten gaw shana she rai mat sai hku re, hpa majaw nga yang Singapore na Jinghpaw naw ku ku ai ten gaw shana maga re ai majaw naw ku sa ai majaw shana she bai matut ka let mara dat ai.

Ndai "Bee Movie" sumla hkrung hta tsun mat wa ai ga kaba langai mi gaw "Every small work, if you done well, means alot." nga ai ga re. Ndai ga hpe ngai gaw grai myit shang sha ai hte ndai sumla hkrung hpe yu ngut ai hpang e mung grai na hkra myit sawn sum ru yu hkrup ai hku re. Ngai galaw dat ai bung li kaji langai mi gaw kade daram mi a kyu rawng wa na ta? ngu ai hpe myit yu let shana jahtum ai pyi grai lang rai sai hku re.

Moi naw kaji ai ten Nu gaw ngai hpe gumhpraw mahkawng na matu gumhpraw mahkawng bu langai mi mari jaw ai hpe bai myit dum dat ai. Dai ten hta nye a myit hta hpa rawng a ta nga jang ngai hpe Nu shani shagu jaw lang ai gumhpraw gaw hpa n law ai sha n ga dai kaw na naw mahkawng ra na gumhpraw gaw grai nan n law la nga ai hpe myit dum lu ai hku re. Dai hku sawn la let mahkawng na malai gaw jai kau ai she grau kaja na re ngu myit let jai kau kau di ai mung grai law lai wa sai hku re. Ya ten bai myit dat yu yang dai shaloi kaw na wa ngai gumhpraw mahkawng wa ai rai yang gaw ya ten kade sai rai sana ngu myit lu ai hku re.

Bai, Yanggung kaw nga ai shaloi San Chawng Jinghpaw nawku jawng hta bat shagu nbung katsi "Air-Conditional" jak kaba a matu alu hta ai hpe mung myit dum let sawn yu hkrup ai hku re. Ndai n bung katsi jak kaba gaw grai nan manu laja la ai hte bat shagu hta la lu ai a lu ni gaw grai nan n law la nga ai hpe mung mu lu ai. Rai tim hpang jahtum e gaw dai n bung katsi jak hpe lu mari la ai hpe bai mu jang grai nan myit sawn sumru yu wa ai hku re.

Ndai lam ni hpe ngai a ten jahtum nna ndai post hta nka tim nang ngai yawng chye da chyalu sha rai nga ai. Makasha hpe sa san yang pyi chye sawn dan nga ai. Rai tim masha ngu ai amyu baw hpan ni a a kyang gaw chye nga ning len nkam galaw ai ladat rawng nga ai gaw kadai mung n mai ning dang ai a kyang rai nga ai. Ngai hpa majaw ndai zawn chye da nga ning len Nu a ga hpe n madat lai wa ai kun? ngu bai myit ai shaloi dai mahtai hpe lu la ai hku re.

Lama wa ngai ya ten hta Jinghpaw buga de wa nna Mungdan a matu shara mi gaw bung li galaw yang grai nrai dum nga ai hku re. Hpa majaw nga yang nye a a tsam hte bung li hpyi yang ngai hpe hpyen la galaw u, shing nrai jawng shara galaw u nga wa ai majaw grai n rai dum let ya na zawn Maigan ga e laika hpaji sharin nga ai hku re. Myu a matu bung li galaw dat ai hte kalang ta ntsa ka na galaw myu ai nye a myit a majaw rai nga ai.

Ya "Bee Movie" sumla hkrung kata na "Every small work, if you done well, means alot." nga ai ga hpe bai na dat yang ngai wa jawng shara galaw ai shing nrai hpyen la galaw taw ai rai yang ya ten myu hte mungdan a matu bung li kade daram pyi ngut sana a dawng ngu myit lu wa ai hku re. Shawng de nye a myit kata hta ngai maigan du jang laika hpaji sharin na, bungli galaw na, bai gumhpraw ni hpe mahkawng let myu hte mungdan a matu bung li kaba ni hpe galaw na ngu myit sawn da ai hku re. Rai tim ya ngai laika hpaji chye tim, tsang 10 hpe pyi rai ngut shi ai nye a manang shanglawt hpyen la langai mi daram pyi myu a matu a kyu n rawng nga ai hpe dum wa ai majaw gaya nga ai hku re.

Aww... Ngai, myu a matu kade daram a kyu galaw ngut sai hpe laika pa kaw ka yang man mi pyi ndu na re ngu myit let yawn nga ai hku re.

Nye a myu tsaw myit

2008-12-19T20:25:00.007+08:00

Ndai laman Christmas du wa tim jawng mung n pat ya ai nga ai majaw dai ning na Christmas gaw mau mau rai sa na hku bin wa nga ai ga re. Hpa majaw nga yang Dec 24th ya shani she jat jat nga nna Assignment ap ra ai da bai nga, shara mung shageng chyu shageng nga ai. Maigan Mungdan kaba e gaw n rai tim Singapore nga yang gaw Maigan rai sai ga rai nga ai.

Maigan ga de jawng lung nna buga na manang ni gaw manawn she manawn, shan hte shadu ai hku gaw bai n rai nga ai majaw tsun dan na pyi gaya gaya she nga ai.

Ngai gaw gara ga mi nga tim ti nang a htung hking hte myu hpe n shamat na re ngu gade mi myit hta bang da tim Maigan masha ni a ga san "What is your Nationality?" nga ai hte n gup kaw na kalang ta n myit ai sha "Burmese" ngu she tsun kau kau de hkrup ai hku re. Ndai zawn re n myit mada ai sha ti nang a Jinghpaw ngu ai "Kachin" nga ai hpe tsun na malap kau kau di ai majaw myit dat shagu loi li hkam sha ai lam nga ai hku re. Manang ni mung dai zawn kalang lang mi bin ma ai kun ngu mung myit ai hku re.

Mahtang gaw "Kachin" ngu tsun dat ai hte kadai mung n chye ai ngu na daram rai nga ai majaw bai sang lang dan ra mat mat re ai majaw kadun ai hku "Burmese" ngu sha tsun kau kau di ai hku re. Ndai gaw myit hta ti nang a Jinghpaw ngu ai amyu hpe n tsaw ra ai majaw gaw n rai nga ai. Rai tim amyu hpe tsaw ra ai myit n sung ai a majaw rai na re ngu shadu la ai hku re. Ngai gaw "Kachin" ngu nna shawng de law law mi shachyen ga sai hku re. Rai tim Maigan du ai na wa magang ndai zawn rai galai shai wa ai gaw ti nang hkum pyi n dum dat ai hku re.

Ngai lama wa Maigan ga e prat tup nga mat ga nga yang n law htum 5 ning nga ai hte ngai gaw Jinghpaw Mung na Jinghpaw ni hte grai shai mat ai hte myu tsaw myit ni grit yawm wa na re ngu ti nang hku m ti nang shadu la nga ai. Dai re ai majaw ya ten nye a myit hta rawng ai gaw ngai hpaji sharin ngut ai hte lawan ai hku Jinghpaw Buga de wa nna myutsaw myit naw sharawt la ra ai ngu hkam la let nau n na jang wa lu na ten hpe la nga ai hku re.

Wunpawng Shingni CopyRight Shingran

2008-12-15T09:52:00.003+08:00

An-hte Jinghpaw Wunpawng sha ni hta Music maga de grai n gun rawng ai hpe mu lu ai hku re. Yu ngwi ning hkring ni mung grai she pyaw hkra chye mahkawn nga ma ai ngu myit yu nna Music hta gaw Mungkan a madang hpe dep lu wa nga ai ngu yu madat n gun lu, a rawng la nga ai hku re. Laning mi VCD n law htum 10 gaw lu shapraw nga ai hpe mu lu ai.

Ndai zawn shing ni hpaji shaman chye ju lu da ai an-hte a myu ni gaw ti nang a a tsam hpe madun na matu tip lahkaw htuk ai shaloi a yak a hkak grai law hkra hpe tawt lai let yu ngwi ning hkring bin lu na matu shakut nga ai hpe mu lu ai hku re. N kau mi gaw dum nta kaw na dang di dang dep ai majaw loi loi sha tip lahkaw ni hpe lu rim shapraw lu ai rai tim law malawng gaw hkoi shap nna sha galaw la ai hpe mung chye lu ai.

An-hte Maigan du Jinghpaw Wunpawng sha ni gaw ti nang a dum nta, amyu sha ni hpe marit ai majaw n dai yu ngwi ni hpe madat hkam sha let marit shaprai lu ai hpe mung chye lu ai. Yawng loi li ai hku madat lu na matu Internet hkan e online mara da ya ai zawn re ai, yawng a matu ngu myit let a ten jaw nna upload galaw da ya ai myit su ni mung nga ga ai. An-hte madat hkam sha lu ai ni mung grai myit simsa ngun bai a wan la lu ai majaw mung grai chyeju dum ai hku re.

Ndai zawn mahkawn ni hpe online hta mara ya ai shaloi n kau mi gaw a hkaw a hkang lu ai hte mara ya ai ni nga ai zawn n kau mi gaw gan san na malap ai zawn, n kau mi gaw gan san na matu shara grai tsan gang ai zawn re ai, matut mahkai lam yak hkak ai zawn re ai majaw n san ai sha yawng madat na matu mara da ai zawn re ai ni hpe mu lu ai hku re.

Yawng madat na matu n dai zawn galaw ai hpe gaw grai chye ju dum ga ai rai tim n kau yu ngwi shayi shadang ni gaw shawng de tsun lai wa ai the maren yak yak hkak hkak hte sa shapraw da ai mahkawn ni hpe manu n shadan ya ai zawn re ai ni mung bin tai wa ai hku re. Masha maigan mungdan ni hta lang nga ai Copyright tara hpe an-hte Jinghpaw Wunpawng sha ni mung lang yang gaw an-hte a manu dan la ai shing ni hpaji hpe manu shadan let Mungkan hta madan dep na matu woi pawn ba ai hku mi rai wa na kun ngu...

SKCF Carol Singing

2008-12-15T01:58:00.002+08:00

Mana gaw jahpaw maga de du hkra lamu kasa sa hkawm (Carol Singing) nna gaw dai hpawt gaw myi she mam mam nga nna yup n hkru ai zawn zawn gaw nga rai taw nga ai hku re. An-hte Singapore Jinghpaw Hkalup hpung Kanawn Mazawm Hpawng (SKCF) ni hku nna Jinghpaw hte seng seng ai dum nta ni yawng hkra de du hkra maw daw kaba (Bus) she shap rai, grai shachyen lai wa sai hku re. Ndai shata 12 ya hte mana 13 ya, lahkawng ya ting ting sha krip lai wa sai.

Sara ni mung lawm, mahkawn shabrang ni yawng hkrum rai marai 50 jan ting, wu wu di di rai nna me Yesu shngai wa ai kabu hpa shi ga hpe tsun shadum lai wa saga ai. Gade n ta mi du yang du, sha hpa gaw a hkru re ai majaw lana mi sha lamu kasa sa ai wa tsawm ra mi hpum jat wa a zawn zawn nga ai le taw. Shawng e gaw loi li gaya ai zawn zawn nga ai majaw nau n sha ai ga re. Rai tim n ta 3, 4 dang lai wa ai hte gaw n gun shadat nna, daw ya ai ni shaman chye ju law law lu na matu shakut sha ya lai wa sai ga.

Hpang jahtum na n ta kaw gaw U hpa daw ya ai majaw hkru hkru nga let sha, ban 4 bai a wut bang lang rai nna jahpaw hkying 4am hta n ta de wa sai hku re. Grai pyaw ai hku 2008 ning na lamu kasa hkawm a hpawng hpe Singapore hta e ngai wa mau mau rai sha chyu sha nna sha ngut la sai rai....

Nye N-Ta Kata Hta

2008-12-12T19:30:00.002+08:00

Ti nang jing hku ni Mai gan mungdan kaba de nga ai majaw sa mayu ai hpe gaw mara ngu n mu ai. Bai shing nrai mung masa lam a majaw sa ra mat ai ni hpe mung hpa n ngu ai. Hpa mung nre ai sha masha ni sa ai majaw sa mayu ai nga nna dum nta dut, pawng hkra hkra rai sa wa nna gaw du myu ai de mung nlu du, lapran kaw chyat nga ai ni hpe yu mau matsan dum nga ai hku re.

Bai bungli n bin mat ai majaw nta de bai wa ga nga yang gaw nta mung dut sha kau da sai ra. Bai gum hpraw mung ma mat, sa wa mahka shakawng shakat rai sa mat wa ai majaw gaya ai lam ni mung loi li nga re ai majaw "Chye ndai kaw sha nga sha mat sana re law." nga nna ding hku shang mat ai ni hpe mung grai mu yu sai.

Grai jam jau nga ai myu sha ni re nga nna United Nation de gaw tsun da bai galaw dat yang gaw Model show da, Stage show da law nga ai hkrai she mu ai. Pyaw mayu yang mung ti nang du mayu ai Mungdan kaba ni de du mat wa ai shaloi she pyaw mu ngu tsun mayu ai law. Hpa majaw nga yang matsan mayan re ai ni hpe sha hkap la nga ai Mungdan kaba ni gaw dai zawn pyaw chye pyaw nga ai ni hpe gaw n shaga mat na re ngu kam ai ga law.

Ndai ni gaw Mungdan kaba de sa na nga nna lapran kaw chya dau nga ai ni a mang hkang re. Bai Jinghpaw mung de naw nga ai ni a lam hpe bai myit yu ga. Hpa ji mung ngut hkra n kam sharin, tsun yang gaw "Myen Mung na hpa ji madang grai nyem ai majaw n kam shakut shalai kau ai" nga ai hkrai hkra bai ra taw. Grai bin ai kun ngu yang gaw Tsang 10 hpe n lu htai awng hkraw ai ni hkrai bai rai taw.

Manang ni gaw hpaji mung chye re ai majaw masha Mungdan Kaba ni ra sharawng ai majaw shaga la ai hpe bai wa yu gaya rai nna Malay shing n rai Thai de sha rai tim sa wa shana re nga nna gamawng she gamawng hkawm mat wa re nga ma ai. Dai hku rai Mungdan a matu mung a kyu n rawng, ti nang na ti nang hkrai mung kan n lu bau la rai shoi chyum nga ai ni hpe she grau bai yu n lu wa sai oi.

Yawng hpe n ngu ai, ya nye a jing hku kasha ni marai 6-7 daram wa nye nta hta sha la yup la rai chyu nga ai ni wa, yup su yup mang wa mi Malaysia sa wa sana nga nna gumhpraw hpyi lajang wa ai le taw. Ngai gaw mau mat ai le, hpa baw sa galaw sha nna she sa nga na nga ma ai kun. Tsang 10 hpe 4th year du hkra htai tim n awng ai ni wa. English ga the seng nna gaw "Good Morning" hte "Hello" nga ai sha chye shaga ai ni wa ding nga wa ai le taw.

Ah ga! Ndai zawn re ai ni a matu bai rai yang gaw ganing re ai tsaw ra myit rau rai tim n chye na ya lu ai le ngai wa. An-hte a Mungdan hpe gaw kadai she shanglawt lu shalawt nna kadai wa mi she Padang manau wa nau sana ta. Ngai myit yu nna ba nga nngai law Karai e.